ၸုမ်းၽွမ်ႉႁူမ်ႈ လုၵ်ႈႁဵၼ်းတႆး

ၸုမ်းၽွမ်ႉႁူမ်ႈ လုၵ်ႈႁဵၼ်းတႆး (ဢိင်းၵလဵတ်ႈ: Tai Students' Union, မၢၼ်ႈ: သျှမ်းကျောင်းသားများသမဂ္ဂ) ၼႆႉ ဢိင်ၼိူဝ်ယိူင်းဢၢၼ်း တႃႇႁႂ်ႈလုၵ်ႈႁဵၼ်းၵူၼ်းၼုမ်ႇတႆး ၵူႊတီႈၵူႊလႅၼ်ႊ ၽွမ်ႉသဵင်ပဵင်းပၢၵ်ႇၵၼ်၊ ႁႂ်ႈမီးၼမ်ႉၸႂ်ႁၵ်ႉၸိူဝ်ႉၸၢတ်ႈသေ ၸွႆႈထႅမ်ၸၢဝ်းၶိူဝ်းတႆးၶိုၼ်းၼႆၼၼ်ႉ လႆႈၶွတ်ႇၽွတ်ႈမႃးမိူဝ်ႈဝၼ်းထီႉ 27၊ လိူၼ်ဢွၵ်ႇထူဝ်ႇပႃႇ၊ ပီႊၶရိတ်ႉ 2020 (ပီႊတႆး ႒႑႑႔ ၼီႈ၊ လိူၼ်သိပ်းဢဵတ်းမႂ်ႇ ႑႑ ၶမ်ႈ၊ ဝၼ်းဢင်းၵၢၼ်း) ၼၼ်ႉယူႇယဝ်ႉ။

ၸုမ်းၽွမ်ႉႁူမ်ႈ လုၵ်ႈႁဵၼ်းတႆး
Tai Students' Union
တႄႇတင်ႈ ဢွၵ်ႇထူဝ်ႇပႃႇ 27၊ 2020

ယိူင်းဢၢၼ်းဢၼ်လႆႈၵေႃႇတင်းၸုမ်း မႄးထတ်း

ၵၢၼ်ယူႇသၢင်ႈၵိၼ်သဝ်း ၵူၼ်းၸၢဝ်းၶိူဝ်းတႆး ဢၼ်ၽႄႈၸွတ်ႇယူႇဝႆႉၼႂ်း မိူင်းႁူမ်ႈတုမ်ႁဝ်းၶႃႈၼႆႉ တူၵ်းတႅမ်ႇၼမ်လိူဝ်ဝႆႉသေဢမ်ႇၵႃး ၽႆၢႇပၢႆးမိူင်းဢမ်ႇဝႃႈ ၽႆၢႇၸိူဝ်ႉၸၢတ်ႈလႄႈ ၽႆၢႇၽိင်ႈငႄႈလိၵ်ႈလၢႆးၵေႃႈ လႆႈႁၼ်မီးလွင်ႈထုၵ်ႇၶီႇၼဵၵ်းတဵၵ်းတဵင်ဝႆႉတၢင်းၼမ်။

လႆႈၶၢမ်ႇၽူႈတႅမ်ႈပိုၼ်းမၢင်ၸိူဝ်း ယိပ်းၵမ်ဝႃႇတ ၵူၼ်းၶိူဝ်းယႂ်ႇၶဝ်သေ တင်ႈၸႂ်ဢဝ်ၶေႃႈမုၼ်း ဢၼ်ဢမ်ႇမီးလၵ်းထၢၼ် ၶတ်းၸႂ်ဢူမ်ဢိုၼ်ၵႂၢမ်းလၢတ်ႈလႄႈ ၽိင်ႈငႄႈလိၵ်ႈလၢႆးတႆးႁဝ်းဝႆႉယူႇ။ ႁဝ်းၶႃႈယုမ်ႇယမ်ဝႃႈ ပုၼ်ႈတႃႇတေၵႅတ်ႇၶႄႁေႉၵင်ႈ လွင်ႈတေထုၵ်ႇဢူမ်ဢိုၼ် ၾိင်ႈပဵၼ်တႆးႁဝ်းၼၼ်ႉ ပဵၼ်ပုၼ်ႈၽွၼ်းၵူၼ်းၼုမ်ႇ ဢၼ်ပဵၼ်ၼေႃႇတႅၼ်းၶိူဝ်းတႆးႁဝ်းၼၼ်ႉယဝ်ႉ ။

ႁဝ်းၶႃႈယုမ်ႇယမ်ဝႃႈ မိူၼ်ၼင်ႇၵၢၼ်ယူႇသၢင်ႈၵိၼ်သဝ်း ၸၢဝ်းၶိူဝ်းတႆးႁဝ်းလႆႈတူၵ်းတႅမ်ႇ၊ ၽိင်ႈငႄႈလိၵ်ႈလၢႆးတႆးလႆႈထုၵ်ႇဢူမ်ဢိုၼ် ၸိူဝ်းၼႆႉ ပဵၼ်ယွၼ်ႉတႆးႁဝ်း ဢမ်ႇမီးသုၼ်ႇလႆႈတႅပ်းတတ်းၸတ်းပွင်ႁၢင်းၶေႃ (ဢမ်ႇမီးပိူင်ဢုပ်ႉပိူင်ႇၽႅတ်ႇတရႄႇၸိုဝ်ႈၸႂ်ႈ) လႄႈ ယွၼ်ႉၸၼ်ႉပၢႆးပၺ်ႇၺႃႇတၢင်းႁူႉလႆႈတူၵ်းတႅမ်ႇသုတ်းၼၼ်ႉၶႃႈယဝ်ႉ။

ယွၼ်ႉၼၼ် ယိူင်းဢၢၼ်းထိုင် ႁႂ်ႈလုၵ်ႈႁဵၼ်းၵူၼ်းၼုမ်ႇတႆးၵူႊတီႈၵူႊလႅၼ်ႊ ၽွမ်ႉသဵင်ပဵင်းပၢၵ်ႇၵၼ်သေ ႁႂ်ႈမီးၼမ်ႉၸႂ်ႁၵ်ႉၸိူဝ်ႉၸၢတ်ႈလႄႈ ၸွႆႈထႅမ်ၸၢဝ်းၶိူဝ်းတႆးၶိုၼ်းၼႆၼၼ်ႉ ႁဝ်းၶႃႈလုၵ်ႈႁဵၼ်းၵူၼ်းၼုမ်ႇတႆးပတ်းပိုၼ်ႉ မႃးၽွမ်ႉႁူမ်ႈၵၼ်သေ တေဢွၼ်ၵၼ်တႄႇတင်ႈပဵၼ် "ၸုမ်းၽွမ်ႉႁူမ်ႈ လုၵ်ႈႁဵၼ်းတႆး" ၼႆၶႃႈယဝ်ႉ။

ပိူင်ဝႃႇတ မႄးထတ်း

(႑) တႃႇလႆႈလွင်ႈၽွမ်ႉႁူမ်ႈလုၵ်ႈႁဵၼ်းတႆး

(႒) တႃႇပွင်သၢင်ႈလႆႈ သုၼ်ႇတႅပ်းတတ်းႁၢင်းၶေႃ

(႓) တႃႇလႆႈ ပၢႆးပၺ်ႇၺႃႇၾႅတ်ႇတရႄႇ

(႔) တႃႇၵုမ်ႉၸွႆႈ ၸိူဝ်းထုၵ်ႇတဵၵ်းတဵင်ၼင်ႇၵၼ်

(႕) တႃႇၵွင်ႉသၢၼ် ႁူမ်ႈႁွမ်းၸွမ်းၵၼ်တင်း ၸုမ်းတႆးၼႂ်းလုမ်ႈၾႃႉ

တႃႈမုင်ႈႁၼ် (Visions) မႄးထတ်း

ၵၢၼ်ပၢႆးပၺ်ႇၺႃႇ မႄးထတ်း

(႑) တႃႇႁႂ်ႈလူင်ပွင်ၸိုင်ႈၵမ်ႉၵူ (ၵမ်ႉၸွၺ်ႈ) ၼႂ်းၵၢၼ်ပၢႆးပၺ်ႇၺႃႇႁႂ်ႈၽဵင်ႇပဵင်း

(႒) တႃႇလႆႈပၢႆးပၺ်ႇၺႃႇ ၾႅတ်ႇတရႄႇတီႇမူဝ်ႇၶရေႇၸီႇ ဢၼ်ပႃးၵူႊၸၢဝ်းၶိူဝ်း

(႓) တႃႇဢွၼ်ႇႁဵၼ်းတႆးၵူႊၵေႃႉ လႆႈသုၼ်ႇၽိုၵ်းသွၼ်ၸွမ်း ပၢႆးပၺ်ႇၺႃႇၶိုၵ်ႉၶႅမ်ႉ

(႔) တႃႇႁႂ်ႈမေႃဝႆႉၼၵ်း လၵ်းၸဵင်ပၢႆးပၺ်ႇၺႃႇလႄႈ ၶိုၼ်းၸႂ်ႉတိုဝ်းပၢႆးပၺ်ႇၺႃႇၼၼ်ႉသေ ႁႂ်ႈမေႃပွင်ၸွႆႈၽွၼ်းပၢင်ႈၸၢဝ်းၶိူဝ်း၊ ဢိူင်ႇ၊ တူင်ႇဝူင်းၸဝ်ႈၵဝ်ႇလႆႈတေႉတေႉဝႃႈဝႃႈ။

ၵၢၼ်မိူင်း မႄးထတ်း

(႑) တႃႇႁႂ်ႈပေႃႇဢွၵ်ႇမႃး မၢႆမီႈပၵ်းပိူင်လၵ်းမိူင်း ဢၼ်ၵူၼ်းမိူင်းၵူႊၸၢဝ်းၶိူဝ်းပတ်းပိုၼ်ႉ ႁၼ်လီၵမ်ႉထႅမ်ၼၼ်ႉ

(႒) တႃႇႁႂ်ႈပေႃႇဢွၵ်ႇမႃး ၵၢၼ်ဢုပ်ႉပိူင်ႇၽွင်းငမ်း ၽဵင်ႇပဵင်း တႃႇၵူၼ်းၸၢဝ်းၵိုၵ်းမိူင်းလူၺ်ႈ ပိူင်ဝႃႇတႃႉၾႅတ်ႇတရႄႇ

(႓) တႃႇႁႂ်ႈပေႃႇဢွၵ်ႇမႃး တပ်ႉသိုၵ်းဢၼ်ဢိင်လူၺ်ႈၾႅတ်ႇတရႄႇ

(႔) တႃႇႁႂ်ႈမီးသုၼ်ႇ ပူၵ်းပွင်ၵၢမ်ႇၵျမ်ႇမႃႇၸဝ်ႈၵဝ်ႇ ထၢင်ႇႁၢင်ႊလွတ်ႈလႅဝ်းလႄႈ ႁႂ်ႈပၢႆးဝူၼ်ႉၶူင်ႊသၢင်ႈလွတ်ႈလႅဝ်း သိုပ်ႇယိုၼ်းယၢဝ်း

(႕) တေသၢၼ်ၶတ်း လွင်ႈၶီႇၼဵၵ်းတဵၵ်းတဵင်ၼိူဝ်ၸၢဝ်းၶိူဝ်းတေႃႇသုတ်း

(႖) တေသၢၼ်ၶတ်း လွင်ႈၶူင်ႊႁဵတ်းပၢင်တိုၵ်း ဢမ်ႇတြႃးတေႃႇသုတ်း

ၵၢၼ်ၸိူဝ်ႉၸၢတ်ႈ မႄးထတ်း

(႑) တႃႇလူလွမ်ၽိင်ႈငႄႈၽိင်ႈထုင်း လိၵ်ႈလၢႆးၵႂၢမ်းလၢတ်ႈ လႄႈတႃႇယုၵ်ႉမုၼ်းၶိုၼ်ႈသုင်

(႒) တႃႇၵုမ်ႉၵူၸွႆႈထႅမ် ၸၢဝ်းၶိူဝ်းႁူမ်ႈလိၼ်ႁူမ်ႈၼမ်ႉ ၸိူဝ်းထုၵ်ႇၺႃးၶီႇၼဵၵ်းတဵၵ်းတဵင်ၼင်ႇၵၼ်

(႓) တႃႇတိုၵ်းတေႃးပႅတ်ႈ ယႃႈမဝ်းၵမ်ႊ

(႔) တႃႇယုၵ်ႉမုၼ်းၵၢၼ်ယူႇသၢင်ႈၵိၼ်သဝ်းၼႂ်းမိူင်းတႆး ႁႂ်ႈၶိုၼ်ႈယႂ်ႇလႄႈ ၽေႃႇဢွၵ်ႇလွင်ႈငမ်းယဵၼ်

(႕) တႃႇၵမ်ႉၵူပၼ်ႁႅင်း ၵၢၼ်မုၼ်းလႅင်း5ယိူင်ႈ

(႖) တႃႇၵွင်ႉသၢၼ်ၵပ်းသိုပ်ႇၸူး ၸုမ်းလုၵ်ႈႁဵၼ်းတႆး ၼႂ်းလုမ်ႈၾႃႉ

ၵၢၼ်ဝႆႉၵႃႊၶၼ် မႄးထတ်း

(႑) သုၼ်ႇလႆႈသုၼ်ႇပဵၼ်ၵူၼ်း

(႒) ၵၢၼ်ငမ်းယဵၼ်

(႓) လွင်ႈၽဵင်ႇပဵင်းၸၢႆးယိင်း

(႔) ပိုၼ်ႉႁူႉ

(႕) လွင်ႈတြႃးၽဵင်ႇပဵင်း

(႖) လွင်ႈလွတ်ႈလႅဝ်း

(႗) ၵၢၼ်တႆးမိူဝ်းၼႃႈပၢၼ် တေလႆႈမီးထိုင်ၼႂ်းမိုဝ်းၵူၼ်းၼုမ်ႇႁတ်းႁၢၼ်

(႘) ၵေႃပွင်ၵၢၼ် ၸုမ်းၽွမ်ႉႁူမ်ႈလုၵ်ႈႁဵၼ်းတႆး

ဢိင်ဢၢင်ႈ မႄးထတ်း