လၶုမႃဝိမႃၼဝတ်ထု၊ ၼၢင်းၽီငဝ်းတူဝ်လႅင်း
2-လၶုမႃဝိမႃၼဝတ်ထု၊ ၼၢင်းၽီငဝ်းတူဝ်လႅင်း မႄးထတ်း
- 173။ ၼၢင်းၽီ မိူၼ်ၼင်ႇလၢဝ်မႃမွင်း ႁိူဝ်ႈႁိူင်းလႅင်းပိူင်း ၵူႈပႃႈၵူႈၽၢႆႇၼင်ႇၼၼ် ငဝ်းတူဝ်မႂ်း ၼၢင်း ဢၼ်လီႁၢၼ်ႉၸႂ်ၼႃႇၼၼ်ႉၵေႃႈ ႁိူဝ်ႈႁိူင်းပိူင်းလႅင်းၵႂႃႇ ၵူႈပႃႈၵူႈတၢင်းဝႆႉယူႇယဝ်ႉ။
- 174။ ၵွပ်ႈပိူဝ်ႈ ၵုသူဝ်ႇဢၼ်လႂ်သေ မႂ်းလႆႈမီး ဢူဢၢႆသၢႆငဝ်းႁိူဝ်ႈလႅင်း ၼင်ႇၼႆၼေႃး။ ၵွပ်ႈပိူဝ်ႈ ၵုသူဝ်ႇသင်လႄႈ တမ်ႈတီႈၼႆႈ မႂ်းၼၢင်း မႃးလႆႈၽွၼ်းလီ တဵမ်ထူၼ်ႈၼေႃး။ ယွၼ်ႉပိူဝ်ႈ ၵုသူဝ်ႇသင်သေ မႂ်းၼၢင်း မႃးလႆႈပူၺ်ႈၽီ တၼ်းၸႂ်ၼင်ႇၼႆၼေႃး။
- 175။ ၼၢင်းၽီ ဢူမုၼ်ၽုင်းယႂ်ႇ ၵဝ်ထၢမ်မႂ်းယူႇယဝ်ႉ။ မိူဝ်ႈပဵၼ်ၵူၼ်းၼၼ်ႉ မႂ်းလႆႈႁဵတ်းၵုသူဝ်ႇ သင်မႃးၼေႃး။ ယွၼ်ႉပိူဝ်ႈ ၵုသူဝ်ႇဢၼ်လႂ်သေ မႃးလႆႈမီး ဢူဢၢႆသၢႆငဝ်းလႅင်းၼင်ႇၼႆၼေႃး။ ယွၼ်ႉပိူဝ်ႈ ၵုသူဝ်ႇသင်သေ ငဝ်းတူဝ်မႂ်းၼၢင်းၵေႃႈ သမ်ႉပေႃး ႁိူဝ်ႈႁိူင်းမၢပ်ႈမိပ်ႈၵႂႃႇ ၵူႈပႃႈၵူႈၽၢႆႇၼေႃး။
- 176။ ၵွပ်ႈပိူဝ်ႈ ၸဝ်ႈမွၵ်ႉၵလၢၼ်ႇထၢမ်လွင်ႈတၢင်းမၼ်းလႄႈ ၼၢင်းၽီၵေႃႈ ႁူမ်ႁူမ်ၸူမ်းၸူမ်း ၸင်ႇၶိုၼ်းတွပ်ႇလၢတ်ႈၼႄ လွင်ႈတၢင်းမၼ်းၵႂႃႇ ၸွမ်းၼင်ႇၶေႃႈထၢမ်ၼၼ်ႉယဝ်ႉ။
- 177-8။ ႁိူၼ်းၶႃႈၼၢင်းၼႆႉ မီးတီႈႁူးဢွၵ်ႇၽၵ်းတူ ၵေႇဝတ်ႉတၼၼ်ႉယဝ်ႉ။ ၶႃႈၼၢင်းလႆႈဢဝ် ၶဝ်ႈသွမ်းလႄႈသင်၊ ၶဝ်ႈမုၼ်းလႄႈသင်၊ ၶဝ်ႈၵိူမ် ဢၼ်ႁုင်လေႃးယွတ်ႈၽၵ်းၼၼ်ႉလႄႈသင် လႆႈလူႇတၢၼ်း တမ်ႈတီႈ လုၵ်ႈႁၵ်ႉၽြႃး ၸဝ်ႈရႁၢၼ်းၶဝ် ဢၼ်မီးၵုၼ်းမုၼ်သိၼ်ထမ်း ဢၼ်ၵႆႉၶဝ်ႈၵႆႉဢွၵ်ႇတမ်ႈတီႈ ၽၵ်းတူၵေႇဝတ်ႉတၼၼ်ႉယဝ်ႉ။ မီးၸႂ်ၽိူၵ်ႇၸိုၼ်ႈၶၢဝ်သႂ်ၼပ်ႉယမ်သေ လႆႈလူႇတၢၼ်း ၼမ်ႉၶဝ်ႈၸဵမ်း (လေႃးၼသေႃးဝီႇရၵ = ၼမ်ႉဝၢၼ် ဢၼ်ဢဝ်ၼမ်ႉၶဝ်ႈသၢၼ်သေႁဵတ်း) တမ်ႈတီႈၸဝ်ႈရႁၢၼ်းၶဝ် ဢၼ်မီးလွင်ႈတၢင်းသိုဝ်ႈယူဝ်းၼၼ်ႉယဝ်ႉ။
- 179။ မိူဝ်ႈဝၼ်းၽိတ်ႈ လိူၼ်မႂ်ႇသိပ်းသီႇၶမ်ႈ လိူၼ်လပ်းသိပ်းသီႇၶမ်ႈလႄႈသင်၊ ဝၼ်းသိပ်း ႁႃႈၶမ်ႈလႄႈသင်၊ ဝၼ်းပႅတ်ႈၶမ်ႈလႄႈသင် ဝၼ်းၽိတ်ႈပႅတ်ႇၶမ်ႈလႄႈသင် ဝၼ်းဢွၵ်ႇသိၼ်ၼၼ်ႉလႄႈသင် ၶႃႈၼၢင်းၼႆႉ တိုဝ်းၵမ်သိၼ်ပႅတ်ႇ ႁႂ်ႈတဵမ်ထူၼ်ႈမႃးၶႃႈဢေႃႈ။
- 180။ ႁပ်ႉသိၼ်ဢုပုတ်ႈယဝ်ႉ။ သိၼ်သီႇလၵေႃႈ ႁႂ်ႈမၼ်ႈၵိုမ်းမႃးတႃႇသေႇယဝ်ႉ။ ပႂ်ႉပႃး(တူဝ် လႄႈသူပ်း)ယဝ်ႉ။ ၸႅၵ်ႇၽႄလူႇတၢၼ်းမႃးယဝ်ႉ။ (ၵွပ်ႈၵုသူဝ်ႇၼၼ်ႉသေ) ၶႃႈၼၢင်းလႆႈယူႇသဝ်း တီႈႁေႃ ဝိမၢၼ်ႇၼႆႉယဝ်ႉ။
- 181။ ၶႃႈၼၢင်းၼႆႉ လွင်ႈဢဝ်တၢႆသၢႆၸႂ်ပိူၼ်ႈၵႄႃႈ ငိူင်ႉဝႄႈယဝ်ႉ။ လွင်ႈလၢတ်ႈမၢပ်ႇပႅတ်ႉလႅၼ် ၼၼ်ႉလႄႈသင်၊ လွင်ႈလၵ်ႉဢဝ် ၶူဝ်းဢၼ်ၸဝ်ႈပိူၼ်ႈ ဢမ်ႇပၼ်လႄႈသင်၊ လွင်ႈပူၼ်ႉပႅၼ် ၽူဝ်သေ ၵႂႃႇၵူတ်ႉၵူၼ်းၸၢႆးတၢင်ႇၵေႃႉၼၼ်ႉလႄႈသင်၊ လွင်ႈၵိၼ်လဝ်ႈမဝ်းၵႅပ်ႇလႄႈသင် ငိူင်ႉဝႄႈၵႆၵႆယူႇယဝ်ႉ။
- 182။ ၶႃႈၼၢင်းၼႆႉ မူၼ်ႈသူဝ်းလူၺ်ႈ သိၼ်ႁႃႈသိၼ်ႈယဝ်ႉ။ လၵ်းလႅမ်ႁူႉႁၼ် ဢရိယႃႇသတ်ႉၸႃႇယဝ်ႉ။ ပဵၼ်ဢုပႃႇသိၵႃႇ မုၼ်ၶမ်းၽြႃး ဢၼ်မီးၸၵ်ႉၶုႁႃႈပိူင် ဢၼ်ၸိုဝ်ႈသဵင်လိုဝ်းလင် ဢၼ်မီး ဢလုမ်းဢလၢင်းၼမ်ၼၼ်ႉယဝ်ႉ။
- 183။ ယွၼ်ႉပိူဝ်ႈ ၵုသူဝ်ႇလူင်ၸိူဝ်းၼၼ်ႉသေ ၶႃႈၼၢင်း ၸင်ႇပဵၼ်မႃးမီးမႃး ဢူငဝ်းၼင်ႇၼႆ ယဝ်ႉ။ပ။ ဢူငဝ်းၶႃႈႁဝ်းၼႆႉၵေႃႈ ႁိူဝ်ႈႁိူင်းပိူင်းသႂ်ၵႂႃႇ ၵူႈပႃႈၵူႈၽၢႆႇၶႃႈယဝ်ႉ။
- 184။ ၸဝ်ႈႁဝ်းတီႈၶႃႈ “ဢုပႃႇသိၵႃႇ ဢၼ်ႁိၵ်ႈၸိုဝ်ႈဝႃႈ လၶုမႃႇၼၼ်ႉ ဝႆႈသႃ တမ်ႈလင်တိၼ် မုၼ်ၶမ်းၽြႃးယူႇ”ၼႆ ဢဝ်ၵႂၢမ်းၶႃႈၼၢင်း မိူဝ်ႈဝႆႈလဝ်ႈတမ်ႈတီႈ လင်တိၼ်မုၼ်ၶမ်းၽြႃးၶႃႈတႃႉ။ ၸဝ်ႈႁဝ်းတီႈၶႃႈ ဢၼ်မုၼ်ၶမ်းၽြႃးလၢတ်ႈဝႃႈ ၶႃႈၼၢင်းၼႆႉ ပဵၼ်ၵေႃႉၽူႈၸုၵ်းယၼ်မၼ်ႈ တမ်ႈတီႈ ၽူဝ်ႇ သႃႇမၺ ဢၼ်ၼိုင်ႈၼႆၼၼ်ႉ ဢမ်ႇၸႂ်ႈဢၼ်လၢၵ်ႇလၢႆးသင်တီႈၶႃႈယဝ်ႉၼႆ လၢတ်ႈၵႂႃႇၼင်ႇၼႆယဝ်ႉ။
မုၼ်ၶမ်းၽြႃးယၢမ်ႈလၢတ်ႈဝႃႈ လၶုမႃႇၼႆႉ ယၼ်မၼ်ႈဝႆႉ တမ်ႈတီႈသၵတႃႇၵႃႇမိၽူဝ်ႇၼႆယဝ်ႉ။ လၶုမႃဝိမႃၼဝတ်ထု ႁူဝ်သွင် သုတ်းယဝ်ႉ။
ၽိုၼ်ဢိင် မႄးထတ်း
- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ဢိၻ်ꩪိဝိမႃၼ၊ ၸိတ်တလတႃဝၷ်၊ လၶုမႃဝိမႃၼဝတ်ထု