ဢႃႇရႃႇမၻူႇသၵ၊ ၸၢတ်ႈ

46- ꩡၢတ်ႈဢႃရႃမၻူသၵ

(ဢႃရႃမၻူသၵ = လုၵ်ႈဢွၼ်ႇယႃႉသူၼ်) ႁဵတ်းႁႂ်ႈမီးၽွၼ်းလီသေတႃႉ ပေႃးဢမ်ႇမီးတၢင်းႁူႉပႆႇၺႃႇၸိုင် ဢမ်ႇမီးၽွၼ်းလီ။

ဝတ်ႉထုပၸ်ႉၸုပၼ်ႇ

တီႈတိူင်းၵေႃးသလ ၽွင်းမိူဝ်ႈ မုၼ်ၶမ်းၽြႃး ယူႇသဝ်း တမ်ႈတီႈ ဝၢၼ်ႈဢွၼ်ႇဝၢၼ်ႈၼိုင်ႈၼၼ်ႉ ဢိင်ပိုင်ႈလူၺ်ႈ လွင်ႈတၢင်း လုၵ်ႈဢွၼ်ႇ ၸိူဝ်းယႃႉသူၼ်မွၵ်ႇသေ ၸင်ႇတေႁေႃး ၸၢတ်ႈၼႆႉယူႇယဝ်ႉ။ ၽူႈမၢၵ်ႈ တီႈဝၢၼ်ႈၼၼ်ႉၵေႃႉၼိုင်ႈ ၸင်ႇၽိတ်ႈပၢင်း မုၼ်ၶမ်းၽြႃး ၼၢမ်းၼႃႈသင်ႇၶႃႇၸဝ်ႈၶဝ်သေ မႃး လူႇယႂ်ႇတၢၼ်းလူင် တမ်ႈတီႈသူၼ်သိူဝ်းမၼ်းယူႇ။ ၸွမ်းၼင်ႇ ၵၢင်ၸႂ်မီးၼၼ်ႉ ဢွၼ်ၵၼ်လဵပ်ႈႁဵၼ်းတူၺ်း ၼႂ်းသူၼ်မွၵ်ႇၶႃႈတႃႉ ၼႆၵေႃႈ လဝ်ႈလၢတ်ႈထိုင် တမ်ႈတီႈ သင်ႇၶႃႇၸဝ်ႈၶဝ်ယူႇ။ ပေႃးဝႃႈ ၸဝ်ႈရႁၢၼ်းၶဝ် ႁွင်ႉဢဝ် ၵူၼ်းပႂ်ႉသူၼ်သေ လဵပ်ႈဢႅဝ်ႇတူၺ်း ၼႂ်းသူၼ်မွၵ်ႇၼၼ်ႉၼႆ ၼႂ်းသူၼ်တီႈၼိုင်ႈၼၼ်ႉ ဢမ်ႇလႆႈႁၼ် တူၼ်ႈမႆႉသင်လႄႈ ၸင်ႇထၢမ် ၽူႈပႂ်ႉသူၼ် လွင်ႈတၢင်းမၼ်းယူႇ။ ၵူၼ်းပႂ်ႉသူၼ် ၸင်ႇဝႃႈ “ၸဝ်ႈႁဝ်းတီႈၶႃႈ... ၽွင်းမိူဝ်ႈ တိုၵ်ႉၽုၵ်ႇသွမ်ႈ တူၼ်ႈမႆႉယူႇၼၼ်ႉ ၸင်ႇမီး လုၵ်ႈဢွၼ်ႇၸၢႆးၵေႃႉၼိုင်ႈ ပေႃးဝႃႈ မၼ်းႁူတ်းၼမ်ႉ တူၼ်ႈမႆႉၼႆ မၼ်းထွၼ်တူၺ်း ႁၢၵ်ႈတူၼ်ႈမႆႉ ဢၼ်ပွတ်း ဢၼ်ယၢဝ်းသေ ၸင်ႇတေႁူတ်းၼမ်ႉ တီႈၶႃႈဢေႃႈ။ ၵွပ်ႈၼၼ် တူၼ်ႈမႆႉဢွၼ်ႇၸိူဝ်းၼၼ်ႉ ႁဵဝ်ႇႁႅင်ႈတၢႆၵႂႃႇလႄႈ ၸင်ႇၵိုတ်းဝႆႉ လွၵ်းလိၼ်ပဝ်ႇၵူၺ်း ၶႃႈဢေႃႈ”ၼႆယဝ်ႉ။ လွင်ႈတၢင်းဢၼ်ၼၼ်ႉ လုၵ်ႉတီႈ ၸဝ်ႈရႁၢၼ်းၶဝ်သေ မုၼ်ၶမ်းၽြႃး လႆႈႁူႉငိၼ်းလႄႈ မုၼ်ၶမ်းၽြႃး ၸင်ႇဝႃႈ “ၸၢႆးဢွၼ်ႇၵေႃႉၼႆႉ မၼ်း ယၢမ်ႈယႃႉလူႉ တူၼ်ႈမႆႉ ၸၢတ်ႈၼႆႉၵူၺ်း ဢမ်ႇၸႂ်ႈ၊ ၸၢတ်ႈၵွၼ်ႇဝၼ်းလင်ၵေႃႈ တေႃႈယၢမ်ႈ ယႃႉလႅဝ်မႃးယဝ်ႈ” ၼႆသေ ၸင်ႇတေႁေႃးလၢတ်ႈၼႄ ၸၢတ်ႈၵွၼ်ႇဝၼ်းလင်ယဝ်ႉ-

ဝတ်ႉထုဢတိတ်ႈ

မိူဝ်ႈၵွၼ်ႇ တီႈမိူင်းၿႃႇရၼသီႇ ၽွင်း ၶုၼ်ႁေႃၶမ်းၿြႁမၻတ်ႈ ပဵၼ်ၶုၼ်ၸိုင် တီႈမိိူင်းၼၼ်ႉ ၵႆႉၵႆႉလေႇ ႁဵတ်းပွႆးလႅင်လၢဝ်ၼၵ်ႈၶတ်ႈယဝ်ႉ။ ၵူၼ်းဝၢၼ်ႈၵူၼ်းမိူင်းၶဝ် တင်းမိူင်းၵေႃႈ မူၼ်ႈမူၼ်ႈသိူဝ်း သိူဝ်းသေ ဢွၼ်ၵၼ် ၶဝ်ႈဢႅဝ်ႇ ပွႆးၼၵ်ႈၶတ်ႈယူႇ။ ၵူၼ်းပႂ်ႉသူၼ်သိူဝ်း ၶုၼ်ႁေႃၶမ်းၵေႃႈ သမ်ႉၶႂ်ႈၵႂႃႇ ဢႅဝ်ႇလႄႇ ပွႆးၼၵ်ႈၶတ်ႈၼၼ်ႉယူႇ။ ၵွပ်ႈၼၼ် ၵူၼ်းပႂ်ႉသူၼ်ၼၼ်ႉ ၸင်ႇၵႂႃႇၸူး တီႈႁူဝ်ၼႃႈလိင်းလူင် တူဝ်ၼိုင်ႈသေ ၸင်ႇၵႂႃႇ ပၼ်ပုၼ်ႈၽွၼ်းလိင်းဝႃႈ “ႁဝ်းတေၵႂႃႇၶဝ်ႈဢႅဝ်ႇ ပွႆးၼၵ်ႈၶတ်ႈ ၼႂ်းဝဵင်းလႄႈ ၸူဝ်ႈၵႃႈ ႁဝ်းပႆႇမႃးၼၼ်ႉ ႁႂ်ႈႁူတ်းပၼ် ၼမ်ႉတူၼ်ႈမႆႉ”ၼႆသေ ၸင်ႇတေဢဝ် ထူင်ၼင်လႄႈ ပုင်းမႆႉ ပၼ်ဝႆႉယဝ်ႉ။ လိင်းလူင်တူဝ်ၼၼ်ႉ ၸင်ႇသင်ႇ လိင်းဢွၼ်ႇတင်းလၢႆဝႆႉ ပေႃးတေႁူတ်းၼမ်ႉ တူၼ်ႈမႆႉၼႆၸိုင် ၼင်ႇႁိုဝ် တေဢမ်ႇသဵင်ႈၼမ်ႉၼမ်ၼၼ်ႉ ဢွၼ်ၵၼ် ထွၼ်တူၺ်း တူၼ်ႈမႆႉဢွၼ်ႇၸိူဝ်းၼၼ်ႉသေ ၸိူဝ်းဢၼ်ႁၢၵ်ႈမၼ်းယၢဝ်းၼၼ်ႉ ႁူတ်းၼမ်ႉၼမ်၊ ၸိူဝ်းဢၼ်ႁၢၵ်ႈမၼ်းပွတ်းၼၼ်ႉ ႁူတ်းၼမ်ႉႁၢမ်ႉဢေႇတႃႉ ၼႆယဝ်ႉ။ လိင်းဢွၼ်ႇၸိူဝ်းၼၼ်ႉၵေႃႈ ႁဵတ်းသၢင်ႈႁၢင်ႈပွင် ၸိူင်ႉၼင်ႇ ၶေႃႈၵႂၢမ်း လိင်းလူင်ၼၼ်ႉယဝ်ႉ။ ပေႃးဝႃႈ ၽူႈမီးပႆႇၺႃႇၵေႃႉၼိုင်ႈ မႃးႁၼ်ၼင်ႇၼၼ် ၸင်ႇမႃးထၢမ်ဝႃႈ ၵွပ်ႈသင်ႈလႄႈ ထူၺ်ႈႁၢၵ်ႈတူၼ်ႈမႆႉဢွၼ်ႇၸိူဝ်းၼႆႉသေ ႁူတ်းၼမ်ႉၼႆလႄႈ ၸင်ႇလၢတ်ႈၼႄ လွင်ႈဢၼ်လိင်းလူင်ၶပ်းၶိုင် ၸႂ်ႉႁဵတ်းၼင်ႇၼႆ ၼႆယဝ်ႉ။ ၵမ်းၼၼ်ႉ ၵူၼ်းၸၢႆးၽူႈမီးပႆႇၺႃႇၼၼ်ႉ ၸင်ႇသႄႉသွမ်း လိင်းလူင်ၼၼ်ႉသေ လွတ်ႈႁေႃး ၵႃႇထႃႇတီႈတႂ်ႈၼႆႉယဝ်ႉ။

ပႃႇလိ

46 ။ ၼ ဝေ ဢၼတ်ထၵုသလေၼ ၊ ဢတ်ထႁရိယႃ သုၶႃဝႁႃ။ ႁႃပေတိ ဢတ်ထံ ၻုမ်မေꩪေႃ ၊ ၵပိ ဢႃရႃမိၵေႃ ယထႃ။

ပိၼ်ႇတႆး

တၢင်းႁဵတ်း ၵူၼ်း ဢၼ်ဢမ်ႇမေႃၶိုင်သၢင်ႈႁၢင်ႈပွင် ၵၢၼ် ဢၼ်မီးၽွၼ်းလီၼၼ်ႉ မၼ်းတိုၼ်း ဢမ်ႇၶိုၼ်ႈယႂ်ႇမႂ်ႇသုင်လႆႈ။ ၵူၼ်း ဢမ်ႇမီးပႆႇၺႃႇတၢင်းမေႃၼၼ်ႉ ဵတမိူၼ်ၼင်ႇ လိင်းပႂ်ႉသူၼ် ႁဵတ်းႁႂ်ႈ ဢမ်ႇမီးၽွၼ်းလီသင် ၼၼ်ႉယဝ်ႉ။

• ႁူမ်ႈꩡၢတ်ႈ ။ ။

ၵူၼ်းၸၢႆး ၽူႈမီးပႆႇၺႃႇၼၼ်ႉ မႃးပဵၼ် ၽြႃး။
လိင်းလူင်ၼၼ်ႉ မႃးပဵၼ် ၵူၼ်းၸၢႆးဢွၼ်ႇ ဢၼ်ယႃႉလႅဝ်သူၼ်။
မႄႈရေႃးႁိၼီႇၸၢတ်ႈၵွၼ်ႇၼၼ်ႉ မႃးပဵၼ်မႄႈရေႃးႁိၼီႇၸၢတ်ႈၼႆႉ။

• ၵၼ်သွၼ် ။ ။

1. ပေႃးဢမ်ႇမီးပႆႇၺႃႇတၢင်းမေႃၸိုင် ပွင်ၶိုင်ႁဵတ်းႁႂ်ႈမီးၽွၼ်းလီၵေႃႈဢမ်ႇပဵၼ်ၽွၼ်းလီလႆႈ။
2. ၸေႇတၼႃႇၸိုဝ်ႈၸႂ်ႈယူႇသေတႃႉ ပေႃးတၢင်းႁဵတ်း ဢမ်ႇၸိုဝ်ႈၸႂ်ႈၼႆၸိုင် ၸၢင်ႈလူႉလႅဝ်။

• ပႃႇရမီႇ ။ ။ ပၺ်ႇၺႃႇပႃႇရမီႇ။
• မင်ႇၷလႃႇ ။ ။ “ၿႃႁုသ်သၸ်ၸ မင်ႇၷလႃႇ၊ ပၼ်ꩦိတႃၼၺ်ၸ မင်ႇၷလႃႇ၊”လူႉလႅဝ်။