လတႃဝိမႃၼဝတ်ထု၊ ၼၢင်းၽီၶိုၵ်ႉတွၼ်း
4- လတႃဝိမႃၼဝတ်ထု၊ ၼၢင်းၽီၶိုၵ်ႉတွၼ်း မႄးထတ်း
- 316။ ၼၢင်းၽီလတႃႇလႄႈသင်၊ ၼၢင်းၽီသတ်ႉၸႃႇလႄႈသင်၊ ၼၢင်းၽီပဝရႃႇလႄႈသင်၊ ၼၢင်းၽီ ဢတ်ႉၸိမတိလႄႈသင် ပဵၼ်ၽူႈမီးပၺ်ႇၺႃႇ ႁိူဝ်ႈႁိူင်းၶိုၵ်ႉလိုၵ်ႉဝႆႉသေ ပဵၼ်လုၵ်ႈယိင်း ၶုၼ်ၽီလူင် ဝဵတ်ႉသဝၼ်ႇ ဢၼ်မီးဢူႁိၵ်ႈၽုင်းယႂ်ႇၼၼ်ႉယဝ်ႉ။ ပဵၼ်ဢၼ်မီးၵုင်ႇမုၼ်ၸိုဝ်ႈၸႂ်ႈ ၶိုၵ်ႉၶၢႆးဝႆႉယူႇယဝ်ႉ။
- 317။ တႃႇတေမႃး လဵၼ်ႈၼမ်ႉၼၼ်ႉ ၼၢင်းၽီႁႃႈၼၢင်း ၽႅဝ်မႃး တမ်ႈတီႈ ၼမ်ႉႁွင်ႈ ဢၼ်မီးတမ်ႈတီႈ ထိူၼ်ႇႁိမဝၼ်ႇတႃႇ ဢၼ်ၵတ်းၸိုၼ်ႈ ဢၼ်မီး ပႃႇမူဝ် ဢၼ်ဢမ်ႇမီးၽေးၶဵၼ် (ဢၼ်လုၵ်ႉတီႈ ၼွင်ဢၼေႃးတတ်ႉတလႆလူင်းမႃးၼၼ်ႉ)ယဝ်ႉ။ ပေႃးဝႃႈ ၼၢင်းၽီႁႃႈၼၢင်း ဢၢပ်ႇၼမ်ႉ ယဝ်ႉ ဢွၼ်ၵၼ်မူၼ်ႈမူၼ်ႈသိူဝ်းသိူဝ်း ႁဵတ်းမေႃသေႃႇၵႂၢမ်း ၵႃႈၵႃႈမႅပ်ႈမႅပ်ႈယဝ်ႉၸိုင် ၼၢင်းၽီသုတႃႇ ၸင်ႇမႃးတွင်ႈထၢမ် ၼၢင်းၽီလတႃႇယူႇယဝ်ႉ။
- 318။ ၸဝ်ႈပီႈၼၢင်း ၼၢင်းၽီလတႃ ဢၼ်ပၵ်းဝႆႉမွၵ်ႇမူဝ် ဢၼ်ၼဵပ်းဝႆႉမွၵ်ႇ(ရတၼႃႇ)တီႈႁူဝ် ဢၼ်ဢူငဝ်းတူဝ် ႁိူဝ်ႈႁိူင်းမိူၼ်ၶမ်း ဢၼ်မီးတႃ ၶွပ်ႇတႃလႅင်ၸိုၼ်ႈ၊ ဢၼ်ဢႃႇယုယိုၼ်းယၢဝ်း ယူႇသဝ်း ၶႅမ်ႉၶိုၵ်ႉ တမ်ႈတီႈ မိူင်းၽီ... ၶႃႈၼၢင်း တေတွင်ႈထၢမ် ၸဝ်ႈၼၢင်းႁဝ်းၵွၼ်ႇ။ ယွၼ်ႉပိူဝ်ႈ ၵုသူဝ်ႇ ၵၢမ်ႇဢၼ်လႂ်သေ ၸဝ်ႈၼၢင်းၽီ ၸင်ႇတေမီးၸိုဝ်ႈသဵင်လိုဝ်းလင် ဢိၵ်ႇဢလုမ်းဢလၢင်းၼမ်ၼေႃး။
- 319။ ၸဝ်ႈပီႈၼၢင်းၽီ ၵွပ်ႈပိူဝ်ႈ ၵုသူဝ်ႇဢၼ်လႂ်သေ ၵေႃႉပဵၼ်ၽူဝ် ၸိုင်ပႄႉႁၵ်ႉႁႅင်းပႅင်း လိူဝ် တီႈၼိူဝ်ၸဝ်ႈပီႈၼၢင်းႁဝ်းၼေႃး။ ၵွပ်ႈသင်လႄႈ ႁၢင်ႈၽၢင်ၵေႃႈ ၶိုၵ်ႉတွၼ်းလိူဝ်သေပိူၼ်ႈၼေႃး။ ၵွပ်ႈသင်လႄႈ လွင်ႈၵႃႈလွင်ႈမႅပ်ႈၵေႃႈ ၶိုၵ်ႉတွၼ်းလိူဝ်ပိူၼ်ႈၼေႃး။ ၵဝ်ၶႃႈ(ၼၢင်းၽီသုတႃႇ) တွင်ႈထၢမ် မႂ်းၼၢင်း ဢၼ်ၶုၼ်ၽီၼၢင်းၽီၶဝ် ဢွၼ်ၵၼ်ထၢမ်ႁႃဝႃႈ (လတႃႇမီးလႂ်)ၼႆယူႇတႃႇသေႇၼၼ်ႉယဝ်ႉ။
- 320။ တမ်ႈတီႈ မိူင်းၵူၼ်း မိူဝ်ႈၽွင်းၵဝ်ပဵၼ်ၵူၼ်းၼၼ်ႉ လႆႈပဵၼ်လုၵ်ႈပႂ်ႉ တီႈႁိူၼ်းၽူႈမၢၵ်ႈၶဝ်ယဝ်ႉ။ (ၵဝ်) ဢမ်ႇဢွၵ်ႇၸႂ်လမ်တေႃးသ။ (ၵဝ်) ၸွမ်းၸႂ်ၸဝ်ႈၽူဝ်မႃးဢိူဝ်ႈ။ လွင်ႈႁပ်ႉသိၼ်ၼၼ်ႉ ၵဝ်ဢမ်ႇလူင်ဢမ်ႇလိုမ်း။
- 321။ ၽွင်းမိူဝ်ႈ ပဵၼ်ၵူၼ်းၼၼ်ႉ ပိၵ်ႉသမ်ႉဝႃႈ ပဵၼ်ၵူၼ်းဢွၼ်ႇသေတႃႉ ဢမ်ႇမီးလွင်ႈယုတ်ႈ မိူၵ်ႈမႂ်ႈ။ မီးၸႂ်ၽိူၵ်ႇၸိုၼ်ႈၶၢဝ်သႂ်သေ ႁဵတ်းႁႂ်ႈၵေႃႉပဵၼ် ပီႈၶူၺ် ပီႈလူဝ်း ၶႃႈယိင်း ၶႃႈၸၢႆး ဢိၵ်ႇလူၺ်ႈ ၸဝ်ႈၽူဝ် လႆႈသိူဝ်းၸႂ်ယဝ်ႉ။ ၽွင်းမိူဝ်ႈ ပဵၼ်လုၵ်ႈပႂ်ႉယူႇၼၼ်ႉ ၵဝ်လႆႈႁဵတ်းမႃး ၵုသူဝ်ႇၼႃးမုၼ် တႃႇတေမီး ဢလုမ်းဢလၢင်းတဵမ်ထူၼ်ႈ ၼမ်ၼၼ်ႉယဝ်ႉ။
- 322။ ၵဝ်ၼႆႉ ၵွပ်ႈပိူဝ်ႈ ၵုသူဝ်ႇလၢၵ်ႇလၢႆးၸိူဝ်းၼၼ်ႉသေ လွင်ႈဢႃႇယုယိုၼ်းယၢဝ်းလႄႈသင်၊ လွင်ႈႁၢင်ႈလီႁၢင်ႈလဝ်းလႄႈသင်၊ လွင်ႈသိူဝ်းသႃႇလိူဝ်တွၼ်းလႄႈသင်၊ လွင်ႈဢဵၼ်ႁႅင်းယႂ်ႇလႄႈသင် သီႇပိူင်ၼႆႉ တွၼ်းၵႄးလိူဝ် တမ်ႈတီႈ ၼိူဝ်ၼၢင်းၽီတၢင်ႇၸိူဝ်းယဝ်ႉ။ လႆႈၸၢမ်ႇပူၺ်ႈလူၺ်ႈ လွင်ႈသိူဝ်းသႃႇ တဵမ်တူဝ်ႈတၼ်းၸႂ်ယဝ်ႉ (ၼႆ ၼၢင်းၽီလတႃႇ လၢတ်ႈၵႂႃႇၼင်ႇၼႆယဝ်ႉ)။
- 323။ ၸိူဝ်းသူ လႆႈငိၼ်း ၶေႃႈၵႂၢမ်းတွပ်ႇ ၸဝ်ႈပီႈၼၢင်းၽီလတႃႇယဝ်ႉဢမ်ႇၸႂ်ႈႁိုဝ်။ ၶေႃႈၵႂၢမ်း ဢၼ်ႁဝ်းထၢမ်ၵႂႃႇၼၼ်ႉ မၼ်းတွပ်ႇမႃးပၼ်ႁဝ်းယဝ်ႉ။ ၽူဝ်ဢၼ်ဝႃႈၼၼ်ႉ ပဵၼ်တီႈ ၸိူဝ်းႁဝ်းၼၢင်း ယိင်း လႆႈပိုင်ႈဢိင်ၵိူဝ်းယမ်ယဝ်ႉ ပဵၼ်ၽီၵႅဝ်ႈ ပုၼ်ႈတႃႇႁဝ်းယဝ်ႉႉ။
- 324။ ၼၢင်းယိင်းၵေႃႉဢၼ် လူႁၼ်လုမ်းလႃး ၸဝ်ႈၽူဝ် (ႁႂ်ႈတဵမ်ထူၼ်ႈမူၼ်ႈၸႂ်ၼၼ်ႉ) ႁိၵ်ႈၸိုဝ်ႈဝႃႈ ၼၢင်းယိင်းၼပ်ႉယမ်ၸဝ်ႈၽူဝ် (ပတိၿ်ၿိယႃ)ယဝ်ႉ။ ၸိူဝ်းႁဝ်းတင်းသဵင်ႈ ဢွၼ်ၵၼ် လူႁၼ်လုမ်းလႃး ၸဝ်ႈၽူဝ် ၸွမ်းၼင်ႇၵၢၼ်ၼၢင်းယိင်းၼၼ်ႉတႃႉ။ ၸိူဝ်းႁဝ်းတင်းသဵင်ႈ သင်ဝႃႈ လူႁၼ်လုမ်းလႃးၸဝ်ႈၽူဝ် ၸွမ်းၼင်ႇၵၢၼ်ၼၢင်းယိင်းၼၼ်ႉၸိုင် တေလႆႈၸၢမ်ႇပူၺ်ႈလူၺ်ႈ ၸီးၸိမ်ႇ ၸိူင်ႉၼင်ႇ ၸဝ်ႈပီႈၼၢင်းလတႃႇၼႆႉယဝ်ႉ။
- 325။ မိူၼ်ၼင်ႇ ၶုၼ်သၢင်ႇသီႇ ဢၼ်ၵိၼ်ၼိူဝ်ႉ ဢၼ်ယူႇသဝ်း တမ်ႈတီႈၵႄႈထိူၼ်ႇၵႄႈလွႆၼၼ်ႉ ယူႇသဝ်း တမ်ႈတီႈ လွႆမႁၼ်ႇတရသေ လိုပ်ႉလမ်းလူၺ်းၵိၼ် တူဝ်သီႇတိၼ်ဢွၼ်ႇၸိူဝ်းၼၼ်ႉ ၼင်ႇၼၼ်...
- 326။ မိူၼ်ၼၼ်ၼင်ႇၵဝ်ႇ တီႈၼႂ်းလေႃးၵၼႆႉ ၵေႃႉပဵၼ်လုၵ်ႈၼွင်ႉဢရိယႃႇ ဢၼ်မီးၸႂ်သတ်ႉ ထႃႇယုမ်ႇယမ်ၼၼ်ႉ ဢိင်ပိုင်ႈၸဝ်ႈၽူဝ်သေ တိုဝ်းၵမ်ၸွမ်းၼင်ႇၵၢၼ်ဝတ်ႈတြႃးၼၢင်းယိင်း ပၢၵ်ႈပႅတ်ႈ ၸႂ်တေႃးသ ၸႂ်ထီႇၼဵဝ်သေ တိုဝ်းၵမ်တြႃးယဝ်ႉ။ ၼၢင်းယိင်းၵေႃႉၼၼ်ႉ လႆႈမူၼ်ႈသိူဝ်းတီႈမိူင်းၽီယဝ်ႉ။
လတႃဝိမႃၼဝတ်ထု ႁူဝ်သီႇ သုတ်းယဝ်ႉ။
ၽိုၼ်ဢိင် မႄးထတ်း
- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ဢိၻ်ꩪိဝိမႃၼ၊ ပႃရိၸ်ꧡတ်တၵဝၷ်၊ လတႃဝိမႃၼဝတ်ထု