ဢႃၸႃမၻႃယိၵႃ ဝိမႃၼဝတ်ထု၊ ၼၢင်းၽီ ဢၼ်လႆႈလူႇၶဝ်ႈၶႅမ်ႈ

3-ဢႃၸႃမၻႃယိၵႃ ဝိမႃၼဝတ်ထု၊ ၼၢင်းၽီ ဢၼ်လႆႈလူႇၶဝ်ႈၶႅမ်ႈ

• 185-6။ ၼၢင်းယိင်းတုၵ်ႉၵတႃႇ ၵေႃႉဢၼ်ၽၢၼ်ပီႈၼွင်ႉ ဢၼ်လႆႈယူႇသဝ်း တီႈတုပ်ႈႁိူၼ်းပိူၼ်ႈၼၼ်ႉ တၢမ်တူဝ်မၼ်း လႆႈဢဝ်ၶဝ်ႈၶႅမ်ႈ လူႇတၢၼ်းပၼ် ၸဝ်ႈႁဝ်း ဢၼ်မႃးတုင်းသွမ်း ၸုၵ်း ၼိမ်ဝႆႉၼၼ်ႉယဝ်ႉ။ ၼၢင်းယိင်းၵေႃႉၼၼ်ႉ တၢႆသေ ႁွတ်ႈၵႂႃႇတီႈလႂ်ၶႃႈၼေႃး (ၼႆ ၸဝ်ႈၶုၼ် ဢိၼ်း ထၢမ်ၵႂႃႇၼင်ႇၼႆယဝ်ႉ)
• 187-9။ ၼၢင်းယိင်းတုၵ်ႉၵတႃႇ ၵေႃႉဢၼ်ၽၢၼ်ပီႈၼွင်ႉ ဢၼ်လႆႈယူႇသဝ်း တီႈတုပ်ႈႁိူၼ်း ပိူၼ်ႈၼၼ်ႉ မီးၸႂ်သတ်ႉထႃႇသေ တၢမ်တူဝ်မၼ်းၼၢင်း လႆႈဢဝ်ၶဝ်ႈၶႅမ်ႈ လူႇတၢၼ်းပၼ် ၵဝ်ၸဝ်ႈယဝ်ႉ။ ၼၢင်းယိင်းၵေႃႉၼၼ်ႉ တၢႆၽၢတ်ႇပၢၼ်ၵူၼ်းသေ မိူဝ်းယူႇသဝ်းၵျေႃႇမူၼ်ႈ တမ်ႈတီႈ မိူင်းၽီ ၼိမ်မႃႇၼရတိ တီႈၽီၽုင်းတၼ်းၶူဝ်းယႂ်ႇၶဝ် ယူႇသဝ်းၵျေႃႇမူၼ်ႈၼၼ်ႉယဝ်ႉ (ၼႆ ၸဝ်ႈမႁႃႇၵတ်ႉသပ လၢတ်ႈၵႂႃႇၼင်ႇၼႆယဝ်ႉ)။
• 190။ တၢင်းလူႇ ၼၢင်းယိင်းတုၵ်ႉၵတႃႇ ၵေႃႉဢၼ်ၽၢၼ်ပီႈၼွင်ႉ ဢၼ်ပဵၼ်တမ်ႈတီႈ ၸဝ်ႈမႁႃႇ ၵတ်ႉသပၼၼ်ႉ လီဢၢမ်းတႄႉယဝ်ႉ။ တၢင်းလူႇ ၶဝ်ႈၶႅမ်ႈမၼ်း ဢၼ်လႆႈဢဝ်မႃး တမ်ႈတီႈႁိူၼ်းပိူၼ်ႈသေ လူႇၵႂႃႇၼၼ်ႉ တဵမ်ထူၼ်ႈတႄႉယဝ်ႉ။
• 191။ သူၶဝ်ဢိူၺ်း... ၼၢင်းယိင်းႁၢင်ႈလီ ဢၼ်မီးပၵ်းပိူင်ဢင်ႇၵႃႇလဵၵ်ႉယႂ်ႇတဵမ်ထူၼ်ႈသေ ၸဝ်ႈၽူဝ်တူၺ်းဢမ်ႇဢိမ်ႇလႆႈၼၼ်ႉ လႆႈပဵၼ်မေးၶုၼ်ၸၵျဝတေးသေတႃႉ ပေႃးမႃးတႅၵ်ႈၵၼ်တင်းတၢင်းလူႇ ဢၼ်ၼၢင်းၵူၼ်းၽၢၼ် လႆႈလူ ၶဝ်ႈၶႅမ်ႈၼၼ်ႉၸိုင် ၵႃႈၶၼ်မၼ်း သိပ်းႁူၵ်းပုၼ်ႈ ၼိုင်ႈပုၼ်ႈၵေႃႈ တေႃႈဢမ်ႇတၢၼ်ႇ။
• 192။ ၶမ်းၶႃၼိုင်ႈသႅၼ်၊ မႃႉၼိုင်ႈသႅၼ်၊ လေႃႉရထႃးၼိုင်ႈသႅၼ် ဢၼ်မႃႉသိင်းထေႃးတိုတ်ႉၸၼ်၊ ၼၢင်းယိင်းသၢဝ်ၼိုင်ႈသႅၼ် ဢၼ်တိုဝ်းပီႇႁူသႅင်လႅင် (ၸိူဝ်းၼႆႉတင်းသဵင်ႈၵေႃႈ) ပေႃးမႃးတႅၵ်ႈၵၼ်တင်း တၢင်းလူႇ ဢၼ်ၼၢင်းၵူၼ်းၽၢၼ်လႆႈလူ ၶဝ်ႈၶႅမ်ႈၼၼ်ႉၸိုင် ၵႃႈၶၼ်မၼ်း သိပ်းႁူၵ်းပုၼ်ႈ ၼိုင်ႈပုၼ်ႈၵေႃႈ တေႃႈဢမ်ႇတၢၼ်ႇ။
• 193။ ၸၢင်ႉမႃႇတင်ႇၵ ပၢၵ်ႇတူဝ် ဢၼ်ယူႇတီႈ လွႆႁိမဝၼ်ႇတႃႇ၊ ဢၼ်မီးငႃးမွင်ႉဢွၼ်ႇ ပႅၼ်ဢွၵ်ႇမႃး၊ ဢၼ်မေႃတိုၵ်းသိုၵ်း၊ ဢၼ်ဢဝ်ၸိူၵ်ႈၶမ်း ႁၢင်ႈၶိူင်ႈဝႆႉၼၼ်ႉ ပေႃးမႃးတႅၵ်ႈၵၼ်တင်းတၢင်း လူႇ ဢၼ်ၼၢင်းၵူၼ်းၽၢၼ်လႆႈလူ ၶဝ်ႈၶႅမ်ႈၼၼ်ႉၸိုင် ၵႃႈၶၼ်မၼ်း သိပ်းႁူၵ်းပုၼ်ႈ ၼိုင်ႈပုၼ်ႈၵေႃႈ တေႃႈဢမ်ႇတၢၼ်ႇ။
• 194။ တီႈၼႂ်းလေႃးၵၼႆႉ ၵူၼ်းၵေႃႉၼိုင်ႈၼႆႉ လႆႈဢုပ်ႉပိူင်ႇ ၵုၼ်လူင်သီႇၵုၼ်ယဝ်ႉ။ ၸီးၸိမ်ႇ ၶုၼ်ၸၵျဝတေးၼၼ်ႉ ပေႃးမႃးတႅၵ်ႈၵၼ် တင်းတၢင်းလူႇ ဢၼ်ၼၢင်းၵူၼ်းၽၢၼ်လႆႈလူ ၶဝ်ႈၶႅမ်ႈၼၼ်ႉၸိုင် ၵႃႈၶၼ်မၼ်း သိပ်းႁူၵ်းပုၼ်ႈ ၼိုင်ႈပုၼ်ႈၵေႃႈ တေႃႈဢမ်ႇတၢၼ်ႇ။

ဢႃၸႃမၻႃယိၵႃ ဝိမႃၼဝတ်ထု ႁူဝ်သၢမ်သုတ်းယဝ်ႉ။