ၽေႃးၸႃႇၸႃႇၼီႇယ၊ ၸၢတ်ႈ

23 - ꩡၢတ်ႈၽေႃꩡႃꩡႃၼီယ

(ၽေႃၸႃꩡႃၼီယ = ၸိုဝ်ႈမႃႉသိၼ်းꩪေႃး) တေႃႇထိုင်ၸမ်တေတၢႆ ၊ ယႃႇပၼ်ႁၢႆဝီႇရိယ

ဝတ်ႉထုပၸ်ႉၸုပၼ်ႇ

ၽွင်းမိူဝ်ႈ မုၼ်ၶမ်းၽြႃး တိုၵ်ႉယူႇသဝ်း တမ်ႈတီႈ ဝတ်ႉၸေႇတဝၼ်ႇၼၼ်ႉ ဢိင်ပိုင်ႈလူၺ်ႈ ၸဝ်ႈရႁၢၼ်း ဢၼ်ဝီႇရိယၶျေႃႉၼၼ်ႉသေ ၸင်ႇတေႁေႃးၼႄ ၸၢတ်ႈၵွၼ်ႇဝၼ်းလင် ၸိူင်ႉၼင်ႇတီႈတႂ်ႈ ၼႆႉယဝ်ႉ-

ဝတ်ႉထုဢတိတ်ႉ

ပဵၼ်မိူဝ်ႈၽွင်း ၶုၼ်ႁေႃၶမ်းၿြႁ်မၻတ်ႈ တိုၵ်ႉပဵၼ် ၶုၼ် တီႈမိူင်းၿႃႇရႃႇၼသီႇ။ ၽွင်းၼၼ်ႉ ၼေႃႇၶမ်းၽြႃးသမ်ႉပဵၼ် မႃႉသိၼ်းꩪေႃး ဢၼ်ၸိုဝ်ႈဝႃႈၽေႃးၸႃႇၸႃႇၼီႇယသေ ပဵၼ်မႃႉမင်ႇၷလႃႇ ၶုၼ်ယဝ်ႉ။ ႁၢင်ႈၶိူင်ႈဝႆႉ တင်းမူတ်း။ ၼႂ်းၶၢဝ်းတၢင်းသၢမ်ပီၼႆႉ လႆႈၵိၼ်ၶဝ်ႈသလေး ဢၼ်သႂ်ႇၼမ်ႉ ႁွမ်ၼၢမ်ႇသႃႇၵူႈပိူင် တီႈၼႂ်းၵွၵ်းၶမ်း ဢၼ်ၵိုင်ႇၵႃႈၼိုင်ႈသႅၼ်ၼၼ်ႉယဝ်ႉ။ တီႈယူႇတီႈသဝ်း မႃႉမင်ႇၷလႃႇ တင်းသီႇပႃႈသီႇၽၢႆႇၼၼ်ႉၼႆၵေႃႈ ဢဝ်ၽႅၼ်ႇၵမ်ႉၿလႃႇ ႁႄႉၵင်ႈဝႆႉသေ တိုမ်းၼၼ်ႉၵေႃႈ ဢဝ် ၽႅၼ်ႇဢၼ်သႂ်ႇသွႆႈမႆငိုၼ်းမႆၶမ်း သႂ်ႇဝႆႉယဝ်ႉ။ ၽႆးၼမ်ႉမၼ်းၵေႃႈ တႆႈဝႆႉတႃႇသေႇ။ ၵွပ်ႈပိူဝ်ႈ မႃႉမင်ႇၷလႃႇၼၼ်ႉသေ ၶုၼ်လူင်ၵေႃႈ ၸိုဝ်ႈသဵင်လိုဝ်းလင်ဝႆႉယဝ်ႉ။ ၶုၼ်တၢင်ႇမိူင်းၶဝ် ဢၼ်လႆႈငိၼ်းၶၢဝ်ႇ ၼင်ႇၼႆၼႆႉ ဢွၼ်ၵၼ် ၶႂ်ႈပဵၼ် ၶုၼ်မိူင်းၿႃႇရၼသီႇယူႇ။

ပွၵ်ႈၼိုင်ႈ ၶုၼ်ၸဵတ်းမိူင်းၶဝ် ဢွၼ်ဢဝ်ၵူၼ်းသိုၵ်း မႃး တင်းၼမ် မႃးလွမ်ႉႁွပ်ႈဝႆႉ မိူင်းၿႃႇရၼသီႇသေ ပၼ်ၶေႃႈပူင်ၶုၼ်ဝႃႈ “တေဢၢပ်ႈပၼ်မိူင်းႁႃႉ၊ တေတိုၵ်းသိုၵ်းႁႃႉ”ၼႆယူႇ။ ၵမ်းၼၼ်ႉ ၸွမ်းၼင်ႇ လွင်ႈၶပ်းၶိုင် ၶုၼ်ၿႃႇရႃႇၼသီႇၼၼ်ႉ ၶုၼ်ႁၢၼ်မႃႉ ၸင်ႇၶီႇ မႃႉသိၼ်းꩪေႃး ၽေႃးၸႃႇၸႃႇၼီႇယ သေ ဢွၵ်ႇၵႂႃႇတိုၵ်း တပ်ႉၽူႈၶဵၼ်တပ်ႉၼိုင်ႈ တပ်ႉၽူႈၶဵၼ်လူႉလႅဝ်သေ ၺွပ်းတီႉလႆႈပႃး ၶုၼ်မိူင်းၼၼ်ႉ မႃးဢၢပ်ႈပၼ် သိုၵ်းၸဝ်ႈၵဝ်ႇယဝ်ႉ။ ႁဵတ်းၼႆ သိုပ်ႇၶဝ်ႈတိုၵ်း တပ်ႉၼိုင်ႈယဝ်ႉတပ်ႉၼိုင်ႈ တီႉၺွပ်းဢဝ် ၶုၼ်ၸဝ်ႈၼိုင်ႈယဝ်ႉ ၸဝ်ႈၼိုင်ႈ မႃးဢၢပ်ႈပၼ်လႄႈ ၽွင်းမိူဝ်ႈ ၺွပ်းတီႉလႆႈ ၶုၼ်ထီႉႁူၵ်းၼၼ်ႉ မႃႉ သိၼ်းꩪေႃး ၽေႃးၸႃႇၸႃႇၼီႇယ တိူဝ်ႉၺႃးပိုၼ်ၵၢင်ႇသေ မၢတ်ႇတိူဝ်ႉၸဵပ်းႁႅင်းၵႂႃႇတႄႉတႄႉ။

ၵွပ်ႈၼၼ် တႃႇၼေၵႂႃႇတီႉၺွပ်းဢဝ် ၶုၼ်ထီႉၸဵတ်းၼၼ်ႉ ၶုၼ်ႁၢၼ်မႃႉ ၸင်ႇၵႂႃႇႁၢင်ႈႁႅၼ်း မႃႉတၢင်ႇတူဝ်သေ သႂ်ႇပၼ်ၶိူင်ႈမႃႉယူႇၼင်ႇၼၼ် ပေႃးဝႃႈ မႃႉ ၽေႃးၸႃႇၸႃႇၼီႇယ လႆႈႁၼ်ၼႆ ၸင်ႇႁူႉဝႃႈ “မႃႉတူဝ်ၼၼ်ႉ တေဢမ်ႇတီႉၺွပ်းလႆႈ ၶုၼ်ထီႉၸဵတ်းၼၼ်ႉသေဢမ်ႇၵႃး ဢၼ်ဢွင်ႇပႄႉမႃးၸိူဝ်းၼႆႉ ယင်းၸၢင်ႈ တူၵ်းသုမ်းၵႂႃႇၵွၼ်ႇ၊ ၶုၼ်ႁၢၼ်မႃႉလႄႈ ၸဝ်ႈၶုၼ်ႁဝ်းၵေႃႈ တေႃႈတေတူၵ်းသုမ်းၵႂႃႇ ၼႂ်းမိုဝ်းပိူၼ်ႈၵွၼ်ႇယဝ်ႉ”ၼႆသေ မႃႉသိၼ်းꩪေႃး ၽေႃးၸႃႇၸႃႇၼီႇယ ၸင်ႇႁွင်ႉဢဝ် ၶုၼ်ႁၢၼ်မႃႉသေ လၢတ်ႈၵႂႃႇၸိူင်ႉၼင်ႇတီႈတႂ်ႈၼႆႉၼႆ မုၼ်ၶမ်းၽြႃးႁေႃးလၢတ်ႈၵႂႃႇယဝ်ႉ-

ပႃႇꩮိ

• 23 - ဢပိ ပသ်သေၼ သေမႃၼေႃ၊ သလ်လေꧤိ သလ်လလီၵတေႃ။

• သေယျေႃဝ ဝꩮဝႃ ꧤွꩡ်ꩡေႃ၊ ယုၺ်ꩡ မၺ်ၺေဝ သႃရထိ။

• ပိၼ်ႇတႆး

ၶုၼ်ႁၢၼ်မႃႉ... ပိၵ်ႉသမ်ႉဝႃႈ ၺႃးပိုၼ်ၵၢင်ႇသေ လႆႈၼွၼ်းသီႈၵႅင်းဝႆႉယူႇသေတႃႉ မႃႉသိၼ်းꩪေႃး ၽေႃးၸႃႇၸႃႇၼီႇယၼၼ်ႉ မၼ်းမႅတ်ႈတွၼ်းလိူဝ်သေ မႃႉယုတ်ႈ၊ မႃႉၶုၺ်ႈၸိူဝ်းၼၼ်ႉယူႇ (ၵွပ်ႈၼႆ) ၶိူင်ႈၶူဝ်းမႃႉၸိူဝ်းၼၼ်ႉ ဢဝ်မႃးသႂ်ႇပၼ်ၵဝ်တႃႉ။

ၶုၼ်ႁၢၼ်မႃႉၵေႃႈ ၸင်ႇမႃးပူၵ်ႉပၼ် ႁွႆးၸဵပ်း မႃႉသိၼ်းꩪေႃးသေ ဢဝ်ၶိူင်ႈမႃႉ သႂ်ႇပၼ်မႃႉယဝ်ႉ။ ဝၢႆးၼၼ်ႉ ၸင်ႇၶီႇမႃႉမင်ႇၷလႃႇၼၼ်ႉသေ ၵႂႃႇတိုၵ်းယႃႉလႅဝ်ပႅတ်ႈ တပ်ႉၽူႈၶဵၼ်သေ ၺွပ်းတီႉဢဝ်မႃး ၶုၼ်ထီႉၸဵတ်းယူႇယဝ်ႉ။ ပေႃးဝႃႈ ၶိုၼ်းၽႅဝ်ထိုင်မႃး တီႈႁေႃၼႆ မႃႉသိၼ်းꩪေႃး ၽေႃးၸႃႇၸႃႇၼီႇယ ၸင်ႇဝႃႈ “ၸဝ်ႈၶုၼ်လူင်... ယႃႇပေဢဝ်တၢႆ ၶုၼ်ၸဵတ်းမိူင်းၶဝ်၊ ႁႂ်ႈၶဝ်ဝႆႉၵတိသၸ်ႉၸႃႇသေ ၶိုၼ်းပွႆႇ ၶဝ်မိူဝ်းတႃႉ။ သူးလၢပ်ႈတႃႇတေပၼ် ၵဝ်လႄႈ ၶုၼ်ႁၢၼ်မႃႉၼၼ်ႉ ဢဝ်ပၼ်ၶုၼ်ႁၢၼ်မႃႉ တင်းမူတ်းတႃႉ။ ၸဝ်ႈၶုၼ်လူင်ႁဝ်းၵေႃႈ ႁဵတ်းၵၢၼ်တၢင်းလူႇတႃႉ၊ ႁပ်ႉသိၼ်သီႇလတႃႉ၊ ႁဵတ်းၶုၼ် ၸွမ်းတြႃးတႃႉ”ၼႆသေ ၽွင်းမိူဝ်ႈ တိုၵ်ႉမႃးပူတ်းၶိူင်ႈမႃႉယူႇၼၼ်ႉ မႃႉမင်ႇၷလႃႇ တၢႆၵႂႃႇပႅတ်ႈယဝ်ႉ။ ၶုၼ်ၿြႁ်မၻတ်ႈၵေႃႈ ႁဵတ်းၸွမ်းၼင်ႇ မႃမႃႉသိၼ်းꩪေႃး ၽေႃးၸႃႇၸႃႇၼီႇယ သင်ႇလၢတ်ႈဝႆႉၼၼ်ႉယဝ်ႉ။

• ႁူမ်ႈꩡၢတ်ႈ ။ ။ မႃႉသိၼ်းꩪေႃး ၽေႃးၸႃႇၸႃႇၼီႇယ မႃးပဵၼ် ၽြႃး။

• ၶုၼ်ႁၢၼ်မႃႉၼၼ်ႉ မႃးပဵၼ် ၸဝ်ႈသႃႇရိပုတ်ႉတ။

• ၶုၼ်လူင်ၿႃႇရႃႇၼသီႇ မႃးပဵၼ် ၸဝ်ႈဢႃႇၼၼ်ႇၻႃႇ။

• ၵၼ်သွၼ် ။ ။ (1)တေႃႇထိုင်ၸမ်တေတၢႆ ၊ ယႃႇပၼ်ႁၢႆဝီႇရိယ။

• ပႃႇရမီႇ ။ ။ ဝီႇရိယပႃႇရမီႇ။

• မင်ႇၷလႃႇ ။ ။ ပဵၼ်“ၵတၺ်ၺုတႃ မင်ၵလႃ”။