ၸဝ်ႈၸၵ်ႉၶုပႃႇလ

ယမၵဝၷ်

ၸဝ်ႈထဵၼ်ၸၵ်ႉၶုပႃႇလ ၸဝ်ႈတႃမွတ်ႇ မႄးထတ်း

မၼေႃပုၿ်ၿင်ၵမႃ ꩪမ်မႃ၊ မၼေႃသေꩦ်ꩧႃ မၼေႃမယႃ။ မၼသႃ ၸေ ပၻုꩦ်ꩧေၼ၊ ꧤႃသတိ ဝႃ ၵရေႃတိ ဝႃ။ တတေႃ ၼံ ၻုၵ်ၶမၼဝေတိ၊ ၸၵ်ၵံဝ ဝႁတေႃ ပၻံ။

တြႃးၸဝ်ႈ ဢၼ်တႄႇငိူၼ်ႈ မၼေႃပုၿ်ၿင်ၵမႃၼၼ်ႉ မုၼ်ၶမ်းၽြႃး တႄႇ ႁေႃးတီႈလႂ်၊ ႁေႃးတီႈဝဵင်းသႃႇဝတ်ႉထိ၊ ႁေႃးယွၼ်ႉပိူဝ်ႈၽႂ်၊ ႁေႃးယွၼ်ႉပိူဝ်ႈ ၸဝ်ႈ ထဵၼ်ၸၵ်ႉၶုပႃႇလယဝ်ႉ။

လုၵ်ႈသွင်ၸၢႆး သထေးမႁႃႇသုဝၼ်ႇၼ မိူင်းသႃႇဝတ်ႉထိ မႄးထတ်း

တီႈမိူင်းသႃႇဝတ်ႉထိၼၼ်ႉ မီးဝႆႉသထေးၵေႃႉၼိုင်ႈ ၸိုဝ်ႈဝႃႈ မႁႃႇသုဝၼ်ႇ ၼ။ မၼ်းမၢၵ်ႈမီးသေ ၶူဝ်းၶွင်ဢုတ်ႉၸႃႇရတၼႃႇၵေႃႈ မီးတင်းၼမ်။ ၶႃႈၸႂ်ႉၸၢႆး ၶႃႈၸႂ်ႉယိင်း ႁူမ်ႈလူၺ်ႈ ဢလုမ်းဢရၢင်းၵေႃႈ မီးတင်းၼမ်ယဝ်ႉ။ ၵူၺ်းၵႃႈ မၼ်း ဢမ်ႇမီးလုၵ်ႈၸၢႆးလုၵ်ႈယိင်းသေၵေႃႉ။ ထိုင်မႃးဝၼ်းၼိုင်ႈ ၽွင်ႈမိူဝ်ႈ ၵႂႃႇဢၢပ်ႇ ၼမ်ႉၵၢင်းၵႃႇသေ ပွၵ်ႈမႃးၸွမ်းတၢင်းၼၼ်ႉ ၸင်ႇမႃးႁၼ် တူၼ်ႈမႆႉတူၼ်ႈၼိုင်ႈ၊ ယွၼ်ႉပိူဝ်ႈ ၵိင်ႇယွတ်ႈၽိူဝ်ၽူၺ်းမၼ်း တဵမ်ထူၼ်ႈလီၼႃႇလႄႈ သထေးလူင် ၸင်ႇ ဝူၼ်ႉဝႃႈ “တူၼ်ႈမႆႉယႂႂ််ႇလူင်ၼႆႉ ႁဵတ်းႁိုဝ်ၵေႃႈ တေမီးၽီပႂ်ႉယူႇ”ၼႆသေ ၸင်ႇၸႂ်ႉ လုၵ်ႈၼွင်ႉတပႄးမၼ်း မႃးပတ်းပတ်းၽဵဝ်ႈၽဵဝ်ႈ တီႈငဝ်ႈတူၼ်ႈမႆႉယဝ်ႉ။ ဢဝ်သၢႆး ၽွင်မႃးသိူဝ်ႇလီလီ ၶၢတ်ႈႁူဝ်ႉလွမ်ႉ၊ ဢဝ်တုင်းတမ်းၶွၼ်ႇၸၵ်ႉၸႃႇ မႃးပၵ်းဝႆႉပၼ် လီလီ ၸင်ႇလဵပ်ႈႁွပ်ႈၽၢႆႇၶႂႃသေ ပူႇၸေႃႇဝႆႈသႃယဝ်ႉ။ မၼ်းၸင်ႇယွၼ်းသူးဝႃႈ “သင်ၸိူဝ်ႉဝႃႈ ၶႃႈႁဝ်း မီးလုၵ်ႈၸၢႆးလႄႈသင် ဢမ်ႇၼၼ် မီးလုၵ်ႈယိင်းလႄႈသင် ၶႃႈႁဝ်းတေမႃး ပူႇၸေႃႇမူးၸႃး ၸဝ်ႈၶုၼ်ၽီႁဝ်း ၶိုၵ်ႉၶိုၵ်ႉၶၢႆးၶၢႆးယူႇဢေႃႈ”ၼႆသေ ပွၵ်ႈမိူဝ်းၵႂႃႇယဝ်ႉ။

ႁဵတ်းၼၼ်သေ ဢမ်ႇႁိုင်ဢမ်ႇၼၢၼ်း ၼၢႆးသထေးၵေႃႈ ၸပ်းတွင်ႉပႃး သၼ်ႇထေႇသေ ၵႂႃႇလၢတ်ႈၼႄ လုင်းသထေးယဝ်ႉ။ သထေးၵေႃႈ ၸင်ႇဝႆႉပၼ် ၵူၼ်းလူႁၼ်လုမ်းလႃး ၼၢႆးသထေးလီလီငၢမ်းငၢမ်းသေ ပေႃးတဵမ်သိပ်းလိူၼ်ၵေႃႈ ၸင်ႇၵိူတ်ႇမႃး လုၵ်ႈၸၢႆးဢွၼ်ႇၵေႃႉၼိုင်ႈ။ ဝၼ်းဢၼ်တေတၢင်ႇပၼ်ၸိုဝ်ႈ လုၵ်ႈ ၸၢႆးၼၼ်ႉ လုင်းသထေးမႁႃႇသုဝၼ်ႇၼ ၸင်ႇဝူၼ်ႉဝႃႈ ၵွပ်ႈပိူဝ်ႈ ၽီိပႂ်ႉပႃးပၼ်သေ ၸင်ႇတေလႆႈလုၵ်ႈၸၢႆးမႃးလႄႈ ၸင်ႇတၢင်ႇပၼ်ၸိုဝ်ႈလုၵ်ႈၸၢႆးမၼ်းဝႃႈ “ပႃႇလ” (ပႂ်ႉပႃး) ၼႆယဝ်ႉ။ ဝၢႆးၼၼ်ႉ ၼၢႆးသထေး သမ်ႉၶိုၼ်းမီးမႃးထႅင်ႈ လုၵ်ႈၸၢႆးၵေႃႉ ၼိုင်ႈလႄႈ ၸိုဝ်ႈလုၵ်ႈၵေႃႉလဵၵ်ႉၼၼ်ႉ ၸင်ႇတၢင်ႇဝႃႈ “ၸူႇလပႃႇလ”ယဝ်ႉ။ ၵေႃႉပီႈဢၢႆႈၼၼ်ႉၵေႃႈ ၸင်ႇႁိၵ်ႈၸိုဝ်ႈဝႃႈ “မႁႃႇပႃႇလ”ၼႆယူႇ။ ၶႃသွင်ၵေႃႉ ပီႈၼွင်ႉၵေႃႈ ထိုင်ၶိင်ႇမွၵ်ႇၵေႃႈမွၵ်ႇ ထိုင်ၶိင်ႇမၢၵ်ႇၵေႃႈမၢၵ်ႇၼႆသေ ၸင်ႇတႄႇၼႃႈ ႁေႃတေႃႁိူၼ်း သိုဝ်ႈၽႂ်တၼ်းမၼ်းယူႇ။ ဝၢႆးသေ ပေႃႈမႄႈသဵင်ႈၵၢမ်ႇသုတ်းမုၼ် ယဝ်ႉ ၶႃသွင်ၵေႃႉပီႈၼွင်ႉ သိုပ်ႇပုတ်ႈဢဝ်ၶူဝ်းပူၺ်ႈပေႃႈမႄႈသေ ယူႇသဝ်းၵိၼ် သၢင်ႈၵႂႃႇယူႇ။

ၽွင်းမိူဝ်ႈၼၼ်ႉ မုၼ်ၶမ်းၽြႃး တိုၵ်ႉမႃးယူႇသဝ်းဝႆႉ တမ်ႈတီႈၵျွင်းၸေႇ တဝၼ်ႇ ဢၼ်သထေးလူင် ဢၼႃႇထပဵၼ်ႇ ၶၢမ်ႇသဵင်ႈငိုၼ်း 45 ၵုတေႇ ႁဵတ်း လူႇတၢၼ်းဝႆႉသေ ႁေႃးတြႃးပၼ် ၵူၼ်းဝၢၼ်ႈၵူၼ်းမိူင်း ႁႂ်ႈပေႃးလႆႈႁွတ်ႈ ၼိူဝ်သဵၼ်ႈ တၢင်း မိူင်းၽီ ၼိပ်ႉပၢၼ်ႇၼၼ်ႉယူႇ။

ၸေႇတၼႃႇ သထေးလူင် ဢၼႃႇထပဵၼ်ႇ မႄးထတ်း

(တီႈၵျွင်းၼိၵျေႃးထႃႇရူင်ႇ ဢၼ်ပဵၼ်ၸိူဝ်ႉၶိူဝ်းသႃႇၵီႇၶဝ် ႁဵတ်းလူႇတၢၼ်း ဝႆႉၼၼ်ႉ မုၼ်ၶမ်းၽြႃး ၵူၺ်းယူႇသဝ်းၵႂႃႇ ၼိုင်ႈဝႃႇၵူၺ်း။ တီႈၵျွင်းၸေႇတဝၼ်ႇ ဢၼ်သထေးလူင် ဢၼႃႇထပဵၼ်ႇ ႁဵတ်းလူႇတၢၼ်းၼၼ်ႉ မုၼ်ၶမ်းၽြႃး ယူႇသဝ်း ၵႂႃႇ 19 ဝႃႇယဝ်ႉ။ တမ်ႈတီႈ ၵျွင်းပုပ်ႉပႃႇရူင်ႇ ဢၼ်ၼၢင်းဝိသႃႇၶႃႇ ၶၢမ်ႇၶၢႆၶူဝ်းၼုင်ႈ မႁလတႃႇ ၵိုင်ႇၵႃႈ 27 ၵုတေႇသေ လူႇတၢၼ်းဝႆႉၼၼ်ႉ မုၼ်ၶမ်းၽြႃး ယူႇသဝ်း ၵႂႃႇ 6 ဝႃႇယဝ်ႉ။ ဢၼ်မုၼ်ၶမ်းၽြႃးယူႇသဝ်းၵႂႃႇ တမ်ႈတီႈ မိူင်းသႃႇဝတ်ႉထိၼႆႉ ပဵၼ်ၵႂႃႇ 25 ဝႃႇ။ သထေးလူင် ဢၼႃႇထပဵၼ်ႇလႄႈ ၼၢင်းဝိသႃႇၶႃႇၼႆႉ ၼိုင်ႈဝၼ်း ႁွတ်ႈမိူဝ်းတီႈၵျွင်း သွင်ပွၵ်ႈ။ ၽွင်းမိူဝ်ႈၶႃၵႂႃႇတီႈ ၽြႃးၼၼ်ႉ ၶႃဝူၼ်ႉဝႃႈ “ၸဝ်ႈ သၢင်ႇဢွၼ်ႇၶဝ် တေလွမ်တူၺ်း မိုဝ်းႁဝ်းပႃးသင်မႃး”ၼႆလႄႈ ၶႃၵႂႃႇၵျွင်းမိူဝ်ႈလႂ်ၵေႃႈ ဢမ်ႇပႃးၶူဝ်းလူႇသေ ၵႂႃႇၵျွင်းၼၼ်ႉ ဢမ်ႇမီးသေပွၵ်ႈ။ ၶၢဝ်းယၢမ်းၵၢင်ၼႂ် ပေႃးဝႃႈ ၵႂႃႇၵျွင်းၼႆၵေႃႈ ပႃးၵႂႃႇ ၶဝ်ႈသွမ်းၽၵ်းသွမ်း ၽေႃးၸၼ်ႇ ၸိူဝ်းၼႆႉယဝ်ႉ။ ပေႃးပဵၼ် ၶၢဝ်းယၢမ်းတၢမ်းၶမ်ႈၼႆၵေႃႈ ပႃးၵႂႃႇယႃႈယႃႁႃႈပိူင်လႄႈသင်၊ ၼမ်ႉသူမ်ႈၼမ်ႉဝၢၼ် လႄႈသင် တိုၼ်းပႃးၵႂႃႇ သေပိူင်ပိူင်သေ ၵႂႃႇလူႇတၢၼ်းယဝ်ႉ။ တီႈႁိူၼ်းၶႃ သွင်ၵေႃႉၼၼ်ႉၵေႃႈ တိုၼ်းႁၢင်ႈႁႅၼ်း သိူဝ်ႇဝႆႉပၼ် တီႈၼင်ႈ တီႈယူႇ ပုၼ်ႈတႃႇ ၸဝ်ႈရႁၢၼ်းသင်ႇၶႃႇ 2000 ၸဝ်ႈ တႃႇသေႇယဝ်ႉ။ ၸဵမ်ၶဝ်ႈသွမ်း ၽၵ်းသွမ်း ၽေႃးၸၼ်ႇ ယႃႈယူတ်းယႃႈယႃ ၶူဝ်းၶွင် ဢၼ်ၸဝ်ႈၶဝ်လူဝ်ႇၸိူင်ႉႁိုဝ်ၵေႃႈ တိုၼ်း ၶပ်ႉၶိုင်ပၼ် ႁႂ်ႈတဵမ်ထူၼ်ႈၵႂႃႇ ၵမ်းလဵဝ်ယဝ်ႉ။ ၵူၺ်းၵႃႈ ၼႂ်းၶႃသွင်ၵေႃႉၼၼ်ႉ သထေးလူင် ဢၼႃႇထပဵၼ်ႇၼႆႉ ဢမ်ႇတွၼ်ႉထၢမ်ၶေႃႈထၢမ် တမ်ႈတီႈၼိူဝ်ၽြႃး ပဵၼ်ၸဝ်ႈ သေၶေႃႈသေၶူတ်း။

ၵွပ်ႈသင်လႄႈ ဢမ်ႇထၢမ်ပေႃးၼႆၸိုင် ၵၢင်ၸႂ်သထေးလူင် ဢဝ်ၸႂ်ႁၵ်ႉ ႁႅင်းၼပ်ႉယမ် ၼိူဝ်ၽြႃးပဵၼ်ၸဝ်ႈသေ ဝူၼ်ဝႃႈ “မုၼ်ၶမ်းၽြႃးၼႆႉ ပဵၼ်ၽြႃး ၸဝ်ႈၽူႈဢမ်ႇမီးဢၼ်တႅၵ်ႈလႄႈ ဢူၼ်ႈဢွၼ်ႇတႄႉတႄႉ။ ပဵၼ်ၸၢဝ်းၶိူဝ်းၶုၼ် လႄႈ ဢူၼ်ႈဢွၼ်ႇတႄႉတႄႉ။ သင်ၸိူဝ်ႉဝႃႈ ၵဝ်သမ်ႉထၢမ်ၵႂႃႇ သေၸိူဝ်ႉသေပိူင် ၸိုင် မုၼ်ၶမ်းၽြႃး သမ်ႉတေတူၺ်းၵုင်ႇၵျေးၸူးၵဝ်သထေး ဢၼ်မီးယႂ်ႇမီးၼမ် ၼၼ်ႉသေ သမ်ႉတေ ႁေႃးတြႃးပၼ်ၵဝ်လႄႈ မုၼ်ၶမ်းၽြႃးတေႁိူဝ်ႉယဝ်ႉ” ဝူၼ်ႉ ႁၼ်ထိုင်ၼင်ႇၼႆသေ ၸင်ႇဢမ်ႇထၢမ်သင်သေၶေႃႈၼႆယဝ်ႉ။ ပိၵ်ႉသမ်ႉ ဢမ်ႇတွင်ႈ ဢမ်ႇထၢမ်သင်သေတႃႉ မုၼ်ၶမ်းၽြႃး တိုၼ်းတူၺ်းႁၼ်ထိုင် လွင်ႈဢၼ်သထေး ဢၼႃႇထပဵၼ်ႇ မီးၸႂ် ၵုမ်ႉၸွႆႈထႅမ်မၼ်းၸဝ်ႈၼၼ်ႉသေ ၵႅၼ်ႇၸဝ်ႈႁေႃးတြႃးပၼ် ပၼ်ပိူၼ်ႈၼၼ်ႉၵေႃႈ မိူၼ်တင်း ႁေႃးတြႃးယွင်ႈယေႃးပၼ် သထေးလူင်ဢၼႃႇ ထပဵၼ်ႇၵႂႃႇယူႇယဝ်ႉ။)

ၵူၼ်းမိူင်းသႃႇဝတ်ႉထိ ၸဵတ်းၵုတေႇ မႄးထတ်း

ၽွင်းၼၼ်ႉ တမ်ႈတီႈ မိူင်းသႃႇဝတ်ႉထိၼႆႉ ၵူၼ်းယူႇသဝ်း မီးၸဵတ်း ၵုတေႇ။ ၼႂ်းၵႃႈ ၵူၼ်းၸဵတ်းၵုတေႇၸိူဝ်းၼၼ်ႉ ဢၼ်လႆႈထွမ်ႇဢဝ် ထမ်းတြႃး ၽြႃးပဵၼ်ၸဝ်ႈသေ ပဵၼ်ဢရိယႃႇၵႂႃႇၼၼ်ႉ မီးႁႃႈၵုတေႇယဝ်ႉ။ ၵူၼ်းဢၼ်ပဵၼ် ပုထုၸၼ်ႇၼၼ်ႉတႄႉ မီးသွင်ၵုတေႇၵူၺ်း။ ၵူၼ်းၸိူဝ်းပဵၼ် ဢရိယႃႇၶဝ်ၼၼ်ႉ တႄႉ ပေႃးဝႃႈ ၵၢင်ၼႂ်မႃးၼႆ ႁဵတ်းၵၢၼ်လူႇၵၢၼ်တၢၼ်း၊ ပေႃးႁူဝ်ၶမ်ႈမႃးၼႆ ဢဝ်မွၵ်ႇ ဢဝ်ၶူဝ်းလူႇၶူဝ်းတၢၼ်းၽႃႈၽႅၼ်ႇ ယႃႈယူတ်းယႃႈယႃ ၼမ်ႉသူမ်ႈၼမ်ႉဝၢၼ်ၸိူဝ်း ၼႆႉၵႂႃႇလူႇသေ ၵႂႃႇပႂ်ႉထွမ်ႇတြႃးၼႆလႄႈ ၵၢၼ်လူင်ၶဝ် ပဵၼ်သွင်ပိူင်ၼႆႉယဝ်ႉ။ ထိုင် မႃးႁူဝ်ၶမ်ႈၶမ်ႈၼိုင်ႈ သထေးလူင်မႁႃႇပႃႇလ လႆႈႁၼ်ၵူၼ်းဢရိယႃႇၸိူဝ်းၼၼ်ႉ ယိပ်းမွၵ်ႇယိပ်းၽႃး ပႃးၸဵမ်ၼမ်ႉႁွမ်ၼၢမ်ႇသႃႇ ဢွၼ်ၵၼ်ၵႂႃႇထွမ်ႇတြႃး တီႈၵျွင်းၽြႃး ၼင်ႇၼၼ် မၼ်းလႆႈႁၼ်သေ ၸင်ႇထၢမ်ဝႃႈ “ၵူၼ်းၸိူဝ်းၼၼ်ႉ ၶဝ်တေၵႂႃႇလႂ်” ၼႆလႄႈ ၸင်ႇလႆႈႁူႉဝႃႈ ၶဝ်တေၵႂႃႇထွမ်ႇတြႃး တမ်ႈတီႈ ၽြႃးၼႆယဝ်ႉ။ မၼ်းၵေႃႈ ၸင်ႇဢွၵ်ႇၸႂ်ဝႃႈ ၵဝ်ၵေႃႈ တေႃႈတေၵႂႃႇထွမ်ႇတြႃး ၸိူင်ႉပိူၼ်ႈၵွၼ်ႇၼႆသေ ၵႂႃႇဝႆႈ သႃၽြႃး ၼင်ႈထွမ်ႇတြႃး တီႈၽိတ်ႇတီႈသုတ်းပိူၼ်ႈၼၼ်ႉယဝ်ႉ။

လၢႆးဢၼ်မုၼ်ၶမ်းၽြႃးႁေႃးတြႃးၼၼ်ႉတႄႉ ၵႅၼ်ႇၸဝ်ႈ တူၺ်းႁၼ်ထိုင် ၵၢင်ၸႂ်သတ်ႉတဝႃႇသေ ႁေႃးတြႃးၽူတ်ႇ(ၶျွတ်ႈ)ဢဝ် သတ်ႉတဝႃႇၵႂႃႇ ၸွမ်းၼင်ႇ တႃႇတေမီးသရၼၵုင်ႇ၊ တႃႇတေပဵၼ်လႆႈရႁၢၼ်းၸိူဝ်းၼၼ်ႉယဝ်ႉ။ ပွၵ်ႈၼႆႉတႄႉ မုၼ်ၶမ်းၽြႃး ႁၼ်ထိုင်ဝႃႈ သထေးလူင် တေပဵၼ်ပုၵ်ႉၵူဝ်ႇ ဢွၵ်ႇမူၼ်ႉပူၼ်ႉလွတ်ႈ ၼႆလႄႈ ၸင်ႇႁေႃးတြႃး လွင်ႈတႃႇၼ၊ လွင်ႈသီႇလ၊ လွင်ႈမိူင်းၽီ၊ လွင်ႈတၢင်းၽိတ်း ၵႃႇမၵုင်ႇ၊ လွင်ႈဢွၵ်ႇမူၼ်ႉပူၼ်ႉလွတ်ႈ ၵႃႇမၵုင်ႇၸိူဝ်းၼၼ်ႉယဝ်ႉ။

မႁႃႇပႃႇလသထေး မႃးႁဵတ်းရႁၢၼ်း မႄးထတ်း

ဝၢႆးသေ လႆႈထွမ်ႇတြႃးယဝ်ႉ သထေးမႁႃႇပႃႇလ ဝူၼ်ႉႁၼ်ထိုင်ဝႃႈ “ပေႃး ဝႃႈ ၵဝ်တၢႆၵႂႃႇၸိုင် လုၵ်ႈလၢင်းၼၢင်းမေးၵဝ် ၼွင်ႉၸၢႆးၵဝ် ၶူဝ်းၶွင်ၸီးၸိမ်ႇၵဝ် ၸိူဝ်းၼၼ်ႉ တေပႃးၵႂႃႇၸွမ်းၵဝ်ၵေႃႈ တေႃႈဢမ်ႇၸႂ်ႈ၊ တူဝ်ၵဝ်ၵေႃႈ တေႃႈတေ ဢမ်ႇပႃးၵႂႃႇၸွမ်းၵဝ်“ ဝူၼ်ႉႁၼ်ၼင်ႇၼႆသေ ၸင်ႇတႅပ်းတတ်းဝႃႈ “ပေႃးၼႆ လွင်ႈဢၼ်ယူႇသဝ်း ၼႂ်းၽဝႃႉၵူၼ်းႁိူၼ်း ၶူဝ်းသွင်ၶႅၼ်ၼၼ်ႉ ပုၼ်ႈတႃႇၵဝ် တေမီးၽွၼ်းလီသင်၊ ၵဝ်တေႁဵတ်းရႁၢၼ်း ၵမ်းလဵဝ်ယဝ်ႉ” ၼႆယဝ်ႉ။ ဝၢႆးသေ ထွမ်ႇတြႃးယဝ်ႉ ၸင်ႇၶဝ်ႈၵႂႃႇတမ်ႈတီႈ ၽြႃးသေ ၵႂႃႇယွၼ်းႁဵတ်းရႁၢၼ်းယဝ်ႉ။ မုၼ်ၶမ်းၽြႃးၸင်ႇဝႃႈ

“မႁႃႇပႃႇလ... မႂ်းဢမ်ႇမီး ပီႈၼွင်ႉ တႃႇတေဢုပ်ႇ ၵုမ် ယွၼ်းၶေႃႈၶႂၢင်ႉတီႈၶဝ်ႁႃႉ” မၼ်းၵေႃႈ ၸင်ႇလၢတ်ႈဝႃႈ
“မီးၼွင်ႉၸၢႆးၵေႃႉၼိုင်ႈ ဢေႃႈ” ၼႆလႄႈ ၽြႃးၸင်ႇၸႂ်ႉႁႂ်ႈမၼ်း ၵႂႃႇမွၵ်ႇလၢတ်ႈထိုင် ၼွင်ႉၸၢႆးမၼ်းၼၼ်ႉ ယဝ်ႉ။ မၼ်းၵေႃႈ ၸင်ႇၶုပ်ႉဝႆႈၽြႃး ၶိုၼ်းပွၵ်ႈမိူဝ်း တီႈႁိူၼ်း မိူဝ်းၸူးတီႈၼွင်ႉၸၢႆးမၼ်း ၸူႇလပႃႇလၼၼ်ႉသေ
“ၼွင်ႉၸၢႆး ၸူႇလပႃႇလ... တီႈႁိူၼ်းႁဝ်းၼႆႉ ၶူဝ်းၶွင်ဢုတ်ႉၸႃႇ ဢၼ် ဢမ်ႇမီးၸႂ် ဢၼ်ပဵၼ်ဢဝိၺ်ႇၺႃႇၼၵ၊ ၶူဝ်းၶွင်ဢုတ်ႉၸႃႇ ဢၼ်မီးၸႂ် သဝိၺ်ႇ ၺႃႇၼၵၸိူဝ်းၼႆႉ မီးဝႆႉတင်းၼမ်ယဝ်ႉ။ ၶူဝ်းၶွင်ၸိူဝ်းၼၼ်ႉ တင်းသဵင်ႈ မႂ်းၼွင်ႉ ၸၢႆး သိမ်းဢဝ်သေတႃႉ။ ၵဝ်ဢၢပ်ႈပၼ်မႂ်းတင်းသဵင်ႈယဝ်ႉ” ၼွင်ႉၸၢႆးမၼ်း ၶိုၼ်းလၢတ်ႈဝႃႈ
“ပီႈဢၢႆႈႁဝ်း သမ်ႉတေၵႂႃႇလႂ်ၶႃႈလႃႇ?”
“ၵဝ်တေၵႂႃႇႁဵတ်းရႁၢၼ်း တမ်ႈတီႈၽြႃးပဵၼ်ၸဝ်ႈယဝ်ႈ”
“ပီႈဢၢႆႈႁဝ်း လၢတ်ႈသင်ၶႃႈၵေႃ... ၸဵမ်မိူဝ်ႈဢူႈမႄႈႁဝ်း သဵင်ႈၵၢမ်ႇသုတ်း မုၼ်ၵႂႃႇယဝ်ႉၼၼ်ႉ ပီႈဢၢႆႈႁဝ်းၼႆႉ မိူၼ်ၼင်ႇဢူႈၶႃႈ မိူၼ်ၼင်ႇမႄႈၶႃႈယဝ်ႉ။ ၵွပ်ႈၼႆ ပီႈဢၢႆႈ... ယႃႇပေၵႂႃႇႁဵတ်းရႁၢၼ်းသေၵမ်းၶႃႈ... ၶႅၼ်းတေႃႈ ယူႇသဝ်းတီႈၽဝႃႉ ၵူၼ်းႁိူၼ်း ၸၢမ်ႇပူၺ်ႈၶူဝ်းၶွင်ဢုတ်ႉၸႃႇသေယဝ်ႉ ႁဵတ်းၵၢၼ်လီၵုသူဝ်ႇၵႂႃႇၶႃႈ လႄႈ”
“ၼွင်ႉၸၢႆး... ၸဵမ်မိူဝ်ႈၵဝ်လႆႈငိၼ်း ၶေႃႈထမ်းတြႃးဢူၼ်ႈဢွၼ်ႇ ဢၼ် ႁူဝ်ႁၢင်ၵၢင်လီၼၼ်ႉယဝ်ႉသေ တႃႇတေယူႇၼႂ်းၽဝႃႉၵူၼ်းႁိူၼ်း တိုဝ်းၵမ်တြႃး ၼၼ်ႉ မၼ်းဢမ်ႇပဵၼ်လႆႈ၊ ပေႃးႁဵတ်းရႁၢၼ်းယဝ်ႉသေၵွၼ်ႇ ၸင်ႇတေထၢင်ႇႁၢင်ႈ တိုဝ်းၵမ်ၸွမ်းၼၼ်ႉယဝ်ႉ”
“ပီႈဢၢႆႈ... ယၢမ်းလဵဝ် ပီႈဢၢႆႈႁဝ်းၵေႃႈ တိုၵ်ႉၼုမ်ႇတိုၵ်ႉၵမ်ယူႇ၊ ပေႃးထဝ်ႈ မႃးၵွၼ်ႇ ၸင်ႇၵွႆႈၵႂႃႇႁဵတ်းရႁၢၼ်းၶႃႈလႄႈ”
“ၼွင်ႉၸၢႆး... ပေႃးထဝ်ႈမႃးယဝ်ႉၸိုင် တေႃႈၵႃႈ တိၼ်မိုဝ်းႁဝ်းၵေႃႈ ႁဝ်း ဢမ်ႇၸၢင်ႈယုၵ်ႉယၢႆႉၶၢႆႉၼိုင် ပဵင်းၸႂ်ႁဝ်းလႆႈယဝ်ႉ။ ပီႈၼွင်ႉႁဝ်းဢၼ်ဝႃႈၼၼ်ႉ ၶႅၼ်းတေႁဵတ်းႁိုဝ် မႃးၸွႆႈႁဝ်းလႆႈလႃႇ” မႁႃႇပႃႇလ လၢတ်ႈၼင်ႇၼႆသေ လွတ်ႈ ႁေႃး ၵႂၢမ်းၵႃႇထႃႇႁူဝ်ၼႆႉယဝ်ႉ။

- ꩡရႃ ꩡꩡ်ꩡရိတႃ ႁေၢၼ်တိ၊ ႁတ်ထပႃၻႃ ဢၼသ်သဝႃ။
- ယသ်သ သေႃ ဝိႁတတ်တႃမေႃ၊ ၵထံ ꩪမ်မံ ၸရိသ်သတိ။

ၼွင်ႉဢွၼ်ႇ ၸူႇလပႃႇလ ပေႃးထဝ်ႈမႃးယဝ်ႉၸိုင် တိၼ်မိုဝ်းႁဝ်းၵေႃႈ ႁဝ်းတေႃႈယုၵ်ႉဢမ်ႇပႄႉ၊ ၵေႃႉဢၼ်ဢမ်ႇမီးႁႅင်းၼၼ်ႉ တေၸၢင်ႈႁဵတ်းႁိုဝ် လႆႈ တြႃး။ ပိၵ်ႉသမ်ႉဝႃႈ ၼွင်ႉၸၢႆးမၼ်း ၸူႇလပႃႇလ ႁႆႈသေ ႁၢမ်ႈသီးမၼ်းၵေႃႈ မႁႃႇပႃႇလ ၸင်ႇပၢႆႈၵႂႃႇၼုင်ႈရႁၢၼ်း တမ်ႈတီႈ ၽြႃးပဵၼ်ၸဝ်ႈယဝ်ႉ။ ပေႃးဝႃႈ ပဵၼ် ရႁၢၼ်းယဝ်ႉၵေႃႈ ၵႂႃႇယူႇသဝ်းၸွမ်ႈ ဢုပတ်ႉၸၢႆးသြႃႇမၼ်း ၶၢဝ်းတၢင်းႁႃႈပီလီလီ၊ ဝၢႆးသေ ဢွၵ်ႇဝႃႇ ႁဵတ်းပဝႃႇရၼႃႇယဝ်ႉ မၼ်းၸဝ်ႈ ၸင်ႇမႃးၸူးတမ်ႈတီႈ မုၼ်ၶမ်း ၽြႃးသေထၢမ်ဝႃႈ

“ၸဝ်ႈႁဝ်းတီႈၶႃႈ တီႈၼႂ်းသႃႇသၼႃႇၼႆႉ ၼႃႈၵၢၼ်ထုရ တႃႇတေႁဵတ်း သၢင်ႈၼၼ်ႉ မီးလၢႆပိူင်တီႈၶႃႈၼေႃႈ” ၼႆလႄႈ ၽြႃးပဵၼ်ၸဝ်ႈ ၶိုၼ်းတွပ်ႇဝႃႈ
“လုၵ်ႈႁၵ်ႉရႁၢၼ်း... တီႈၼႂ်းသႃႇသၼႃႇၵဝ်ၽြႃးၼႆႉ ၼႃႈၵၢၼ်ရႁၢၼ်း ၶဝ်ဢၼ်တေလႆႈႁဵတ်းၼၼ်ႉ မီးဝႆႉထုရသွင်ပိူင် ဢၼ်ပဵၼ် ၷၼ်ႇထꩪုရလႄႈ ဝိပတ်ႉသၼႃꩪုရၼၼ်ႉယဝ်ႉ”
“ၸဝ်ႈႁဝ်းတီႈၶႃႈ... ၵၼ်ႇထထုရဢၼ်ဝႃႈၼၼ်ႉ ပဵၼ်ၸိူင်ႉႁိုဝ်ၶႃႈ၊ ဝိပတ်ႉသၼႃႇထုရ ဢၼ်ဝႃႈၼၼ်ႉ ပဵၼ်ၸိူင်ႉႁိုဝ်တီႈၶႃႈ”
“လုၵ်ႈႁၵ်ႉရႁၢၼ်း... ၵၼ်ႇထထုရ ဢၼ်ဝႃႈၼၼ်ႉ ဢဝ်ၸွမ်းၼင်ႇ ႁႅင်းၺၢၼ်ႇၸဝ်ႈၵဝ်ႇသေ သွၼ်ႁဵၼ်းဢဝ်ၶေႃႈထမ်းတြႃး ၼိၵၢႆႇၼိုင်ႈဢၼ် လႄႈသင် ၼိၵၢႆႇသွင်ဢၼ်လႄႈသင် သင်ပဵၼ်လႆႈၵေႃႈ ႁဵၼ်းဢဝ်ပိတၵၢတ်ႈ တင်းမူတ်းသေ ဢူမ်ႇဢၢၼ်ႇပူင်သွၼ်ပၼ်ပိူၼ်ႈၼၼ်ႉယဝ်ႉ။ ဝိပတ်ႉသၼႃႇထုရ ဢၼ်ဝႃႈၼၼ်ႉတႄႉ ဢမ်ႇလူဝ်ႇမီးၵၢၼ်ႁၢပ်ႇၼၵ်းသင် လူဝ်ႇယူႇသဝ်း တီႈၽိတ်ႇ တီႈယဵၼ် ၶတ်းၸႂ်ယၵ်ႉတူၺ်း တူဝ်ၶၼ်ႇထႃႇ ဢမ်ႇမၼ်ႈဢမ်ႇၵိုမ်း ၵပ်းၵပ်းတၢမ်း တၢမ်းၵၼ်သေ တိုဝ်းၵမ်ၵျၢင်ႉၵမ် ႁႂ်ႈလႆႈႁွတ်ႈ ဢရႁတ်ႉတၽူဝ်ႇၼၼ်ႉယဝ်ႉ”
“ၸဝ်ႈႁဝ်းတီႈၶႃႈ... ၶႃႈတပႄးၼႆႉ ယွၼ်ႉပိူဝ်ႈ ဢႃႇယုယႂ်ႇသေ ၸင်ႇတေ မႃးႁဵတ်းရႁၢၼ်းလႄႈ တႃႇတေႁၢပ်ႇၵၢၼ် ၵၼ်ႇထထုရၼၼ်ႉတႄႉ ၶႃႈတပႄး ဢမ်ႇ ပဵၼ်လႆႈယဝ်ႉၶႃႈ။ ၶႃႈတပႄးတေႁဵတ်းၸွမ်း ဝိပတ်ႉသၼႃႇထုရၵူၺ်းၶႃႈယဝ်ႉ။ ၶႅၼ်း တေႃႈႁေႃးတြႃးၵမ်ႇမတ်ႉထၢၼ်းပၼ် ပုၼ်ႈတႃႇၶႃႈတပႄး တေလႆႈၵျၢင်ႉၵမ်ၽိုၵ်း ၸွမ်းၼၼ်ႉ သေၵမ်းတီႈၶႃႈ”

မုၼ်ၶမ်းၽြႃးၵေႃႈ ၸင်ႇႁေႃးတြႃးၵမ်ႇမတ်ႉထၢၼ်းပၼ် မႁႃႇပႃႇလ တႃႇတေႁွတ်ႈထိုင် ဢရႁတ်ႉတၽူဝ်ႇၼၼ်ႉယဝ်ႉ။ မႁႃႇပႃႇလၵေႃႈ ဝႆႈသႃၽြႃး၊ ၸူဝ်းဢဝ်ၸဝ်ႈရႁၢၼ်း ႁူၵ်းသိပ်းပႃး ဢၼ်ၵၢင်ၸႂ်မိူၼ်ၵၼ်ၼၼ်ႉသေ ၵႂႃႇၶတ်းၸႂ် ၵၢၼ်တြႃး တီႈဢၼ်ယၢၼ်ၵႆၽြႃး ပၢၵ်ႇပၢႆသၢဝ်းယူႇၸၼႃႇၼၼ်ႉယဝ်ႉ။ ၸင်ႇၵႂႃႇ ယူႇသဝ်း တမ်ႈတီႈ ႁိမ်းဝၢၼ်ႈဢၼ်ၼိုင်ႈ တႃႇတေၸၢင်ႈတုင်းၵိၼ်သွမ်းၼၼ်ႉယူႇ။

တၵႃႇၵူၼ်းဝၢၼ်ႈ ႁဵတ်းၵျွင်းလူႇတၢၼ်း မႄးထတ်း

ပေႃးဝႃႈ ၵူၼ်းဝၢၼ်ႈၵူၼ်းသူၼ်ၶဝ် လႆႈႁၼ်ၸဝ်ႈရႁၢၼ်းၶဝ် ႁွတ်ႈထိုင်မႃး တီႈႁိမ်းဝၢၼ်ႈၶဝ်ၼၼ်ႉၵေႃႈ ပဵၼ်ၸႂ်ယုမ်ႇယမ်ၼပ်ႉယမ်သေ ၸင်ႇသိူဝ်ႇပၼ် တီႈ ယူႇတီႈသဝ်း လူႇတၢၼ်းၶဝ်ႈသွမ်းၽၵ်းသွမ်း တမ်ႈတီႈၶဝ်ၸဝ်ႈယဝ်ႉ။

“ၸဝ်ႈႁဝ်းၶဝ်တီႈၶႃး... ၸဝ်ႈႁဝ်းၶဝ် တေယေႃးၶိင်း ၵႂႃႇတၢင်းလႂ်ၶႃႈ?”
“တၵႃႇႁဝ်းၶဝ်...ၸိူဝ်းႁဝ်းၼႆႉ တေဢၢင်ႈၵႂႃႇႁႃယူႇသဝ်း တီႈဢၼ် သၢင်ႇ ထုၵ်ႇ တႃႇတေႁဵတ်းၵၢၼ်တြႃးၼၼ်ႉၼႆယဝ်ႉ”

ၵူၼ်းဝၢၼ်ႈၵူၼ်းသူၼ်ၶဝ်ၵေႃႈ ႁူႉထိုင်ဝႃႈ ၵၢင်ၸႂ်ၸဝ်ႈရႁၢၼ်းၶဝ် ၶႂ်ႈမႃး ဢဝ်ဝႃႇသႃ တီႈႁိမ်းႁွမ်းၼႆႉၼႆလႄႈ ၸင်ႇဝႆႈလဝ်ႈလၢတ်ႈဝႃႈ

“ၸဝ်ႈႁဝ်းၶဝ်တီႈၶႃႈ... ၼင်ႇႁိုဝ် ၸိူဝ်းၶႃႈတပႄးႁဝ်းၶဝ် တေလႆႈႁပ်ႉ ဢဝ်သရၼၵုင်ႇသၢမ်ပိူင် သိၼ်ႁႃႈ၊ သိၼ်ပႅတ်ႇ၊ သိၼ်သိပ်းၸိူဝ်းၼၼ်ႉ ၸဝ်ႈႁဝ်း ၶဝ် ၶႅၼ်းတေႃႈ ယိူၼ်ႉၸႂ်သေ ဢဝ်ဝႃႇပၼ် တမ်ႈတီႈႁဝ်းၼႆႉသေၵမ်းတီႈၶႃႈ၊ ၶႃႈတပႄးၶဝ် ၽိတ်ႈပၢင်းၵမ်းလဵဝ်တီႈၶႃႈယဝ်ႉ”

ၶဝ်ၸဝ်ႈၸိူဝ်းၼၼ်ႉၵေႃႈ ၸင်ႇဝူၼ်ႉဝႃႈ ႁႂ်ႈလႆႈပဵၼ် တီႈပိုင်ႈဢိင်လီ ပုၼ်ႈတႃႇ တၵႃႇၶဝ် ဢွၵ်ႇမူၼ်ႉပူၼ်ႉလွတ်ႈၼႆသေ ၸင်ႇယိူၼ်ႉၸႂ် ဢဝ်ဝႃႇတီႈ ၼၼ်ႈယဝ်ႉ။ ၵူၼ်းဝၢၼ်ႈၵူၼ်းသူၼ်ၶဝ်ၵေႃႈ ၸင်ႇဢွၼ်ၵၼ် တီႇၽဵဝ်ႈ ႁဵတ်းပၼ် တီႈယူႇတီႈသဝ်း လူႇတၢၼ်းပၼ် ပုၼ်ႈတႃႇ ၸဝ်ႈရႁၢၼ်းၶဝ်ယဝ်ႉ။

ၸဝ်ႈထဵၼ်ၸၵ်ႉၶုပႃႇလ ၶတ်းၸႂ်တြႃး မႄးထတ်း

ပေႃးဝႃႈ ၸဝ်ႈရႁၢၼ်းၶဝ် ၶဝ်ႈၵႂႃႇတုင်းသွမ်းၼႂ်းဝၢၼ်ႈၼႆ တၵႃႇမေႃယႃ ၵေႃႉၼိုင်ႈ ၸင်ႇဝႆႈလဝ်ႈဝႃႈ

“ၸဝ်ႈႁဝ်းၶဝ်တီႈၶႃႈ... တီႈဢၼ်ၸဝ်ႈႁဝ်းၶဝ် ယူႇသဝ်းၸွမ်းၵၼ်တင်း ၼမ်ၼၼ်ႉ မၢင်ပွၵ်ႈမၢင်လႂ် တေၸၢင်ႈမီး လွင်ႈယူႇဢမ်ႇလီ၊ သုင်းဢမ်ႇဝၢၼ်ၼၼ်ႉ ယူႇၶႃႈ၊ ပေႃးဝႃႈ ပဵၼ်မႃး ၼင်ႇၼၼ်ၸိုင် ၶႅၼ်းတေႃႈမႃးမွၵ်ႇလၢတ်ႈပၼ် ၶႃႈ တပႄးသေၵမ်း၊ ၶႃႈတပႄး တေမႃးၸွႆႈထႅမ် ယူတ်းယႃပၼ်ၶႃႈဢေႃႈ” ၼႆယဝ်ႉ။ ပေႃးဝႃႈ ႁွတ်ႈထိုင် ဝၼ်းၶဝ်ႈဝႃႇၵေႃႈ ၸဝ်ႈထဵၼ်မႁႃႇပႃႇလ ၸင်ႇႁွင်ႉဢဝ် ရႁၢၼ်း တင်းသဵင်ႈ မႃးတုမ်ၵၼ်သေ
“ၸဝ်ႈႁဝ်းၶဝ်တီႈၶႃႈ... ၼႂ်းဝႃႇသၢမ်လိူၼ်ၼႆႉ ၸဝ်ႈႁဝ်းၶဝ် တေႁဵတ်း ႁိုဝ် ယူႇသဝ်း တိုဝ်းၵမ် ၵျၢင်ႉၵမ်ၵႂႃႇ တီႈၶႃႈၼေႃႈ”
“တေယူႇသဝ်းတိုဝ်းၵမ် ၵျၢင်ႉၵမ်ၵႂႃႇ ၸွမ်းၼင်ႇဢိရိယႃႇပုတ်ႉသီႇပိူင် ပႆ ၸုၵ်း ၼင်ႈ ၼွၼ်း ၼၼ်ႉတီႈၶႃႈဢေႃႈ”
“ၸဝ်ႈႁဝ်းၶဝ်တီႈၶႃႈ... ပေႃးယူႇသဝ်းၵႂႃႇၸိူင်ႉၼၼ် လၢႆလၢႆတႄႉ ဢမ်ႇ သၢင်ႇထုၵ်ႇတီႈၶႃး၊ ထုၵ်ႇလီယူႇသဝ်းၵႂႃႇ ဢမ်ႇလူင်ဢမ်ႇလိုမ်းၼၼ်ႉဢေႃႈ၊ ၸိူဝ်း ႁဝ်းၼႆႉ လႆႈထွမ်ႇဢဝ် ၶေႃႈသင်ႇသွၼ် တႃႇတေတိုဝ်းၵမ်မႃး တမ်ႈတီႈ တူၼ်တူဝ် မုၼ်ၶမ်းၽြႃးယဝ်ႉ ဢမ်ႇၸိုဝ်ႈၶႃႈႁိုဝ်၊ မုၼ်ၶမ်းၽြႃးႁဝ်းၼႆႉ မၼ်းၸဝ်ႈ ဢမ်ႇလႆႈ ၸႂ် လွင်ႈယူႇသဝ်း လူင်တူဝ်လိုမ်းၶိင်းၼၼ်ႉၵူၺ်း၊ မုၼ်ၶမ်းၽြႃး ၵူၺ်းလႆႈၸႂ် လွင်ႈယူႇသဝ်းၵႂႃႇ ဢမ်ႇလူင်ဢမ်ႇလိုမ်းၼၼ်ႉဢေႃႈ။ ၸဝ်ႈႁဝ်းၶဝ်တီႈၶႃး... ၵေႃႉ ဢၼ် ယူႇသဝ်းလူင်တူဝ်လိုမ်းၶိင်းၼႆႉ ဢပႄႇသီႇတီႈၼၼ်ႉ မိူၼ်ႁိူၼ်းၸဝ်ႈၵဝ်ႇ ယဝ်ႉ၊ ၵွပ်ႈၼႆ ႁႂ်ႈလႆႈတိုၵ်းသူၼ်းၸဝ်ႈႁဝ်းၶဝ် ယႃႇပေယူႇသဝ်း လူင်တူဝ်လိုမ်းၶိင်း သေၵမ်းၶႃႈ” ၸဝ်ႈရႁၢၼ်းၶဝ် ၶိုၼ်းထၢမ်ၸဝ်ႈမႁႃႇပႃႇလဝႃႈ
“ပေႃးၼႆ ၼႂ်းဝႃႇသၢမ်လိူၼ်ၼႆႉ ၸဝ်ႈႁဝ်းသမ်ႉတေ ႁဵတ်းႁိုဝ်ယူႇသဝ်း ၵျၢင်ႉၵမ် တိုဝ်းၵမ်ၵႂႃႇၶႃႈလႃႇ”
“ၸဝ်ႈႁဝ်းၶဝ်တီႈၶႃႈ... ၶႃႈတပႄးတႄႉ လွင်ႈဢိရိယႃႇပုတ်ႉ ဢိင်လင် ငႅၵ်ႈၼွၼ်းၼၼ်ႉ ၶႃႈတပႄးတေ ဢမ်ႇႁဵတ်းသေ တေတိုဝ်းၵမ် ၵျၢင်ႉၵမ်တြႃးၵႂႃႇ တီႈၶႃႈဢေႃႈ”
“သႃထုၶႃႈၸဝ်ႈ... ၶတ်းၸႂ်တြႃးၵႂႃႇ ယႃႇပေလူင်လိုမ်းသေၵမ်းတီႈၶႃႈ”

ထိုင်မႃး ၵၢင်ၶမ်ႈၵၢင်ၶိုၼ်းသေတ ၸဝ်ႈထဵၼ်မႁႃႇပႃႇလ ဢမ်ႇလပ်းဢမ်ႇ ၼွၼ်းသေ သိုပ်ႇၶတ်းၸႂ်ၵၼ်တြႃးၵႂႃႇယူႇ။ ထိုင်မႃး ၶၢဝ်းယၢမ်းတဵင်ႈၶိုၼ်းၼၼ်ႉ ၼမ်ႉတႃမၼ်းၸဝ်ႈ ၸိုမ်းဢွၵ်ႇ ၸိုမ်းဢွၵ်ႇမႃး ပေႃးၼင်ႇ ဢုမ်ၼမ်ႉပွင်ႇၼၼ်ႉ သေ ပဵၼ်တႃၸဵပ်းတႃလႅင်ပႅတ်ႈယဝ်ႉ။ မၼ်းၸဝ်ႈ ဢမ်ႇသုတ်ႈဢမ်ႇႁူၼ် သိုပ်ႇ ၶတ်းၸႂ်ၼင်ႈၵၢၼ်တြႃး တေႃႇထိုင်မိူင်းၸမ်လႅင်း ၸင်ႇတေၶဝ်ႈမိူဝ်းလိုဝ်ႈသဝ်း တီႈၼႂ်းၵျွင်းဢွၼ်ႇမၼ်းၸဝ်ႈယဝ်ႉ။ ထိုင်မႃး ၶၢဝ်းတုင်းသွမ်းၼၼ်ႉ ၸဝ်ႈရႁၢၼ်း ၶဝ်ၸင်ႇမႃး ၽိတ်ႈပၢင်းဝႃႈ

“ၸဝ်ႈႁဝ်းတီႈၶႃႈ... ထိုင်ၶၢဝ်းယၢမ်း တုင်းသွမ်းယဝ်ႉတီႈၶႃႈဢေႃႈ”ၼႆ လႄႈ မၼ်းၸဝ်ႈၵေႃႈ ၸင်ႇဢဝ်သပိတ်ႈ သၢင်ႇၵၢၼ်းသေ ဢွၵ်ႇမႃးတုင်းသွမ်း ယဝ်ႉ။ ၸဝ်ႈရႁၢၼ်းတင်းၼမ် လႆႈႁၼ် တႃမၼ်းၸဝ်ႈၸဵပ်း ၼမ်ႉတႃယွႆႉဝႆႉလႄႈ ၸင်ႇထၢမ်ဝႃႈ
“တႃၸဝ်ႈႁဝ်း ပဵၼ်သင်ၶႃႈ?”
“ယွၼ်ႉလူမ်းမႆႈၶိုၼ်ႈလႄႈ တႃၵဝ်ၸဵပ်းဝႆႉယဝ်ႉ”
“ၸဝ်ႈႁဝ်းတီႈၶႃႈ မေႃယႃလူင်ၼႂ်းဝၢၼ်ႈၼႆႉ ၽိတ်ႈမွၵ်ႇဝႆႉဝႃႈ ပေႃးပဵၼ် တႂ်ႈပဵၼ်ၼိူဝ်မႃးၸိုင် ႁႂ်ႈၵႂႃႇမွၵ်ႇလၢတ်ႈမၼ်းၼႆလႄႈ ၶႃႈတပႄးၶဝ် တေၵႂႃႇလၢတ်ႈ ၼႄမၼ်းၶႃႈၼႃႈ”
“ဢိူဝ်ႈ... ၵႂႃႇလၢတ်ႈလႄႈ”

ၸဝ်ႈရႁၢၼ်းၶဝ်ၵေႃႈ ၵႂႃႇမိူဝ်းလၢတ်ႈၼႄ မေႃယႃသေ မေႃယႃၵေႃႈ ၸင်ႇ ပၼ်မႃး ယႃႈယႃယဝ်ႉ။ ၸဝ်ႈမႁႃႇပႃႇလၵေႃႈ ၼင်ႈၶၢတ်ႈတႃသေ ၶဝ်ႈၵႂႃႇ တုင်းသွမ်း တီႈၼႂ်းဝၢၼ်ႈယဝ်ႉ။ (တီႈတႄႉ မၼ်းၸဝ်ႈ လူဝ်ႇၼွၼ်းသေၶၢတ်ႈတႃ၊ ၵူၺ်းၵႃႈ မၼ်းၸဝ်ႈတိုဝ်းၵမ်ဝႆႉ ၼိသꩡ်ꩡꩪုတင်ႇလႄႈ ၸင်ႇဢမ်ႇတမ်းဝၢင်းၵွင်းလင်)

ဢမ်ႇယွမ်း တၢင်းၶတ်းၸႂ် မႄးထတ်း

ပေႃးဝႃႈ မေႃယႃ လႆႈႁၼ် ၸဝ်ႈမႁႃႇပႃႇလၵေႃႈ ၸင်ႇထၢမ်ဝႃႈ

“ၸဝ်ႈႁဝ်း ပဵၼ်တႃၸဵပ်းၼႆၶႃႈႁႃႉ?”
“ၸႂ်ႈဢိူဝ်ႈ... ႁဝ်းၸဝ်ႈ ပဵၼ်တႃႇၸဵပ်းဢိူဝ်ႈ တၵႃႇ”
“ၸဝ်ႈႁဝ်းတီႈၶႃႈ ယႃႈယႃ ဢၼ်ၶႃႈတၵႃႇ လူႇၵႂႃႇၼၼ်ႉ ၸဝ်ႈႁဝ်း ဢဝ် ၶၢတ်ႈတႃယူႇ ဢမ်ႇၸႂ်ႈၶႃႈႁႃႉ?”
“ဢဝ်ၶၢတ်ႈယူႇ တၵႃႇ”
“ပဵၼ်ႁိုဝ်မႃးၶႃႈလႃႇ ၸဝ်ႈ?”
“တိုၵ်ႉၸဵပ်းမိူၼ်ၵဝ်ႇယူႇၵူၺ်း တၵႃႇ”

တၵႃႇမေႃယႃၵေႃႈ ၸင်ႇဝူၼ်ႉဝႃႈ

“ယႃႈယႃ ဢၼ်ၵဝ်ပၼ်ၵႂႃႇၼၼ်ႉ ပေႃး ၶၢတ်ႈတႃပွၵ်ႈလဵဝ်ၵူၺ်း မၼ်းပေႃးလူဝ်ႇႁၢႆၶႅၼ်းယဝ်ႉလူင်၊ ၼႆႉသမ်ႉ ဢမ်ႇႁၢႆၶႅၼ်း ၼၼ်ႉ ၵွပ်ႈသင်ၼေႃး” ဝူၼ်ႉသေ ၸင်ႇထၢမ်ဝႃႈ
“ၸဝ်ႈႁဝ်းတီႈၶႃႈ... မိူဝ်ႈၶၢတ်ႈတႃၼၼ်ႉ ၸဝ်ႈႁဝ်း ၼင်ႈသေၶၢတ်ႈၶႃႈ ႁႃႉ ဢမ်ႇၼၼ် ၼွၼ်းသေ ၶၢတ်ႈၶႃႈႁႃႉ?”

ပိၵ်ႉသမ်ႉဝႃႈ တၵႃႇမေႃယႃ ထၢမ်ၵႂႃႇၼင်ႇၼၼ် လၢႆပွၵ်ႈလၢႆၽဝ်ႇၵေႃႈ မၼ်းၸဝ်ႈ တေႃႈဢမ်ႇတွပ်ႇလၢတ်ႈသင်လႄႈ မေႃယႃၸင်ႇဝူၼ်ႉဝႃႈ တေၵႂႃႇလွမ် တူၺ်း တီႈၵျွင်း ဢၼ်ၸဝ်ႈမႁႃႇပႃႇလ ယူႇသဝ်းၼၼ်ႉၵွၼ်ႇၼႆလႄႈ ၸင်ႇဝႃႈ

“ၸဝ်ႈႁဝ်း လူဝ်ႇယေႃးၶိင်းၵႂႃႇၵေႃႈ ၵႂႃႇၶႃႈလႃႈ” ၼႆယဝ်ႉ။ ဝၢႆးသေ ၸဝ်ႈ ယေႃးၶိင်းၵႂႃႇၵေႃႈ မေႃယႃ ၸင်ႇၵႂႃႇလွမ်တူၺ်း တီႈၵျွင်းၸဝ်ႈယဝ်ႉ။ တီႈၵျွင်းၸဝ်ႈ ၼၼ်ႉ ၵူၺ်းလႆႈႁၼ် ဢွင်ႈတီႈပႆၽၢႆႈပႆတဵဝ်းလႄႈ ဢွင်ႈတီႈၼင်ႈၵူၺ်း၊ သမ်ႉဢမ်ႇ လႆႈႁၼ် ဢွင်ႈတီႈၼွၼ်းလႄႈ ဝၢႆးသေ ၶိုၼ်းထူပ်းႁၼ်ၸဝ်ႈမႁႃႇပႃႇလၼၼ်ႉ မေႃ ယႃ ၸင်ႇၶိုၼ်းထၢမ်ဝႃႈ
“ၸဝ်ႈႁဝ်းတီႈၶႃႈ... မိူဝ်ႈၶၢတ်ႈတႃၼၼ်ႉ ၸဝ်ႈႁဝ်း ၼင်ႈသေၶၢတ်ႈတႃ ၶႃႈႁႃႉ ဢမ်ႇၼၼ် ၼွၼ်းသေၶၢတ်ႈတႃၶႃႈႁႃႉ?” ၼႆယဝ်ႉ။ ၵူၺ်းၵႃႈ ၸဝ်ႈမႁႃႇပႃႇ လ ဢမ်ႇတွပ်ႇသေၶေႃႈ။ မေႃယႃၸင်ႇၶိုၼ်းဝႃႈ
“ၸဝ်ႈႁဝ်းတီႈၶႃႈ... ယႃႇပေႁဵတ်းၸိူင်ႉၼၼ်သေၵမ်းၶႃႈ... တြႃးဢၼ် ဝႃႈၼၼ်ႉ ပေႃးဝႃႈ ယူႇလီသုင်းဝၢၼ်ၵွၼ်ႇ ၸင်ႇတေၸၢင်ႈၶတ်းၸႂ်ႁဵတ်းသၢင်ႈလႆႈ ၶႃႈဢေႃႈ... ၸဝ်ႈႁဝ်း ၶႅၼ်းတေႃႈ ၵိင်းၼွၼ်းသေ ၶၢတ်ႈတႃသေၵမ်းၶႃႈ ၶႃႈတပႄး ယွၼ်းတွင်းပၢၼ်ႇ ယႂ်ႇယႂ်ႇၼမ်ၼမ်တီႈၶႃႈဢေႃႈ” ၸဝ်ႈၵေႃႈ ၸင်ႇလၢတ်ႈဝႃ
“တၵႃႇႁဝ်း... ၵႂႃႇသေၵွၼ်ႇတႃႉ ႁဝ်းၸဝ်ႈမီးလွင်ႈလူဝ်ႇလႆႈဢုပ်ႇၵုမ် ၵွၼ်ႇဢိူဝ်ႈ” ၼႆယဝ်ႉ။ တီႈဝၢၼ်ႈၼၼ်ႉ ပုၼ်ႈတႃႇ ၸဝ်ႈတေလႆႈဢုပ်ႇၵုမ်ဢၼ်ဝႃႈ ၼၼ်ႉ ဢမ်ႇမီးပီႈၼွင်ႉမၼ်းၸဝ်ႈသေၵေႃႉ၊ မၼ်းၸဝ်ႈလူဝ်ႇလႆႈ ဢုပ်ႇၵုမ်ၶိုၼ်း တူဝ်ၸဝ်ႈၵဝ်ႇလႄႈ ၸင်ႇဝႃႈၵွႃႇ ၼင်ႇၼၼ်ယဝ်ႉ။ ပေႃးဝႃႈ မေႃယႃ ၽၢၵ်ႈမိူဝ်းၵႂႃႇ ယဝ်ႉၵေႃႈ မၼ်းၸဝ်ႈ ၸင်ႇဢုပ်ႇၵုမ်ၶိုၼ်း တူဝ်မၼ်းၸဝ်ႈၼင်ႇၼႆယဝ်ႉ။
“ၸဝ်ႈပႃႇလိတ ၸဝ်ႈၵဝ်ႇတေတူၺ်းထိုင်ၼိူဝ် တႃၸဵပ်းၸဝ်ႈၵဝ်ႇႁႃႉ ၸဝ်ႈၵဝ်ႇ တေတူၺ်း သႃႇသၼႃႇၶေႃႈၽြႃးသင်ႇသွၼ်ႁႃႉ၊ ၸဝ်ႈပႃႇလိတ... ၼႂ်းသမ်ႇသရႃႇယၢဝ်းၵႂၢင်ႈလူင်ၼၼ်ႉ ၸဝ်ႈၵဝ်ႇလႆႈပဵၼ် ၵူၼ်းတႃမွတ်ႇမႃးၼၼ်ႉ ဢမ်ႇၼပ်ႉဢၢၼ်ႇလႆႈယဝ်ႉ။ ပိၵ်ႉသမ်ႉဝႃႈ လႆႈလတ်းမႃး ၼႂ်းၶၢဝ်းတၢင်းသမ်ႇသရႃႇ ယၢဝ်းႁီးလူင်တၢၼ်ႇၼၼ်ႉၵေႃႈ တေႃႈဢမ်ႇလႆႈထူပ်းႁၼ်ၽြႃးမႃး၊ တေႃႈဢမ််ႇလႆႈ တိုဝ်းၵမ်တြႃးမႃး။ ယၢမ်းလဵဝ် ၼႂ်းဝႃႇသၢမ်လိူၼ်ၼႆႉ ၵဝ်တေဢမ်ႇၼွၼ်းသေ တေၶတ်းၸႂ်ၵၢၼ်တြႃးၵဝ်ယဝ်ႉ။ ၸဝ်ႈပႃႇလိတ... ပိၵ်ႉသမ်ႉဝႃႈ မၢၵ်ႇတႃၼႆႉ ၶႂ်ႈတႅၵ်ႇလႅဝ်ၵေႃႈ ပွႆႇမၼ်းတႅၵ်ႇလႅဝ်ၵႂႃႇတႃႉ... တိုဝ်းၵမ်ၸွမ်းၶေႃႈဢၼ် ၽြႃးသင်ႇ သွၼ်ၼၼ်ႉတႃႉ... ယႃႇပေၵုမ်ႇၵႂႃႇ ၸပ်းပႅၼ်းမၢၵ်ႇတႃယူႇလႃႈ” ၼႆသေ သင်ႇ သွၼ် တူဝ်ၸဝ်ႈၵဝ်ႇၼင်ႇၼႆယဝ်ႉ။

ၸၵ်ၶူၼိ ႁႃယၼ်တု မမႃယိတႃၼိ သေႃတႃၼိ ႁႃယၼ်တု တထေဝ ၵႃယေႃ။ သၿ်ၿိမ်ပိၻံ ႁႃယတု ၻေႁၼိသ်သိတံ၊ ၵိံ ၵႃရၼႃ ပႃလိတ တွံ ပမꩡ်ꩡသိ။

ၸၵ်ၶူၼိ ꩡီရၼ်တု၊ မမႃယိတႃၼိ၊ သေႃတႃၼိ ꩡီရၼ်တု တထေဝ ၵႃယေႃ။ သၿ်ၿမ်ပိၻံ ꩡီရတု ၻေႁၼိသ်သိတံ ၵိံ ၵႃရၼႃ ပႃလိတ တွံ ပမꩡ်ꩡသိ။

ၸၵ်ၶူၼိ ꧤိꩡ်ꩡၼ်တု၊ မမႃယိတႃၼိ၊ သေႃတႃၼိ ꧤိꩡ်ꩡၼ်တု တထေဝ ၵႃယေႃ။ သၿ်ၿမ်ပိၻံ ꩡီရတု ၻေႁၼိသ်သိတံ ၵိံ ၵႃရၼႃ ပႃလိတ တွံ ပမꩡ်ꩡသိ။

ၸဝ်ႈပႃႇလိတ မၢၵ်ႇတႃ ဢၼ်လီႁၵ်ႉၼႃႇၼၼ်ႉ ၶႂ်ႈလူႉသုမ်းၵေႃႈ ပွႆႇမၼ်း လူႉသုမ်းသေလႄႈ။ လိူဝ်သေၼၼ်ႉ ႁူၸိူဝ်းၼႆႉ ၶႂ်ႈလူႉသုမ်းၵေႃႈ ပွႆႇမၼ်းလူႉသုမ်း သေလႄႈ၊ တူဝ်ၵေႃႈ ပွႆႇမၼ်းလူႉသုမ်းသေလႄႈ၊ ဢၼ်ၵပ်းၵၢႆႇတူဝ်တင်းသဵင်ႈ ၼၼ်ႉ ၶႂ်ႈလူႉသုမ်းၵေႃႈ ပွႆႇမၼ်းလူႉသုမ်းလႄႈ။ ၵွပ်ႈသင် ၸဝ်ႈၵဝ်ႇသမ်ႉတေ ၵုမ်ႇလူင်လိုမ်းယူႇလႃႇ။ ၸဝ်ႈပႃႇလိတ မၢၵ်ႇတႃ ဢၼ်လီႁၵ်ႉၼႃႇၼၼ်ႉ ၶႂ်ႈမွတ်ႇၵေႃႈ ပွႆႇမၼ်း မွတ်ႇသေလႄႈ။ လိူဝ်သေၼၼ်ႉ ႁူၸိူဝ်းၼႆႉ ၶႂ်ႈၼူၵ်ႇၵေႃႈ ပွႆႇမၼ်းၼူၵ်ႇ သေလႄႈ၊ တူဝ်ၵေႃႈ ပွႆႇမၼ်းယၢတ်ႇပင်းသေလႄႈ၊ ဢၼ်ၵပ်းၵၢႆႇတူဝ်တင်းသဵင်ႈၼၼ်ႉ ၶႂ်ႈ ယၢတ်ႇပင်းၵေႃႈ ပွႆႇမၼ်းယၢတ်ႇပင်းလႄႈ။ ၵွပ်ႈသင် ၸဝ်ႈၵဝ်ႇသမ်ႉတေ ၵုမ်ႇလူင် လိုမ်းယူႇလႃႇ။ ၸဝ်ႈပႃႇလိတ မၢၵ်ႇတႃ ဢၼ်လီႁၵ်ႉၼႃႇၼၼ်ႉ ၶႂ်ႈတႅၵ်ႇလႅဝ်ၵေႃႈ ပွႆႇမၼ်း တႅၵ်ႇလႅဝ်သေလႄႈ။ လိူဝ်သေၼၼ်ႉ ႁူၸိူဝ်းၼႆႉ ၶႂ်ႈတႅၵ်ႇလႅဝ်ၵေႃႈ ပွႆႇမၼ်းတႅၵ်ႇ လႅဝ်သေလႄႈ၊ တူဝ်ၵေႃႈ ပွႆႇမၼ်းတႅၵ်ႇလႅဝ်သေလႄႈ၊ ဢၼ်ၵပ်းၵၢႆႇတူဝ်တင်းသဵင်ႈ ၼၼ်ႉ ၶႂ်ႈတႅၵ်ႇလႅဝ်ၵေႃႈ ပွႆႇမၼ်းတႅၵ်ႇလႅဝ်လႄႈ။ ၵွပ်ႈသင် ၸဝ်ႈၵဝ်ႇသမ်ႉတေ ၵုမ်ႇလူင်လိုမ်းယူႇလႃႇ။

မေႃယႃပွႆႇၽႃႈပႅတ်ႈ မႄးထတ်း

မၼ်းၸဝ်ႈ ဢဝ်ၶေႃႈၵႂၢမ်းၵႃႇထႃႇ သၢမ်ၶေႃႈၼႆႉ သင်ႇသွၼ်တူဝ်မၼ်းၸဝ်ႈ ယဝ်ႉ ၵူၺ်းၼင်ႈသေ ၶၢတ်ႈတႃၵူၺ်း၊ ႁဵတ်းၼၼ်သေ ၶဝ်ႈၵႂႃႇတုင်းသွမ်းၼႂ်းဝၢၼ်ႈ ယဝ်ႉ။ ပေႃးဝႃႈ မေႃယႃ မႃးႁၼ်မၼ်ႈၸဝ်ႈၼႆ မေႃယႃၸင်ႇထၢမ်

“ၸဝ်ႈႁဝ်း ၸွင်ႇၶၢတ်ႈတႃယူႇၶႃႈႁိုဝ်?”
“တၵႃႇမေႃယႃ ႁဝ်းၸဝ်ႈၶၢတ်ႈယူႇ”
“ပဵၼ်ႁိုဝ်မႃးၶႃႈလႃႇၸဝ်ႈ?”
“တိုၵ်ႉၸဵပ်းမိူၼ်ၵဝ်ႇယူႇၵူၺ်း”
“ၸဝ်ႈႁဝ်း ၼင်ႈသေၶၢတ်ႈတႃၶႃႈႁႃႉ ၼွၼ်းသေ ၶၢတ်ႈတႃၶႃႈႁႃႉ?”

ပေႃးဝႃႈ မေႃယႃ ထၢမ်ၼင်ႇၼၼ် မၼ်းၸဝ်ႈ ဢမ်ႇတွပ်ႇသင်သေ ယူႇ ဝႆႉ တဵတ်ႇတဵတ်ႇယဵၼ်ယဵၼ်ၵူၺ်းလႄႈ မေႃယႃၸင်ႇဝႃႈ

“ၸဝ်ႈႁဝ်းတီႈၶႃႈ... ၸဝ်ႈႁဝ်းၶဝ်ၼႆႉ ဢမ်ႇႁဵတ်းၸွမ်းၼင်ႇ မေႃယႃ ၸီႉသင်ႇၼၼ်ႉၶႃႈလူင်၊ တႄႇဢဝ်မိူဝ်ႈၼႆႉၵႂႃႇ ၸဝ်ႈႁဝ်းၶဝ် ယႃႇပေလၢတ်ႈဝႃႈ ၶႃႈႁဝ်း ပဵၼ်ၵေႃႉယူတ်းယႃ ပၼ်ယႃႈယႃၸဝ်ႈႁဝ်းၶဝ်သေၵမ်းၶႃႈလႃႈ၊ ၶႃႈတပႄး ၵေႃႈ တေဢမ်ႇလၢတ်ႈ လွင်ႈဝႃႈ ၶႃႈလႆႈယူတ်းယႃပၼ် ၸဝ်ႈႁဝ်းၶဝ်ၼၼ်ႉယဝ်ႉ”

ၸဝ်ႈထဵၼ်ၸၵ်ႉၶုပႃႇလ ပဵၼ်သုၵ်ႉၶဝိပသ်သၵ ရႁၢၼ်းတႃႇ မႄးထတ်း

ယွၼ်ႉပိူဝ်ႈ မေႃယႃပွႆႇၽႃႈပႅတ်ႈယဝ်ႉလႄႈ မၼ်းၸဝ်ႈၵေႃႈ ၶိုၼ်းပွၵ်ႈမႃး တီႈၵျွင်းသေ လၢတ်ႈဝႃႈ “မေႃယႃတႄႉ ၸုၼ်ႉပႅတ်ႈမႂ်းယဝ်ႉ ၵူၺ်းၵႃႈ ယႃႇပေၸုၼ်ႉ ပႅတ်ႈဢိရိယႃႇပုတ်ႉ ဢၼ်ၸဝ်ႈၵဝ်ႇတိုဝ်းၵမ်ဝႆႉၼၼ်ႉ” ၼႆသေ လွတ်ႈႁေႃးၵႃႇထႃႇ ႁူဝ်ၼႆႉယဝ်ႉ။

ပꩦိၵ်ၶိတ်တေႃ တိၵိၸ်ꧢႃယ၊ ဝေꩡ်ၸေၼႃပိ ဝိဝꩡ်ꩡိတေႃ။ ၼိယတေႃ မၸ်ၸုရႃꩡသ်သ၊ ၵိံ ပႃလိတ ပမꩡ်ꩡသိ။ ၸဝ်ႈပႃႇလိတ တႃႇတေယူတ်းယႃၼၼ်ႉ မေႃယႃတႄႉ ပွႆႇၽႃႈပႅတ်ႈယဝ်ႉ။ ဢဝ်ၼွပ်ႇဢၢပ်ႈပၼ် မရၼၶုၼ်တၢႆယဝ်ႉ။ ၵွပ်ႈသင် မႂ်းသမ်ႉတေၵုမ်လူင်တူဝ် လိုမ်းၶိင်းယူႇလႃႇ။

မၼ်းၸဝ်ႈ ဢဝ်ၵႃႇထႃႇႁူဝ်ၼႆႉ သင်ႇသွၼ်တူဝ်မၼ်းၸဝ်ႈသေ သိုပ်ႇၶတ်း ၸႂ်ၵၢၼ်တြႃးၵႂႃႇ တင်းၶိုၼ်းယဝ်ႉ။ ထိုင်မႃး ၶၢဝ်းယၢမ်းႁူဝ်မိူင်းသႂ်ၼၼ်ႉ မၢၵ်ႇတႃ မၼ်းၸဝ်ႈ တင်းသွင်ၶွၼ်ၵေႃႈ တႅၵ်ႇလႅဝ်ၵႂႃႇ မွတ်ႇၵႂႃႇသေ ဢမ်ႇႁိုင်ဢမ်ႇၼၢၼ်း မၼ်းၸဝ်ႈၵေႃႈ ၵိလေႇသႃႇမူၺ်ႉမူတ်း၊ ပဵၼ်သုၵ်ၶဝိပသ်သၵ ရႁၢၼ်းတႃႇၵႂႃႇယဝ်ႉ။ ဝၢႆးၼၼ်ႉ မၼ်းၸဝ်ႈ ၸင်ႇၶဝ်ႈၵႂႃႇလိုဝ်ႈဝႆႉ ၼႂ်းၵျွင်းဢွၼ်ႇမၼ်းၸဝ်ႈယဝ်ႉ။

ရႁၢၼ်းတႃႇပꩦိသမ်ႇꧤိတႃႇပတ်ႉတၶဝ်ၸဝ်ႈ ပေႃးဝႃႈ ထိုင်မႃး ၶၢဝ်းတုင်းသွမ်းၵေႃႈ ရႁၢၼ်းၶဝ် ၸင်ႇမႃးတီႈမၼ်းၸဝ်ႈ သေ လၢတ်ႈဝႃႈ

“ၸဝ်ႈႁဝ်းတီႈၶႃႈ ထိုင်ၶၢဝ်းယၢမ်း ၵႂႃႇတုင်းသွမ်းယဝ်ႉဢေႃႈ”
“ထိုင်ၶၢဝ်းတုင်းသွမ်းယဝ်ႉၶႃႈႁႃႉ?”
“ၸႂ်ႈၶႃႈဢေႃႈ”
“ၸဝ်ႈႁဝ်းၶဝ် ၵႂႃႇတုင်းၶႃႈလႃႈ”
“ၸဝ်ႈႁဝ်း သမ်ႉပဵၼ်သင်ၶႃႈလႃႇ?”
“ၸဝ်ႈႁဝ်းၶဝ်တီႈၶႃႈ... တႃၶႃႈတပႄး မွတ်ႇယဝ်ႉၶႃႈဢေႃႈ”

ၸဝ်ႈရႁၢၼ်းၶဝ် ဢွၼ်ၵၼ် မႃးလွမ်တူၺ်း တႃမၼ်းၸဝ်ႈသေ မၢင်ၸဝ်ႈ ၼမ်ႉတႃပေႃးတူၵ်းၸွမ်းယဝ်ႉ။

“ၸဝ်ႈႁဝ်း ပဵၼ်ၼၼ်သေတႃႉ ယႃႇပေမႆႈၸႂ်သင်ၶႃႈ၊ ၸိူဝ်းႁဝ်း တေ ၶတ်းၸႂ် လူႁၼ်လုမ်းလႃးၸဝ်ႈႁဝ်းဢေႃႈ”ၼႆသေ ၵႂႃႇတုင်းသွမ်းၼႂ်းဝၢၼ်ႈယဝ်ႉ။

ၵူၼ်းဝၢၼ်ႈ ၵူၼ်းသူၼ်ၶဝ် ဢမ်ႇလႆႈႁၼ် မၼ်းၸဝ်ႈလႄႈ ၸင်ႇထၢမ်ဝႃႈ

“ၸဝ်ႈမႁႃႇပႃႇလႁဝ်း ၵႂႃႇမီးလႂ်ၶႃႈလႃႇ မၼ်းၸဝ်ႈ ဢမ်ႇမႃးၶႃႈႁႃႉ?”

ၸဝ်ႈရႁၢၼ်းၶဝ်ၵေႃႈ ၸင်ႇလၢတ်ႈၼေလွင်ႈတၢင်းမၼ်း ငဝ်ႈတေႃႇပၢႆ ယဝ်ႉ။ ပေႃးဝႃႈ လႆႈငိၼ်းၼင်ႇၼၼ် တၵႃႇၶဝ် ၸင်ႇၸႂ်ႉႁႂ်ႈမိူဝ်းသူင်ႇပၼ် ၶဝ်ႈသွမ်း ၽၵ်းသွမ်း တီႈၵျွင်းသေ တူဝ်တၵႃႇၶဝ်ၵေႃႈ ဢွၼ်ၵၼ်မိူဝ်းႁွတ်ႈထိုင် တီႈၵျွင်းမၼ်း ၸဝ်ႈယဝ်ႉ။ တၵႃႇၶဝ် ႁႆႈသေ ဝႆႈလဝ်ႈဝႃႈ

“ပဵၼ်ၼႆသေတႃႉ ၸဝ်ႈႁဝ်း ယႃႇပေမႆႈၸႂ်ၶႃႈ... ၸိူဝ်းႁဝ်းတၵႃႇ တေ လူႁၼ်လုမ်းလႃး ၸဝ်ႈႁဝ်းၶဝ်ယူႇၶႃႈဢေႃႈ”ၼႆသေ ပွၵ်ႈမိူဝ်းၵႂႃႇယဝ်ႉ။ တႄႇဢဝ် ဝၼ်းၼၼ်ႉမႃး တၵႃႇၶဝ်ၵေႃႈ ဢဝ်ၶဝ်ႈသွမ်းၽၵ်းသွမ်း ၽေႃးၸၼ်ႇမိူဝ်းသူင်ႇထိုင် တမ်ႈတီႈၵျွင်းယဝ်ႉ။ ၸဝ်ႈထဵၼ်ၸၵ်ႉၶုပႃႇလၵေႃႈ ဢဝ်ၶေႃႈတြႃး သင်ႇသွၼ်ပၼ် ၸဝ်ႈရႁၢၼ်းႁူၵ်းသိပ်းၸဝ်ႈၼၼ်ႉၵႂႃႇ တႃႇသေႇယဝ်ႉ။ ၶဝ်ၸဝ်ႈၸိူဝ်းၼၼ်ႉၵေႃႈ ႁပ်ႉဢဝ် ၶေႃႈသင်ႇသွၼ်မၼ်းၸဝ်ႈသေ သိုပ်ႇၶတ်းၸႂ် ႁဵတ်းၵၢၼ်တြႃးၵႂႃႇလႄႈ ၽိူဝ်ႇႁွတ်ႈထိုင်မႃး လိူၼ်သိပ်းဢဵတ်းမူၼ်း ဝၼ်းၸမ်တေႁဵတ်းပဝႃႇရၼႃႇၼၼ်ႉ ၶဝ်ၸဝ်ႈတင်းသဵင်ႈ လႆႈႁွတ်ႈထိုင်ၸၼ်ႉဢရႁတ်ႉထသေ ပဵၼ်ပꩦိသမ်ႇꧤိတႃႇ ရႁၢၼ်းတႃႇၵႂႃႇယဝ်ႉ။

သင်ႇၶေႃႈၵႂၢမ်းထိုင် ၵေႃႉၼွင်ႉ ၸူႇလပႃႇလ မႄးထတ်း

ပေႃးဝႃႈ ဢွၵ်ႇဝႃႇယဝ်ႉၵေႃႈ ၸိူဝ်းၶဝ်ၸဝ်ႈႁူၵ်းသိပ်းၼၼ်ႉ ၶႂ်ႈမိူဝ်းဝႆႈသႃ ၽြႃးပဵၼ်ၸဝ်ႈလႄႈ ၸင်ႇၵႂႃႇၸူး တီႈၸဝ်ႈထဵၼ်ၸၵ်ႉၶုပႃႇလသေ

“ၸဝ်ႈႁဝ်းတီႈၶႃႈ... ၸိူဝ်းၶႃႈတပႄးၶဝ် ၶႂ်ႈမိူဝ်းဝႆႈသႃ မုၼ်ၶမ်းၽြႃး တီႈ ၶႃႈဢေႃႈ” ၸဝ်ႈထဵၼ်ၵေႃႈ ၸင်ႇဝူၼ်ႉဝႃႈ
“ၵဝ်ၸဝ်ႈၼႆႉတႄႉ ဢမ်ႇပေႃးမီးႁႅင်းယဝ်ႉ။ ၸွမ်းထိူၼ်ႇ ၸွမ်းတႃႈ ၸွမ်းတၢင်းၵေႃႈ ပဵၼ်ဢွင်ႈတီႈယူႇ ၽီလူးၶဝ်ပႂ်ႉဝႆႉၵူၺ်းၵူၺ်း၊ ပေႃးဝႃႈ ၵဝ်မိူဝ်းၸွမ်း ၸဝ်ႈရႁၢၼ်းၶဝ်ၸိုင် ၸိူဝ်းၶဝ်တေလႆႈယၢပ်ႇၸႂ်ၸွမ်းၵဝ်ယဝ်ႉ။ တႃႇတေလႆႈ ၶဝ်ႈ သွမ်းၵေႃႈ တေယၢပ်ႇၸႂ်ယဝ်ႉ။ ၵဝ်ၵိုင်ႇလီ ၸႂ်ႉႁႂ်ႈၶဝ်ၸဝ်ႈ မိူဝ်းဢွၼ်တၢင်းၵဝ် ယဝ်ႉ”ၼႆသေ ၸင်ႇလၢတ်ႈဝႃႈ
“ၸဝ်ႈရႁၢၼ်းၶဝ် မိူဝ်းဢွၼ်တၢင်းၶႃႈလႃႈ”
“ၸဝ်ႈႁဝ်းသမ်ႉတေႁဵတ်းႁိုဝ်ၶႃႈလႃႇ?”
“ၵဝ်ၸဝ်ႈ ၸင်ႇၵွႆႈမိူဝ်းဝၢႆးလင်ယဝ်ႉ ပေႃးဝႃႈ သူၸဝ်ႈ ႁွတ်ႈထိုင်မိူဝ်း တီႈသႃႇဝတ်ႉထိၸိုင် ၼွင်ႉၸၢႆးၵဝ် တေႁၼ်သူၸဝ်ႈသေ မၼ်းတေထၢမ်လွင်ႈ ၵဝ်ယဝ်ႉ။ ပေႃးၼၼ်ၵေႃႈ လၢတ်ႈၼႄဝႃႈ လွင်ႈတႃၵဝ်ၸဝ်ႈ မွတ်ႇၼၼ်ႉပၼ်မၼ်း တႃႉ။ ပေႃးဝႃႈ ၼွင်ႉၸၢႆးၵဝ် ပွႆႇၵူၼ်းမႃးႁပ်ႉၵွၼ်ႇ ၵဝ်ၸင်ႇတေမိူဝ်းၸွမ်းယဝ်ႉ။ ၸိူဝ်းသူၸဝ်ႈတင်းသဵင်ႈ ဢဝ်ၶေႃႈၵႂၢမ်းၵဝ်ၼႆႉသေ မိူဝ်းဝႆႈလဝ်ႈထိုင် မုၼ်ၶမ်းၽြႃး ႁူမ်ႈပႃး ၸဝ်ႈမႁႃႇသႃႇဝၵလူင်ၶဝ်ၸဝ်ႈတႃႉ” ၼႆသေ ၸႂ်ႉႁႂ်ႈၸဝ်ႈရႁၢၼ်းၶဝ် မိူဝ်း ထႃႈယဝ်ႉ။

သင်ႇၶႃႇၸဝ်ႈတင်းလၢႆၵေႃႈ ဝႆႉၵိုတ်း ၸဝ်ႈထဵၼ်ၸၵ်ႉၶုပႃႇလသေ ၶဝ်ႈမိူဝ်း တုင်းသွမ်း တီႈၼႂ်းဝၢၼ်ႈယဝ်ႉ။ ပေႃးဝႃႈ ၵူၼ်းဝၢၼ်ႈႁၼ်ၶဝ်ၸဝ်ႈၵေႃႈ ၸင်ႇသိူဝ်ႇ ပၼ် တီႈယူႇတီႈၼင်ႈ လူႇတၢၼ်းၶဝ်ႈသွမ်းၽၵ်းသွမ်းသေ ထၢမ်ဝႃႈ

“ၸဝ်ႈႁဝ်းၶဝ် တေဢွၵ်ႇတႃႈဢွၵ်ႇတၢင်းၶႃႈႁႃႉ?”
“ၸႂ်ႈဢိူဝ်ႈ တၵႃႇၶဝ် ႁဝ်းတေမိူဝ်းဝႆႈသႃ ၽြႃးပဵၼ်ၸဝ်ႈဢိူဝ်ႈ”

တၵႃႇၶဝ် ဢွၼ်ၵၼ်ႁၢမ်ႈတၢပ်ႈၵေႃႈ တေႃႈဢမ်ႇလႆႈယဝ်ႉလႄႈ ၵမ်းလိုၼ်း တၵႃႇၶဝ် ၵိုၵ်းတင်းၶေႃးၶူမ် မိူဝ်းသူင်ႇၶဝ်ၸဝ်ႈ ပွတ်းတၢင်းသေ ၸဝ်ႈၶဝ်ၵေႃႈ ပူၼ်ႉမိူဝ်းထိုင်တီႈ ၵျွင်းၸေႇတဝၼ်ႇ တီႈဢၼ်မုၼ်ၶမ်းၽြႃးယူႇသဝ်းဝႆႉၼၼ်ႉ ယဝ်ႉ။ ၶဝ်ၸဝ်ႈၵေႃႈ ဢဝ်ၶေႃႈၵႂၢမ်းၸဝ်ႈထဵၼ်ၸၵ်ႉၶုပႃႇလ ဝႆႈလဝ်ႈထိုင်မုၼ်ၶမ်း ၽြႃး ဝႆႈလဝ်ႈထိုင် မႁႃႇသႃႇဝၵပႅတ်ႇသိပ်းၸဝ်ႈၼၼ်ႉယဝ်ႉ။ ထႅင်ႈဝၼ်းၼိုင်ႈ ၸိူဝ်း ၶဝ်ၸဝ်ႈ ၸင်ႇၵႂႃႇတုင်းသွမ်း တၢင်းႁိူၼ်းၸူႇလပႃႇလသေ ၸူႇလပႃႇလ ဢမ်ႇလႆႈ ႁၼ်ပီႈဢၢႆႈမၼ်းလႄႈ ၸင်ႇတွင်ႈထၢမ်ၶဝ်ၸဝ်ႈ၊ ၶဝ်ၸဝ်ႈၵေႃႈ လၢတ်ႈၼႄ လွင်ႈ ၸဝ်ႈထဵၼ်ၼၼ်ႉပၼ်ၵႂႃႇ တင်းသဵင်ႈယဝ်ႉ။

ပွႆႇၸဝ်ႈသၢင်ႇ ၵႂႃႇပၢင်းၸဝ်ႈထဵၼ်ႇမႃး မႄးထတ်း

ပေႃးဝႃႈ ၸူႇလပႃႇလ လႆႈငိၼ်းၶေႃႈၵႂၢမ်း တီႈၸဝ်ႈသင်ႇၶႃႇၶဝ်ၸိူဝ်းၼၼ်ႉ ၵေႃႈ မၼ်းႁွင်ႉႁွင်ႉႁႆႈႁႆႈသေ လၢတ်ႈဝႃႈ

“ၸဝ်ႈႁဝ်းၶဝ်ၶႃႈ ၶႃႈတပႄး တေလႆႈႁဵတ်းႁိုဝ်ၶႃႈလႃႇ?”
“တၵႃႇ... မၼ်းၸဝ်ႈမုင်ႈမွင်း ၶႂ်ႈႁႂ်ႈတၵႃႇ သူင်ႇၵူၼ်းသေၵေႃႉၵေႃႉ ၵႂႃႇ ႁပ်ႉမၼ်းၸဝ်ႈသေ တေၶႂ်ႈပွၵ်ႈမႃးၸွမ်း ၵေႃႉၵႂႃႇႁပ်ႉၼၼ်ႉ ၼႆယဝ်ႉ”
“ဢေႃႈတီႈၶႃႈ... လုၵ်ႈဢွၼ်ႇၵေႃႉၼႆႉ ပဵၼ်လၢၼ်ႇၶႃႈ ၸိုဝ်ႈႁွင်ႉဝႃႈ ပႃႇ လိတၼႆဢေႃႈ၊ ၸဝ်ႈႁဝ်းၶဝ် ၸႂ်ႉႁႂ်ႈမၼ်းၸၢႆး ၵႂႃႇႁပ်ႉမၼ်းၸဝ်ႈၶႃႈလႄႈ” ၼႆယဝ်ႉ။ သင်ႇၶႃႇၸဝ်ႈၶဝ်ၵေႃႈ ၸင်ႇဝႃႈ
“တၵႃႇ... လုၵ်ႈဢွၼ်ႇၵေႃႉၼႆႉ ပေႃးတေႁဵတ်းၼႆသေ သူင်ႇမၼ်းၵႂႃႇ ၸိုင် ၸွမ်းတႃႈၸွမ်းတၢင်းၵေႃႈ မီးၽေးတင်းၼမ်ယဝ်ႉ။ ယွၼ်ႉၼၼ် ၵိုင်ႇလီ ဢဝ် ၸၢႆးဢွၼ်ႇၵေႃႉၼႆႉ ၼုင်ႈပဵၼ်သၢင်ႇသေ သူင်ႇၵႂႃႇႁပ်ႉၼၼ်ႉ တေသၢင်ႇထုၵ်ႇ ယူႇ”
“သၢင်ႇထုၵ်ႇၼင်ႇႁိုဝ်ၵေႃႈ ၸဝ်ႈႁဝ်းၶဝ် ၶပ်ႉၶိုင်ၵႂႃႇတီႈၶႃႈလႄႈ”

သင်ႇၶႃႇၸဝ်ႈၶဝ်ၵေႃႈ ၸင်ႇဢဝ်ၸၢႆးဢွၼ်ႇၵေႃႉၼၼ်ႉ ၼုင်ႈပၼ်သၢင်ႇ သေ ၼႂ်းၶၢဝ်းတၢင်းၽၢၵ်ႇလိူၼ်ၼၼ်ႉ ၸင်ႇသွၼ်ပၼ်မၼ်း ႁႂ်ႈမေႃၼုင်ႈမႆသၢင်ႇ ၵၢၼ်း ႁႂ်ႈမေႃဢုမ်ႈႁွပ်ႇသပိတ်ႈ လၢႆးယူႇလၢႆးသဝ်း ၵူႈပိူင်ပိူင်သေ ၸင်ႇလၢတ်ႈၼႄ သဵၼ်ႈတၢင်း တႃႇတေၵႂႃႇၸူး ၸဝ်ႈထဵၼ်ၸၵ်ႉၶုပႃႇလယဝ်ႉ။ ၸဝ်ႈသၢင်ႇၵေႃႈ ၸင်ႇဢွၵ်ႇၶၢဝ်းတၢင်း ႁွတ်ႈထိုင်ၵႂႃႇ တီႈႁူဝ်ဝၢၼ်ႈ ၼၼ်ႉယဝ်ႉ။ လႆႈႁၼ် တၵႃႇၵေႃႉၼိုင်ႈသေ

“တၵႃႇ... ႁိမ်းဝၢၼ်ႈၼႆႉ မီးဝႆႉ ၵျွင်းထိူၼ်ႇဢွၼ်ႇၵျွင်းၼိုင်ႈ ၸွင်ႇၸႂ်ႈ?”
“ဢေႃႈ... မီးၶႃႈဢေႃႈ”
“ၸဝ်ႈဢၼ်ယူႇသဝ်း တီႈၵျွင်းၼၼ်ႉ ၸိုဝ်ႈဝႃႈႁိုဝ်?”
“ၸဝ်ႈပႃႇလိတၼႆၶႃႈဢေႃႈ”
“ပေႃးၼၼ် ၼႄပၼ်ႁဝ်းၸဝ်ႈ တၢင်းၵႂႃႇၵျွင်းၼၼ်ႉလူး”
“ၸဝ်ႈႁဝ်း သမ်ႉပဵၼ်ၽႂ်ၶႃႈလႃႇ?”
“ႁဝ်းၸဝ်ႈ ပဵၼ်လၢၼ်မၼ်းၸဝ်ႈဢိူဝ်ႈ”

ၵမ်းၼၼ်ႉ တၵႃႇၵေႃႉၼၼ်ႉ ၸင်ႇၵႂႃႇသူင်ႇ ၸဝ်ႈသၢင်ႇ ႁႂ်ႈႁွတ်ႈထိုင် တီႈၵျွင်းယဝ်ႉ။ ၸဝ်ႈသၢင်ႇႁွတ်ႈထိုင်ၵႂႃႇ တီႈၵျွင်း ၵႂႃႇၶုပ်ႉဝႆႈ ၸဝ်ႈထဵၼ်သေ လူ ႁၼ်လုမ်းလႃးၵႂႃႇ မွၵ်ႈၶိုင်ႈလိူၼ်ၼိုင်ႈယဝ်ႉ။ ဝၢႆးၼၼ်ႉ ၸင်ႇဝႆႈလဝ်ႈဝႃႈ

“ၸဝ်ႈႁဝ်းတီႈၶႃႈ... ယၢမ်းလဵဝ် ၼွင်ႉၸၢႆးၸဝ်ႈႁဝ်းၵေႃႈ ၶႂ်ႈႁၼ်ၸဝ်ႈ ႁဝ်းၼႃႇယဝ်ႉတီႈၶႃႈလႄႈ ႁဝ်းပွၵ်ႈမိိူဝ်းလႆႈယဝ်ႉၶႃႈယူဝ်ႉ?”ၼႆယဝ်ႉ။
“ၸဝ်ႈသၢင်ႇ... ပေႃးၼႆၵေႃႈ မႂ်းယိပ်းၸုင် ပၢႆၶွၼ်ႉတဝ်ႉၵဝ်ၼႆႉသေ ဢွၼ် ၵဝ်ပွၵ်ႈမိူဝ်းလႄႈ”ၼႆသေ ၽၢတ်ႇယၢၼ်ၵျွင်း လတ်းၶဝ်ႈမႃး ၼႂ်းဝၢၼ်ႈယဝ်ႉ။ ၵူၼ်း ဝၢၼ်ႈၶဝ် ၸင်ႇမႃးပၼ်တီႈၼင်ႈတီႈယူႇသေ
“ၸဝ်ႈႁဝ်း တေယေႃးၶိင်းၵႂႃႇတီႈလႂ်ၶႃႈ?”
“ႁဝ်းၸဝ်ႈတေပွၵ်ႈၵႂႃႇ ဝႆႈသႃမုၼ်ၶမ်းၽြႃးၼႆယဝ်ႉ”

ပိၵ်ႉသမ်ႉဝႃႈ တၵႃႇၶဝ် ႁၢမ်ႈသီးတၢၼ်ႇႁိုဝ်ၵေႃႈ တေႃႈဢမ်ႇလႆႈယဝ်ႉလႄႈ ၸိူဝ်းၵူၼ်းဝၢၼ်ႈၶဝ် ၸင်ႇၸွမ်းသူင်ႇထိုင် ပွတ်းတၢင်း ဢွၼ်ၵၼ်ႁႆႈသေ ၶိုၼ်း ပွၵ်ႈမႃးတီႈဝၢၼ်ႈယဝ်ႉ။ ၸဝ်ႈသၢင်ႇၵေႃႈ ယိပ်းၸၼ်ပၢႆၶွၼ်ႉတဝ်ႉသေ ဢွၼ်ဢဝ်ၸဝ်ႈထဵၼ်ၸၵ်ႉ ၶုပႃႇလ ဢွၵ်ႇၶၢဝ်းတၢင်းမႃး၊ မႃးထိုင်တီႈဝၢၼ်ႈ ဢၼ်ယၢမ်ႈလတ်းမႃးၼၼ်ႉယဝ်ႉ။ ဝၢႆးသေ ၶၢမ်ႈပူၼ်ႉဝၢၼ်ႈလုၵ်ႈၼၼ်ႉယဝ်ႉ တီႈၼႂ်းထိူၼ်ႇတီႈၼိုင်ႈ ၸဝ်ႈသၢင်ႇ ၸင်ႇလႆႈငိၼ်း သဵင်ႁွင်ႉၵႂၢမ်း ၼၢင်းယိင်းၵေႃႉၼိုင်ႈယဝ်ႉ။ (ၶေႃႈၵႂၢမ်းၼၼ်ႉ မၢၼ်ႇမႅၼ်ႈတႄႉယဝ်ႉ။ သဵင်ဢၼ်လႂ်သေဢမ်ႇဝႃႈ ႁႂ်ႈ ပေႃးမိူၼ်သဵင်ၼၢင်းယိင်း ဢၼ်တေတုမ်ႉယွၼ်ႈသႂ်ႇ တူဝ်ၵူၼ်းၸၢႆးတင်းတူဝ်ၼၼ်ႉ ဢမ်ႇမီးသဵင်ဢၼ်လႂ်မိူၼ်လႆႈ) (သဵင်ၼၢင်းယိင်းၼႆႉ ပဵၼ်သဵင် ဢၼ်တုမ်ႉယွၼ်ႈ ၵူၼ်းၸၢႆးလိူဝ်သေပိူၼ်ႈ)

ၵွပ်ႈၼႆ တီႈၼႂ်းဢင်ၵုတ်ႉတရပႃႇလိၸဝ်ႈၼၼ်ႉ မုၼ်ၶမ်းၽြႃး ၸင်ႇႁေႃး ဝႆႉဝႃႈ- ၼႃႁံ ꧤိၵ်ၶဝေ ဢၺ်ၺံ ဢေၵသၻ်ၻမ်ပိ သမၼုပသ်သႃမိ၊ ယေႃ ဢေဝံ ပုရိသသ်သ ၸိတ်တံ ပရိယႃၻႃယ တိꩦ်ꩧတိ၊ ယထယိၻံ ꧤိၵ်ၶဝေ ဢိတ်ထိသၻ်ၻေႃ။ ရႁၢၼ်းၶဝ်... သဵင်ဢၼ်ၸၼ်ဢဝ်လႆႈ ၸႂ်ၵူၼ်းၸၢႆး ႁႂ်ႈမိူၼ်ၼင်ႇ သဵင် ၼၢင်းယိင်းၼၼ်ႉ ၵဝ်ၽြႃးဢမ်ႇႁၼ်ထႅင်ႈ သဵင်တၢင်ႇဢၼ်။ (သဵင်ၼၢင်းယိင်းၼႆႉ ၸၼ်ဢဝ်လႆႈ ၸႂ်ၵူၼ်းၸၢႆးလိူဝ်သေပိူၼ်ႈ) ၸဝ်ႈသၢင်ႇဢွၼ်ႇၼၼ်ႉ ၸင်ႇတွင်းမၢႆဝႆႉ ၽၢႆႇသဵင်မေႃးၼၼ်ႉသေ

“ၸဝ်ႈႁဝ်းတီႈၶႃႈ... ႁဝ်းၵိုတ်းလိုဝ်ႈတီႈၼႆႈ ၵမ်းၼိုင်ႈၵွၼ်ႇၶႃႈ၊ ၶႃႈတပႄး မီးလွင်ႈလူဝ်ႇလႆႈၵႂႃႇ ႁဵတ်းသေပိူင်ပိူင်ဢေႃႈ”ၼႆ ၽႃႈဝၢင်းၶွၼ်ႉတဝ်ႉသေ ၵႂႃႇၸူး တီႈသဵင်ၼၢင်းယိင်းမေႃၵႂၢမ်းၼၼ်ႉယဝ်ႉ။ ၼၢင်းယိင်းဢွၼ်ႇ ဢၼ်မႃးႁွၼ်းၽိုၼ်း ၼၼ်ႉ လႆႈႁၼ်ၸဝ်ႈသၢင်ႇဢွၼ်ႇသေ ယူႇဝႆႉတဵတ်ႇတဵတ်ႇယဵၼ်ယဵၼ်ယဝ်ႉ။ ၸဝ်ႈ သၢင်ႇဢွၼ်ႇၵေႃႈ ၸင်ႇၵႂႃႇၵဝ်းၼၢင်းယိင်းဢွၼ်ႇၼၼ်ႉသေ ၸူးဢဝ်သိၼ်မၼ်း ႁၵ်းၵႂႃႇပႅတ်ႈယူႇ။ ၸဝ်ႈထဵၼ်လူင် ၸင်ႇဝူၼ်ႉဝႃႈ
“မိူဝ်ႈၵႆႈ တိုၵ်ႉလႆႈငိၼ်း သဵင်ၼၢင်းယိင်းႁွင်ႉၵႂၢမ်းယူႇ၊ ၵမ်းၼႆႉ သဵင်ႁွင်ႉ ၵႂၢမ်းၵေႃႈ ၶၢတ်ႇၵႂႃႇပႅတ်ႈ၊ ၸဝ်ႈသၢင်ႇဢွၼ်ႇၼႆႉၵေႃႈ ပႄႉၵႂႃႇႁိုင်၊ ႁဵတ်းႁိုဝ်ၵေႃႈ ၸဝ်ႈသၢင်ႇဢွၼ်ႇလႄႈ ၼၢင်းယိင်းဢွၼ်ႇၼၼ်ႉ တေၵဝ်းၵၼ်သေ သိၼ်ၸဝ်ႈ သၢင်ႇၵေႃႈ တေႁၵ်းယဝ်ႉ”ၼႆယူႇ။ ဝၢႆးသေ ၸဝ်ႈသၢင်ႇဢွၼ်ႇ သိၼ်ႁၵ်းယဝ်ႉ ၶိုၼ်းဢွၵ်ႇမႃးၸူး တီႈၸဝ်ႈထဵၼ်သေ လၢတ်ႈဝႃႈ
“ၸဝ်ႈႁဝ်းတီႈၶႃႈ... ၵႂႃႇၶႃႈလႄႈ ႁဝ်းသိုပ်ႇၶၢဝ်းတၢင်းထႅင်ႈ”
“ၸဝ်ႈသၢင်ႇဢွၼ်ႇ... ၸဝ်ႈၼႆႉ ၵႂႃႇႁဵတ်းပူၼ်ႉပႅၼ် ၵၢၼ်မိူၵ်ႈမႂ်ႈလူင် မႃး ၸွင်ႇၸႂ်ႈႁိုဝ်?” ၸဝ်ႈသၢင်ႇဢွၼ်ႇၵေႃႈ ယူႇဝႆႉ တဵတ်ႇယဵၼ်ယူႇ။ သိုပ်ႇထၢမ် ထႅင်ႈၵေႃႈ တေႃႈဢမ်ႇတွပ်ႇသင်လႄႈ ၸဝ်ႈထဵၼ်လူင်ၸင်ႇဝႃႈ
“ၸဝ်ႈသၢင်ႇဢွၼ်ႇ ၵူၼ်းယုတ်ႈမႂ်ႈ ၸိူင်ႉၼင်ႇမႂ်း ဢၼ်ႁဵတ်းၽိတ်း ၵၢၼ်ယုတ်ႈမႂ်ႈၼၼ်ႉ ဢမ်ႇၵိုင်ႇထိူၵ်ႈ မႃးယိပ်းပၢႆၶွၼ်ႉတဝ်ႉၵဝ်”

ၸဝ်ႈသၢင်ႇဢွၼ်ႇၼၼ်ႉ တိုၼ်ႇၽၢၼ်ႈၵူဝ်ႁႄၵႂႃႇ၊ ၸင်ႇလွၼ်ႈပႅတ်ႈ သၢင်ႇ ၵၢၼ်းမၼ်းၵမ်းလဵဝ်သေ ၶိုၼ်းၼုင်ႈၸိူင်ႉၼင်ႇ ၵူၼ်းႁိူၼ်းယဝ်ႉ။

“ၸဝ်ႈႁဝ်းတီႈၶႃႈ... မိူဝ်ႈၸဝ်ႉၼၼ်ႉ ၶႃႈပဵၼ်ၸဝ်ႈသၢင်ႇယူႇၶႃႈဢေႃႈး ယၢမ်းလဵဝ် ၶႃႈပဵၼ်ၵူၼ်းႁိူၼ်းယဝ်ႉၶႃႈ၊ ၸဝ်ႈႁဝ်းတီႈၶႃႈ မိူဝ်ႈၶႃႈၼုင်ႈသၢင်ႇၵၢၼ်း ၼၼ်ႉ ယွၼ်ႉၶႃႈတပႄး မီးၸႂ်သတ်ႉထႃႇသေ ၼုင်ႈမႃးၵေႃႈ ဢမ်ႇၸႂ်ႈၶႃႈ၊ ယွၼ်ႉ ပိူဝ်ႈ ၵူဝ်ၺႃးၽေးၶဵၼ် ၸွမ်းတႃႈၸွမ်းတၢင်းလႄႈ ၸင်ႇၼုင်ႈသၢင်ႇၵၢၼ်းၵူၺ်းၶႃႈ၊ ၸဝ်ႈႁဝ်းၶႃႈ မႃးၶႃႈလႄႈ ႁဝ်းသိုပ်ႇၶၢဝ်းတၢင်းၵႂႃႇထႅင်ႈၶႃႈ...”
“ယူႇတီႈၽဝႃႉၵူၼ်းႁိူၼ်းသေ ႁဵတ်းၵၢၼ်မိူၵ်ႈမႂ်ႈလႄႈသင်၊ ယူႇတီႈ ၽဝႃႉ ရႁၢၼ်းသေ ႁဵတ်းၵၢၼ်မိူၵ်ႈမႂ်ႈလႄႈသင် ပဵၼ်လွင်ႈမိူၵ်ႈမႂ်ႈၼင်ႇၵၼ်ယဝ်ႉ။ မႂ်းၼႆႉ မိူဝ်ႈၽွင်းမႃးယူႇသဝ်း ၼႂ်းၽႃႈလိူင်သၢင်ႇၵၢၼ်းယူႇၼၼ်ႉၵူၺ်း ယင်းဢမ်ႇပႂ်ႉပႃး လႆႈသိၼ်သီႇလ ႁႂ်ႈတဵမ်ထူၼ်ႈ၊ ပေႃးဝႃႈ ၵႂႃႇပဵၼ်ၵူၼ်းႁိူၼ်းယဝ်ႉၼႆတႄႉ ၶႅၼ်း တေႁဵတ်းႁိုဝ် တိုဝ်းၵမ်လႆႈ လွင်ႈလီယဝ်ႉလႃႇ၊ ၵူၼ်းယုတ်ႈမႂ်ႈၸိူင်ႉၼင်ႇမႂ်းၼႆႉ ဢမ်ႇလူဝ်ႇမႃး ယိပ်းပၢႆၶွၼ်ႉတဝ်ႉၵဝ်”
“ၸဝ်ႈႁဝ်းတီႈၶႃႈ... တၢင်းထိူၼ်ႇသဵၼ်ႈၼႆႉ ပဵၼ်သဵၼ်ႈတၢင်းႁုၵ်းႁၢႆႉ ဢၼ်ၽီလူးၶဝ် ပႂ်ႉဝႆႉတီႈၶႃႈဢေႃႈ... ယွၼ်ႉပိူဝ်ႈ တႃၸဝ်ႈႁဝ်းၵေႃႈ ဢမ်ႇႁၼ်၊ သမ်ႉဢမ်ႇမီးၽႂ် ၸုင်ၸၼ်ၸဝ်ႈႁဝ်းလႄႈ ၸဝ်ႈႁဝ်းတေႁဵတ်းႁိုဝ် ယူႇသဝ်းၵႂႃႇ တီႈၼႂ်းထိူၼ်ႇၼႆႉၶႃႈလႃႇ”
“ၸၢႆးဢွၼ်ႇ... ယႃႇပေဝူၼ်ႉသေ ၵုမ်ႇမႆႈၸႂ်တၢင်ၵဝ်ယူႇလႃႈ၊ ဢမ်ႇၸၢင်ႈ ၵႂႃႇတၢင်းလႂ်သေ တၢႆၼႂ်းထိူၼ်ႇၼႆႉၵေႃႈ ပွႆႇမၼ်းတၢႆၵႂႃႇသေလႃႈ၊ ၵိင်ႈၵူမ်ၸွမ်း တၢင်း တုၵ်ႉၶၼႆၵေႃႈ ပွႆႇမၼ်းၵိင်ႈၵူမ်ၸွမ်းလႃႈ၊ ၵူၺ်းၵႃႈ တႃႇဝႃႈ ၵဝ်တေၵႂႃႇၸွမ်းမႂ်း ၵူၼ်းယုတ်ႈမႂ်ႈၼၼ်ႉတႄႉ ဢမ်ႇမီးမိူင်းမၼ်း” ၼႆသေ ၸင်ႇလွတ်ႈႁေႃး ၵႃႇထႃႇ သွင်ႁူဝ်ၼႆႉယဝ်ႉ။

ႁၼ်ၻႃႁံ ႁတၸၵ်ၶူသ်မိ၊ ၵၼ်တႃရၻ်ꩪႃၼမႃၷတေႃ။ သေယျႃမႃၼေႃ ၼ ၷၸ်ꧢႃမိ၊ ၼတ်ထိ ၿႃလေ သႁႃယထတႃ။ ႁၼ်ၻႃႁံ ႁတၸၵ်ၶူသ်မိ၊ ၵၼ်တႃရၻ်ꩪႃၼမႃၷတေႃ။ မရိသ်သႃမိႇ ၼေႃ ၵမိသ်သႃမိ၊ ၼတ်ထိ ၿႃလေ သႁႃယတႃ။

ၸၢႆးဢွၼ်ႇ... ယၢမ်းလဵဝ် တႃၵဝ်ၼႆႉ မွတ်ႇလႅဝ်ယဝ်ႉ။ ၽႅဝ်မႃး တမ်ႈတီႈ ၼႂ်းထိူၼ်ႇလိုၵ်ႉလူင်ဝႆႉယဝ်ႉ။ တၢႆသေတႃႉၵေႃႈ ၵဝ်တေႃႈတေဢမ်ႇၵႂႃႇ။ ဢမ်ႇၶႂ်ႈ ၵပ်းသိုပ်ႇ ၵူၼ်းမိူၵ်ႈမႂ်ႈ၊ ၸၢႆးဢွၼ်ႇ... ယၢမ်းလဵဝ် တႃၵဝ်ၼႆႉ မွတ်ႇလႅဝ်ယဝ်ႉ။ ၽႅဝ်မႃး တမ်ႈတီႈ ၼႂ်းထိူၼ်ႇလိုၵ်ႉလူင်ဝႆႉယဝ်ႉ။ ၵဝ်တေၶၢမ်ႇတၢႆၵူၺ်း၊ တေဢမ်ႇ ၵႂႃႇၸွမ်းမႂ်း၊ ၵဝ်ဢမ်ႇၶႂ်ႈႁဵတ်းၵေႃႉ ၵူၼ်းမိူၵ်ႈမႂ်ႈ။

ၸၢႆးဢွၼ်ႇ လႆႈငိၼ်းၼင်ႇၼႆ ပဵၼ်လွင်ႈတူၵ်းၸႂ်လႂ်တိုၼ်ႇ ႁွင်ႉပၢဝ်ႇဝႃႈ “ၵဝ်ႁဵတ်းၽိတ်းလိုၵ်ႉလမ်ႇလူင်ယဝ်ႉ၊ ၵဝ်လႆႈႁဵတ်းၽိတ်းၺႃး ဢၼ်ဢမ်ႇၵိုင်ႇလီ ႁဵတ်းၽိတ်းၼၼ်ႉယဝ်ႉ”ၼႆ ယုၵ်ႉပူၵ်းမိုဝ်းတၢင်ႇႁူဝ် ႁွင်ႉသႅၼ်ႇသေ ပၢႆႈၶဝ်ႈၵႂႃႇ ပႅတ်ႈ ၼႂ်းထိူၼ်ႇယဝ်ႉ။

ၵူၼ်းလီၵေႃႈ ၽီလီမႃးၸွႆႈ မႄးထတ်း

ယွၼ်ႉပိူဝ်ႈ ဢူမုၼ်ၽုင်းသိၼ်ၸဝ်ႈလႄႈ ပၼ်ႇတုၵမ်ႇပလႃႇၽႃသႅင်လႅင် ၸဝ်ႈၶုၼ်ဢိၼ်း ဢၼ်ယၢဝ်းႁူၵ်းသိပ်းယူႇၸၼႃႇ၊ ဢၼ်ပွတ်ႈ ႁႃႈသိပ်းယူႇၸၼႃႇ၊ ဢၼ်သုင်သိပ်းႁႃႈ ယူႇၸၼႃႇၼၼ်ႉ လိူတ်ႇမႆႈမႃးၵမ်းလဵဝ်ယဝ်ႉ။ ၸဝ်ႈၶုၼ်ဢိၼ်း ၵေႃႈ ၸင်ႇဝႃႈ

“ၵွပ်ႈသင်လႄႈ ပဵၼ်ၼႆ ၵဝ်တေလႆႈၸုၼ်ႉပႅတ်ႈ ပၢၼ်ၶုၼ်ဢိၼ်းၵဝ် ႁိုဝ်ႉၼေႃး”ၼႆသေ ၽိူဝ်ႇဢဝ်မၢၵ်ႇတႃၽီ လွမ်တူၺ်းလွင်ႈတၢင်းမၼ်းၸိုင် လႆႈၵႂႃႇ ႁၼ် ၸဝ်ႈထဵၼ်မႁႃႇပႃႇလိတ ဢၼ်ႁွင်ႉဝႃႈ ၸဝ်ႈထဵၼ်ၸၵ်ႉၶုုပႃႇလၼၼ်ႉယဝ်ႉ။ ၸဝ်ႈဢတ်ႉထၵထႃႇၶဝ် မိူဝ်ႈၵွၼ်ႇတႄႉ ဢဝ်ၵႃႇထႃႇႁူဝ်ၼႆႉသေ ဝႃႈဝႆႉၼင်ႇၼႆ

သႁသ်သၼေတ်တေႃ ၻေဝိၼ်ၻေႃ၊ ၻိၿ်ၿၸၵ်ၶံု ဝိသေႃꩪယိ။ ပႃပၷရႁီ ဢယံ ပႃလေႃ၊ ဢႃꩡီဝံ ပရိသေႃꩪယိ။ သႁသ်သၼေတ်တေႃ ၻေဝိၼ်ၻေႃ၊ ၻိၿ်ၿၸၵ်ၶံု ဝိသေႃꩪယိ။ ꩪမ်မၷရုၵေႃ ဢယံ ပႃလေႃ၊ ၼသိၼ်ၼေႃ သႃသၼေ ရတေႃ။

ၸဝ်ႈၶုၼ်ဢိၼ်း ဢၼ်မီးတႃတိပ်ႉႁဵင်ၼိုင်ႈၼၼ်ႉ ဢဝ်မၢၵ်ႇတႃၽီမၼ်း တူၺ်းႁၼ်ထိုင် ၸဝ်ႈပႃႇလိတ ဢၼ်မေႃသႄႉသွမ်း လွင်ႈၵၢၼ်မိူၵ်ႈမႂ်ႈသေ မီး လွင်ႈႁႃလဵင်ႉတွင်ႉ ၸိုၼ်ႈသႂ်ၼၼ်ႉယဝ်ႉ။ ၸဝ်ႈၶုၼ်ဢိၼ်း ဢၼ်မီးတႃတိပ်ႉႁဵင်ၼိုင်ႈၼၼ်ႉ ဢဝ်မၢၵ်ႇတႃၽီမၼ်း တူၺ်းႁၼ်ထိုင် ၸဝ်ႈပႃႇလိတ ဢၼ်ၼပ်ႉယမ်တြႃး ဢၼ်ယူႇမၼ်ႈၵိုမ်းၼႂ်းသႃႇ သၼႃႇၽြႃးၼၼ်ႉယဝ်ႉ။

ၸဝ်ႈၶုၼ်ဢိၼ်း လႆႈႁၼ်ထိုင် ၸႅင်ႈၸႅင်ႈလႅင်းလႅင်း ၼင်ႇၼၼ်ယဝ်ႉ သေ ၸင်ႇဝူၼ်ႉဝႃႈ “ၸဝ်ႈၽူႈဢၼ်မေႃသႄႉၼႄး လွင်ႈယုတ်ႈမႂ်ႈသေ ဢၼ်မီး လွင်ႈၼပ်ႉယမ်တြႃးၼၼ်ႉ သင်ဝႃႈ ၵဝ်ဢမ်ႇၵႂႃႇၸူးတီႈမၼ်းၸဝ်ႈၸိုင် ၵွၵ်းႁူဝ် ၵဝ်ၼႆႉ ၸၢင်ႈတႅၵ်ႇပႅတ်ႈ ၸဵတ်းသိၵ်ႈယဝ်ႉ”ၼႆသေ ၸင်ႇၼႅတ်ႈၵႂႃႇတီႈ ၸဝ်ႈထဵၼ် ပႃႇလိတ ၵမ်းလဵဝ်ယဝ်ႉ။ ယွၼ်ႉၼၼ် ဢတ်ႉထၵထႃႇၶဝ်ၸဝ်ႈ မိူဝ်ႈၵွၼ်ႇ ဢဝ်ၵႃႇ ထႃႇသေ ႁေႃးလၢတ်ႈဝႃႈ

သႁသ်သၼေတ်တေႃ ၻေဝိၼ်ၻေႃ၊ ၻေဝရꩡ်ꩡသိရိၼ်ꩪရေႃ။ တင်ၶၼေၼ ဢႃၷၼ်တွႃၼ၊ ၸၵ်ၶုပႃလမုပႃၷမိ။ ၸဝ်ႈၶုၼ်ဢိၼ်း ဢၼ်မီးတႃတိပ်ႉႁဵင်ၼိုင်ႈ ဢၼ်ဢုပ်ႉပိူင်ႇၸိုင်ႈ မိူင်းၽီ ၼၼ်ႉ ၸင်ႇၵိုင်ႉၵၢင်ႉ လူင်းၵႂႃႇၸူး တမ်ႈတီႈ ထိူၼ်ႇဢၼ်ၸဝ်ႈထဵၼ်ၸၵ်ႉၶုပႃႇလ ယူႇသဝ်းဝႆႉၼၼ်ႉယဝ်ႉ။

ၸဝ်ႈၶုၼ်ဢိၼ်း လူင်းမႃးထိုင်တမ်ႈတီႈ ႁိမ်းၸမ် ၸဝ်ႈထဵၼ်ၼၼ်ႉသေ ပၼ်သဵင်တိၼ်မေႃးဝႆႉယဝ်ႉ။ ၸဝ်ႈထဵၼ်ၸင်ႇထၢမ်

“ၵေႃႉဢၼ်မႃးမီးတီႈႁိမ်းၼႆႉ ပဵၼ်ၽႂ်?”
“ၸဝ်ႈႁဝ်းတီႈၶႃႈ ၶႃႈတပႄးပဵၼ် ၵူၼ်းၵႂႃႇၶၢဝ်းတၢင်းတီႈၶႃႈဢေႃႈ”
“တၵႃႇ... တၵႃႇသမ်ႉတေၵႂႃႇတၢင်းလႂ်?”
“ၶႃႈတပႄး တေၵႂႃႇ မိူင်းသႃႇဝတ်ႉထိၶႃႈဢေႃႈ”
“ၵႂႃႇလႄႈ ၵႂႃႇလႄႈ တၵႃႇ...”
“ၸဝ်ႈႁဝ်းသမ်ႉ တေယေႃးၶိင်းၵႂႃႇ တီႈလႂ်ၶႃႈ?”
“တၵႃႇ ႁဝ်းၸဝ်ႈၵေႃႈ တေႃႈတေၵႂႃႇ သႃႇဝတ်ႉထိၼင်ႇၵဝ်ႇယဝ်ႉ”
“ပေႃးၼၼ်ၵေႃႈ ၶႃႈတပႄးၶဝ် ၵႂႃႇၸွမ်းၵၼ်ၶႃႈ ၼေႃႈၸဝ်ႈ?”
“တၵႃႇ... ၵဝ်ၸဝ်ႈၼႆႉ ဢမ်ႇမီးႁႅင်းသင်ယဝ်ႉ၊ ပေႃးဝႃႈ မႂ်းတၵႃႇ ၵႂႃႇၸွမ်း ၵဝ်ၼႆၸိုင် ၶၢဝ်းတၢင်းမႂ်း တေၸိူင်ႉတေၼၢၼ်းထိုင်ဢိူဝ်ႈ”
“ၸဝ်ႈႁဝ်းတီႈၶႃႈ... ၶႃႈတပႄးတႄႉ ဢမ်ႇမီးၵၢၼ်ႁိပ်ႈၼႅတ်ႈသင်တီႈၶႃႈ၊ သင်ၸိူဝ်ႉဝႃႈ ၶႃႈတပႄး လႆႈၵႂႃႇၸွမ်းၸဝ်ႈႁဝ်း ပေႃးၼႆၸိုင် ၼႂ်းၵႃႈ ၵၢၼ်တၢင်းလီ သိပ်းပိူင်ၼၼ်ႉ ၶႃႈၵေႃႈ တေၸၢင်ႈလႆႈ ပိူင်ၼိုင်ႈၼၼ်ႉၶႃႈဢေႃႈ၊ ၵွပ်ႈၼႆလႄႈ ႁႂ်ႈလႆႈၵႂႃႇၸွမ်းၵၼ်သေၵမ်းၶႃႈ” ၸဝ်ႈၸၵ်ႉၶုပႃႇလၵေႃႈ ၸင်ႇဝူၼ်ႉဝႃႈ “ၵူၼ်းၵေႃႉ ၼႆႉ တေပဵၼ်ၵူၼ်းလီၵေႃႉၼိုင်ႈယူႇ”ၼႆသေ
“ပေႃးၼႆၵေႃႈ တၵႃႇ... ယိပ်းပၢႆၶွၼ်ႉတဝ်ႉၵဝ်လႄႈ” ၸဝ်ႈၶုၼ်ဢိၼ်း ၵေႃႈ ၸင်ႇယိပ်းၸုင်ဢဝ် ပၢႆၶွၼ်ႉတဝ်ႉၸဝ်ႈသေ ယေႃႈသၢႆလိၼ်ပႅတ်ႈလႄႈ ထိုင်မႃး တၢမ်းၶမ်ႈ ၸင်ႇႁွတ်ႈထိုင်ၵႂႃႇ တီႈမိူင်းသႃႇဝတ်ႉထိ ၵျွင်းၸေႇတဝၼ်ႇယဝ်ႉ။ ပေႃး ဝႃႈ မၼ်းၸဝ်ႈ လႆႈငိၼ်းသဵင်တိုင်ႈႁွႆၶၢဝ်၊ သဵင်ၵွင်ပႅင်ႈၸိုင် မၼ်းၸဝ်ႈၸင်ႇထၢမ်ဝႃႈ
“ၼႆႉပဵၼ်သဵင်မေႃးတီႈလႂ်ၼႆႉ?”
“ၸဝ်ႈႁဝ်းတီႈၶႃႈ... ပဵၼ်သဵင်ဢၼ်မေႃးတီႈ မိူင်းသႃႇဝတ်ႉထိၶႃႈဢေႃႈ”
“ၵႃႈၵွၼ်ႇတွၼ်းဢွၼ်ဢၼ်ႁဝ်းယၢမ်ႈၵႂႃႇမႃးၼၼ်ႉ လႆႈၵႂႃႇတင်းႁိုင်ဢိူဝ်ႈ”
“ၸဝ်ႈႁဝ်းတီႈၶႃႈ... ၶႃႈတပႄးႁူႉတၢင်းလတ်းၶႃႈဢေႃႈ’‘ ပေႃးဝႃႈၼၼ်ႉ ၸဝ်ႈထဵၼ်ၸင်ႇဝူၼ်ႉဝႃႈ
“ၵူၼ်းၵေႃႉၼႆႉ ဢမ်ႇၸိုဝ်ႈၵူၼ်း၊ တေပဵၼ်ၽီၵူၺ်း” ၼႆယဝ်ႉ။ ၵွပ်ႈၼႆ ၸဝ်ႈဢတ်ႉထၵထႃႇၶဝ် ဢဝ်ၵႃႇထႃႇသေ လၢတ်ႈမႃးဝႃႈ-

သႁသ်သၼေတ်တေႃ ၻေဝိၼ်ၻေႃ၊ ၻေဝရꩡ်ꩡသိရိၼ်ၻရေႃ။ သင်ၶိမိတွႃၼ တံ မၷ်ၷံ၊ ၶိပ်ပံ သႃဝတ်ထိမႃၷမိ။

ၸဝ်ႈၶုၼ်ဢိၼ်း ဢၼ်မီးမၢၵ်ႇတႃတိပ်ႉႁဵင်ၼိုင်ႈ ဢၼ်ပဵၼ်ၸဝ်ႈဢူၽုင်း မိူင်ႈၽီၼၼ်ႉ ယေႃႈသဵၼ်ႈတႃႈသၢႆတၢင်းသေ ႁဵတ်းႁႂ်ႈႁွတ်ႈထိုင် မိူင်းသႃႇဝတ်ႉထိ ၽႂ်းၽႂ်းယဝ်ႉ။

ၸဝ်ႈၶုၼ်ဢိၼ်း ပၢင်းဢဝ်ၸဝ်ႈထဵၼ်မိူဝ်းယူႇသဝ်း တမ်ႈတီႈၵျွင်းမုင်းတွင် ၶွၵ်ႉ ဢၼ်ၽူႈမၢၵ်ႈၸူႇလပႃႇလ ႁဵတ်းလူႇဝႆႉ၊ ပၢင်းမိူဝ်းၼင်ႈတီႈၼိူဝ်ပလၢင်ႇသေ ၶုၼ်ဢိၼ်း ၶိုၼ်းပွၵ်ႈၵႂႃႇ တီႈႁိူၼ်းသထေးၸူႇလပႃႇလၶဝ်ယဝ်ႉ။

“ဢူၺ်းလီ ၸူႇလပႃႇလ”
“ဢေႃႈ... မီးလွင်ႈသင်ၶႃႈ?”
“ပီႈမုၼ်သူ ႁွတ်ႈထိုင်မႃးၼၼ်ႉ မႂ်းႁူႉယူႇႁႃႉ?”
“ဢမ်ႇႁူႉၶႃႈ... ပီႈမုၼ်ႁဝ်း ယေႃးၶိင်းထိုင်မႃးၼႆၶႃႈႁႃႉ?”
“ၸႂ်ႈဢိူဝ်ႈ... ၵဝ်တိုၵ်ႉလုၵ်ႉတီႈၵျွင်းသေ ပွၵ်ႈမႃးၵူၺ်း၊ ၵဝ်လႆႈႁၼ် ၸဝ်ႈပီႈမုၼ်သူ မႃးယူႇသဝ်းဝႆႉ တမ်ႈတီႈ ၵျွင်းဢွၼ်ႇ ဢၼ်မႂ်းႁဵတ်းလူႇဝႆႉၼၼ်ႉ ယဝ်ႈ” ၼႆသေ ၸဝ်ႈၶုၼ်ဢိၼ်း ပၢႆႈမိူဝ်းၵႂႃႇယဝ်ႉ။

ၸူႇလပႃႇလၵေႃႈ မိူဝ်းထူပ်းႁၼ် ၸဝ်ႈထဵၼ်ပဵၼ်ၵႂႃႇၼင်ႇၼၼ်လႄႈ ၸင်ႇ ႁႆႈႁႆႈႁွင်ႉႁွင်ႉသေ လၢတ်ႈဝႃႈ “ယွၼ်ႉပိူဝ်ႈ ႁၼ်ထိုင်ၼင်ႇၼႆသေလႄႈ ၸင်ႇဢမ်ႇ ၶႂ်ႈပၼ် ၵႂႃႇႁဵတ်းရႁၢၼ်းၼၼ်ႉယဝ်ႉ... ”ၼႆသေ ၸင်ႇဢဝ်လုၵ်ႈၸၢႆး ၶႃႈၸႂ်ႉမၼ်း သွင်ၵေႃႉ ႁႂ်ႈလွတ်ႈပူၼ်ႉ ၸၢတ်ႈပၼ်ၶီႈၶႃႈသေ ဢဝ်ႁဵတ်းပဵၼ် ၸဝ်ႈသၢင်ႇ၊ ႁႂ်ႈလႆႈ လူႁၼ်လုမ်းလႃး ၶဝ်ႈသွမ်းၽၵ်းသွမ်း ပုၼ်ႈတႃႇ ၸဝ်ႈထဵၼ်ၸၵ်ႉၶုပႃႇလယဝ်ႉ။

သႄႉသွမ်း ၸဝ်ႈထဵၼ်ၸၵ်ႉၶုပႃႇလ မႄးထတ်း

ထိုင်မႃးဝၼ်းၼိုင်ႈ ၸဝ်ႈရႁၢၼ်ႈၶဝ် ဢၼ်ယူႇၵူႈတီႈၵူႈတၢင်း ႁွတ်ႈထိုင်မႃး တမ်ႈတီႈ ၵျွင်းၸေႇတဝၼ်ႇ မႃးဝႆႈၽြႃးယဝ်ႉသေ သိုပ်ႇပူၼ်ႉၵႂႃႇႁႃဝႆႈ မႁႃႇသႃႇဝၵ လူင် ပႅတ်ႇသိပ်း တီႈၵျွင်းလင်ၼိုင်ႈယဝ်ႉ လင်ၼိုင်ႈယူႇ။ ႁဵတ်းၼၼ်သေ ၶဝ်ၸဝ်ႈ ၸမ်ၽႅဝ်ႁွတ်ႈထိုင် ႁိမ်းၵျွင်းၸဝ်ႈထဵၼ်ၸၵ်ႉၶုပႃႇလယူႇ။ ၽွင်းၼၼ်ႉ ၽူၼ်လူင် ၵိုင်ႉၵၢင်ႉတူၵ်းမႃးလႄႈ ၶဝ်ၸဝ်ႈၸင်ႇဝႃႈ “ၽူၼ်လူင်ၵေႃႈ တူၵ်းမႃးယဝ်ႉ ဝၼ်း ၵေႃႈၸမ်ၶမ်ႈယဝ်ႉလႄႈ မိူဝ်ႈၽုၵ်ႈၵၢင်ၼႂ်မႃးၵွၼ်ႇ ႁဝ်းၸင်ႇမႃးဝႆႈ ၸဝ်ႈထဵၼ် ၸၵ်ႉၶုပႃႇလ”ၼႆသေ ပွၵ်ႈမိူဝ်းလိုဝ်ႈသဝ်း တီႈယူႇၽႂ်မၼ်းယဝ်ႉ။ ၽူၼ်ၵေႃႈ တူၵ်းတေႃႇထိုင် ပထမယၢမ်ႇ (6 မွင်း တေႃႇထိုင် 10 မွင်း)သေ ၶၢဝ်းမၸ်ႉသိမယၢမ်ႇ (10 မွင်းတေႃႇထိုင် 2 မွင်း)တႄႉ ၽူၼ်ထၢတ်ႇၵႂႃႇယဝ်ႉ။ ထိုင်မႃး ၶၢဝ်းပတ်ႉသိမယၢမ်ႇ (2 မွင်း တေႃႇထိုင် 6 မွင်း) ၼၼ်ႉတႄႉ ၸဝ်ႈထဵၼ် ၸၵ်ႉၶုပႃႇလ ၵႆႉလုၵ်ႉပႆတဵဝ်း (ပႆၸၢင်းၵျၢၼ်ႇ)တႃႇသေႇလႄႈ မၼ်းၸဝ်ႈလုၵ်ႉပႆ တဵဝ်း တေႃႇမိူင်းလႅင်းယဝ်ႉ။ ယွၼ်ႉပိူဝ်ႈ ၽူၼ်မႃးလႄႈ မူင်ႈမႅင်း ဢၼ်မီးၼႂ်းလိၼ်ၼႂ်းႁူးၼၼ်ႉ ဢွၼ် ၵၼ်ပၢႆႈဢွၵ်ႇမႃး တီႈၼွၵ်ႈယဝ်ႉ။ သမ်ႉဢွၵ်ႇမႃးမီးဝႆႉ ၼိူဝ်သဵၼ်ႈတၢင်း ၸဝ်ႈထဵၼ် ပႆတဵဝ်းၼၼ်ႉလႄႈ မူင်ႉမႅင်းဢွၼ်ႇၸိူဝ်းၼၼ်ႉ လႆႈတၢႆၵႂႃႇတႂ်ႈၽႃႇတိၼ်ၸဝ်ႈထဵၼ် တင်းၼမ်ယဝ်ႉ။ ပေႃးဝႃႈ ၸုမ်းၸဝ်ႈရႁၢၼ်းမိူဝ်ႈဝႃးၼၼ်ႉ ႁွတ်ႈထိုင်မႃး တီႈၸဝ်ႈ ပႆတဵဝ်းၸိုင် လႆႈမႃးႁၼ် မူင်ႈမႅင်းတၢႆတင်းၼမ်လႄႈ ၸင်ႇထၢမ်ဝႃႈ

“တီႈၼႆႈ ပဵၼ်ဢွင်ႈတီႈၽႂ် ပႆတဵဝ်းၶႃႈ?” တပႄးၸဝ်ႈထဵၼ် ၸင်ႇတွပ်ႇဝႃႈ
“ပဵၼ်ဢွင်ႈတီႈပႆတဵဝ်း ၸဝ်ႈထဵၼ်ၸၵ်ႉၶုပႃႇလ ဢၼ်ပဵၼ်သြႃႇႁဝ်းၼၼ်ႉ တီႈၶႃႈဢေႃႈ”
“ၸဝ်ႈႁဝ်းၶဝ်တူၺ်းလီလီလူး... ၸဝ်ႈရႁၢၼ်းပႃးၼႆႉ မိူဝ်ႈၽွင်းတႃလီ ယူႇၼၼ်ႉ ၵုမ်ႇငဝ်ၼွၼ်းသုတ်းၼွၼ်းယူႇသေ သမ်ႉဢမ်ႇၶတ်းၸႂ်ႁဵတ်းၵၢၼ်တြႃး သင်၊ ထိုင်တီႈ ပဵၼ်မႃးတႃမွတ်ႇၵွၼ်ႇ ၸင်ႇမႃးၶတ်းၸႂ် ပႆတဵဝ်းသေ ႁဵတ်းၵၢၼ်တြႃး လႄႈ ႁဵတ်းႁႂ်ႈ သတ်ႉတဝႃႇဢွၼ်ႇ လူႉယႂ်ႇတၢႆၼမ်ၵူၺ်းယဝ်ႉ၊ ႁဵတ်းပုၼ်ႈတႃႇ တူဝ်ၸဝ်ႈၵဝ်ႇသေတႃႉ ဢမ်ႇမီးၽွၼ်းလီသင်”

ၸဝ်ႈရႁၢၼ်းၸိူဝ်းၼၼ်ႉ သႄႉသွမ်းၼင်ႇၼႆသေ ၵႂႃႇမိူဝ်းလဝ်ႈလၢတ်ႈထိုင် တမ်ႈတီႈ မုၼ်ၶမ်းၽြႃးယဝ်ႉ။

“မုၼ်ၶမ်းၽြႃးတီႈၶႃႈဢေႃႈ... ၸဝ်ႈထဵၼ်ၸၵ်ႉၶုပႃႇလၼႆႉ ပႆတဵဝ်းသေ ႁဵတ်းႁႂ်ႈ သတ်ႉတဝႃႇဢွၼ်ႇ လူႉယႂ်ႇတၢႆၼမ်တႄႉတႄႉၶႃႈဢေႃႈ” ၽြႃးၸင်ႇၶိုၼ်ႈ ထၢမ်ဝႃႈ
“ၸဝ်ႈရႁၢၼ်းၶဝ်... ၸွင်ႇတူဝ်သူႁၼ် ၸဝ်ႈၸၵ်ႉၶုပႃႇလ ဢဝ်တၢႆတူဝ် သတ်းၸိူဝ်းၼၼ်ႉယူႇႁႃႉ?”
“ဢမ်ႇႁၼ်တီႈၶႃႈ”
“လုၵ်ႈႁၵ်ႉ ရႁၢၼ်းၶဝ်ဢိူၺ်း... ၸိူင်ႉၼင်ႇ သူၸဝ်ႈ ဢမ်ႇလႆႈႁၼ် ၸဝ်ႈၸၵ်ႉၶုပႃႇလ ဢဝ်တၢႆတူဝ်သတ်းဢွၼ်ႇၸိူဝ်းၼၼ်ႉၼင်ႇၵၼ် ၸဝ်ႈၸၵ်ႉၶု ပႃႇလၵေႃႈ တေႃႈဢမ်ႇႁၼ်ၼင်ႇၵဝ်ႇ၊ လုၵ်ႈႁၵ်ႉ ရႁၢၼ်းၶဝ်... ပုၵ်ႉၵူဝ်ႇရႁၢၼ်း တႃႇ ၵေႃႉၽူႈဢႃႇသဝေႃးတြႃး မူၺ်ႉမူတ်းယူတ်းၵဵင်ႈၼၼ်ႉ ၶဝ်တိုၼ်းဢမ်ႇမီး ၸေႇ တၼႃႇ ၶႂ်ႈဢဝ်တၢႆပိူၼ်ႈ”
“မုၼ်ၶမ်းၽြႃးတီႈၶႃႈ... ၸဝ်ႈထဵၼ်ၸၵ်ႉၶုပႃႇလၼႆႉ ပိၵ်ႉသမ်ႉဝႃႈ မီး ၵုသူဝ်ႇပႃႇရမီႇ လႆႈႁွတ်ႈထိုင် ဢရႁတ်ႉတၽူဝ်ႇယဝ်ႉသေတႃႉ ယွၼ်ႉပိူဝ်ႈသင် သမ်ႉလႆႈပဵၼ် ၵူၼ်းတႃမွတ်ႇၶႃႈလႃႇ”
“လုၵ်ႈႁၵ်ႉ ရႁၢၼ်းၶဝ်... ယွၼ်ႉပိူဝ်ႈ ၸဝ်ႈၵဝ်ႇလႆႈႁဵတ်းမႃး မီးမႃး ၵၢမ်ႇဝၼ်းလင်လႄႈ ၸင်ႇလႆႈပဵၼ် တႃႇမွတ်ႇၼၼ်ႉယဝ်ႉ”*“မုၼ်ၶမ်းၽြႃးတီႈၶႃႈ... ၵၢမ်ႇဝၼ်းလင် ဢၼ်ၸဝ်ႈၸၵ်ႉၶုပႃႇလ လႆႈ ႁဵတ်း ၽိတ်းမႃးၼၼ်ႉ ပဵၼ်ၸိူင်ႉႁိုဝ်ၶႃႈၼေႃႈ?”
“လုၵ်ႈႁၵ်ႉ ရႁၢၼ်းၶဝ်ဢိူၺ်း... ပေႃးၼႆၵေႃႈ ထွမ်ႇတုင်းဢဝ်တႃႉ”

ၵၢမ်ႇဝၼ်းလင် ၸဝ်ႈၸၵ်ႉၶုပႃႇလ မႄးထတ်း

လုၵ်ႈႁၵ်ႉရႁၢၼ်းၶဝ်... မိူဝ်ႈၵွၼ်ႇၵွၼ်ႇ တီႈမိူင်းပႃႇရႃႇၼသီႇ ၽွင်းမိူဝ်ႈ ၸဝ်ႈႁေႃၶမ်း ၿြမတၢတ်ႈ ဢုပ်ႉဝၢၼ်ႈပွင်မိူင်းယူႇၼၼ်ႉ ၸင်ႇမီးမေႃယႃၵေႃႉၼိုင်ႈ ဢႅဝ်ႇၸွမ်းဝၢၼ်ႈၸွမ်းဝဵင်းသေ လႄႇႁႃ ယူတ်းယႃပၼ်ပိူၼ်ႈလႄႈ ၸင်ႇလႆႈၵႂႃႇႁၼ် ၼၢင်းယိင်းတႃၸဵပ်းၵေႃႉၼိုင်ႈသေ ၸင်ႇထၢမ်ဝႃႈ

“မႂ်းၼၢင်းပဵၼ်သင်?”
“မေႃယႃလူင်... ၶႃႈႁဝ်းပဵၼ်တႃႇၸဵပ်းသေ ဢမ်ႇလႆႈႁၼ်သင်ၶႃႈ”
“ပေႃးၼႆ ၵဝ်တေယူတ်းယႃပၼ်မႂ်းၵႂႃႈ”
“မေႃယႃလူင်... ယႃပၼ် ၶႃႈႁဝ်းသေၵမ်းၶႃႈလႃႈ”
“ပေႃးၵဝ် ယႃပၼ်မႂ်း မႂ်းတေပၼ်ၵဝ် ၵႃႈယူတ်းယႃယူႇႁႃႉ?”
“မေႃယႃလူင်ၶႃႈ... သင်ဝႃႈ မေႃယႃႁဝ်း ယူတ်းယႃပၼ်ႁႂ်ႈတႃၶႃႈႁဝ်း ၶိုၼ်းလႅင်းမႃး မိူၼ်ၵဝ်ႇၼႆၸိုင် ၵဝ်ၶႃႈလႄႈ လုၵ်ႈလၢင်းၶႃႈတင်းသဵင်ႈ တေၶၢမ်ႇ ႁဵတ်းၶႃႈၸႂ်ႉ မေႃယႃႁဝ်းၶႃႈဢေႃႈ”
“လီယဝ်ႉ”

မေႃယႃၵေႃႈ ၸင်ႇၸၢပ်ႈယႃႈယႃလီသေ ၶၢတ်ႈပၼ်တႃၼၢင်းယိင်း ၵေႃႉ ၼၼ်ႉပွၵ်ႈလဵဝ်ၵူၺ်းၵေႃႈ တႃၸဵပ်းမၼ်းၼၢင်း ႁၢႆၶႅၼ်းမိူၼ်ၵဝ်ႇၵႂႃႇၵမ်းလဵဝ်ယဝ်ႉ။ ၼၢင်းယိင်းၼၼ်ႉ ၸင်ႇဝူၼ်ႉဝႃႈ

“ဢိုဝ်ႈ... ၵဝ်လႆႈယိုၼ်ၵႂၢမ်းဝႃႈ ႁဝ်းတင်းႁိူၼ်း တေၶၢမ်ႇႁဵတ်းၶႃႈ မေႃယႃ ၼႆယဝ်ႉ။ ပေႃးပဵၼ်ၶႃႈၸႂ်ႉပိူၼ်ႈၼႆၸိုင် တႃႇပိူၼ်ႈတေလၢတ်ႈၵႂၢမ်းဢူၼ်ႈဢွၼ်ႇ တေႃႇႁဝ်းၼၼ်ႉ တေဢမ်ႇမီး၊ ပေႃးၼႆ ၵဝ်တေပႅတ်ႉလႅၼ်မေႃယႃၵွၼ်ႇ” ၼႆ ယဝ်ႉ။ ပေႃးမေႃယႃ ႁွတ်ႈထိုင်မႃးၵေႃႈ မႃးထၢမ်
“တႃမႂ်း ပဵၼ်ႁိုဝ်မႃး?”
“ဢေႃႈၶႃႈ... မိူဝ်ႈၸဝ်ႉၼၼ်ႉ တႃၶႃႈႁဝ်းၼႆႉ တေႃႉတႄႉၸဵပ်းၵူၺ်း ဢေႃႈ၊ ၵမ်းၼႆႉတႄႉ ၸဵပ်းႁႅႅင်း ၶိုၼ်ႈႁႅင်းလိူဝ်သေၵဝ်ႇတႄႉတႄႉဢေႃႈ” မေႃယႃ ၵေႃႈ ၸင်ႇဝူၼ်ႉဝႃႈ
“ၼၢႆးၼႆႉ မၼ်းဢမ်ႇၶႂ်ႈပၼ် ၵႃႈၶၼ်ယူတ်းယႃ တီႈၵဝ်လႄႈ မၼ်းမႃး ပႅတ်ႉလႅၼ်ၵဝ်ဢိူဝ်ႈၼႆႉ၊ ၵဝ်တေလႆႈႁဵတ်းႁိုဝ် တႅၼ်းပၼ်မၼ်းၼေႃး... ဢိုဝ်ႈ ၵဝ်တေႁဵတ်းပၼ် ႁႂ်ႈတႃမၼ်းမွတ်ႇၵွၼ်ႇၵႂႃႈ”ၼႆယဝ်ႉ။ မေႃယႃ ပွၵ်ႈမိူဝ်းတီႈႁိူၼ်း မိူဝ်းလၢတ်ႈၼႄမေးမၼ်း ၵူႈလွင်ႈလွင်ႈသေ ၸင်ႇဢွၵ်ႇၵႂႃႇႁႃ ယႃႈယႃ ၼႂ်းထိူၼ်ႇ ယဝ်ႉ။ ၸင်ႇႁႃဢဝ် ႁၢၵ်ႈမႆႉႁၢၵ်ႈတွၵ်ႇ မႃးၸၢပ်ႈႁဵတ်းယႃႈယႃသေ ဢဝ်ၵႂႃႇပၼ် ၵေႃႉတႃၸဵပ်းၼၼ်ႉယဝ်ႉ။ ပေႃးဝႃႈ ၼၢင်းယိင်းၵေႃႉၼၼ်ႉ ဢဝ်ယႃႈယႃ မႃးၶၢတ်ႈ သႂ်ႇ တီႈတႃမၼ်းတင်းသွင်ၶွၼ်ၼႆၵေႃႈ မႆႈလိူတ်ႇပေႃးတၢၼ်ႇၽႆးသေ ၸူးဢဝ် တႃမၼ်းၼၢင်း မွတ်ႇၵႂႃႇပႅတ်ႈ တင်းသွင်ၶွၼ်ယဝ်ႉ။ မေႃယႃၵေႃႉၼၼ်ႉ ယၢမ်းလဵဝ် လႆႈမႃးပဵၼ် ၸဝ်ႈၸၵ်ႉၶုပႃႇလယဝ်ႉ။ မုၼ်ၶမ်းၽြႃး မႃးၶႆႈလၢတ်ႈၼႄ လွင်ႈပိုၼ်း ၸဝ်ႈၸၵ်ႉၶုပႃႇလသေ လၢတ်ႈဝႃႈ
“လုၵ်ႈႁၵ်ႉ ရႁၢၼ်းၶဝ်... လုၵ်ႈႁၵ်ႉ ၸၵ်ႉၶုပႃႇလၼႆႉ ယွၼ်ႉပိူဝ်ႈ ဢၵု သူဝ်ႇ ဢၼ်ၸဝ်ႈၵဝ်ႇႁဵတ်းတီႈပိူၼ်ႈမႃးၼၼ်ႉ ၶိုၼ်းမႃးလမ်းၶိုတ်းလႄႈ ၸၢတ်ႈၼႆႉ ၸင်ႇလႆႈမႃးပဵၼ် ၵူၼ်းတႃမွတ်ႇယဝ်ႉ”

ၸဝ်ႈရႁၢၼ်းသၢမ်မိုၼ်ႇ ပဵၼ်ရႁၢၼ်းတႃႇၵႂႃႇ မႄးထတ်း

လုၵ်ႈႁၵ်ႉ ရႁၢၼ်းၶဝ်... မိူၼ်ၼင်ႇ ဝူဝ်းလၢၵ်ႈလေႃႉၼၼ်ႉ မၢၵ်ႇလေႃႉ ၼႆႉ ၵိင်ႈၸွမ်းလင် ႁွႆးတိၼ်ဝူဝ်းသေ လမ်းမႃးၸွမ်းၽၢႆႇလင် ဢမ်ႇထၢတ်ႇ ဢမ်ႇဝၢႆး ၼင်ႇၼၼ် ၵေႃႉဢၼ်ႁဵတ်းဝႆႉ ဢၵုသူဝ်ႇၼၼ်ႉၵေႃႈ တေႃႈလမ်းမႃးၸွမ်းလင်မၼ်း ယူႇယဝ်ႉၼႆသေ ၸင်ႇတေလွတ်ႈႁေႃးပၼ် ၶေႃႈထမ်းတြႃးၵႂႃႇ ၼင်ႇၼႆယဝ်ႉ။

မၼေႃပုၿ်ၿင်ၷမႃ ꩪမ်မႃ၊ မၼေသေꩦ်ꩧႃ မၼေႃမယႃ။ မၼသႃ ၸေ ပၻုꩦ်ꩧေၼ၊ ꧤႃသတိ ဝႃ ၵရေႃတိ ဝႃ။ တတေႃ ၼံ ၻုၵ်ၶမၼဝေတိ၊ ၸၵ်ၵံ ဝ ဝႁတေႃ ပၻံ။ ၸႂ်ၼႆႉ ပဵၼ်ဢၼ်ဢွၼ်ႁူဝ်ဢွၼ်ၵၼ်း ၸႂ်ၼႆႉ မၼ်းပဵၼ်ဢၼ်ယိုင်ႈယႂ်ႇသုင် ၸႂ်ၼႆႉ ၸုင်ၸၼ်ႁႂ်ႈယဝ်ႉတူဝ်ႈ ၵေႃႉဢၼ် ဢဝ်ၸႂ်ဢမ်ႇလီသေ လၢတ်ႈၵႂႃႇ ႁဵတ်းၵႂႃႇၼၼ်ႉ လွင်ႈဢမ်ႇလီ တေၸွမ်းလင်မၼ်း မိူၼ်ၼင်ႇ မၢၵ်ႇလေႃႉၵိင်ႈၸွမ်းလင် ႁွႆးတိၼ်ဝူဝ်းၼၼ်ႉယဝ်ႉ။

ပေႃးဝႃႈ ၶေႃႈၵႃႇထႃႇတြႃး သုတ်းၵႂႃႇယဝ်ႉၵေႃႈ ၵႃႈပဵၼ်ၸဝ်ႈရႁၢၼ်း သၢမ် မိုၼ်ႇ ဢွၼ်ၵၼ် ႁွတ်ႈထိုင်ပဵၼ်ၵႂႃႇ ပတိသမ်ႇၽိတႃႇပတ်ႉတ ရႁၢၼ်းတႃႇယဝ်ႉ။ ၵူၼ်းႁိူၼ်းပရိသတ်ႈ တင်းၼမ်ၵေႃႈ ဢွၼ်ၵၼ် ႁူႉႁၼ်တြႃးၵႂႃႇယဝ်ႉ။

ၸိူင်းႁူဝ်ပိုင်း ၸဝ်ႈထဵၼ်ၸၵ်ႉၶုပႃလ သုတ်းယဝ်ႉ။

ၽိုၼ်ဢိင် မႄးထတ်း

ၶုၻ်ၻၵၼိၵႃယ ဢꩦ်ꩧၵထႃ၊ ꩪမ်မပၻ