လွင်ႈယဵၼ်ႇငႄႈ ၵူႈလွင်ႈလွင်ႈ

လွင်ႈယဵၼ်ႇငႄႈ ၽွင်းဢွၵ်ႇၶၢဝ်းတၢင်း ဢၼ်ဝႃႈၼႆႉ မၼ်းပဵၼ် လွင်ႈယဵၼ်ႇငႄႈ ဢၼ်ပႃးၼႂ်း ယဵၼ်ႇငႄႈ သႅၼ်သမ်ႇ ဢၼ်ၼိုင်ႈယဝ်ႉ။ ယဵၼ်ႇငႄႈ ၽွင်းဢွၵ်ႇၶၢဝ်းတၢင်းၼႆႉ ပေႃးတူၺ်းၽတ်ႉၽဵင်ႇၵၼ်ၼႆ တေမီးယူႇ ႒႑ မဵဝ်းယဝ်ႉ။ ၸိူဝ်းၼၼ်ႉတႄႉ -

1. ပေႃးဝႃႈ တေလၢတ်ႈတေႃႇ ၽူႈယႂ်ႇၵူၼ်းလူင်ၶဝ်လႄႈသင်၊ တေလၢတ်ႈတေႃႇ ၵူၼ်းဢၼ်ပႆႇႁူႉၸၵ်းၼၼ်ႉလႄႈသင် တေဢမ်ႇလႆႈ ၵူမ်ႈႁူဝ်သေလၢတ်ႈ၊ ထုၵ်ႇလီတူၺ်းၶဝ်သေလၢတ်ႈယဝ်ႉ။
2. ၽွင်းလၢတ်ႈၵႂၢမ်းၼၼ်ႉ တေဢမ်ႇလႆႈၼႄႁၢင်ႈ ဢၢႆ။ တေဢမ်ႇလႆႈၼႄ ႁၢင်ႈႁတ်းႁၢၼ်ပူၼ်ႉတီႈ။ (ယႃႇပေဝူၼ်ႉဝႃႈ ၵူၼ်းတၢင်ႇၵေႃႉ ႁႃတၢင်းၽိတ်းၸဝ်ႈၵဝ်ႇ။)
3. ပေႃးၵူၼ်းတၢင်ႇၵေႃႉ တိုၵ်ႉလၢတ်ႈၵႂၢမ်း ယႃႇပေႈတတ်းၵႂၢမ်းပိူၼ်ႈသေ ၶဝ်ႈလၢတ်ႈ။ ထုၵ်ႇလီပႂ်ႉႁၢၼ်ႉတေႃႉ ၵႂၢမ်းမၼ်းပ​​ေႃးသုတ်း။ ႁူမ်ႈဝႃးၸဝ်ႈၵဝ်ႇ ဢမ်ႇပႃးၸႂ်ထွမ်ႇၼႆၵေႃႈ ယႃႇပေၼႄႁၢင်ႈၸႂ်ႉလူႉသေ ထုၵ်ႇလီၼႄႁၢင်ႈ ပႃးၸႂ်သေ ထွမ်ပၼ်ယဝ်ႉ။
4. သင်ၸိူဝ်ႉဝႃႈ ႁၼ်မႅၼ်ႈ လွင်ႈဢၼ်လူဝ်ႇၽိူမ်ႉထႅမ်သႂ်ႇထႅင်ႈၼႆၵေႃႈ ပေႃးမၼ်းလၢတ်ႈၵႂၢမ်းသုတ်းၵႂႃႇယဝ်ႉ ၸွင်ႇၼႄႁၢင်ႈလွင်ႈယဵၼ်ႇငႄႈသေ ၽိူမ်ႉထႅမ်သႂ်ႇပၼ်လႄႈ။ (ယႃႇပေၼႄႁၢင်ႈ ၼင်ႇဝႃႈ ၸဝ်ႈၵဝ်ႇ လူင်ႉလႅၼ်ႇၼႃႇ၊ ၼင်ႇႁဵတ်းႁၢင်ႈပဵၼ် ၶူးသွၼ်လူင် ၸိူင်ၼၼ်။)
5. ဢမ်ႇထုၵ်ႇလီလၢတ်ႈ လွင်ႈတၢင်းၽိတ်းပိူၼ်ႈ။ ဢမ်ႇၼၼ် ပေႃးလၢတ်ႈ ထုၵ်ႇလီလၢတ်ႈလွင်ႈလီၶဝ်ၵူၺ်း။ ပေႃးဢမ်ႇမီး လွင်ႈလီတၢင်ႇယွင်ႈဢၢမ်းၵေႃႈ ဢမ်ႇထုၵ်ႇလီလၢတ်ႈယဝ်ႉ။
6. ဢမ်ႇထုၵ်ႇလီ လၢတ်ႈၵႂၢမ်းထဵင်ၵၼ်တင်း ၵူၼ်းဢွၵ်ႇတေႃးသ။ ယဝ်ႉၵေႃႈ ထုၵ်ႇလီဝႄႈ လွင်ႈလၢတ်ႈတႃႉၶဵင်ႇၵၼ်တင်း ၽူႈၼူၵ်ႇတၼ်ၽၢႆလဵဝ်။ ပေႃးဝႃႈ ဢမ်ႇယႃႇလွတ်ႈလႆႈလႄႈ တေလႆႈလၢတ်ႈတေႃႇၼႆၵေႃႈ လၢတ်ႇတေႃႇ လွႆးလွႆး လၢတ်ႈတေႃႇ ၵႂၢမ်းဝၢၼ်ဝၢၼ်လႄႈ။
7. ႁူမ်ႈဝႃႈပဵၼ် ဢူၺ်းၵေႃႉၸမ်ၸႂ်ၵၼ်ၵေႃႈယဝ်ႉ ဢမ်ႇထုၵ်ႇလီလၢတ်ႈၵႂၢမ်း မဵဝ်းဢမ်ႇထုၵ်ႇမႅၼ်ႈၸႂ်၊ မဵဝ်းဢမ်ႇမီးၽွၼ်းလီသင်။ ပေႃးၵႆႉလၢတ်ႈ မၼ်းတေၸပ်းယဵၼ်ႉမၼ်းၵႂႃႇ။
8. ၵိုင်ႇဝႃႈပဵၼ် လုၵ်ႈပေႃႈမႄႈလၵ်းလႅမ်သေလႄႈ ထုၵ်ႇလီဝႄႈ ၶေႃႈၵႂၢမ်းလၢတ်ႈလိူင်းယဝ်ႉ။ ၽွင်းတိုၵ်ႉၸႂ်လမ်ယူႇၼၼ်ႉၵေႃႈ ထုၵ်ႇလီၽၢင်ႉဝႆႉ ယႃႇႁႂ်းလၢတ်ႈၶေႃႈၵႂၢမ်းလိူင်း။ (ပေႃးၶတ်းလႆႈ လိၼ်ႉၸဝ်ႈၵဝ်ႇၵေႃႈ တေၶတ်းလႆႈ တူဝ်မႃးယဝ်ႉ။
9. ထုၵ်ႇလီၽၢင်ႉပၼ် ယႃႇႁႂ်ႈႁဵတ်းၺႃး ၵၢၼ်ဢၼ်ဢမ်ႇလီ၊ ယႃႇႁႂ်ႈလၢတ်ႈၺႃး ၶေႃႈၵႂၢမ်းဢမ်ႇလီ။ သင်ၸိူဝ်ႉဝႃႈ သေၵေႃႉၵေႃႉ လၢတ်ႈဝႆႉၸိူင်ႉၼၼ်ၼႆ ထုၵ်ႇလီဝႄႈသေၵႂႃႇယဝ်ႉ။ ဢမ်ႇထုၵ်ႇလီၶဝ်ႈသေ ပၼ်ႁႅင်းၶဝ်၊ ထုၵ်ႇလီယူႇဝႆႉ တဵတ်ႇတဵတ်ႇယူႇ။ ပေႃးဝႃႈသႅၼ်းႁဝ်းထၢၼ်ႇၵၼ် ထုၵ်ႇလီ သင်ႇသွၼ်ၵၼ်ယူႇ။ (ၼႆႉမၼ်းပဵၼ် ပုၼ်ႈၽွၼ်းၵူၼ်းဢၼ်ၼိုင်ႈၼႆ ယႃႇပေလိုမ်း)။
10. တီႈဢၼ်ဢမ်ႇၵပ်းၵၢႆႇ၊ ၶူဝ်းၶွင်ဢၼ်ဢမ်ႇၵပ်းၵၢႆႇ၊ ၼႃႈၵၢၼ်ဢၼ်ဢမ်ႇၵပ်းၵၢႆႇ ၸဝ်ႈၵဝ်ႇၼၼ်ႉ ၸဝ်ႈၵဝ်ႇထုၵ်ႇလီ ငိူင်ႈဝႄႈယဝ်ႉ။
11. ႁူမ်ႈဝႃႈ ပဵၼ်လွင်ႈ ဢၼ်ၵပ်းၵၢႆႇၸဝ်ႈၵဝ်ႇသေတႃႉ ပေႃးပိူၼ်ႈလၢတ်ႈႁႂ်းႁဝ်းႁူႉၸင်ႇ ၶဝ်ႈႁူႉၸွမ်း။ ယွၼ်ႉၶႂ်ႈႁူႉၼႃႇဢႃးလႄႈ မိူဝ်ႈၵႂၢမ်းပိူၼ်ႈပႆႇသုတ်းၼၼ်ႉ ၼႅတ်ႈတွင်ႈၼႅတ်ႈထၢမ် ယႃပေႁဵတ်း။ ထုၵ်ႇလီပႂ်ႉၶၢဝ်းယၢမ်းသေ ပေႃးထုၵ်ႇလီထၢမ်ၸင်ႇၵႆႈထၢမ်လႄႈ။
12. ဢမ်ႇထုၵ်ႇလီ ၸၢႆႉတူၺ်း ဢၼ်ပဵၼ် ၽိုၼ်လိၵ်ႈဢၼ်ၵပ်းၵၢႆႇပိူၼ်ႈ။ (ထုၵ်ႇလီပဵၼ် ၵူၼ်းမီးပၵ်းပိူင်ယႂ်ႇၵေႃႉၼိုင်ႈ။)
13. သင်ၸိူဝ်ႉမီး ၼႃႈၵၢၼ်ပုၼ်ႈၽွၼ်း ဢၼ်ၸဝ်ႈၵဝ်ႇ တေလႆႈႁဵတ်းၼႆ ယႃႇပေပွင်ႉၶၢင်း။ ၵူၼ်းပွင်ႉၶၢင်းၼႆႉ မၼ်းဢမ်ႇၶဝ်ႈတၢင်းတိုဝ်းလႆႈသေတီႈ။ မၼ်းၸၢင်ႈပၼ် လွင်ႈတုမ်ႉတိူဝ်ႉပိူၼ်ႈသေဢမ်ႇၵႃး ၽူႈလႂ်ၽႂ်လႆႈငိၼ်းထွမ်ႇ လွင်ႈပွင်ႉၶၢင်းၵေႃႈ မၼ်းၸၢင်ႈမေႃ ၸႂ်ၸႃႉၸွမ်းၼၼ်ႉယဝ်ႉ။
14. မိူဝ်ႈလႂ်သေဢမ်ႇဝႃႈ ထုၵ်ႇလီဝႆႉ ၼႃႈၵီႈတႃဝၢၼ်။ ႁူမ်ႈဝႃႈထူပ်းၺႃး ၶဵၼ်လွင်ႈၸႃႉၵႃႈႁိုဝ်ၵေႃႈယႃႇ ဢမ်ႇထုၵ်ႇလီၸႂ်ၸႃႉသေ ထုၵ်ႇလီမၢႆတွင်းဝႃႈ မၼ်းပဵၼ်တွၼ်ႈသွၼ် တွၼ်ႈတႃႇၸဝ်ႈၵဝ်ႇၵူၺ်းၼႆယဝ်ႉ။
15. ၼႃႈတႃ ယုမ်ႉယၢႆႈၼႆႉ ဝႆႉလႆႈၵႃႈႁိုဝ်ၵေႃႈဝႆႉလႄႈ။
16. လွင်ႈလၢတ်ႈၵႂၢမ်းဢၼ်ဝႃႈၼႆႉ မၼ်းပဵၼ်လွင်ႈယဵၼ်ႇငႄႈဢၼ်ၼိုင်ႈသေ ၼၼ်ႉမၼ်းၼႄဝႃႈ ၸဝ်ႈၵဝ်ႇမီးၵူၼ်းမိူတ်ႈၵိုဝ်းၼမ်ၼႆၼၼ်ႉယဝ်ႉ။
17. လၢတ်ႈၵႂၢမ်းမိူဝ်ႈလႂ်ၵေႃႈ ထုၵ်ႇလီၸႂ်ႉၶေႃႈၵႂၢမ်း ဢၼ်ယဵၼ်ႇငႄႈသေ ထုၵ်ႇလီဝႆႉ ၼႃႈတႃၸိုၼ်ႈသႂ် မေႃယုမ်ႉသေၵမ်း။
18. ၶုၵ်းၸႂ်လႆႈ ၶေႃႈၵႂၢမ်းၵပ်းထုၵ်ႇတႆး ဢၼ်ၵပ်းၵၢႆႇလွင်ႈ လၢတ်ႈၵႂၢမ်းသဵင်လီသဵင်ဝၢၼ်ႇၼၼ်ႉလႄႈ။
19. ၵႂၢမ်းၵပ်းထုၵ်ႇမၢင်ဢၼ်ၼႆႉ မၼ်းၵေႃႈပဵၼ်ဢၼ်ၵပ်းၵၢႆႇတင်း လွင်ႈယဵၼ်ႇငႄႈ ဢၼ်ၵပ်းၵၢႆႇသူပ်းၵႂၢမ်းယဝ်ႉ။
20. ယႃႇပေၵႂႃႇယႃႉ လွင်ႈသိူဝ်းၸႂ်ပိူၼ်ႈ။ ဝႆႉၸႂ်သိုဝ်ႈ၊ ၸႂ်လီတေႃႇၵူၼ်းၵူႈၵေႃႉလႄႈ။
21. သင်ၸိူဝ်ႉဝႃႈ ၸဝ်ႈၵဝ်ႇပဵၼ်ၵေႃႉ ထုၵ်ႇပၼ်ပုၼ်ႈၽွင်းလႄႈ မီးသုၼ်ႇၸီႉသင်ႇသေတႃႉ ယႃႇပေပေႉၵိၼ် ၵူၼ်းၽၢႆႇတႂ်ႈၸဝ်ႈၵဝ်ႇ။ ယႃႇပေပွင်ႉလႃႇ၊ ထုၵ်ႇလီလၢတ်ႈ ၊ လီၵပ်းသိုပ်ႇ ႁႂ်ႈမီးလွင်ႈယဵၼ်ႇငႄႈ။