ဝတ်ထုတ်တမၻႃယိၵႃဝိမႃၼဝတ်ထု၊ ၼၢင်းၽီလူႇၽႅၼ်သိူဝ်ႈၶူဝ်း

1-ဝတ်ထုတ်တမၻႃယိၵႃဝိမႃၼဝတ်ထု၊ ၼၢင်းၽီလူႇၽႅၼ်သိူဝ်ႈၶူဝ်း

• 327။ ၸဝ်ႈၶုၼ်ဢိၼ်း ဢၼ်ပဵၼ်ၸိူဝ်ႉၶိူဝ်း ၵေႃးသိယ... (တမ်ႈတီႈ မုသိလၼၼ်ႉ) ၵဝ် လႆႈသွၼ်ပၼ်မၼ်း တၢင်းမေႃလဵတ်းတိင်ႇ ၸဵတ်းသၢႆ ဢၼ်သဵင်ဝၢၼ် ဢၼ်မေႃၸၼ်ဢဝ်ၸႂ်ပိူၼ်ႈ ၼၼ်ႉယဝ်ႉ။ မုသိလၼၼ်ႉ ႁွင်ႉၵဝ်ၶဵင်ႇတႃႉမၼ်းဝႃႈ (မႃးလႄႈ မႃးၼႄတၢင်းမေႃမႂ်းလႄႈ)ၼႆ တမ်ႈတီႈ ဝၢင်းႁေႃယူႇယဝ်ႉ။ ႁႂ်ႈ(ၸဝ်ႈၶုၼ်ဢိၼ်း) လႆႈပဵၼ် တီႈပိုင်ႈဢိင် ၶႃႈႁဝ်းသေၵမ်း။
• 328။ သြႃႇၵုတ်ႉတိလ ၵဝ်ၼႆႉ တေပဵၼ် တီႈပိုင်ႈဢိင်မႂ်းယူႇယဝ်ႉ။ ၵဝ်ၼႆႉ ပဵၼ်ၵေႃႉဢၼ် မေႃပူႇၸေႃႇမူးၸႃး တမ်ႈတီႈ သြႃႇၼၼ်ႉယဝ်ႉ။ တပႄးမႂ်း (မုသိလ)ၼၼ်ႉ တၵ်းတေ ဢမ်ႇလႆႈပႄႉ မႂ်း။ မႂ်းၵူၺ်းဢိူဝ်ႈ တၵ်းတေလႆႈပႄႉမၼ်း။
• 329။ ၼၢင်းၽီ မိူၼ်ၼင်ႇလၢဝ်မႃမွင်း ႁိူဝ်ႈႁိူင်းလႅင်းပိူင်း ၵူႈပႃႈၵူႈၽၢႆႇၼင်ႇၼၼ် ငဝ်းတူဝ်မႂ်းၼၢင်း ဢၼ်လီႁၢၼ်ႉၸႂ်ၼႃႇၼၼ်ႉၵေႃႈ ႁိူဝ်ႈႁိူင်းပိူင်းလႅင်းၵႂႃႇ ၵူႈပႃႈၵူႈတၢင်းဝႆႉယူႇယဝ်ႉ။
• 330။ ၵွပ်ႈပိူဝ်ႈ ၵုသူဝ်ႇဢၼ်လႂ်သေ မႂ်းလႆႈမီး ဢူဢၢႆသၢႆငဝ်းႁိူဝ်ႈလႅင်းၼင်ႇၼႆၼေႃး။ ၵွပ်ႈပိူဝ်ႈ ၵုသူဝ်ႇသင်လႄႈ တမ်ႈတီႈၼႆႈ မႂ်းၼၢင်း မႃးလႆႈၽွၼ်းလီ တဵမ်ထူၼ်ႈၼေႃး။ ယွၼ်ႉပိူဝ်ႈ ၵုသူဝ်ႇသင်သေ မႂ်းၼၢင်း မႃးလႆႈပူၺ်ႈၽီ တၼ်းၸႂ်ၼင်ႇၼႆၼေႃး။
• 331။ ၼၢင်းၽီ ဢူမုၼ်ၽုင်းယႂ်ႇ ၵဝ်ထၢမ်မႂ်းယူႇယဝ်ႉ။ မိူဝ်ႈပဵၼ်ၵူၼ်းၼၼ်ႉ မႂ်းလႆႈႁဵတ်းၵုသူဝ်ႇ သင်မႃးၼေႃး။ ယွၼ်ႉပိူဝ်ႈ ၵုသူဝ်ႇဢၼ်လႂ်သေ မႃးလႆႈမီး ဢူဢၢႆသၢႆငဝ်းလႅင်း ၼင်ႇၼႆၼေႃး။ ယွၼ်ႉပိူဝ်ႈ ၵုသူဝ်ႇသင်သေ ငဝ်းတူဝ်မႂ်းၼၢင်းၵေႃႈ သမ်ႉပေႃး ႁိူဝ်ႈႁိူင်းမၢပ်ႈမိပ်ႈၵႂႃႇ ၵူႈပႃႈၵူႈၽၢႆႇၼေႃး။
• 332။ ၵွပ်ႈပိူဝ်ႈ ၸဝ်ႈမွၵ်ႉၵလၢၼ်ႇထၢမ်လွင်ႈတၢင်းမၼ်းလႄႈ ၼၢင်းၽီၵေႃႈ ႁူမ်ႁူမ်ၸူမ်းၸူမ်း ၸင်ႇၶိုၼ်းတွပ်ႇလၢတ်ႈၼႄ လွင်ႈတၢင်းမၼ်းၵႂႃႇ ၸွမ်းၼင်ႇၶေႃႈထၢမ်ၼၼ်ႉယဝ်ႉ။
• 333။ ၼၢင်းယိင်းၵေႃႉဢၼ် မေႃလူႇတၢၼ်းပၼ် ၽႅၼ်ႇသိူဝ်ႈၶူဝ်းၼၼ်ႉ တမ်ႈတီႈ ၼႂ်းၵူၼ်းၸၢႆးလႄႈသင် ၼႂ်းၵူၼ်းယိင်းလႄႈသင် မျၢတ်ႈတွၼ်းတႄႉယဝ်ႉ။ ၼၢင်းယိင်း ၵေႃႉဢၼ်မေႃလူႇတၢၼ်းပၼ် ၶူဝ်းလူႇဢၼ်လီႁၵ်ႉပႅင်းၼင်ႇၼႆၼၼ်ႉ လႆႈႁွတ်ႈထိုင် မိူင်းၽီသေ လႆႈမီးလွင်ႈႁၢၼ်ႉၸႂ်ယဝ်ႉ။
• 334။ တူၺ်း ႁၢင်ႈႁေႃဝိမၢၼ်ႇၵဝ်ၶႃႈလႄႈ။ ၶႃႈၼၢင်းၼႆႉ ပဵၼ်ၼၢင်းၽီ ဢၼ်မီးႁၢင်ႈၽၢင် တဵမ်တၼ်းၸႂ်ၼၼ်ႉယဝ်ႉ။ ၶႃႈၼၢင်းၼႆႉ ၶိုၵ်ႉတွၼ်းလိူဝ်သေ ၼၢင်းၽီဢလုမ်းဢလၢင်း ႁဵင်းၵေႃႉၼၼ်ႉယဝ်ႉ။ တူၺ်းႁၼ်ထိုင် ၽွၼ်းလီၵုသူဝ်ႇတႃႉ။
• 335။ ယွၼ်ႉပိူဝ်ႈ ၵုသူဝ်ႇၼႃးမုၼ် ဢၼ်ၼၼ်ႉသေ ၶႃႈၼၢင်းၸင်ႇမႃးမီး ငဝ်းတူဝ်ႁိူဝ်ႈလႅင်းပိူင်း ၼင်ႇၼႆယဝ်ႉ။ ၵွပ်ႈၵုသူဝ်ႇၼၼ်ႉသေ တမ်ႈတီႈၼႆႈ လႆႈ(သိူဝ်းသႃႇ)တဵမ်ထူၼ်ႈယဝ်ႉ။ ၵွပ်ႈပိူဝ်ႈ ၵုသူဝ်ႇဢၼ်ၼၼ်ႉလႄႈ ၶႃႈၼၢင်း ၸင်ႇလႆႈပူၺ်ႈလီ(ၸီးၸိမ်ႇ) တင်းသဵင်ႈ ဢၼ်ပဵင်းဢူၵ်းပဵင်းၸႂ်ၼၼ်ႉယဝ်ႉ။
• 336။ ၸဝ်ႈရႁၢၼ်း ၽူႈမီးၽုင်းယႂ်ႇတီႈၶႃႈ... ၶႃႈၼၢင်းတွပ်ႇလၢတ်ႈပၼ်ၸဝ်ႈႁဝ်း ၼင်ႇၼႆဢေႃႈ။ မိူဝ်ႈပဵၼ်ၵူၼ်းၼၼ်ႉ ၶႃႈၼၢင်းလႆႈလူႇတၢၼ်း ၽႅၼ်ႇသိူဝ်ႈၶူဝ်းတီႈၶႃႈဢေႃႈ။ ၵွပ်ႈၵုသူဝ်ႇၸိူဝ်းၼၼ်ႉသေ ၸင်ႇတေလႆႈမီး ဢူငဝ်းႁိူဝ်ႈႁိူင်းၼင်ႇၼႆဢေႃႈ။ ၵွပ်ႈၵုသူဝ်ႇၼၼ်ႉသေ ဢူငဝ်းၶႃႈႁဝ်းၼႆႉၵေႃႈ ႁိူဝ်ႈႁိူင်း ပိူင်းသႂ်ၵႂႃႇ ၵူႈပႃႈၵူႈၽၢႆႇၶႃႈဢေႃႈ... (လၢတ်ႈၵႂႃႇၼင်ႇၼႆယဝ်ႉ)။

(ၸိူဝ်းၸတုရဝိမႃၼဝတ်ႉထုသီႇႁူဝ်ၼၼ်ႉၵေႃႈ ထုၵ်ႇလီၼႄတီႈၵႂၢင်ႈ ၸိူင်ႉၼင်ႇ ဝတ်ႉထုတႃႇယိၵႃႇဝတ်ႉထုၼၼ်ႉယဝ်ႉ)