သိရိမႃဝိမႃၼဝတ်ထု၊ ၼၢင်းၽီသီႇရိမႃႇ

15-သိရိမႃဝိမႃၼဝတ်ထု၊ ၼၢင်းၽီသီႇရိမႃႇ မႄးထတ်း

  • 137။ ရထႃးမႂ်းၼၢင်းၼၼ်ႉ ဢဝ်မႃႉ ဢၼ်ဢဝ်ၶူဝ်းၵႅဝ်ႈ ႁၢင်ႈၶိူင်ႈဝႆႉ ဢၼ်(လုၵ်ႉမိူင်းၽီလူင်းမႃးသေ) ၵူမ်ႈၼႃႈလူင်းဝႆႉသေ ဢၼ်မေႃမိၼ်လႆႈ ၼိူဝ်ၵၢင်ႁၢဝ် ဢၼ်မီးႁႅင်းၽႂ်းၽၢႆတဵမ်ထူၼ်ႈၼၼ်ႉ ႁၢင်ႈဝႆႉယူႇ။ မႃႉရထႃးႁႃႈပၢၵ်ႇ ဢၼ်မႂ်းၼၢင်းၽၢၼ်ႇပဵၼ်ၼၼ်ႉ မိူၼ်ၼင်ႇ မီးၵေႃႉႁေႃႈမၼ်းသေ ၵႂႃႇၸွမ်းၼင်ႇ ဢၼ်မႂ်းၶႂ်ႈၵႂႃႇၼၼ်ႉယဝ်ႉ။
  • 138။ မႂ်းၼၢင်းၽီ ဢၼ်ႁၢင်ႈၶိူင်ႈဝႆႉ တီႈတူဝ်သေ ၶီႇၼိူဝ်လေႃႉရထႃး ဢၼ်ႁိူဝ်ႈလႅင်းမၢပ်ႈမိပ်ႈ ဝႆႉယူႇ။ ၼၢင်းၽီႁၢင်ႈလီ ဢၼ်လီယဵမ်ႈလီတူၺ်း ၵဝ်ထၢမ်မႂ်းယူႇယဝ်ႉ။ မႂ်းၼၢင်း လုၵ်ႉတီႈ မိူင်းၽီၶူင်းလႂ်သေ မႃးၸူးတမ်ႈတီႈ မုၼ်ၶမ်းၽြႃးယူႇ။
  • 139။ ၸဝ်ႈႁဝ်းတီႈၶႃႈ ၽီၸိူဝ်းဢၼ်မီး ၵႃႇမၵုၼ်ႇၶိုၵ်ႉတွၼ်းၸိူဝ်းၼၼ်ႉ ဢွၼ်ၵၼ်ဝႃႈ မိူင်းၽီဢၼ်ၼၼ်ႉ ၶိုၵ်ႉတွၼ်းတႄႉၼႆယဝ်ႉ။ ၽီမိူင်းၼၼ်ႉ ဢဝ်ဢူၽုင်းၽီၶဝ် ၽၢၼ်ႇပဵၼ် ၽၢၼ်ႇပဵၼ်သေ မူၼ်ႈၵျေႃႇယူႇယဝ်ႉ။ တူၶႃႈၼၢင်းၽီ ဢၼ်တဵမ်ထူၼ်ႈတၼ်းၸႂ်ၵူႈပိူင်ၼႆႉ လုၵ်ႈတီႈမိူင်းၽီ(ၼိမ်ႇမႃႇၼရ တိ)သေ မႃးမိူင်းၵူၼ်း တႃႇမႃးဝႆႈသႃ မုၼ်ၶမ်းၽြႃးယဝ်ႉ။
  • 140။ ၸၢတ်ႈၵွၼ်ႇၼၼ်ႉ မႂ်းၼၢင်း လႆႈႁဵတ်းသၢင်ႈႁၢင်ႈပွင် (သုၸရိတ်ႈတြႃး)သင်မႃး။ ၵွပ်ႈပိူဝ်ႈ ၵုသူဝ်ႇဢၼ်လႂ်သေ မႂ်းၼၢင်း မီးဢလုမ်းဢလၢင်း သမ်ႉပေႃးဢမ်ႇဢၢၼ်ႇလႆႈသေ လႆႈသိူဝ်းသႃႇၶိုၼ်ႈယႂ်ႇမႂ်ႇသုင် တီႈမိူင်းၽီၼႆႉယူႇၼေႃး။ ၵွပ်ႈသင် ဢမ်ႇမီးၵေႃႉတွၼ်းလိူဝ်သေမႂ်းၼၢင်းသေ မႂ်းၼၢင်းမီးၽုင်း ယႂ်ႇ ၵႂႃႇလႆႈၼိူဝ်ၵၢင်ႁၢဝ်ၼေႃး။ ၵွပ်ႈသင် ငဝ်းတူဝ်မႂ်းၼၢင်းၵေႃႈ ႁိူဝ်ႈလႅင်းၵႂႃႇ သိပ်းၼႃႈမိူင်းၼေႃး။
  • 141။ ၼၢင်းၽီ မႂ်းၼၢင်းၼႆႉ ပဵၼ်ၵေႃႉဢၼ်ၽီတင်းလၢႆဢုမ်ႇလွမ်ႉ ၼပ်ႉယမ်ယူႇယဝ်ႉ။ မႂ်းၼၢင်း လုၵ်ႉတီႈၽဝလႂ်ႇ တၢႆသေ မိူဝ်းႁွတ်ႈထိုင်မိူင်းၽီ ၼိမ်မႃႇၼရတိၼေႃး။ မႂ်းၼၢင်း တုင်းထွမ်ႇဢဝ် ၶေႃႈသင်ႇသွၼ် သြႃႇၶူးမႃးၵေႃႉလႂ်ၼေႃး။ သင်ဝႃႈ မႂ်းၼၢင်းယၢမ်ႈပဵၼ် ဢုပႃႇသိၵႃႇ မႄႈဢွၵ်ႇမုၼ်ၶမ်းၽြႃးၸိုင် တွပ်ႇလၢတ်ႈပၼ်ၵဝ်လူး။
  • 142။ (ၶႃႈၼၢင်း) ယၢမ်ႈပဵၼ်မႃး ၵေႃႉလူႁၼ်လုမ်းလႃး ၸဝ်ႈႁေႃၶမ်း ပိမ်ႇပိသႃႇရ မိူင်းရႃႇၸ ၵႁ ဢၼ်မီးမုၼ် ဢၼ်မီးဝႆႉ ၼႂ်းၵႄႈၵၢင်လွႆၼၼ်ႉယဝ်ႉ။ ၶႃႈၼၢင်းၼႆႉ လႆႈလဵပ်ႈႁဵၼ်းယဝ်ႉတူဝ်ႈ လွင်ႈၵႃႈ လွင်ႈႁွင်ႉၵႂၢမ်းၸိူဝ်းၼႆႉယဝ်ႉ။ တီႈမိူင်းရႃႇၸၵႁၼႆႉ ႁူႉၸၵ်းၶႃႈၼၢင်းဝႃႈ ၼၢင်းသီႇရိမႃႇၼႆ တင်းသဵင်ႈယဝ်ႉ။
  • 143။ မုၼ်ၶမ်းၽြႃး ဢၼ်မေႃသင်ႇသွၼ်ဢွၼ်လီ ၸဝ်ႈရႁၢၼ်းၶဝ်ၼၼ်ႉ တမ်ႈတီႈၶႃႈၼၢင်းၵေႃႈ လွင်ႈဢမ်ႇမၼ်ႈဢမ်ႇၵိုမ်း တုၵ်ႉၶသတ်ႉၸႃႇ သမုတယသတ်ႉၸႃႇၼၼ်ႉလႄႈသင်၊ လွင်ႈမၼ်ႈၵိုမ်း ၼိရေႃးထသတ်ႉၸႃႇ ဢၼ်ဢမ်ႇၸၢင်ႈမူၼ်ႉမႄးၼၼ်ႉလႄႈသင်၊ သဵၼ်ႈတၢင်းၵတ်းယဵၼ် သိုဝ်ႈသႅတ်း မၵ်ႉၵသတ်ႉၸႃႇၼၼ်ႉလႄႈသင် ႁေႃးလၢတ်ႈၼႄပၼ်ယဝ်ႉ။
  • 144။ တမ်ႈတီႈ မုၼ်ၶမ်းၽြႃး ဢၼ်မႃးၸွမ်းသဵၼ်ႈတၢင်းၽြႃး မိူဝ်ႈမိုၼ်ႉသိုၼ်းၵွၼ်ႇၼၼ်ႉ ၶႃႈၼၢင်းၼႆႉ လႆႈထွမ်ႇငိၼ်းတြႃး လွင်ႈႁွတ်ႈထိုင်ၼိပ်ႉပၢၼ်ႇ ဢၼ်လွတ်ႈတၢင်းတၢႆ ဢၼ်ဢမ်ႇၵိုင်ႇမူၼ်ႉမႄး သေ တိုဝ်းၵမ်သိၼ်သီႇလလီလီယဝ်ႉ။ မၼ်ႈၵိုမ်းလူၺ်ႈ တြႃးမုၼ်ၶမ်းၽြႃး ဢၼ်မျၢတ်ႈတွၼ်းသေ ၽီၵူၼ်းတင်းလၢႆၼၼ်ႉယဝ်ႉ။
  • 145။ တမ်ႈတီႈ မုၼ်ၶမ်းၽြႃး ဢၼ်မႃးၸွမ်း သဵၼ်ႈတၢင်းၽြႃး မိူဝ်ႈမိုၼ်ႉသိုၼ်းၵွၼ်ႇၼၼ်ႉ ၶႃႈၼၢင်းၼႆႉ လႆႈထွမ်ႇငိၼ်း ႁူႉႁၼ်းတြႃး လွင်ႈႁွတ်ႈထိုင်ၼိပ်ႉပၢၼ်ႇ ဢၼ်လွတ်ႈတၢင်းတၢႆ ဢၼ်ဢမ်ႇၵိုင်ႇမူၼ်ႉမႄးသေ ႁွတ်ႈထိုင်သမႃႇထိ(လေႃးၵုတ်ႉတရႃႇ) ဢၼ်မွတ်ႇယဵၼ်ပႅတ်ႈ တြႃးၸိူဝ်းသၢၼ်ၶတ်းၼၼ်ႉယဝ်ႉ။ လွင်ႈလႆႈသမႃႇထိ ဢၼ်ၼၼ်ႉၼၼ်ႉ ၶႃႈၼၢင်းႁွတ်ႈထိုင် (ဢရိယႃႇမၵ်ႈ) ဢၼ်မျၢတ်ႈဢၼ်မၼ်ႈၼၼ်ႉယဝ်ႉ။
  • 146။ ၶႃႈၼၢင်းၼႆႉ ႁပ်ႉလႆႈၼိပ်ႉပၢၼ်ႇ ဢၼ်မျၢတ်ႈတွၼ်းလိူဝ်သေ ပုထုၸၼ်ႇၼၼ်ႉယဝ်ႉသေ လူင်ႉႁွတ်ႈႁၼ်ထိုင် မၵ်ႈၺၢၼ်ႇၶိုၵ်ႉလိုၵ်ႉသေ မီးတၢင်းဢဝ်မၢၼ်ႇမႅၼ်ႈယဝ်ႉ။ လွင်ႈယုမ်ႇယူဝ်းယဵင်းၵေႃႈ ယၢၼ်ၽႃႈယဝ်ႉ။ ၶႃႈၼၢင်းၼႆႉ လႆႈႁပ်ႉၶၢမ်ႇဢဝ် လွင်ႈပူႇၸေႃႇမူးၸႃးပိူၼ်ႈသေ လႆႈၸၢမ်ႇပူၺ်ႈလူၺ်ႈ လွင်ႈမူၼ်ႈသိူဝ်း တင်းၼမ်တင်းလၢႆယဝ်ႉ။
  • 147။ ဢဝ်လၢႆးၼႆႉသေ ၶႃႈၼၢင်းပဵၼ်ၼၢင်းၽီ ဢၼ်ႁူႉႁၼ် ၼိပ်ႉပၢၼ်ႇ တီႈဢမ်ႇထဝ်ႈဢမ်ႇတၢႆ ၼၼ်ႉယဝ်ႉ။ ပဵၼ်လုၵ်ႈသိတ်ႇၽြႃးပဵၼ်ၸဝ်ႈ ဢၼ်မႃးၸွမ်းသဵၼ်ႈတၢင်းၽြႃး မိူဝ်ႈမိုၼ်ႉသိုၼ်းၵွၼ်ႇၼၼ်ႉယဝ်ႉ။ ႁူႉႁၼ်တြႃး(သတ်ႉၸႃႇသီႇပႃး)ယဝ်ႉ။ ပဵၼ်ၵေႃႉၽူႈယၼ်မၼ်ႈ တမ်ႈတီႈ သေႃးတႃႇပတ်ႉတိၽူဝ်ႇသေ ၵေႃႈပဵၼ်သေႃးတႃႇပၼ်ႇယဝ်ႉ။ ၶႃႈၼၢင်းၼႆႉ တၢင်းၵႂႃႇၵတိ ဢၼ်ဢမ်ႇလီၼၼ်ႉၵေႃႈ ဢမ်ႇမီးယဝ်ႉ။
  • 148။ ၶႃႈၼၢင်းၼႆႉ ပုၼ်ႈတႃႇတေမႃး ဝႆႈသႃၽြႃးၼၼ်ႉလႄႈသင်၊ တႃႇတေမႃး ဝႆႈသႃရႁၢၼ်းၶဝ် ဢၼ်ၵွၼ်းဝႆႉ လွင်ႈၼပ်ႉယမ် ဢၼ်ဢမ်ႇမီးတၢင်းၽိတ်း ဢၼ်မူၼ်ႈသိူဝ်းလူၺ်ႈတြႃး(ၼိပ်ႉပၢၼ်ႇ)ၼၼ်ႉ လႄႈသင်၊ လႆႈႁွတ်ႈၽႅဝ်မႃးတမ်ႈတီႈ ပၢင်တုမ် မုၼ်ၶမ်းၽြႃး ဢၼ်ဢမ်ႇမီးၽေး ဢၼ်မွတ်ႇယဵၼ်ပႅတ်ႈ လွင်ႈဢမ်ႇလီ ဢိၵ်ႇလူၺ်ႈ လုၵ်ႈသိတ်ႇတပႄးၽြႃးၼၼ်ႉယဝ်ႉ။ ၶႃႈၼၢင်းမီး လွင်ႈဝႆႈသႃ တမ်ႈတီႈ မုၼ်ၶမ်းၽြႃး ဢၼ်မီးဢူၽုင်း ဢၼ်ပဵၼ်ၶုၼ်တြႃးၼၼ်ႉယဝ်ႉ။
  • 149။ ၶႃႈၼၢင်း မီးတၢင်းၸႂ်ၸူမ်းသိူဝ်း ႁၢၼ်ႉၸႂ်ဝႆႈသႃ မုၼ်ၶမ်းၽြႃး ဢၼ်မႃးၸွမ်းသဵၼ်ႈတၢင်းၽြႃး မိူဝ်ႈမိုၼ်ႉသိုၼ်းၵွၼ်ႇ ဢၼ်ပဵၼ် ၵူၼ်းၸၢႆးမျၢတ်ႈ မေႃသင်ႇသွၼ်ဢွၼ်လီ ၵေႃႉၵိုင်ႇသင်ႇသွၼ် ဢၼ်တတ်း ၶၢတ်ႇပၢတ်ႇပႅတ်ႈ တၼ်ႇႁႃႇ ဢၼ်ဢမ်ႇမီးတၢင်းၽိတ်း ဢၼ်မူၼ်ႈၸွမ်းတြႃး(ၼိပ်ႉပၢၼ်ႇ) ဢၼ်ပဵၼ်ၽူႈ ၼၢမ်းၼႃႈ ၽီၵူၼ်းၼၼ်ႉယဝ်ႉ။ ၶႃႈၼၢင်း ဝႆႈသႃႇမုၼ်ၶမ်းၽြႃး ဢၼ်ထွတ်ႈမျၢတ်ႈ ဢၼ်ဢဝ်ၽွၼ်း ပၢင်ႈလီ ပႂ်ႉပႃး(သတ်ႉတဝႃႇတင်းသဵင်ႈ)ၼၼ်ႉယဝ်ႉ။

သီရိမႃဝိမႃၼဝတ်ထု ႁူဝ်သိပ်းႁူၵ်း သုတ်းယဝ်ႉ။

ၽိုၼ်ဢိင် မႄးထတ်း

  1. ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ဢိၻ်ꩪိဝိမႃၼ၊ ပီၻဝၷ်ၷ၊ သီရိမႃဝိမႃၼဝတ်ထု