လွင်ႈတႆးၸိင်းတိုၵ်း မိူင်းဢႃႇဝႃႉ ပွၵ်ႈၵမ်းၼိူင်ႈ (1524-1525)

လွင်းတႆးလႆႈၶိုၼ်ႈတိုၵ်း မိူင်းဢႃႇဝႃႉ ၼႆႉမၼ်းမီးယူႇ သွင်ပွၵ်ႈ။ ပွၵ်ႈၵမ်းၼိူင်ႈၼႆႉမၼ်းတႄႇမႃးမိူဝ်ႈပီႊ1524ၼၼ်ႉ ၼႆယဝ်ႉ။ ၸဝ်ႈလူင်မိူင်းယၢင်း ဢၼ်မီးၸိုဝ်ႈဝႃႈ သိူဝ်ၼုမ်ႇ ဢၼ်ပဵၼ်လုၵ်ႈၸၢႆးၸဝ်ႈသိူဝ်ၼူႈ(သိူဝ်လူႈ)ၼၼ်ႉဢွၼ်ႁူဝ်သေၸိင်းတိုၵ်းမႃး။ ၵူႈပွၵ်ႈၼႆႉတႆးႁဝ်းၼႆႉတႄႇၸိင်းတိုၵ်းမိူင်းဢႃႇဝႃႇပွတ်းႁွင်ႇဢွၼ်တၢင်း ၵူၺ်းၵႃႈ ပွၵ်ႈၼႆႉၶဝ်တႄႇၸိင်းတိုၵ်းပွတ်းၼႃႈတၢင်းတူၵ်းမႄႈၼမ်ႉၶျိၼ်းတႂိၼ်းသေ ၶဝ်ႈၵႂႃႇတိုၵ်းလႆႈထိုင်ၼႂ်းၵၢင်မၼ်း သေၼိုၵ်းလႆႈမႃးမိူင်းဢႃႇဝႃႉၼႆယဝ်ႉ။ ယွၼ်ႉတၢင်းမႄႈၼမ်ႉၶျိၼ်းတႂိၼ်းၼႆ မၼ်းဢမ်ႇမီးလွးင်ႈႁႄႉၵင်း မိူၼ်ၼင်ႇတၢင်းပွတ်းႁွင်ႇ။ ၵွပ်ႈၼၼ်တႆးႁဝ်းၵေႃႈၸင်ႇဢဝ်တိုတ်ႉတင်းၼၼ်ႉသေ တိုၵ်းဢဝ်ဝဵင်းမိၼ်းၵိၼ်း(မင်းကင်း) ဢၼ်မီးယူႇပွတ်းၼိူဝ်ၼမ်ႉၶျိၼ်းတႂိၼ်းၼၼ်ႉဢွၼ်တင်းၼႆယဝ်ႉ။ ဝၢႆးၼၼ်ႉၸဝ်ႈလူင်မိူင်းယၢင်းၶိုၼ်းၼႃႈသေလႆႈၵႂႃႇတိုၵ်းသိုၵ်းမၢၼ်ႊဢၼ်မီးတီႈ ဝဵင်းမျေႇတူးၼၼ်ႉ။ မိူဝ်ႈၸဝ်ႈၾႃႉမိူင်းဢႃႇဝႃႉလႆႈငိၼ်းၶၢဝ်ဢၼ်ၼၼ်ႉယဝ်ႉၵေႃႈ မၼ်းၵေႃႈလႆႈသူင်ႇသိုၵ်းၵႂႃႇတီႈဝဵင်းမျေႇတူးၵမ်းလဵဝ်၊ ၸဝ်ႈလူင်မိူင်းယၢင်းၵေႃႈလႆႈ ႁၵ်ႉတိုၵ်းၶဝ်တီႈၼၼ်ႉသေဢဝ်တင်းတပ်ႉသိုၵ်းမႃႉလႄႈ တင်းတပ်ႉသိုၵ်းၸၢင်ႉသေလႆႈတိုၵ်းပေႉမႃးတပ်ႉသိုၵ်းမႃႉၾၢႆမၢၼ်ႊၶဝ်ၵေႃႈလႆႈတူၵ်းသုမ်းၵႂႃႉၼႆယဝ်ႉ။ ၸဝ်ႈလူင်မိူင်းယၢင်းၵေႃႈ တိုၵ်းဢဝ်လႆႈ ဝဵင်းမျေႇတူးယဝ်ႉၶိုၼ်းသိုပ်ႇတိုၵ်း ဝဵင်းငရၼႄးလႄႈ သီႇပုၵ်ႉတယႃႇ။ ၶိုၼ်းသိုပ်ႉတိုၵ်းမိူင်းၸေႊၵႅင်း သိမ်းဢဝ်လႆႈပႃးဝၢၼ်ႈလႄႈ တင်းဝဵင်းၸိူဝ်းဢၼ်ယူႇမီးၽၢႆတၢင်းတူၵ်း ပၵၢၼ်ႇၵျီး ၼၼ်ႉ။

မိူဝ်ႈမိူင်းယၢင်းၶဝ်မႃးတိုၵ်းဢႃႇဝႃႉၼၼ်ႉ မိူင်းပြူင်ႈပဵၼ် မိူင်းဢူၺ်းလီၵၼ်တၢင်းမိူင်းယၢင်း၊ ဢူၺ်းလီမိူင်းဢႃႇဝႃႉပဵၼ်မိူင်းသႅၼ်ဝီ။ ၸဝ်ႈလူင်မိူင်းယၢင်းလႆႈၽွမ်ႉၸွမ်းၸဝ်ႈမိူင်းပြူင်ႈ ဝႃႈ တေဢဝ်မိူင်းဢႃႇဝႃႉပၼ်မၼ်း။