လွင်ႈလႃႇပွင်ႉႁိုတ်းထႃႉ

ဢူႈလုင်း မႃႇၵၼ်ႇတီႇၶဝ်ၼႆႉ ဢဝ်မႃႇၵၼ်ႇတီႇသၢၵ်ႈထိုင်ၶုၼ်ႁေႃၶမ်းဢုတေႇၼ မိူင်းၵေႃးသမ်ႇပီႇယူႇယဝ်ႉ။ ၶုၼ်ႁေႃၶမ်းဢုတေႇၼၼႆ့ ပေႃးဝႃႈလႆႈႁၼ်တၢင်းႁၢင်ႈလီမႃႇၵၼ်ႇတီႇၵေႃႈ ၸင်ႇဢဝ်ႁဵတ်းၼၢင်းၶၢင်းႁူဝ် မိူၼ်ၸိူင်ႉၼင်ႇ ၼၢင်းၶၢင်းႁူဝ် သႃႇမႃႇဝတီႇ၊ ၼၢင်းၶၢင်းႁူဝ်ဝႃႇသုလတတ်ႉတႃႇ ၶဝ်ယူႇယဝ်ႉ။

ၵူၼ်းၵႃႉၶဝ်ဢွၼ်ၵၼ်ပၢင်းလႄႈ ၽြႃးပဵၼ်ၸဝ်ႈယေႃးၶိင်းမႃးဝဵင်းၵေႃးသမ်ႇပီႇၼၼ်ႉ ၼၢင်းမႃႇၵၼ်ႇတီ ဢမ်ႇႁၢၼ်ႉၸႂ် ဢမ်ႇလႆႈၸႂ်သေဢိတ်း။ ၵွပ်ႈသင်ၼႆ - မီးပွၵ်ႈၼိုင်ႈ ၽြႃးပဵၼ်ၸဝ်ႈယၢမ်ႈလၢတ်ႈဝႃႈ တီႈတူဝ်မႃႇၵၼ်ႇတီႇၼၼ်ႉ ၽၢႆႈလူင်ၽၢႆႈၼွင်ႉပေႃးတဵမ်တူဝ်ဝႆႉလႄႈ ယင်းတေဢမ်ႇဢဝ်တိၼ်ၵဝ်ၽြႃးတိူဝ်ႉၵွၼ်ႇၼႆလႄႈ ၸင်ႇဝႆႉၸႂ်ၼိူဝ်ၽြႃးပဵၼ်ၸဝ်ႈမႃး။ ၽိူဝ်ႇၼၢင်းၶၢင်းႁူဝ် သႃႇမႃႇဝတီႇလႄႈ ၸိူင်ႉၼၢင်းၽူႈၵႅမ်တူဝ်ႁႃႈပၢၵ်ႇၸိူဝ်းၼၼ်ႉ ပဵၼ်လုၵ်ႈၼွင်ႉသႃႇဝၵၽြႃးပဵၼ်ၸဝ်ႈၼႆ ၼၢင်းမႃႇၵၼ်ႇတီႈယိုင်ႈၶႅၼ်းဢမ်ႇၶႂ်ႈၶၢမ်ႇလႃးလႃး။

ၼၢင်းၶၢင်းႁူဝ်မႃႇၵၼ်ႇတီႇ ၵေႃႉဢၼ်ဢမ်ႇမီးၺၢၼ်ႇပၺ်ႇၺႃႇၼႆႉ ဢမ်ႇပွင်ႇၸႂ်ၶေႃႈၵႂၢမ်းၽြႃးပဵၼ််ၸဝ်ႈ မၢၼ်ႇမႅၼ်ႈၸိုဝ်ႈၸႂ်ႈၵႃႈႁိုဝ်ၼႆ။ လုၵ်ႈယိင်းၶုၼ်သူင်သၢမ်ၵေႃႉၼၼ်ႉ ၼင်ႇႁိုဝ်ၽြႃးပဵၼ်ၸဝ်ႈပေႃးတေပဵၼ်ၸႂ်တၼ်ႇႁႃႇရႃႇၵၼႆသေ မႃႈပွႆႇၼႄတူဝ်ၼႄၾၢင်ႁၢင်ႈၶဝ်လႄႈ ပၢႆးႁူၺ်းၽြႃးပဵၼ်ၸဝ်ႈ။ ယွၼ်ႉပဵၼ်ၼၢင်းၽီလႄႈ ႁၢင်ႈလီလိူဝ်ၵူၼ်းႁဝ်းတႄႉတႄႉ။ ၶုၼ်ၽီၼၢင်းၽီၶဝ်ၼႆႉ ၶဝ်ဢမ်ႇၵိၼ်ဢႃးႁၢၼ်ဢၼ်ပဵၼ်ၵွၼ်ႈပဵၼ်မမ်ႈသင်၊ ၵွပ်ႈၼၼ်လႄႈ ၶုၼ်ၽီၼၢင်းၽီၶဝ်ၼႆႉ ဢမ်ႇမီးၽၢႆႈလူင်ၽၢႆႈၼွႆႉသင်။ ၵူၼ်းႁဝ်းတႄႉ ဢမ်ႇမိူၼ်ၼၼ်၊ ၶႂ်ႈႁၢင်ႈလီတၢၼ်ႇႁိုဝ်ၵေႃႈယဝ်ႉ တႃႇတူဝ်ရုပ်ႈၶၼ်ႇထႃႇၼၼ်ႉ တေလႆႈၵိၼ်ပၼ်ဢႃးႁၢၼ်ယဝ်ႉ။ ပဵၼ်တၢင်းဝူၺ်ႇႁၢင်ႈမႃးယဝ်ႉ​ တေလႆႈမွင်ဝႆႉ၊ တေလႆႈထွၵ်ႇဢွၵ်ႇတၢင်းဝူၺ်ႇႁၢင်ႈၸိူဝ်းၼၼ်ႉယူႇယဝ်ႉ။ တေႃႈၼၢင်းၽီၶဝ် ဢၼ်ဢမ်ႇမီးတၢင်းဝူၺ်ႇႁၢင်ႈသင်ၼၼ်ႉ ယင်းဢမ်ႇပၢႆးႁူၺ်းၽြႃးပဵၼ်ၸဝ်ႈလႆႈၼႆၸိုင် ၵူၼ်းႁဝ်းဢၼ်မီးရုပ်ႈၼၢမ်ႇၶၼ်ႇထႃႇ တၢင်းဝူၺ်ႇႁၢင်ႈပေႃးတဵမ်တူဝ်လူင်ၼၼ်ႉ သမ်ႉတေႁဵတ်းႁိုဝ် ႁူၺ်းပၢႆးၽြႃးပဵၼ်ၸဝ်ႈလႆႈယဝ်ႉလႃႇ။

ထႅင်ႈဢၼ်ၼိုင်ႈ သမ်ႇမႃႇသမ်ႇပုတ်ႉထၽြႃးၸဝ်ႈၼႆႉ ပေႃးပိုၼ်ႉပွႆႇၽႃႈဝၢင်းပႅတ်ႈၵိလေႇသႃႇ လွင်ႈဝူၺ်ႇႁင်ႈတင်းသဵင်ႈ၊ ၾိင်ႈယၢမ်ႈတၢင်းသဵင်ႈယဝ်ႉယဝ်ႈ။ တေႁဵတ်းႁိုဝ်သမ်ႉတေတႄႇၼႃႈႁေႃတေႃႁိူၼ်းယဝ်ႉလႃႇ။

ၼၢင်းၶၢင်းႁူဝ်မႃႇၵၼ်ႇတီႇၼႆႉ ဢမ်ႇႁူႉႁၼ်ထိုင်လွင်ႈတၢင်းၸိူဝ်းၼႆႉ။ ၵွပ်ႈၼၼ်လႄႈ ၸင်ႇလွမ်ၸႂ်ႉၵူၼ်းမိူၵ်ႈၵူၼ်းႁၢႆႉ ၵူၼ်းၶီႈလဝ်ႈၶဝ် လႃႇပွင်ႉႁိုတ်းထႃႉၽြႃးပဵၼ်ၸဝ်ႈဝႃႈ ပဵၼ်ၽူႈလၵ်ႉၸၵ်ႉၶုတ်ႈ၊ သတ်းတိရတ်ႉသၢၼ်ႇ၊ ၵူၼ်းတူၵ်းငရၢႆး ၼႆယူႇယဝ်ႉ။

ပေႃးႁဵတ်းၼၼ် ၽြႃးပဵၼ်ၸဝ်ႈၼႆႉ တေၵူဝ်ႁေတိုၼ်ႇၽၢၼ်ႈသေ ဢွၵ်ႇပၢႆႈယၢၼ်မိူင်းၵေႃးသမ်ႇပီႇ - ၼၢင်းၶၢင်းႁူဝ်မႃႇၵၼ်ႇတီႇသွၼ်ႇၼင်ႇၼႆ။ ၸဝ်ႈဢႃႇၼၼ်ႇတႃႇၼႆႉ ပေႃးဝႃႈလႆႈငိၼ်းသဵင်လႃႇပွင်ႉႁိုတ်းထႃႉၸိူင်ႉၼၼ် ၸင်ႇလဝ်ႈလၢတ်ႈၽြႃးပဵၼ်ၸဝ်ႈ ႁႂ်ႈၶၢႆႉၼီၵႂႃႇတၢင်ႇဝၢၼ်ႈတၢင်ႇဝဵင်းၼႆႉ။ ၽြႃးပဵၼ်ၸဝ်ႈဢမ်ႇႁပ်ႉ။ မိူၼ်ၼင်ႇ သင်ႇသွၼ်ပၼ်လုၵ်ႈၼွင်ႉတင်းသဵင်ႈ ႁႂ်ႈဢူတ်းယိူၼ်ႉ၊ ႁႂ်ႈႁတ်းႁၢၼ်လႄႈ ႁႂ်ႈဝႆႉဢုပႅၵ်ႉၶႃႇတြႃးၼႆသေ တူဝ်ၽြႃးပဵၼ်ၸဝ်ႈၵေႃႈ ယူႇၸွမ်းတြႃးၼင်ႇၼၼ်ၵွႆး။ ၽြႃးပဵၼ်ၸဝ်ႈ ၸင်ႇလၢတ်ႈတီႈၸဝ်ႈဢႃႇၼၼ်ႇတႃႇဝႃႈ ယႃႇပေမႆႈၸႂ်၊ ႁႂ်ႈဢဝ်ၸႂ်ဢုပႅၵ်ႉၶႃႇသေ တေႃႇသူႈပၼ်ႁႃတၢင်းယၢပ်ႇၽိုတ်ႇ ၼႆယူႇယဝ်ႉ။ ၸင်ႇသိုပ်ႇပူင်ဝႃႈ ဢၼ်ႁဝ်းဢမ်ႇသူင် ဢမ်ႇထုၵ်ႇၸႂ်တင်းသဵင်ႈၼႆႉ မၼ်းဢမ်ႇယူႇႁိုင်လႆႈၵႃႈႁိုဝ်။ ၼင်ႇၽြႃးပဵၼ်ၸဝ်ႈပူင်လၢတ်ႈၼၼ်ႉၼင်ႇၵဝ်ႇ လွင်ႈလႃႇႁိုတ်းထႃႉၸိူဝ်းၼၼ်ႉၵေႃႈ ၼႂ်းၶၢဝ်းတၢင်းဝူင်ႈၼိုင်ႈၵွႆး ၵိုတ်းယိုတ်းၵႂႃႇၵမ်းလဵဝ်ယဝ်ႉ။ လွင်ႈၶတ်းၸႂ်သႂ်ႇႁႅင်း ၼၢင်းၶၢင်းႁူဝ်မႃႇၵၼ်ႇတီႇၵေႃႈ ပႅတ်ႈလၢႆၵႂႃႇတင်းသဵင်ႈယူႇယဝ်ႉ။

ၽိူဝ်ႇၼၼ် တေႃးသၼၢင်းၶၢင်းႁူဝ် မႃႇၵၼ်ႇတီႇၼႆႉ ဝၢႆႇမႃးၸူးၼၢင်းၶၢင်းႁူဝ်သႃႇမႃႇဝတီႇလႄႈ ၸိူင်ႉၼၢင်းႁႃႈပၢၵ်ႇၶဝ် ၶဝ်ႈယူႇၼႂ်းႁေႃသႅင်ၵႅမ်လင်ၼိုင်ႈသေ ဢဝ်ၾႆးၸုတ်ႇၽဝ်လႄႈ ၼၢင်းၶၢင်းႁူဝ်လႄႈ ၸိူင်ႉၼၢင်းၸိူဝ်းၼၼ်ႉတင်းသဵင်ႈ ဝႆႉၸႂ်မႅတ်ႉတႃႇတြႃး၊ ဝႆႉၸႂ်ဢုပႅၵ်ႉၶႃႇတြႃးလႄႈ သဵင်ႈၵၢမ်ႇသုတ်းမုၼ်ၵႂႃႇ။ ၽိူဝ်ႇၶုၼ်လူင်ဢုတေႇၼ လႆႈငိၼ်းလွင်ႈတၢင်းဢၼ်ၼႆႉၵေႃႈ ဢမ်ႇပၢႆၸႃးတူၺ်းထိုင်ဢီးလူသင်သေ ပၼ်တၢင်ႇတၢႆၼၢင်းၶၢင်းႁူဝ်မႃႇၵၼ်ႇတီႇလႄႈ လုၵ်ႈၼွင်ႉမၼ်းၸိူဝ်းၼၼ်ႉယူႇယဝ်ႉ။

ပုတ်ႉထၽြႃးပဵၼ်ၸဝ်ႈၼႆႉ ၸွမ်းၼင်ႇၸဝ်ႈၵဝ်ႇသင်ႇသွၼ်ပိူၼ်ႈၼၼ်ႉ တူဝ်ၸဝ်ႈၵဝ်ႇၵေႃႈ ႁဵတ်းၸွမ်းတိုဝ်းၵမ်ၸွမ်းၸိူင်ႉၼၼ်ယဝ်ႉ။ လွင်ႈလႃႇႁိုတ်းထႃႉ ၸိူဝ်းၼၼ်ႉလႄႈသင်၊ လွင်ႈယွင်ႈဢၢမ်း ယေႃးၵုင်ႇၸိူဝ်းၼၼ်ႉလႄႈသင်၊ ဢမ်ႇပဵၼ်လွင်ႈၸႂ်ဝႅၼ်ဝင်ႇဝိူဝ်ႈသင်သေ ယူႇလူၺ်ႈတင်းဢုပႅၵ်ႉၶႃႇတြႃးၵွႆးယူႇယဝ်ႉ။

သေလေႃ တထႃ ဢေၵယၼေႃ ဝႃတေၼ ၼဝမီရတိ၊
ဢေဝ့ၼိၼ်ၻႃပသံသႃသု၊ ၼၼ်သမိၼ်ၸၼ်တိပꧣ်ꩦိတႃ။
(ꩪမ်မပၻ ႘႑ - ပꧣ်ꩦိတဝၷ်)

မိူၼ်ၼင်ႇလွႆႁိၼ်လွႆၽႃၶဝ် ဢမ်ႇတူင်ႉဝႆၶွၼ်းယွၼ်ႉလူၺ်ႈလူမ်းပဝ်ႇဢီးထွင်းၼၼ်ႉ ၽူႈမီးပၺ်ႇၺႃႇၶဝ်ၵေႃႈ ဢမ်ႇတူင်ႉဝႆၶွၼ်းယွၼ်ႉလွင်ႈသႄႉသွမ်း၊ လွင်ႈဢၢမ်းယေႃးသင်။

ၽိုၼ်ဢိင်

ၼႃႈလိၵ်ႈ ႕႒၊ ပပ်ႉ - ႁၢင်ႈပိုၼ်းပုတ်ႉထၸဝ်ႈ| တႅမ်ႈ - သြႃႇလူင်ဢူးၵူဝ်ႇဢိင်ႇၵႃႇ (ၽူႈၼႄတြႃးဝိပသ်သၼႃႇလုမ်ႈၾႃႉ)