ၻုတိယပတိၿ်ၿတႃဝိမႃၼဝတ်ထ၊ ၼၢင်းၽီ ႁေႃသဝ်ပတ်းလမ်

12-ၻုတိယပတိၿ်ၿတႃဝိမႃၼဝတ်ထ၊ ၼၢင်းၽီ ႁေႃသဝ်ပတ်းလမ်

• 101။ ၼၢင်းၽီ ဢူၽုင်းယႂ်ႇ... မႂ်းၼၢင်းၼႆႉ ဢဝ်ၽုင်းတၼ်းၶူဝ်း ၵူႈပိူင်ပိူင် ၽၢၼ်ႇပဵၼ်သဝ် ပတ်းလမ် ႁေႃဝိမၢၼ်ႇ ဢၼ်မီးဢူငဝ်းၵူႈသီသီ ႁၢင်ႈလီမၢပ်ႈမိပ်ႈသေ ယူႇသဝ်းၼႂ်းႁေႃဝိမၢၼ်ႇၼႆႉယဝ်ႉ။ ၼၢင်းၽီဢွၼ်ႇၸိူဝ်းၼႆႉၵေႃႈ ဢွၼ်ၵၼ်ယူႇသဝ်း ဢုမ်ႇလွမ်ႉမႂ်းၵူႈ ပႃႈၵူႈၽၢႆႇသေ ၵႃႈၵေႃႈဢွၼ်ၵၼ်ၵႃႈ ႁဵတ်းၵႂၢမ်းၵေႃႈ ဢွၼ်ၵၼ်ႁဵတ်းသေ ပၼ်ပဵၼ်တၢင်းသိူဝ်းၸႂ် ယူႇယဝ်ႉ။
• 102။ ၼၢင်းၽီ မႂ်းၼၢင်းၼႆႉ မီးဢူၽုင်းၽီ တဵမ်ထူၼ်ႈလီငၢမ်းတႄႉယဝ်ႉ။ မိူဝ်ႈပဵၼ်ၵူၼ်းၼၼ်ႉ မႂ်းၼၢင်းလႆႈႁဵတ်း ၵုသူဝ်ႇသင်မႃးၼေႃး။ ၵွပ်ႈပိူဝ်ႈ ၵုသူဝ်ႇဢၼ်လႂ်သေ မီးဢူၽုင်းႁိူဝ်ႈႁိူင်းၼင်ႇၼႆၼေႃး။ ၵွပ်ႈပိူဝ်ႈ ၵုသူဝ်ႇသင်သေ ငဝ်းတူဝ်မႂ်းၼၢင်း ႁိူဝ်ႈႁႅင်းလႅင်းၸွတ်ႇၵႂႃႇ ၵူႈပႃႈၵူႈၽၢႆႇၼေႃး။
• 103။ ၵွပ်ႈပိူဝ်ႈ ၸဝ်ႈမွၵ်ႉၵလၢၼ်ႇထၢမ်လွင်ႈတၢင်းမၼ်းလႄႈ ၼၢင်းၽီၵေႃႈ ႁူမ်ႁူမ်ၸူမ်းၸူမ်း ၸင်ႇၶိုၼ်းတွပ်ႇလၢတ်ႈၼႄ လွင်ႈတၢင်းမၼ်းၵႂႃႇ ၸွမ်းၼင်ႇၶေႃႈထၢမ်ၼၼ်ႉယဝ်ႉ။
• 104။ တမ်ႈတီႈ မိူင်းၵူၼ်း မိူဝ်ႈပဵၼ်ၵူၼ်းၼၼ်ႉ ၶႃႈၼၢင်းလႆႈပဵၼ် ဢုပႃႇသိၵႃႇ မႄႈဢွၵ်ႇ မုၼ်ၶမ်းၽြႃး ဢၼ်မီးမၢၵ်ႇတႃႁႃႈပိူင်ၼၼ်ႉယဝ်ႉ။ ငိူင်ႉဝႄႈ လွင်ႈဢဝ်တၢႆတူဝ်ၸႂ်ပိူၼ်ႈယဝ်ႉ။ ၼႂ်းလေႃးၵၼႆႉ ငိူင်ႉဝႄႈ လွင်ႈဢဝ် ၶူဝ်းၶွင် ဢၼ်ၸဝ်ႈမၼ်းဢမ်ႇပၼ်ၼၼ်ႉယဝ်ႉ။
• 105။ ၼမ်ႉလဝ်ႈၼမ်ႉမဝ်းၸိူဝ်းၼၼ်ႉ ဢမ်ႇၵိၼ်ဢမ်ႇသူတ်ႉ။ ၵႂၢမ်းဢမ်ႇၸိုဝ်ႈဢမ်ႇၸႂ်ႈၼၼ်ႉ ဢမ်ႇလၢတ်ႈ။ ႁၢၼ်ႉၸႂ်လူၺ်ႈ ၸဝ်ႈၽူဝ်ၸဝ်ႈၵဝ်ႇၵူၺ်း။ မီးလွင်ႈႁၢၼ်ႉၸႂ်သေ ၶဝ်ႈသွမ်းလႄႈသင်၊ ၼမ်ႉဝၢၼ်လႄႈသင် ၶူဝ်းလူႇတၢင်ႇပိူင်လႄႈသင် ၼပ်ႉၼပ်ႉယမ်ယမ်သေ ယၢမ်ႈလူႇတၢၼ်းမႃးယဝ်ႉ။
• 106။ ယွၼ်ႉပိူဝ်ႈ ၵုသူဝ်ႇၼႃးမုၼ်ဢၼ်ၼၼ်ႉသေ ၶႃႈၼၢင်းၸင်ႇမႃးမီး ငဝ်းတူဝ်ႁိူဝ်ႈလႅင်းပိူင်း ၼင်ႇၼႆယဝ်ႉ။ ၵွပ်ႈပိူဝ်ႈ ၵုသူဝ်ႇဢၼ်ၼၼ်ႉလႄႈ တမ်ႈတီႈၼႆႈ ၶႃႈၼၢင်းၸင်ႇလႆႈပူၺ်ႈလီ(ၸီးၸိမ်ႇ) တင်းသဵင်ႈ ဢၼ်ပဵင်းဢူၵ်းပဵင်းၸႂ်ၼၼ်ႉယဝ်ႉ။
• 107။ ၸဝ်ႈရႁၢၼ်း ၽူႈမီးၽုင်းယႂ်ႇတီႈၶႃႈ... ၶႃႈၼၢင်းတွပ်ႇလၢတ်ႈပၼ်ၸဝ်ႈႁဝ်း ၼင်ႇၼႆဢေႃႈ။ မိူဝ်ႈပဵၼ်ၵူၼ်းၼၼ်ႉ (လႆႈႁပ်ႉသရၼၵုင်ႇ၊ လႆႈႁပ်ႉသိၼ်သေ တိုဝ်းၵမ်) တၢင်းလီမႃးဢေႃႈ။ ၵွပ်ႈၵုသူဝ်ႇ ၼၼ်ႉသေ ၸင်ႇတေ လႆႈမီး ဢူငဝ်းႁိူဝ်ႈႁိူင်းၼင်ႇၼႆဢေႃႈ။ ၵွပ်ႈၵုသူဝ်ႇၼၼ်ႉသေ ဢူငဝ်းၶႃႈႁဝ်းၼႆႉၵေႃႈ ႁိူဝ်ႈႁိူင်းပိူင်းသႂ်ၵႂႃႇ ၵူႈပႃႈၵူႈၽၢႆႇၶႃႈဢေႃႈ... (လၢတ်ႈၵႂႃႇၼင်ႇၼႆယဝ်ႉ)။

ၻုတိယပတိၿ်ၿတႃဝိမႃၼဝတ်ထု ႁူဝ်သိပ်းသွင် သုတ်းယဝ်ႉ။