လွင်ႈယဵၼ်ႇငႄႈ တီႈႁိူၼ်း

လွင်ႈယဵၼ်ႇငႄႈ တီးႁိူၼ်း ဢၼ်ဝႃႈၼႆႉ မၼ်းပဵၼ် လွင်ႈယဵၼ်ႇငႄႈ ဢၼ်ပႃးၼႂ်း လွင်ႈယဵၼ်ႇငႄႈ သႅၼ်သမ်ႇ ဢၼ်ၼိုင်ႈယဝ်ႉ။ လွင်ႈယဵၼ်ႇငႄႈ တီႈႁိူၼ်းၼႆႉ ပေႃးတူၺ်းၽတ်ႉၽဵင်ႇၵၼ်ၼႆ တေမီးယူႇ ႓႒ မဵဝ်းယဝ်ႉ။ ႓႒ မဵဝ်းၼၼ်ႉတႄႉ ပဵၼ် -

1. ထုၵ်ႇလီယူႇသဝ်းတီႈဢၼ်တေ သၢင်ႇထုၵ်ႇတွၼ်ႈတႃႇၸဝ်ႈၵဝ်ႇ။
2. ပေႃးၵူၼ်းလူင် ဢမ်ႇႁွင်ႉ ဢမ်ႇထုၵ်ႇလီၵႂႃႇၸူး တီႈၶႅၵ်ႇ။
3. ထုၵ်ႇလီမီး ၼႃႈၵီႈတႃဝၢၼ်။
4. တေဢမ်ႇလႆႈလၢတ်ႈၵႂၢမ်း သဵင်ယႂ်ႇသဵင်လူင်။ တေဢမ်ႇလႆႈ ဢူၼ်ဢၢၼ်မေႃးမႄး။
5. ၵူၼ်းၼုမ်ႇ၊ လုၵ်ႈဢွၼ်ႇၼင်ႇၵၼ် ထုၵ်ႇလီ ထွမ်ႇသူပ်းဢဝ်ၵႂၢမ်းၵၼ်။
6. ထုၵ်ႇလီၸွႆႈထႅမ် ၼႃႈၵၢၼ်ၵူၼ်းလူင် ၼင်ႇၵႃႈ ပဵၼ်လႆႈ။
7. ထုၵ်ႇလီႁဵတ်း လွင်ႈမူတ်းသႂ် တီႈၼွၼ်း။ ထုၵ်ႇလီၵႆႉဢဝ်တၢၵ်ႇလႅတ်ႇ။ ပေႃးလုၵ်ႉမႃး ထုၵ်ႇလီပိၼ်ႈသုတ်း (ဢမ်ႇၼၼ်) တူပ်ႉသေ ၸိူဝ်းပဵၼ် ၽႃႈမႆ၊ မွၼ်ႁူဝ်ၸိူဝ်းၼႆႉ ထုၵ်ႇလီ ၶပ်ႉတမ်းဝႆႉလီလီ။
8. မိူဝ်ႈပႆႇဢွၵ်ႇၵႂႃႇတီႈ ဢွင်ႈတီႈၼွၼ်းၼၼ်ႉ ထုၵ်ႇလီယဵမ်ႈတူၺ်းဝႃႈ ၸွင်ႇမၼ်းတႅတ်ႈၼႅတ်ႈလီ ဢမ်ႇတႅတ်ႈၼႅတ်ႈလီ။
9. သင်ၸဝ်ႈၵဝ်ႇတိုၼ်ႈ မိူဝ်ႈပိူၼ်ႈပႆႇတိုၼ်ၼႆ ထုၵ်ႇလီၽၢင်ႉလီလီ။ ထုၵ်ႇလီၽၢင်ႉတူဝ် ယႃႇႁႂ်ႈ ၵူၼ်းၸိူဝ်းတိုၵ်ႉၼွၼ်း ပေႃးလႆႈတိုၼ်ႇယွၼ်ႉၸဝ်ႈၵဝ်ႇ။
10. မွၼ်ႁူဝ် ယႃႇပေပေႃးမွၼ်သုင်၊ ပေႃးမွၼ်သုင်ၼႃႇ ​မေႃၸၢင်ႈပဵၼ် လွင်ႈထူၺ်ႈၸႂ် ဢမ်ႇၽဵင်ႇၵၼ်။
11. သင်ၸိူဝ်ႉဝႃႈ ၽူႈယႂ်ႇၵူၼ်းလူင် ယိုၼ်ႈပၼ်မႅင်ႇသေဢၼ်ဢၼ်ၼႆ ထုၵ်ႇလီဢဝ် မိုဝ်းသွင်ၶွၼ်သေ တုင်းႁပ်ႉဢဝ်။ ပေႃးဝႃႈ ၸဝ်ႈၵဝ်ႇ ၵေႃႉပၼ်ၵေႃႈ ထုၵ်ႇလီဢဝ် မိုဝ်းသွင်ၶွၼ်သေ ပၼ်။
12. ၼႃႈဝၢင်းလႄႈသင်၊ ဢွင်ႇလုၵ်းလႄႈသင် သင်ၸိူဝ်ႉဝႃႈ မီးၽၵ်းတူၼႆ ပေႃးၶဝ်ႈဢွၵ်ႇမိူဝ်ႈလႂ်ၵေႃႈ ထုၵ်ႇလီၶိုၼ်းႁပ်း/ဢိုတ်းဝႆႉ။ မိူဝ်ႈႁပ်း/ဢိုတ်းၼၼ်ႉၵေႃႈ ထုၵ်ႇလီႁပ်း/ဢိုတ်းလွႆးလွႆး ယႃႇႁႂ်ႈမၼ်းဢွၵ်ႇသဵင်လင်။
13. ၽွင်းမိူဝ်ႈတေၶဝ်ႁိူၼ်း၊ သင်ၸိူဝ်ႉဝႃႈ တီႈၶႅပ်းတိၼ်ႁဝ်း ၼၼ်ႉ ၽုၼ်ႇမုၵ်ႉ၊ လွင်ႈမၢၵ်ႇဢိူၵ်ႇ သေဢၼ်ဢၼ်ၸပ်းပႃးဝႆႉ ထုၵ်ႇလီ ၸဵတ်ႉတီႈဢၼ်သၢင်ႇထုၵ်ႇသေ ၸင်ႇၶဝ်ႈ။ သင်ၸိူဝ်ႉဝႃႈ တေလႆႈထွတ်ႇၶႅပ်းတိၼ်ႈၵေႃႈ ထွတ်ႇပၼ် တီႈဢၼ်သၢင်ႇထုၵ်ႇသေ ဝႆႉၵႂႃႇလႄႈ။
14. ပေႃးႁွတ်ႈႁိူၼ်းသေ သင်ၸိူဝ်ႉဝႃႈ ၶႅပ်းတိၼ်၊ မူင်တိၼ်ႁဝ်း ယမ်းဝႆႉၼႆ ထုၵ်ႇလီထွတ်ႇဝႆႉၵမ်းလဵဝ်။ ဢမ်ႇၼၼ် ထုၵ်ႇလီ လၢႆႈပႅတ်ႈ။
15. လွင်ႈၵိၼ်ယႅမ်ႉၵ​ေႃႈ ထုၵ်ႇလီၵိၼ်ႁႂ်ႈမႅၼ်ႈၸွမ်း ၶၢဝ်းယၢမ်းမၼ်း။ ထုၵ်ႇလီၵိၼ်လွႆးလွႆးသေ ထုၵ်ႇလီၵဵဝ်ႉဢွၼ်ႇဢွၼ်ႇယဝ်ႉ။
16. ဢမ်ႇထုၵ်ႇလီၵိၼ် ႁိပ်ႈႁိပ်ႈၼႅတ်ႈၼႅတ်ႈ။
17. ၵမ်းၶဝ်ႈတေဢမ်ႇလႆႈႁဵတ်း ၵမ်းယႂ်ႇ။ ၽွင်းတိုၵ်ႉၵဵဝ်ႉၵမ်းၶဝ်ႈ တေဢမ်ႇလႆႈလၢတ်ႈၵႂၢမ်း။
18. ပေႃးၵမ်းၶဝ်ႈ ဢမ်ႇပႆႇၸမ်ပၢၵ်ႇသူပ်း တေဢမ်ႇလႆႈ ဢႃႈသူပ်းဝႆႉ။ တေဢမ်ႇလႆႈၵိၼ် ႁႂ်ႈသဵင်ပေႃးဢွၵ်ႇၸၢပ်ႉၸၢပ်ႉ။
19. ပေႃးသူတ်ႉၼမ်ႉၽၵ်း ယႃႇပေႁႂ်ႈဢွၵ်ႇသဵင်လင်။
20. ပေႃး​ၵွၼ်ႉဢဝ်ၽၵ်း ဢဝ်မိုဝ်းၽၢႆသၢႆႉၵွၼ်ႉဢဝ်ၼႆႉ ပဵၼ် လွၵ်းလၢႆး ဢၼ်သၢင်ႇထုၵ်ႇလီယဝ်ႉ။
21. ၶဝ်ႈလႄႈၽၵ်းၵေႃႈ ဢမ်ႇထုၵ်ႇလီ ၵူဝ်ႈၵဝ်လေႃးၵၼ် ႁႂ်ႈၵူၼ်းတူၺ်းပေႃးဢမ်ႇၶႅမ်ႉ။
22. မိုဝ်းႁဝ်းၼၼ်ႉ ယႃႇပေႁႂ်ႈ ၼမ်ႉၽၵ်းၵူဝ်ႈၺႃး၊ ယႃႇပေႁႂ်ႈ မဵတ်ႉၶဝ်ႈၸပ်းဝႆႉ၊ ယႃႇပေဢဝ်မိုဝ်းၸူၵ်းၼႂ်းဝၢၼ်ႇၽၵ်း။
23. ပေႃးၵိၼ်ၶဝ်ႈယဝ်ႉ ယႃႇပေၸုပ်ႇၶဵဝ်ႈ၊ ပဵၼ်ဢၼ်လီ ဢီယင်ႈယဝ်ႉ။ သင်ၸိူဝ်ႉဝႃႈ လူဝ်ႇသေႇၶဵဝ်ႈၼႆၵေႃႈ ၵႂႃႇသေႇတီႈဢၼ်ၵူၼ်းဢမ်ႇႁၼ်ၼၼ်ႉလႄႈ။
24. ယႃႇပေဢဝ်မိုဝ်းတၢင်ႇၼိူဝ် ၽိုၼ်ၶဝ်ႈ။
25. ထုၵ်ႇလီၼင်ႈသိုဝ်ႈသိုဝ်ႈသေ ၵိၼ်။
26. သင်ၸိူဝ်ႉဝႃႈ ၶႂ်ႈလႆႈသေဢၼ်ဢၼ်ၼႆ ယွၼ်ႉဢဝ်တီႈ ၵေႃႉဢၼ်ၸမ်ႁဝ်းသေပိူၼ်ႈၼၼ်ႉလႄႈ။
27. ၽွင်းပိူၼ်ႈတိုၵ်ႉၵိၼ်ၶဝ်ႈယူႇၼၼ်ႉ ယႃႇပေထူမ်ႇၼမ်ႉလၢႆး၊ ယႃႇပေၶၢၵ်ႇၶီႈၶၢၵ်ႇ။
28. ယႃႇပေၶၢႆႉ ၸိူဝ်းဢၼ်မီးၼိူဝ် ၽိုၼ်ၶဝ်ႈၼၼ်ႉ ၵႂႃႇၵႂႃႇမႃးမႃး။ (ပဵၼ်လွင်ႈ ဢမ်ႇမီးလွင်ႈယဵၼ်ႇငႄႈယဝ်ႉ။)
29. ပေႃႈမႄႈ ၶႅၵ်ႇ ၽူႈယႂ်ႇၵူၼ်းလူင်ၶဝ် လူဝ်ႇသင်ၼႆ ထုၵ်ႇလီ ၽၢင်ႉသေ တူၺ်းယဵမ်ႈၸွမ်း။ သင်ၸိူဝ်ႉဝႃႈ ႁူႉၺႃး ႁၼ်ၺႃးၼႆၵေႃႈ ထုၵ်ႇလီႁဵတ်းပၼ် လွႆးလွႆး၊ ယႃႇပေႁႂ်ႈမေႃးမႄး။
30. ပေႃးၵိၼ် ၼမ်ႉၼဵင်ႇဝၢၼ်၊ ၵႃႇၽီႇၼႆႉ ဢၼ်ထွၵ်ႇသႂ်ႇၼႂ်း ဝၢၼ်ႇၶၢမ်ႇတႂ်ႈမၼ်းသေ ၵိၼ်ၼႆႉ မၢင်ၸိူဝ်းဝႃႈ ဢမ်ႇမီးလွင်ႈယဵၼ်ႇငႄႈ။ ဝၢၼ်ႇၽေဢၼ်ၶၢမ်ႇပၼ် ၽၢႆႇတႂ်ႈၵွၵ်းၼၼ်ႉ မၼ်းၵႅတ်ႇၶေပၼ် ယႃႇႁႂ်ႈမၼ်း​ႁေႈ၊ ယႃႇႁႂ်ႈမၼ်း ၵူဝ်ႈၵိူဝ်ႇၵူၺ်း။ ၼင်ႇႁိုဝ် မိုဝ်းႁဝ်းပေႃးတေဢမ်ႇလိူတ်ႇမႆႈၼၼ်ႉ မၼ်းၵေႃႈပဵၼ်ဢၼ် ၵႅတ်ႇၶေပၼ်ၼႆယဝ်ႉ။
31. မဵဝ်းၽႃႇသေၵိၼ်လႆႈၵေႃႈ ၽႃႇသေၵိၼ်ဢဝ်၊ ယႃႇပေၶူပ်းသေၵိၼ်။
32. ၽွင်းတိုၵ်ႉၵိၼ်ၶဝ်ႈယူႇၼၼ်ႉ ယႃႇပေႉႁႅင်ႉလၢတ်ႈၵႂၢမ်းၼမ်ၼႃႇၽႅဝ်၊ ထုၵ်ႇလီဝႆႉၼႃႈၵီႈတႃဝၢၼ်၊ ထုၵ်ႇလီလၢတ်ႈၵႂၢမ်း သဵင်လီသဵင်ဝၢၼ်။