ရေဝတီဝိမႃၼဝတ်ထု၊ ၼၢင်းရေႇဝတီႇ မေးသထေးၼၼ်ႇတိယ

5 - မႁႃရထဝၷ် မႄးထတ်း

2 - ရေဝတီဝိမႃၼဝတ်ထု၊ ၼၢင်းရေႇဝတီႇ မေးသထေးၼၼ်ႇတိယ မႄးထတ်း

လွင်ႈတၢင်း ၵေႃႉၽူဝ်ၸိုဝ်ႈၼၼ်ႇတိယ မေးၸိုဝ်ႈရေႇဝတီႇသေ ၽူဝ်သမ်ႉပဵၼ် ၽူႈၵူၼ်ႈလီ၊ မေးသမ်ႉပဵၼ် ၽူႈဢမ်ႇလီသေ သၽေႃးၸႂ်ၶႃ ဢမ်ႇမိူၼ်ၵၼ်။ ၼၼ်ႇတိယၼႆႉ ဢမ်ႇမီးၸႂ်ထီႇၼဵဝ် လူႇလူႇတၢၼ်းတၢၼ်းသေ မိူဝ်ႈၽွင်းလႆႈၵႂႃႇပဵၼ်တီႈ မိူင်းၽီၼၼ်ႉ မေးမၼ်းရေႇဝတီႇ တၢႆသေ တေလႆႈၵႂႃႇႁွတ်ႈမိူင်းငရၢႆးလႄႈ ၽီငရၢႆးၶဝ် ဢွၼ်မၼ်းၼၢင်း ၵႂႃႇမိူဝ်းၼႄ ႁၢင်ႈႁေႃၼၼ်ႇတိယ၊ လႆႈႁၼ်ၼင်ႇၼၼ် မၼ်းၼၢင်း ၼႅင်ၸႂ်ၼႅင်ၶေႃးတႄႉတႄႉ ဢမ်ႇလႆႈ ယူႇၸွမ်းၼၼ်ႇတိယ လႆႈမိူဝ်းတူၵ်းငရၢႆးၼၼ်ႉယဝ်ႉ။

  • 861။ ၵေႃႉဢၼ် ၽၢတ်ႇယၢၼ် ပီႈပီႈၼွင်ႉၼွင်ႉ ၵႂႃႇတင်းႁိုင် ၵႂႃႇထိုင်တီႈၵႆသေ ၶိုၼ်းႁွတ်ႈၽႅဝ်မႃးၼၼ်ႉ ပီႈပီႈၼွင်ႉၼွင်ႉလႄႈသင်၊ ဢူၺ်းၵေႃႉဢူၺ်းသႄႈလႄႈသင်၊ ၵေႃႉႁၵ်ႉၸဝ်ႈၵဝ်ႇလႄႈသင် ဢွၼ်ၵၼ်ႁူမ်ၸူမ်း လွင်ႈ ဢၼ်ၶိုၼ်းႁွတ်ႈမႃး လီလီငၢမ်းငၢမ်းၼၼ်ႉယူႇ။
  • 862။ မိူၼ်ၼၼ်ၼင်ႇၵဝ်ႇ ၵေႃႉဢၼ်ႁဵတ်းၵၢၼ်တၢင်းလီသေ လုၵ်ႉတီႈလေႃးၵၼႆႉ ၵႂႃႇႁွတ်ႈထိုင်လေႃးၵ ၸၢတ်ႈၼႃႈၵေႃႈ လွင်ႈတၢင်းလီၼၼ်ႉ ႁပ်ႉဢဝ်မိူၼ်ၼင်ႇ ဢူၺ်းလီပီႈၼွင်ႉ ႁပ်ႉတွၼ်ႈ ၵေႃႉပွၵ်ႈမႃးထိုင်ၼၼ်ႉယဝ်ႉ။
  • 863။ ၼၢင်းရေႇဝတီႇ ဢၼ်မီးတၢင်းတိုဝ်းၵမ် ယုတ်ႈမႂ်ႈ၊ ဢၼ်ဢမ်ႇမေႃယိုၼ်ႈပၼ်လူႇတၢၼ်းသင် တီႈပိူၼ်ႈ၊ ဢၼ်ၽၵ်းတူငရၢႆး ပိုတ်ႇၽုၺ်ႇဝႆႉၼၼ်ႉ လုၵ်ႉမႃးလူး။ တမ်ႈတီႈမိူင်းငရၢႆး ဢၼ်သတ်ႉတဝႃႇၶဝ် လႆႈၵႂႃႇႁွတ်ႈသေ လႆႈၶၢမ်ႇတၢင်း မိပ်ႇငႅၼ်းၼိၵ်ႈၸၢၵ်ႈ လႆႈႁွင်ႉဢိဝ်ဝႆႉယူႇယဝ်ႉ။ တမ်ႈတီႈ ငရၢႆးၼၼ်ႉ ႁဝ်းတေ သူင်ႇမႂ်းၵႂႃႇဢိူဝ်ႈ။
  • 864။ လၢတ်ႈဝႃႈၼင်ႇၼႆ ၶဵဝ်ၶုၼ်ငရၢႆး (ၶုၼ်ယမ) ဢၼ်မၢၵ်ႇတႃလႅင်ၸိုၵ်းၶိုၵ်း ဢၼ်တူဝ်မင်ႈမင်ႈသင်ႈသင်ႈ ၽီလူးလူင်သွင်တူဝ် ၸင်ႇမႃးၺွပ်းၸၼ်ဢဝ် ႁူဝ်ၶႅၼ်ရေႇဝတီႇ ၵေႃႉၶွၼ်ၶွၼ်သေ ဢဝ်ၶိုၼ်ႈမိူဝ်းၸူႈ တမ်ႈတီႈ ၶုၼ်ၽီတႃႇဝတိမ်ႇသႃႇၶဝ်ယဝ်ႉ။
  • 865။ ႁေႃဝိမၢၼ်ႇ ဢၼ်ႁိူဝ်ႈႁိူင်းပိူင်းသႂ် မိူၼ်ၼင်ႇငဝ်းလႅတ်ႇ ဢၼ်မီးတီႈလီသိူဝ်းသႃႇၸႂ် ဢၼ်ၶုၼ်ၽီ ၼၢင်းၽီဢွၼ်ႇၶဝ် ၼုင်ႈမႆၽႃႈယႅင်ႉၵႅဝ်ႈသေ သူၼ်ႈသိၼ်းသၢၼ် ဢူၼ်ဢၢၼ်မူၼ်ႈသိူဝ်းဝႆႉယူႇလႄႈ ႁေႃဝိမၢၼ်ႇ ဢၼ်ႁိူဝ်ႈႁိူင်းပိူင်းသႂ် မိူၼ်ၼင်ႇငဝ်းဝၼ်းၼၼ်ႉ ပဵၼ်ႁေႃဝိမၢၼ်ႇၽႂ်ၼေႃး။
  • 866။ ၼၢင်းၽီဢွၼ်ႇတင်းသဵင်ႈ ဢၼ်လုပ်ႈတႃး လွၼ်ႉၸၼ်းၵူးသေ ဢုမ်ႇလွမ်ႈႁေႃဝိမၢၼ်ႇ (ၸဵမ်ၼွၵ်ႈ ၸဵမ်ၼႂ်း)ၼၼ်ႉ ၶိုၵ်ႉလိုၵ်ႉတႄႉတႄႉ။ ႁေႃဝိမၢၼ်ႇၼၼ်ႉ ႁိူဝ်ႈႁိူင်းပိူင်းလႅင်း ထၢင်ႇၸႅင်ႈ မိူၼ်ၼင်ႇ ငဝ်းလႅတ်ႈယဝ်ႉ။ ၵေႃႉဢၼ်ႁွတ်ႈၽႅဝ်မႃး မိူင်းၽီသေ မႃးၸၢမ်ႇပူၺ်ႈ မူၼ်ႈသိူဝ်းယူႇၼၼ်ႉ ပဵၼ်ၽႂ်ၼေႃး (ၼႆ ရေႇဝတီႇထၢမ်ၵႂႃႇယဝ်ႉ)။
  • 867။ တီႈမိူင်းပႃႇရႃႇၼသီႇၼၼ်ႉ မီးမႃး ၵေႃႉဢၼ်ၸိုဝ်ႈဝႃႈ ၼၼ်ႇတိယ ဢုပႃႇသၵႃႇ ဢၼ်ဢမ်ႇထီႇၼဵဝ် ဢၼ်ပဵၼ်ၸဝ်ႈတႃႇၼ ဢၼ်မေႃႁူႉလူၺ်ႈ လွင်ႈတၢင်း(ၵၢင်ၸႂ်) ၽူႈလူႇၶၢမ်ႇၶဝ်ၼၼ်ႉယဝ်ႉ။ ႁေႃဝိမၢၼ်ႇ ဢၼ်ၶုၼ်ၽီ ၼၢင်းၽီဢွၼ်ႇၶဝ် သူၼ်ႈသိၼ်းသၢၼ်သေ ႁိူဝ်ႈႁိူင်းပိူင်းသႂ် မိူၼ်ၼင်ႇ ငဝ်းဝၼ်းၼၼ်ႉ ပဵၼ်ႁေႃဝိမၢၼ်ႇ ၼၼ်ႇတိယဢုပႃႇသၵႃႇယဝ်ႉ။
  • 868။ ၼၢင်းၽီဢွၼ်ႇတင်းသဵင်ႈ ဢၼ်လုပ်ႈတႃး လွၼ်ႉၸၼ်းၵူးသေ ဢုမ်ႇလွမ်ႈႁေႃဝိမၢၼ်ႇ (ၸဵမ်ၼွၵ်ႈ ၸဵမ်ၼႂ်း)ၼၼ်ႉ ၶိုၵ်ႉလိုၵ်ႉတႄႉတႄႉ။ ႁေႃဝိမၢၼ်ႇၼၼ်ႉ ႁိူဝ်ႈႁိူင်းပိူင်းလႅင်း ထၢင်ႇၸႅင်ႈ မိူၼ်ၼင်ႇ ငဝ်းလႅတ်ႈယဝ်ႉ။ ၵေႃႉဢၼ် ႁွတ်ႈၽႅဝ်မႃး တမ်ႈတီႈ မိူင်းၽီတႃႇဝတိမ်ႇသႃႇသေ မႃးၸၢမ်ႇပူၺ်ႈ မူၼ်ႈသိူဝ်း တီႈႁေႃဝိမၢၼ်ႇၼႆႉတႄႉ ပဵၼ် ၼၼ်ႇတိယဢုပႃႇသၵႃႇယဝ်ႉ (ၼႆ ၽီလူးၸိူဝ်းၼၼ်ႉ တွပ်ႇၵႂႃႇယဝ်ႉ)။
  • 869။ ၵဝ်ၼႆႉ ပဵၼ်မေးၼၢင်း ၼၼ်ႇတိယဢိူဝ်ႈ။ ပဵၼ်မႄႈၸဝ်ႈႁိူၼ်း ဢၼ်လႆႈၵွၼ်းဢုပ်ႉ ၸီးၸိမ်ႇတင်းသဵင်ႈယဝ်ႉ။ ယၢမ်းလဵဝ် ႁႂ်ႈၵဝ်လႆႈမူၼ်ႈသိူဝ်းလူၺ်ႈ ႁေႃဝိမၢၼ်ႇ ၽူဝ်ၵဝ်ၼၼ်ႉသေၵမ်း။ ၵၢင်ၸႂ် ဢၼ်ၶႂ်ႈငွၵ်ႈတူၺ်း ငရၢႆးၼၼ်ႉ ဢမ်ႇမီး(ၼႆ ရေႇဝတီႇ လၢတ်ႈၵႂႃႇယဝ်ႉ)။
  • 870။ ရေႇဝတီႇ ဢၼ်မီးတၢင်းတိုဝ်းၵမ် ယုတ်ႈမႂ်ႈ… ငရၢႆးၼႆႉ ပဵၼ်ငရၢႆးမႂ်းယဝ်ႉ။ မိူဝ်ႈတိုၵ်ႉမီးသၢႆၸႂ်ယူႇ တီႈမိူင်းၵူၼ်းၼၼ်ႉ မႂ်းၼႆႉ ဢမ်ႇႁဵတ်းၵၢၼ်တၢင်းလီ။ ၵေႃႉဢၼ်မီးသၽေႃးထီႇၼဵဝ် ၵေႃႉဢၼ်မေႃႁၢမ်ႈတၢပ်ႈ ၵေႃႉဢၼ်မီးၸႂ်မိူၵ်ႈမႂ်ႈ(ယုတ်ႈမႂ်ႈ)ၼၼ်ႉ ဢမ်ႇၸၢင်ႈလႆႈပဵၼ် ဢူၺ်းၵေႃႉဢူၺ်းသေႈ ၽီၶဝ် တီႈမိူင်းၽီ။
  • 871။ ပဵၼ်သင်လႃႇ။ သမ်ႉလႆႈႁၼ် ၽၢႆႈဢွၼ်ႇ ၽၢႆႈလူင် ဢၼ်ဢမ်ႇသႅၼ်ႈဢမ်ႇသႂ် လီဢီသဵတ်ႇဢီႁင်လူင် ဝႆႉ။ ၵွပ်ႈသင်လႄႈ ငရၢႆးၼႆႉ မီးၽၢႆႈလူင် ဢၼ်ဢၢႆသႅဝ် ဢမ်ႇလီ။ ၵွပ်ႈသင် ငရၢႆးၼႆႉ မဵၼ်ဢၢႆဢမ်ႇလီ (ၼႆ ရေႇဝတီႇ ထၢမ်ၵႂႃႇယဝ်ႉ)
  • 872။ ရေႇဝတီႇ ငရၢႆးဢၼ်လိုၵ်ႉမိူၼ်ၼင်ႇ လုၵ်းလဝ်ဢသူႇရႃႇလူင်ၼၼ်ႉ ယွၼ်ႉပိူဝ်ႈ ၽၢႆႈဢွၼ်ႇၽၢႆႈလူင် လႆဢွၵ်ႇဢမ်ႇထၢတ်ႈလႄႈ ႁွင်ႉဝႃႈ ငရၢႆးသံသဝၵယဝ်ႉ။ မႂ်းတေလႆႈတူၵ်း မူၵ်းထင် တီႈငရၢႆးၼၼ်ႉ ဢၢၼ်ႇႁူဝ်ႁဵင်ပီ ဢမ်ႇၵႃးယဝ်ႉ။ (ၼႆ ၽီလူးလၢတ်ႈၵႂႃႇယဝ်ႉ)။
  • 873။ ၵွပ်ႈသင်။ ၶႃႈၼၢင်းလႆႈဢဝ် တူဝ်ႁဵတ်းသူပ်းဝႃႈၸႂ်ဝူၼ်ႉၽိတ်းသင်မႃး။ ယွၼ်ႉပိူဝ်ႈ လွင်ႈဢမ်ႇလီ ဢၼ်လႂ်သေ ၶႃႈၼၢင်း သမ်ႉတေလႆႈၵႂႃႇတူၵ်းငရၢႆးသံသဝ ဢၼ်လိုၵ်ႉမိူၼ်ၼင်ႇ လုၵ်းလဝ်ဢသူႇရႃႇလူင် ဢၼ်ၸၢင်ႈႁဵတ်းႁႂ်ႈ ၽၢႆႈၼွႆႉၽၢႆႈလူင် လႆဢွၵ်ႇဢမ်ႇထၢတ်ႇၼၼ်ႉၶႃႈလႃႇ (ၼႆ ရေႇဝတီႇ ထၢမ်ၵႂႃႇယဝ်ႉ)
  • 874။ တမ်ႈတီႈ သမၼ ပြႁမၼၶဝ်လႄႈသင်၊ တမ်ႈတီႈ ၵူၼ်းၶေႃၵူၼ်းယွၼ်းၶဝ်လႄႈသင် မႂ်းၼၢင်းယၢမ်ႈ ဢဝ် ၶေႃႈၵႂၢမ်းဢမ်ႇၸိုဝ်ႈဢမ်ႇၸႂ်ႈသေ ပႅတ်ႉလႅၼ်ၶဝ်မႃးယဝ်ႉ။ ဢၵုသူဝ်ႇၵၢမ်ႇ ဢၼ်ဢမ်ႇလီၼၼ်ႉ မႂ်းႁဵတ်းၽိတ်းမႃးယဝ်ႉ။
  • 875။ ယွၼ်ႉပိူဝ်ႈ ဢၵုသူဝ်ႇၵၢမ်ႇ ဢၼ်ဢမ်ႇလီၼၼ်ႉသေ မႂ်းတေလႆႈၵႂႃႇတူၵ်း တမ်ႈတီႈ ငရၢႆးသံႇသဝၵ ဢၼ်လိုၵ်ႉမိူၼ်ၼင်ႇ လုၵ်းလဝ်ဢသူႇရႃႇလူင်ၼၼ်ႉယဝ်ႉ။ မႂ်းတေလႆႈတူၵ်း မူၵ်းထင်တီႈငရၢႆးၼၼ်ႉ ဢၢၼ်ႇႁူဝ်ႁဵင်ပီ ဢမ်ႇၵႃးယဝ်ႉ။
  • 876။ တေတႅပ်း မိုဝ်းမႂ်းၸိူဝ်းၼၼ်ႉယဝ်ႉ။ တေတႅပ်း တိၼ်မႂ်းၸိူဝ်းၼၼ်ႉယဝ်ႉ။ တေတႅပ်း ႁူမႂ်းၸိူဝ်းၼၼ်ႉယဝ်ႉ။ တေတႅပ်းၶူႈလင်မႂ်းယဝ်ႉ။ လိူဝ်သေၼၼ်ႉ ၵႃႈပဵၼ်ၼူၵ်ႉတင်းလၢႆ တေဢွၼ်ၵၼ်မႃးလုမ်ႈသႂ်ႇမႂ်း ဢၼ်သၼ်ႇသၼ်ႇသၢႆသၢႆၼၼ်ႉသေ တေသၵ်းၵိၼ်မႂ်းယဝ်ႉ။ (ၼႆ ၽီလူးလၢတ်ႈၵႂႃႇယဝ်ႉ)။
  • 877။ ယွၼ်းတွင်းပၢၼ်ႇတီႈၶႃႈ။ ၶႅၼ်းတေႃႈ ၶိုၼ်းဢဝ်ၶႃႈၼၢင်း သူင်ႇ(မိူင်းၵူၼ်း)သေၵမ်း။ ပေႃးႁဵတ်း ၵုသူဝ်ႇၸိူဝ်းၼၼ်ႉၸိုင် တေလႆႈႁွတ်ႈထိုင် တီႈသိူဝ်းသႃႇယဝ်ႉ။ မိူဝ်းၼႃႈမႃး ဢၼ်တေလႆႈၶီၼႅင် ၶိူဝ်းၶိူဝ်းယႂ်းယႂ်းၼၼ်ႉၵေႃႈ ဢမ်ႇမီး။ ၶႃႈၼၢင်းၼႆႉ လွင်ႈလူႇတၢၼ်းၼၼ်ႉလႄႈသင်၊ လွင်ႈတိုဝ်းၵမ်ၸွမ်း တြႃးၽဵၼ်ႈၽီၼ်ႈၼၼ်ႉလႄႈသင်၊ လွင်ႈပႂ်ႉပႃးတြႃးလႄႈသင်၊ လွင်ႈသင်ႇသွၼ် ဢိၼ်ႇတရေႇလႄႈသင် တေႁဵတ်းၵုသူဝ်ႇတင်းၼမ်ယဝ်ႉ (ၼႆ ရေႇဝတီႇ လၢတ်ႈၵႂႃႇယဝ်ႉ)။
  • 878။ မိူဝ်ႈၸၢတ်ႈၵွၼ်ႇ မႂ်းၼႆႉ လူင်လူင်လိုမ်းလိုမ်း (ၵၢၼ်ၵုသူဝ်ႇ)လႄႈ မိူဝ်ႈလဵဝ် ၸင်ႇမႃးႁႆႈယူႇယဝ်ႉ။ ၵၢမ်ႇဢၼ်တူဝ်မႂ်းႁဵတ်းၼၼ်ႉ တူဝ်မႂ်းတေလႆႈၶၢမ်ႇ ၽွၼ်းႁၢႆႉမၼ်းယူႇယဝ်ႉ (ၼႆ ၽီလူးလၢတ်ႈၵႂႃႇယဝ်ႉ)။
  • 879။ သင်ဝႃႈ (ၶႃႈၼၢင်း)တွင်ႈထၢမ်ဝႃႈ “ၵိုင်ႇလီလူႇတၢၼ်း သမၼပြၢမ်ႇမၼၶဝ် ဢၼ်လုၵ်ႉမိူင်းၽီ ႁွတ်ႈမႃး မိူင်းၵူၼ်း ဢၼ်ၽႃႈဝၢင်းပူင် လၢၵ်ႈၼၢၵ်ႈၶိူင်ႈယိပ်းၼၼ်ႉယဝ်ႉ။ ၶူဝ်းၼုင်ႈၶူဝ်းမႆလႄႈသင်၊ တီႈၼွၼ်းတီႈသိူဝ်ႇလႄႈသင်၊ ၶဝ်ႈသွမ်း ၼမ်ႉဝၢၼ်လႄႈသင် ထုၵ်ႇလီလူႇတၢၼ်းယဝ်ႉ။ ၵေႃႉဢၼ်မီးသၽေႃး ထီႇၼဵဝ် ဢၼ်မေႃတဵၵ်းတဵင် ဢၼ်ယုတ်ႈမႂ်ႈၼၼ်ႉ တိုၼ်းတေဢမ်ႇၸၢင်ႈပဵၼ်လႆႈ ဢူၺ်းၵေႃႉၽီၶဝ် ၸိူဝ်းဢၼ်လႆႈႁွတ်ႈမိူင်းၽီၼၼ်ႉ”ၼႆ ၽီၵေႃႉလႂ် တေမႃးလၢတ်ႈၵဝ်ၶႃႈၼေႃး”
  • 880။ သင်ဝႃႈ ၶႃႈၼၢင်း လႆႈလွတ်ႈပူၼ်ႉငရၢႆးၼႆႉသေ ၶိုၼ်းမိူဝ်းလႆႈ ၽဝႃႉမိူင်းၵူၼ်းၼႆၸိုင် တေမေႃႁူႉ လွင်ႈတၢင်းၵၢင်ၸႂ် ၽူႈႁပ်ႉတၢင်းလူႇၶဝ်သေ တေႁဵတ်းႁႂ်ႈ သိၼ်သီႇလတဵမ်ထူၼ်ႈသေ လွင်ႈလူႇတၢၼ်းၼၼ်ႉလႄႈသင်၊ လွင်ႈတိုဝ်းၵမ်ၸွမ်း တြႃးၼၼ်ႉလႄႈသင်၊ လွင်ႈပႂ်ႉပႃး ဢိၼ်ႇတရေႇၼၼ်ႉလႄႈသင် တေႁဵတ်းၵုသူဝ်ႇတၢင်းလီ ၼမ်ၼမ်ယူႇယဝ်ႉ။
  • 881။ တေဝႆႉၸႂ်ၽိူၵ်ႇၸိုၼ်ႈၶၢဝ်သႂ်သေ တူၼ်ႈမၢၵ်ႇတူၼ်ႈမွၵ်ႇၵေႃႈ တေၽုၵ်ႇယူယဝ်ႉ။ တီႈဢၼ်ၵႂႃႇမႃးယၢပ်ႇၼၼ်ႉ တေႁဵတ်းၶူဝ်သေ လူႇတၢၼ်းယဝ်ႉ။ ႁဵတ်းၶဵင်ႇၼမ်ႉလႄႈသင်၊ ၼမ်ႉမေႃႇ ၼွင်ၼမ်ႉလႄႈသင် တေႁဵတ်းလူႇတၢၼ်းယဝ်ႉ။
  • 882-3။ လိူၼ်မႂ်ႇ လိူၼ်လွင်ႈသိပ်းသီႇၶမ်ႈလႄႈသင်၊ သိပ်းႁႃႈၶမ်ႈလႄႈသင်၊ ပႅတ်ႇၶမ်ႈလႄႈသင်၊ ဝၼ်းၽိတ်ႈသိၼ် ဝၼ်းဢွၵ်ႇသိၼ်ၼၼ်ႉလႄႈသင် တေတိုဝ်းၵမ် သိၼ်ဢုပုတ်ႉ ဢၼ်ဢင်ႇၵႃႇပႅတ်ႇပိူင် တဵမ်ထူၼ်ႈၼၼ်ႉယဝ်ႉ။ တႃႇတေလူႇတၢၼ်းၼၼ်ႉ တေဢမ်ႇလူင်ဢမ်ႇလိုမ်းယဝ်ႉ။ ၶႃႈၼၢင်း လႆႈမႃးထူပ်းႁၼ် ငရၢႆးၼႆႉယူႇယဝ်ႉ (ၼႆ ရေႇဝတီႇလၢတ်ႈၵႂႃႇယဝ်ႉ)။
  • 884။ ၼၢင်းရေႇဝတီႇ တိုၵ်ႉႁႆႈယူႇၵေႃႈ ၽီငရၢႆးၶဝ် ၸင်ႇၸၼ်ဢဝ် တိၼ်ၼၢင်းရေႇဝတီႇ ပူၵ်းၶိုၼ်ႈတင်းၼိူဝ် ဢဝ်ၵွၵ်းႁူဝ်မၼ်း ပၵ်းၶိတ်း လူင်းတႂ်ႈ ဝိုတ်ႉၶဝ်ႈၵႂႃႇ ၼႂ်းငရၢႆး ဢၼ်လီၵူဝ်လီၵၢၵ်ႇၼၼ်ႉယဝ်ႉ။
  • 885။ ၵဝ်ၼႆႉ မိူဝ်ႈၵွၼ်ႇၼၼ်ႉ လႆႈထီႇၼဵဝ်မႃးယဝ်ႉ။ ယၢမ်ႈထႃႉလႃႇ သမၼ ပြမ်ႇမၼၶဝ်မႃးယဝ်ႉ။ ယၢမ်ႈဢဝ် ၶေႃႈၵႂၢမ်းဢမ်ႇၸိုဝ်ႈ ဢမ်ႇၸႂ်ႈသေ ပႅတ်ႉလႅၼ် ၽူဝ်ၸဝ်ႈၵဝ်ႇမႃးလႄႈ လႆႈတူၵ်းငရၢႆး ဢၼ်မီးသၽေႃးလီၵူဝ် လီၵၢၵ်ႇၼၼ်ႉယဝ်ႉ (ၼႆသေ မေႃးၶၢင်းယူႇယဝ်ႉ)

ရေဝတီဝိမႃၼဝတ်ထု ႁူဝ်သွင် သုတ်းယဝ်ႉ။

ၽိုၼ်ဢိင် မႄးထတ်း

  1. ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ပုရိသဝိမႃၼ၊ မႁႃရထဝၷ်၊ ရေဝတီဝိမႃၼဝတ်ထု