မလ်လိၵႃဝိမႃၼဝတ်ထု၊ ၼၢင်းၽီ ဢၼ်လႆႈလူႇ ၽႃႈဝၢတ်ႈ မႁႃႇလတႃႇ
8. မလ်လိၵႃဝိမႃၼဝတ်ထု၊ ၼၢင်းၽီ ဢၼ်လႆႈလူႇ ၽႃႈဝၢတ်ႈ မႁႃႇလတႃႇ
မႄးထတ်း- 658။ ၼၢင်းၽီဢွၼ်ႇ ဢၼ်ၼုင်ႈဝႆႉသိူဝ်ႈၶူဝ်းလိူင်မိူၼ်ၶမ်း၊ ဢၼ်ၼုင်ႈဝႆႉ ၽႃႈယၢၵ်ႈတၼ်းသႃႇ လိူင်မိူၼ်ၶမ်း မႂ်းၼၢင်းၼႆႉ ပိၵ်ႉသမ်ႉဝႃႈ ဢမ်ႇၼုင်ႈၶူဝ်းသီၶမ်း ဢၼ်ႁၢင်ႈလီႁၢင်ႈငၢမ်းဝႆႉၼၼ်ႉသေ တႃႉ (တူဝ်မႂ်းၼၢင်းၼႆႉ)ပေႃးႁၢင်ႈ လီႁၢင်ႈလဝ်းဝႆႉယူႇယဝ်ႉ။
- 659။ ၼၢင်းၽီဢွၼ်ႇ ဢၼ်တိုဝ်းဝႆႉဝႅၼ်ၶမ်း၊ ဢၼ်တိုဝ်းဝႆႉ ပၢၼ်းၵုမ်းၶမ်း၊ ဢၼ်ၼုင်ႈဝႆႉ ၽႃႈသဵၼ်ႈမႆၶမ်း ဢၼ်မီးဝႆႉမွၵ်ႇၵႅဝ်ႈသႅင်ၵူႈပိူင်ပိူင် (မႂ်းၼၢင်းၽီ) ႁိၵ်ႈၸိုဝ်ႈသင်ၼေႃး။
- 660။ (ၼၢင်းၽီဢွၼ်ႇ တူင်ႇမွၵ်ႇဢၼ်ႁၢင်ႈၶိူင်ႈဝႆႉ တီႈတူဝ်မႂ်းၼၢင်းၼၼ်ႉ) ဢဝ်ၶမ်းမဝ်ႈသေ ႁဵတ်းဝႆႉယဝ်ႉ၊ ဢဝ်သႅင်လႅင်သေ ႁဵတ်းဝႆႉယဝ်ႉ။ ဢဝ်သႅင်ၶႆႇမုၵ်ႈသေ ႁဵတ်းဝႆႉယဝ်ႇ။ ဢဝ်ပတ်းလမ်သေ ႁဵတ်းဝႆႉယဝ်ႉ။ ဢဝ်သႅင် လႅင်သႅင်လၢႆးသေ ႁဵတ်းဝႆႉယဝ်ႉ။ ဢဝ်သႅင်မူၼ်ႇ ဢၼ်မိူငၼ် မၢၵ်ႇတႃၵႃဢိုဝ်ႈၼၼ်ႉႁဵတ်းဝႆႉလႄႈ လၢၵ်ႇလၢႆးယူႇတႄႉယဝ်ႉ။
- 661။ ၼႂ်းၵႃႈ တူင်ႇမွၵ်ႇၸိူဝ်းၼၼ်ႉ တူင်ႇမွၵ်ႇ မၢင်ဢၼ်ၼႆႉ မီးသဵင်မိူၼ်ၼင်ႇ သဵင်ၼူၵ်ႉယုင်း သဵင်လီ သဵင်ဝၢၼ်တႄႉယဝ်ႉ။ မီးသဵင်လီသဵင်ဝၢၼ် မိူၼ်ၼင်ႇ သဵင်ၶုၼ်ၼူၵ်ႉႁၢင်းသႃႇယဝ်ႉ။ မီးသဵင်လီသဵင်ဝၢၼ် မိူၼ်ၼင်ႇ သဵင်ၼူၵ်ႉၵရဝဵၵ်ႉယဝ်ႉ။ တမ်ႈတီႈ တူင်ႇမွၵ်ႇၼၼ်ႉ လႆႈငိၼ်းလီသဵင်ဝၢၼ် မိူၼ်ၼင်ႇပိူၼ်ႈတွႆႇ သဵင်ၵွင်တူႇရိယႃႇ ဢၼ်မီးဢင်ႇၵႃႇႁႃႈပိူင်ၼၼ်ႉယဝ်ႉ။
- 662။ လေႃႉရထႃးမႂ်းၼၢင်းၵေႃႈ ၵျႃႉတႄႉတႄႉ။ ထုၵ်ႇၸႂ်တႄႉတႄႉ။ ဢဝ်ၵႅဝ်ႈသႅင်ၵူႈပိူင်ပိူင် ႁဵတ်းဝႆႉလႄႈ လၢၵ်ႇလၢႆးတႄႉတႄႉ။ (မၢၵ်ႇလေႃႉ ၶႃလေႃႉၸိူဝ်းၼၼ်ႉၵေႃႈ) ႁၢင်ႈၶိူင်ႈဝႆႉၵူႈပိူင်ပိူင်လႄႈ ၶႅၼ်းၵျႃႉတႄႉတႄႉ။
- 663။ ၼၢင်းၽီ ဢၼ်ႁၢင်ႈလီမိူၼ်ၼင်ႇ ၶမ်းၸဵၼ်ႈဝႆႉသေ မီးဝႆႉယူႇၼိူဝ်လေႃႉရထႃးၼၼ်ႉ မႂ်းၼၢင်းၼႆႉ ဢဝ်ငဝ်းတူဝ်မႂ်ႈသေ ႁိူဝ်ႈႁႅင်းလႅင်းသႂ်ႇ ၼိူဝ်လိၼ်မိူင်းယူႇယဝ်ႉ။ ၽွၼ်းလီဢၼ်ၼႆႉ ပဵၼ်ယွၼ်ႉပိူဝ်ႈ ၵၢမ်ႇၵုသူဝ်ႇ ဢၼ်လႂ်ၼေႃး။ ၵဝ်ထၢမ်မႂ်းၼၢင်းယူႇယဝ်ႉ။ တွပ်ႇပၼ်မႃးလႄႈ (ၼႆ ၸဝ်ႈၼႃႇရတ ထၢမ်ၵႂႃႇယဝ်ႉ)။
- 664။ (ၶႃႈၼၢင်း) မီးၸႂ်ၸေႇတၼႃႇ ၽိူၵ်ႇၸိုၼ်ႈၶၢဝ်သႂ် လႆႈဢဝ် ၽႃႈဝၢတ်ႈ မႁႃႇလတႃႇတၼ်းသႃႇ ဢၼ်ႁိၵ်ႈၸိုဝ်ႈဝႃႈ သေႃးဝၼ်ႇၼၸႃႇလ ဢၼ်ဢဝ် မႆၶမ်း သွႆႉၽွတ်ႈဝႆႉ သႅင်ပတ်ႉတမျႃး၊ သႅင်ၶႆႇမုၵ်ႈၵူႈပိူင်ပိူင်သေ လူႇတၢၼ်းႁူမ်ႇပၼ် တမ်ႈတီႈ မုၼ်ၶမ်းၽြႃး ဢၼ်ဢမ်ႇမီးတီႈတႅၵ်ႈ၊ ဢၼ်မီး ၵုင်ႇၵျေးၸူးတဵမ်ထူၼ်ႈ ၸဝ်ႈၽူႈဢၼ် ၶဝ်ႈသူႇၼိပ်ႉပၢၼ်ႇၼၼ်ႉယဝ်ႉ။
- 665။ ၸဝ်ႈႁဝ်းတီႈၶႃႈ ၶႃႈၼၢင်းလႆႈႁဵတ်းၵၢမ်ႇၵုသူဝ်ႇ ဢၼ်မုၼ်ၶမ်းၽြႃးၶဝ်ၸဝ်ႈ ယွင်ႈယေႃးၼၼ်ႉလႄႈ ၸင်ႇတေဢမ်ႇလႆႈမီး လွင်ႈၶီၼႅင်သင်၊ ဢမ်ႇမီးတၢင်းၶႆႈတၢင်းပဵၼ်သင်သေ လႆႈၵတ်းယဵၼ်သိူဝ်းသႃႇယူႇတီႈၶႃႈဢေႃႈ (တွပ်ႇလၢတ်ႈၵႂႃႇၼင်ႇၼႆယဝ်ႉ)။
မလ်လိၵႃဝိမႃၼဝတ်ထု ႁူဝ်ပႅတ်ႇ သုတ်းယဝ်ႉ။
ၽိုၼ်ဢိင်
မႄးထတ်း- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ၵုတ်တိလဝိမႃၼ၊ မလ်လိၵႃဝိမႃၼဝတ်ထု၊