ဢုၸ်ꧡုၻႃယိၵႃဝိမႃၼဝတ်ထု၊ ၼၢင်းၽီလႆႈလူႇဢွႆႈ
2-ဢုၸ်ꧡုၻႃယိၵႃဝိမႃၼဝတ်ထု၊ ၼၢင်းၽီလႆႈလူႇဢွႆႈ
မႄးထတ်း- 296။ မိူၼ်ၼင်ႇ လိူၼ် တႃဝၼ်း ႁဵတ်းႁႂ်ႈၵၢင်ႁၢဝ်လႄႈ ၼင်လိၼ်မိူင်း ႁိူဝ်ႈလႅင်ႈႁၢင်ႈလီၼင်ႇၼၼ် မႂ်းၼၢင်းၽီၵေႃႈ ႁၢင်ႈလီၼႃႇတႄႉယဝ်ႉ။ မိူၼ်ၼင်ႇ ၶုၼ်သၢင်လူင် ႁၢင်ႈၶိုၵ်ႉလိူဝ်တွၼ်းသေ ၸဝ်ႈၶုၼ်ဢိၼ်း မိူင်းၽီတႃႇဝတိမ်ႇသႃႇ လႄႈ ၽီတင်းလၢႆၼင်ႇၼၼ် မႂ်းၵေႃႈ ဢဝ်တၢင်းဢူႁိၵ်ႈ ဢဝ်တၢင်းဢူငဝ်း ဢဝ်တၢင်းဢလုမ်းဢလၢင်း ဢဝ်တင်းတၼ်းၶူဝ်းသေ တွၼ်းၵႄးၶိုၵ်ႉတွၼ်းလိူဝ်ပိူၼ်ႈ တင်းသဵင်ႈယဝ်ႉ။
- 297။ ၼၢင်းၽီ ဢၼ်ပၵ်းဝႆႉမွၵ်ႇမူဝ် ဢၼ်ၼဵပ်းဝႆႉမွၵ်ႇ(ရတၼႃႇ)တီႈႁူဝ် ဢၼ်ဢူငဝ်းတူဝ် ႁိူဝ်ႈႁိူင်းမိူၼ်ၶမ်း ဢၼ်ဢဝ်တၼ်းသႃႇႁၢင်ႈၶိူင်ႈတီႈတူဝ်ဝႆႉ ဢၼ်ၼုင်ႈဝႆႉ ၽႃႈၵႅဝ်ႈသေ ႁၢင်ႈၶိုၵ်ႉလိုၵ်ႉဝႆႉၼၼ်ႉ ၵဝ်ထၢမ်မႂ်းယူႇယဝ်ႉ။ မႂ်းၼၢင်း ဢၼ်မႃးဝႆႉၵဝ်ယူႇၼႆႉ ပဵၼ်ၽႂ်ၼေႃး။
- 298။ ၼၢင်းၽီ ၸၢတ်ႈၵွၼ် မိူဝ်ႈပဵၼ်ၵူၼ်းၼၼ်ႉ မႂ်းၼၢင်းလႆႈႁဵတ်းမႃး ၵၢမ်ႇဢၼ်လႂ်။ မိူဝ်ႈမႂ်း ပဵၼ်ၵူၼ်းၼၼ်ႉ လွင်ႈလူႇတၢၼ်းၼၼ်ႉ မႂ်းယၢမ်ႈႁဵတ်းသၢင်ႈႁၢင်ႈပွင်မႃးယူႇႁႃႉ။ ဢမ်ႇၼၼ် ယၢမ်ႈႁပ်ႉ သိၼ်မႃးယူႇႁႃႉ။ ၵွပ်ႈပိူဝ်ႈ ၵုသူဝ်ႇထူးဢၼ်လႂ်သေ မႂ်းၼၢင်း လႆႈမႃးဢဝ်သၼ်ႇထေႇ တမ်ႈတီႈ သုၵတိ မိူင်းၽီသေ သမ်ႉမႃးမီး ဢလုမ်းဢလၢင်းၼမ်ၼင်ႇၼႆၼေႃး။ ၽွၼ်းလီဢၼ်ၼႆႉ ပဵၼ်ၽွၼ်းလီ ၵုသူဝ်ႇ ဢၼ်လႂ်။ ၼၢင်းၽီ ၵဝ်ထၢမ်မႂ်းယူႇယဝ်ႉ။ တွပ်ႇပၼ်တႃႉ။
- 299။ ၸဝ်ႈႁဝ်းတီႈၶႃႈ တၢမ်ႈတီႈ မိူင်းရႃႇၸၵႁၼၼ်ႉ ပုၼ်ႈတႃႇတေတုင်းသွမ်းၼၼ်ႉ (ၸဝ်ႈႁဝ်း ၽႅဝ်မႃး တမ်ႈတီႈ ႁိူၼ်းၶႃႈၼၢင်းၶႃႈဢေႃႈ။ ၵွပ်ႈပိူဝ်ႈ ၽႅဝ်မႃး တမ်ႈတီႈႁိူၼ်းလႄႈ ၶႃႈၼၢင်း မီးတၢင်း ၸႂ်ၼပ်ႉယမ်သေ လႆႈဢဝ်ဢွႆႈၵမ်ႈၽွင်ႈ လူႇတၢၼ်းပၼ် ၸဝ်ႈႁဝ်းၵႂႃႇ ႁူမ်ႁူမ်ၸူမ်းၸူမ်းယဝ်ႉ။
- 300။ ၸဝ်ႈႁဝ်းတီႈၶႃႈ ဝၢႆးၼၼ်ႉ မႄႈဢွၵ်ႇၼၢႆး မႃးတွင်ႈထၢမ်ဝႃႈ “လုၵ်ႈပႂ်ႉဢွၼ်ႇ ဢွႆႈၼၼ်ႉ ဢဝ်ၵႂႃႇပႅတ်ႈတီႈလႂ်”ၼႆယဝ်ႉ။ ပေႃးထၢမ်ၼင်ႇၼၼ် “ၸဝ်ႈမႄႈ ဢွႆႈၼၼ်ႉ ၸုၼ်ႉၵေႃႈၶႃႈၼၢင်းဢမ်ႇ ၸုၼ်ႉပႅတ်ႈၼင်ႇၵဝ်ႇ။ ၵိၼ်ၵေႃႈ ဢမ်ႇၵိၼ်ၼင်ႇၵဝ်ႇ။ တၢမ်တူဝ်ၶႃႈၼၢင်း ဢဝ်လူႇပၼ် တမ်ႈတီႈ ၸဝ်ႈရႁၢၼ်း ဢၼ်ဢမ်ႇမီးၵိလေႇသႃႇၼၼ်ႉယဝ်ႉ” (လၢတ်ႈၵႂႃႇၼင်ႇၼႆယဝ်ႉ)။
- 301။ ၸဝ်ႈႁဝ်းတီႈၶႃႈ မႄႈဢွၵ်ႇၼၢႆးၼၼ်ႉ ထႃႉလႃႇဝႃႈ “ႁိူၺ်ႉ လုၵ်ႈပႂ်ႉ ႁိူၼ်းလင်ၼႆႉ မႂ်းပဵၼ်ၸဝ်ႈႁိူၼ်းႁႃႉ ၵဝ်ပဵၼ်ၸဝ်ႈႁိူၼ်းႁႃႉ”ၼႆယဝ်ႉ။ မႄႈဢွၵ်ႇၼၢႆးၼၼ်ႉ ဢဝ်ၶႅပ်းမႆႉပႅၼ်ႈ ပေႃႉ မင်ၶႃႈၼၢင်းဢေႃႈ။ ၶႃႈၼၢင်း လႆႈသဵင်ႈၸူဝ်ႈပၢၼ်ၵူၼ်းသေ မႃးပဵၼ်ၼၢင်းၽီယဝ်ႉ။
- 302။ ၶႃႈၼၢင်းၵူၺ်းလႆႈႁဵတ်း ၵၢၼ်ၵုသူဝ်ႇ ဢၼ်ဢမ်ႇမီးတၢင်းၽိတ်း ဢၼ်ၸၢင်ႈပၼ်ၽွၼ်းလီ ဢၼ်လႆႈဢဝ်ဢွႆႈလူႇတၢၼ်း ၼၼ်ႉၵူၺ်းဢေႃႈ။ တၢမ်တူဝ် လႆႈၸၢမ်ႇပူၺ်ႈလူၺ်ႈ ၽွၼ်းလီသိူဝ်းသႃႇ ၵုသူဝ်ႇယဝ်ႉ။ ၶႃႈၼၢင်း လႆႈၵျေႃႇလူၺ်ႈ ဢလုမ်းဢလၢင်းၽီၶဝ်ယူႇဢေႃႈ။ ၶႃႈၼၢင်းလႆႈမူၼ်ႈသိူဝ်းလူၺ်ႈ ၵႃႇမၵုၼ်ႇႁႃႈပိူင်ယူႇဢေႃႈ။
- 303။ ၶႃႈၼၢင်းၵူၺ်းလႆႈႁဵတ်း ၵၢၼ်ၵုသူဝ်ႇ ဢၼ်ဢမ်ႇမီးတၢင်းၽိတ်း ဢၼ်ၸၢင်ႈပၼ်ၽွၼ်းလီ ဢၼ်လႆႈဢဝ်ဢွႆႈလူႇတၢၼ်းၼၼ်ႉၵူၺ်းဢေႃႈ။ တၢမ်တူဝ် လႆႈၸၢမ်ႇပူၺ်ႈလူၺ်ႈ ၽွၼ်းလီသိူဝ်းသႃႇ ၵုသူဝ်ႇယဝ်ႉ။ ၶႃႈၼၢင်းၼႆႈ လႆႈတၢင်းၽီတႃႇဝတိမ်ႇသႃႇၶဝ် လူလွမ်ပႂ်ႉပႂ်ႉပႃးယူႇလႄႈ လႆႈလွင်ႈႁူမ်ႈလူမ်ႈ မိူၼ်ၼင်ႇ ၸဝ်ႈၶုၼ်ဢိၼ်းတီႈၶႃႈယဝ်ႉ။ လႆႈၸၢမ်ႇပူၺ်ႈလူၺ်ႈ ၵႃႇမၵုင်ႇႁႃႈပိူင် တဵမ်ထူၼ်ႈယူႇဢေႃႈ။
- 304။ ၽွၼ်းလီ လွင်ႈတၢင်းလီၼင်ႇၼႆၼႆႉ ယႂ်ႇၼမ်တႄႉယဝ်ႉ။ တၢင်းလူႇ ဢၼ်လႆႈလူႇဢွႆႈ ပွတ်းဢွၼ်ႇၼၼ်ႉ ၽွၼ်းလီမီးယႂ်ႇမီးၼမ်တႄႉယဝ်ႉ။ ၶႃႈၼၢင်း လႆႈၵျေႃႇလူၺ်ႈ ဢလုမ်းဢလၢင်းၽီၶဝ်ယူႇဢေႃႈ။ ၶႃႈၼၢင်းလႆႈမူၼ်ႈသိူဝ်းလူၺ်ႈ ၵႃႇမၵုၼ်ႇႁႃႈပိူင်ယူႇဢေႃႈ။
- 305။ ၽွၼ်းလီ လွင်ႈတၢင်းလီၼင်ႇၼႆၼႆႉ ယႂ်ႇၼမ်တႄႉယဝ်ႉ။ တၢင်းလူႇ ဢၼ်လႆႈလူႇဢွႆႈ ပွတ်းဢွၼ်ႇၼၼ်ႉ ဢႃႇၼုၽေႃႇယႂ်ႇတႄႉယဝ်ႉ။ ၽီတႃႇဝတိမ်ႇသႃႇၶဝ် လူလွမ်ပႂ်ႉပႃးယူႇလႄႈ လႆႈလွင်ႈ ႁူမ်ႇလူမ်ႈ မိူၼ်ၼင်ႇ ၸဝ်ႈၶုၼ်ဢိၼ်းတီႈၶႃႈယဝ်ႉ။ ၸဝ်ႈၶုၼ်ဢိၼ်း ဢၼ်မီးတႃတိပ်ႉ ႁဵင်လုၵ်ႈသေ လႆႈမူၼ်ႈသိူဝ်းလူၺ်ႈ ၼႂ်းသူၼ်သိူဝ်းၼၼ်ႇတဝၼ်ႇၼင်ႇၼၼ် (ၶႃႈၼၢင်း) လႆႈၵျေႃႇမူၼ်ႈသိူဝ်းယဝ်ႉ။
- 306။ ၸဝ်ႈႁဝ်းတီႈၶႃႈ ၶႃႈၼၢင်းၼႆႉ လႆႈဝႆႈသႃၸဝ်ႈႁဝ်း ဢၼ်မီးလွင်ႈဢီးလူ ဢၼ်မီးပၺ်ႇ ၺႃႇၼၼ်ႉယဝ်ႉ။ လႆႈတွင်ႈထၢမ်မႃး လွင်ႈၸဝ်ႈႁဝ်း ဢမ်ႇမီးတၢင်းၶႆႈတၢင်းပဵၼ်ၼၼ်ႉယဝ်ႉ။ လိူဝ်သေ ၼၼ်ႉ ၶႃႈၼၢင်း မီးတၢင်း ၸႂ်ၼပ်ႉယမ်သေ လႆႈဢဝ်ဢွႆႈၵမ်ႈၽွင်ႈ လူႇတၢၼ်းပၼ် ၸဝ်ႈႁဝ်းၵႂႃႇ ႁူမ်ႁူမ်ၸူမ်းၸူမ်းယဝ်ႉ။
ဢုၸ်ꧡုၻႃယိၵႃဝိမႃၼဝတ်ထု ႁူဝ်သွင် သုတ်းယဝ်ႉ။
ၽိုၼ်ဢိင်
မႄးထတ်း- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ဢိၻ်ꩪိဝိမႃၼ၊ ပႃရိၸ်ꧡတ်တၵဝၷ်၊ ဢုၸ်ꧡုၻႃယိၵႃဝိမႃၼဝတ်ထု