ပၢႆးပႆႇၺႃႇ ၵပ်းၵၢႆႇလွင်ႈၵူၼ်း

ၸွမ်းၼင်ႇ ၶေႃႈၵႂၢမ်း မၼူၵ်ႉတတ်ႉတ ပႃႇဝေႃး တူင်ႇလပေႃး ဢၼ်ဝႃႈၼၼ်ႉသေ ၽဝၵူၼ်းဢၼ်ဝႃႈၼႆႉ မၼ်းပဵၼ် ဢၼ်လႆႈယၢပ်ႇလႆႈယဵၼ်းဝႆႉ လႄႈ ၽွင်းႁဝ်းလႆႈမႃးပဵၼ်ၵူၼ်းယူႇၼၼ်ႉ ၼႂ်းလေႃႉၵမိူင်းၵူၼ်းၼႆႉ မၼ်းပဵၼ်သင်ယူႇ၊ လွင်ႈၵပ်းၵၢႆႉၵွင်ႉသၢၼ်ၵၼ်​မီးသင်၊ ပဵၼ်သင်ၼႆ ထုၵ်ႇလီႁူႉၸွမ်းဝႆႉယူႇ။ ပေႃးၼၼ် မၼ်းၸွင်ႇဝႃႈ ပဵၼ်ၵူၼ်းဢၼ်မီးၵႃႈၶၼ်၊ ၵိုင်ႇပဵၼ်ၵူၼ်း ဢၼ်ၵိူတ်ႇမႃးၼႂ်း မိူင်းၵူၼ်းယူႇယဝ်ႉ။ ပၢႆးပႆႇၺႃႇ ၵပ်းၵၢႆႇလွင်ႈၵူၼ်းဢၼ်ဝႃႈၼႆႉ မၼ်းပဵၼ်ပၢႆးပႆႇၺႃႇ ဢၼ်လႆႈလဵပ်ႈႁဵၼ်း လွင်ႈၶူင်းၵၢၼ်လေႃးၵႃႉၵူၼ်းႁဝ်းၼႆႉယဝ်ႉ။

ပေႃးမႃးႁုပ်ႈတူၺ်း ပၢႆးပႆႇၺႃႇ ၵပ်းၵၢႆႇလွင်ႈၵူၼ်းဢၼ်ဝႃႈၼႆႉ မၼ်းပဵၼ်လွင်ႈလဵပ်ႈႁဵၼ်း ပၢႆးသၢႆႊ ဢၼ်ၵပ်းၵၢႆႇလူၺ်ႈ လွင်ႈတူင်ႇဝိူင်းၵူၼ်းလႄႈ လွင်ႈလေႃးၵၵူၼ်း ဢၼ်ႁုၼ်ႈမုၼ်းၶိုၼ်းယႂ်ႇ ​မႃးၼၼ်ႉယဝ်ႉ။ ၵေႃႉဢၼ်ၶူင်သၢင်ႈ ဝေႃးႁၢၼ်ဢၼ်ဝႃႈ ပၢႆးပႆႇၺႃႇ ၵပ်းၵၢႆႇလွင်ႈၵူၼ်း ဢၼ်ဝႃႈၼႆႉ မၼ်းပဵၼ် ၽူႈလူင်ႉလႅၼ်ႇပၢႆးဝူၼ်ႉၶႆႈ မိူင်းပျၢင်ႇသဵတ်ႉ ဢၼ်လႆႈၸိုဝ်ႈသၢႈ ဢေႃးၵၢသ်ႉၵုၼ်ႉ ဢၼ်ဝႃႈၼၼ်ႉယဝ်ႉ။ ၵေႃႉဢၼ်လႆႈၸိုဝ်ႈဝႃႈ ၽရႅတ်ႉထရဵတ်ႉ လေႇပရႄး ဢၼ်ဝႃႈၼၼ်ႉၵေႃႈ မၼ်းလႆႈတႅမ်ႈမႃး လွင်ႈပၢႆးပႆႇၺႃႇ ၵပ်းၵၢႆႇလွင်ႈၵူၼ်းၼႆႉယူႇ။ ၵူၺ်းၵႃႈဝႃႈ ၵပ်းၵၢႆႇလူၺ်ႈ လွင်ႈပႆးပႆႇၺႃႇ ၵပ်းၵၢႆႈလွင်ႈၵူၼ်းၼႆႉသေ ၵေႃႉဢၼ် ​တႅမ်ႈလွင်ႈၵႄႈလိတ်ႈသၢင်းလၢင်းမႃးၼမ်သေပိူၼ်ႈၼႆႉ ပဵၼ် ႁႃးပတ်ႉသပိၼ်ႇသႃႇ ၼႆယဝ်ႉ။ ဢၼ်ႁဝ်းလဵပ်ႈႁဵၼ်း လွင်ႈပၢႆးပႆႇၺႃႇ ၵပ်းၵၢႆႇလွင်ႈၵူၼ်းယူႇၼႆႉ ႁဝ်းၶႃး လႆႈႁဵတ်းႁဵတ်း လွင်ႈၵေႃႇသၢင်ႈ လေႃးၵၵူၼ်းလူင်ႁဝ်းၼႆႉ ႁဵတ်းႁိုဝ်ပဵၼ်မႃး၊ လွင်ႈဝႃႈ ၵူၼ်း ယူႇပဵၼ်မုၵ်ႉပဵၼ်ၵေႃၼႆႉ ၶဝ်တႄႇယူႇသဝ်းမႃးၸဵမ်မိူဝ်ႈလႂ်ၼႆ လႆႈလဵပ်ႈႁဵၼ်းၸၵႂႃႇၸိူဝ်းၼႆႉယဝ်ႉ။ ၸွမ်းၼင်ႇဝႃႈ ၵူၼ်းဢၼ်ဝႃႈၼႆႉ မၼ်းပဵတ်သတ်ႉတဝႃႇ ဢၼ်လႆႈယူႇႁူမ်ႈသိုၵ်ႈသမ်ႇၵၼ်ၼႆလႄႈ ၸဵမ်မိူဝ်ႈမိုၼ်ႉမိူဝ်ႈၵွၼ်ႇ ဢၼ်ပူၼ်ႉမႃးၼၼ်ႉၵေႃႈ ၵူၼ်းႁဝ်းၼႆႉ ႁူမ်ႈၵၼ်သေ ယူႇသဝ်းၸွမ်းၵၼ်မႃးယဝ်ႉ။ လွင်ႈႁူမ်ႈၵၼ်သေ ယူႇသဝ်းၸွမ်းၵၼ်ၼႆႉ ပေႃးမႃးၼိူင်းတူၺ်း ၵူၼ်းဢၼ်ယူႇသဝ်း​ႁင်းၶေႃ ဢၼ်ဢမ်ႇၶဝ်ႈၵႄႈဢွၵ်ႇၵၢင်ပိူၼ်ႈၼၼ်ႉၼႆ တေလႆႈဝႃႈ မၼ်းမီးၽွၼ်းလီတၢင်းၼမ်သေ ၸၢင်ႈမီးလွင်ႈ ၶိုၼ်ႈယႂ်ႇမႂ်ႇသုင်ယူႇယဝ်ႉ။

လွင်ႈၵူၼ်းယူႇပဵၼ်ၽုင်ဢၼ်ဝႃႈၼႆႉ ငဝ်ႈႁၢၵ်ႈမၼ်းတႄႇမႃးတီႈ လွင်ႈၵူပ်ႉၵူႈပဵၼ်ႁိူၼ်းၼၼ်ႉယဝ်ႉ။ ၼႃႈႁိူၼ်းၼိူင်ႈဢၼ်ၼႆႉ မၼ်းတေမီး ပေႃႈ၊ မႄႈ၊ လုၵ်ႈလၢင်းသေ ယူႇသဝ်း ပဵၼ်မုၵ်ႉ ပဵၼ်ႁၢင်း၊ ယူႇၸွမ်းၵၼ်၊ ၵိၼ်ၸွမ်းၵၼ်မႃးယဝ်ႉ။ တႄႇဢဝ်တီႈၼၼ်ႉသေ ၵေႃႉၼိုင်ႈလႄႈၵေႃႈၼိုင်ႈ ပဵၼ်ဢူၺ်းၵေႃႉၵၼ်၊ ပဵၼ်ၵေႃႉၸမ်ၸႂ်ၵၼ်မႃးသေလႄႈ ၸင်ႇၵွႆႈႁဵတ်းမူႇႁဵတ်းၸုမ်း သေၵေႃႈ ယူႇသဝ်းမႃးယဝ်ႉ။ ယွၼ်ႉႁူဝ်ၵူၼ်းၵေႃႈ ၼမ်မႃးလႄႈ လွင်ႈၵပ်းသိုပ်ႇသိူၵ်ႈသမ်ႇၵၼ်ၵေႃႈ ပဵၼ်ဢမ်ႇၸမ်ၸႂ်ၵၼ်မႃးသေ လွင်ႈလႆႈပိုင်ႈဢိင်ၼိူဝ်ၵၼ်ၵေႃႈ တိူဝ်းလိူဝ်မႃးယူႇယဝ်ႉ။

တီႈပၢႆးပႆၺႃႇ ၵပ်းၵၢႆႇလွင်ႈၵူၼ်းၼၼ်ႉ မၼ်းတေပႃးဝႆႉ လွင်ႈၵူပ်ႉၵူႈပဵၼ်ႁိူၼ်း ၵူၼ်းမိူဝ်ႈၵွၼ်ႇၵွၼ်ႇ ဢၼ်ပူၼ်ႉမႃးႁဝ်ႈႁဵင်ပီၼၼ်ႉ၊ လွင်ႈပၵ်းပိူင်တူဝ်ၵဝ်ႇ လႄႈ ၽိင်ႈထုင်း ၸိူဝ်းဢွၵ်ႇပဵၼ်မႃး၊ လွင်ႈၼႃႈႁိူၼ် ၼႂ်းၵႄႈ လွင်ႈသုၵ်ႉယုင်ႈ မိူင်းၵူၼ်း၊ လွင်ႈပိူင်ႇၶူဝ်းၶွင်၊ လွင်ႈပၢႆးဢုပ်ႉပိူင်၊ လွင်ႈသွၼ်ပၢႆးပႆႇၺႃႇ၊ လွင်ႈယုမ်ႇယမ်ဝႃႇတ၊ လွင်ႈသူၼ်းတုမ်၊ လွင်ႈယူႇၼႂ်း ဝဵင်းလူင်၊ လွင်ႈယၢပ်ႇၽိုတ်ႇၵိၼ်းၸႂ်၊ လွင်ႈပဵၼ်တၢင်းပဵၼ်၊ လွင်ႈၵူၼ်းတၢင်ႇမိူင်း ၶဝ်ႈမႃးယူႇႁူမ်ႈၸွမ်းသေ လႆႈပဵၼ် လွင်ႈသုၵ်ႉယုင်ႈ ၼႂ်းၵႄႈ ၵူၼ်းၶိူဝ်းၼိူင်ႈလႄႈ ၶိူဝ်းၼိူင်ႈ၊ ၸိူဝ်းၼႆႉ ၸိူဝ်းၼႆႉ မၼ်းပဵၼ်ဢၼ်ၶဝ်ႈပႃးၼႂ်း ပၢႆးပႆႇၺႃႇ ၵပ်းၵၢႆႇလွင်ႈၵူၼ်းယဝ်ႉ။

ၵပ်းၵၢႆႇလူၺ်ႈ လွင်ႈၵူၼ်းၸိူဝ်းၼႆႉ ႁူမ်ႈဝႃႈ မၼ်းဢမ်ႇၸႂ်ႈ ဢၼ်မၼ်ႈၵိုမ်းဝႆႉတႃႇသေ​ႇသေတႃႉ မၢင်ၸိူဝ်းမၢင်လွင်ႈတႄႉၵေႃႈ တိုၵ်ႉပဵၼ် ဢၼ်မၼ်ႈၵိုမ်းဝႆႉယူႇၵေႃႈမီး။ လွင်ႈၸိူဝ်းၼၼ်ႉတႄႉ မၼ်းပဵၼ် လွင်ႈထတ်းသၢင် ၵူတ်ႉႁႃ လွင်ႈၵတ်းယဵၼ် ဢၼ်တေၸၢင်ႈဝႄႈလႆႈ လွင်ႈယၢပ်ႇၽိုတ်ႇၵိၼ်းၸႂ်ၼၼ်ႉယဝ်ႉ။ ၸွမ်းၼင်ႇ ပိူင်ပဵၼ် ဢၼ်ပဵၼ်မႃး ဢွၵ်ႇမႃး မႂ်ႇမႂ်ႇၼၼ်ႉသေလႄႈ ႁဝ်းၵေႃႈ လႆႈလႅၵ်ႈလၢႆႈ ပိူင်ယူႇပိူင်ၵိၼ်ႁဝ်းၸွမ်းယူႇ။ တူဝ်ယၢင်ႇမၼ်း မၼ်ၼင်ႇၵၢပ်ႈပၢၼ် ယၢမ်းလဵဝ် တေလႆႈဝႃႈ ပဵၼ်ၵၢပ်ႈပၢၼ် ပၢႆးပႆၺႃႇ ၶိူင်ႈၸၢၵ်ႈမႃးလႄႈ လွင်ႈယူႇတၼ်းသဝ်း​ႁဝ်းၵေႃႈ ၵႃႈလႆႈလႅၵ်ႈလၢႆႈၸွမ်းယူႇယဝ်ႉ။

လွင်ႈလႅၵ်ႈလၢႆႈဢၼ်ဝႃႈၼႆႉ မၼ်းၵေႃႈပဵၼ် ၵၢၼ်သမတႃႇ တွၼ်ႈတႃႇ ၶူင်းၵၢင်လေႃးၵလူင်ႁဝ်းၼႆႉယူႇ။ ယွၼ်ႉပိူဝ်ႈဝႃႈ ဢီႈသင်ၵေႃႈ ဢမ်ႇမၼ်ႈၵိုမ်းလူး။ မိူဝ်ႈၵူႈပွၵ်ႈၵ​ေႃႈ ပဵၼ်လွင်ႈလႅၵ်ႈလၢႆႈမႃးယူႇ၊ ယၢမ်းလဵဝ်ၵေႃႈ တိုၵ်ႉပဵၼ် လွင်ႈလႅၵ်ႈလၢႆႈယူႇ၊ မိူဝ်းၼႃႈၵေႃႈ တေပဵၼ်လွင်ႈလႅၵ်ႈလၢႆႈထႅင်ႈယူႇၼင်ႇၵဝ်ႇ။ ပၢႆးပႆႇၺႃႇ ၵပ်းၵၢႆႇလွင်ႈၵူၼ်းၼႆႉ တေလႆႈဝႆႉၽၢင်ႉသတိသေ လဵပ်ႈႁဵၼ်း လွင်ႈလႅၵ်ႈလၢႆႈၸိူဝ်းၼၼ်ႉယဝ်ႉ။ လွင်ႈလႅၵ်ႈလၢႆႈၼိူင်ႈဢၼ်ၼႆႉ မၼ်းတေပၼ် ၽွၼ်းလီလေႃးၵႁႃႉ ဢမ်ႇၼၼ် မၼ်းတေပၼ် ၽွၼ်းၸႃႉတႃႇလေႃးၵႁႃႉၼႆ တေလႆႈလဵပ်ႈႁဵၼ်းၵႂႃႇယဝ်ႉ။ ပေႃးပဵၼ် လွင်ႈလႅၵ်ႈလၢႆႈ ဢၼ်ပၼ်ၽွၼ်းလီၼႆ တေလႆႈဝႃႈ ပဵၼ်လွင်ႈယူႇသဝ်းၵူၼ်းႁဝ်း ၶိုၼ်ႈယႂ်ႇမႃးၼႆသေ ၸိူဝ်းပဵၼ် ၽူႈလူင်ႉလႅၼ်ႇ ပၢႆးပႆႇၺႃႇ ၵပ်းၵၢႆႇလွင်ႈၵူၼ်းၶဝ်ၵေႃႈ ၶဝ်တေလႆႈသွၵ်ႈႁႃ လွင်ႈသၽေႃး လႅၵ်ႈလၢႆႈလႄႈ လွင်ႈပိုၼ်ႉဢၼ်ႁႂ်ႈလႅၵ်ႈလၢႆႈမႃး ၼၼ်ႉယူႇယဝ်ႉ။

ၸဵမ်မိူဝ်ႈမိုၼ်ႉမိူဝ်ႈၵွၼ်ႇယဝ်ႉ ၸိူဝ်းပဵၼ်ၸၢဝ်းၶိူဝ်းၵမ်ႉပႃႈၼမ်ၼႆႉ ယုမ်ႇယမ်ၼိူဝ် ၽိင်ႈငႄႈ ႁႅင်းယႂ်ႇ၊ လွင်ႈပၢႆးဝူၼ်ႉၸဝ်ႈၵဝ်ႇၸမ်ႉ ႁႅင်းဢေႇမႃး။ မၼ်းဢမ်ႇၸႂ်ႈဝႃႈ ၸၢဝ်းၶိူဝ်းၼႂ်းမိူင်းႁဝ်း လၢႆလၢႆၵူၺ်း။ ၸၢဝ်းၶိူဝ်းၼႂ်းၵမ်ႇၽႃႇ ၵမ်ႉပႃႈၼမ်ၼႆႉ မၼ်းၵေႃႈ ဢွၼ်ၵၼ်လပ်းတႃ ယုမ်ယမ်ၼိူဝ် လွင်ႈယုမ်ႇယမ်ၸွမ်းၽိင်ႈထုင်းမႃးၵူၺ်း။ လွင်ႈယုမ်ႇယမ်ၸိူဝ်းၼၼ်ႉ မၼ်းပဵၼ်ဢၼ်ၵိုၵ်းၸပ်းတူဝ်ၸႂ်မႃး။ တီႈပၢႆးပႆၺႃႇ ၵပ်းၵၢႆႇလွင်ႈၵူၼ်းၼႆႉ မၼ်းသပ်းလႅင်းၸႅၵ်ႇၼႄလွင်ႈၼႆႉဝႆႉယူႇ။ လိူဝ်သေၼၼ်ႉဢမ်ႇၵႃး ၸိူဝ်းပဵၼ်ၽူႈလဵပ်ႈႁဵၼ်း လွင်ႈပၢႆးပႆႇၺႃႇ ၵပ်းၵၢႆႇလွင်ႈၵူၼ်းၼႆႉၼႆ လွင်ႈလၢၵ်ႇလၢႆး ဢၼ်ၵပ်းၵၢႆႇလွင်ႈၵူၼ်း၊ ၽိင်ႈထုင်းၸိူဝ်းၼႆႉ ႁူမ်ႈဝႃႈ မၼ်းလဵၵ်ႉၼွႆႉတၢၼ်ႇႁိုဝ်ၵေႃႈလၢႆး တိုၼ်းတေဢမ်ႇလႆႈဝႆႉဝႃႈပဵၼ်လွင်ႈလဵၵ်ႉဢေႇၵေႇမၢင်။ ယွၼ်ႉပိူဝ်ႈသင်ၼႆ လွင်ႈၸိူဝ်းၼၼ်ႉၼႆႉ ႁူမ်ႈဝႃႈ မၼ်းလဵၵ်ႉလဵၵ်ႉဢွၼ်ႇၼႆသေတႃႉ ပေႃးတွၼ်ႈတႃႇ ၵူၼ်းတေႃႇၵူၼ်း ၵပ်းသိုပ်ႇၵၼ် ၊ ယိူင်ႈၵၼ်ၼႆႉ မၼ်းၵေႃႈ တေလႆႈဝႃႈ ပဵၼ်ဢၼ်လမ်ႇလွင်ႈဝႆႉဢေႃႈ။

ဢၼ်ႁဝ်းယူႇႁဝ်းၵိၼ်၊ ႁဵတ်းႁဵတ်းသၢင်ႈသၢင်ႈယူႇ ၵူႈဝၼ်းၵူႈဝၼ်းၼႆႉ မၼ်းၵေႃႈ ၶဝ်ႈပႃးၼႂ်း ပၢႆးပႆႇၺႃႇ ၵပ်းၵၢႆႇလွင်ႈၵူၼ်းယူႇလႄႈ မၼ်းၵေႃႈ မိူၼ်တၢင်းႁဝ်းၶႃႈ လဵပ်ႈႁဵၼ်း လွင်ႈပၢႆးပႆႇၺႃႇ ၵပ်းၵၢႆႇလွင်ႈၵူၼ်းယူႇယဝ်ႉ။ ၵေႃႉဢၼ်ၽၢင်ႉမႅၼ်ႈၺႃး လွင်ႈၼၼ်ႉၼႆႉ တေလႆႈဝႃႈ ဢမ်ႇပေႃးမီးၼမ်။ ၵူၺ်းၵႃႈဝႃႈ ၵူၼ်းၸိူဝ်းဢၼ် ၽၢင်ႉလွင်ႈ ႁိမ်းႁွမ်းသေ၊ ဝူၼ်ႉသွၼ်ႇလီလီသေ ယူႇသဝ်းၵႂႃႇၵေႃႈ ၼမ်မႃးၼမ်မႃး ၵူႈမိုဝ်ႉၵူႈဝၼ်းယူႇယဝ်ႉ။ ပေႃးႁဝ်းၶဝ်ႈၸႂ် လဵပ်ႈႁဵၼ်းတူၺ်း ပၢႆးပႆႇၺႃႇ ၵပ်းၵၢႆႇလွင်ႈၵူၼ်းၼႆ လဵပ်ႈႁဵၼ်းတူၺ်း လွင်ႈပိုၼ်းဝဵင်း ဢၼ်ၸဝ်ႈၵဝ်ႇ ယူႇသဝ်းယူႇၼၼ်ႉလႄႈသင်၊ လဵပ်ႈႁဵၼ်းတူၺ်း လွင်ႈၵူၼ်းႁိမ်းႁွမ်း၊ လွင်ႈၶဝ်ယူႇသဝ်း၊ လွင်ႈၶဝ်ႁဵတ်းၵၢၼ်လဵင်ႉတွင်ႉ၊ လွင်ႈဝႃႈ တီႈဝဵင်းၼၼ်ႉ မီးၽြႃးလၢႆသူႇ၊ ၵျွင်းမုၼ်ၸဝ်ႈ မီးလၢႆၵျွင်း ၸၵႂႃႇၸိူဝ်းၼႆႉ တူဝ်ႈတၼ်းမိူဝ်ႈလႂ်ၵေႃႈ လဵပ်ႈႁဵၼ်းတူၺ်းၼႆ မၼ်းတေပဵၼ် လွင်ႈသူင်ၸႂ် ဢၼ်လီၶဝ်ႈၸႂ်တႄႉတႄႉဝႃႈဝႃႈယဝ်ႉ။

ပၢႆးပႆၺႃႇ ၵပ်းၵၢႆႇလွင်ႈၵူၼ်းၼႆႉ တေလႆႈဝႃႈ တႄႇဢဝ် ႁူဝ်ပၢၵ်ပီ ႑႙ မႃးသေ ၸင်ႇၵွႆႈလဵပ်ႈႁဵၼ်းမႃး ၸွမ်းၶွပ်ႇၸွမ်းပိူင်မၼ်းလီလီယဝ်ႉ။ ၵူၼ်းၵေႃႉၼိူင်ႈလႄႈ ၵေႃႉၼိူင်ႈ ယိူင်ႈၸမ်ၸႂ်ၵၼ်မႃး လွင်ႈပၢႆးပႆႇၺႃႇ ၵပ်းၵၢႆႇလွင်ႈၵူၼ်းၼႆႉ ယိူင်ႈၶႅၼ်းၶဝ်ႈတၢင်းတိုဝ်းမႃးတိၵ်းတိၵ်းယဝ်ႉ။ ပၢႆးပႆႇၺႃႇ ၵပ်းၵၢႆႇလွင်ႈၵူၼ်းၼႆႉ မၼ်းၸႅၵ်ႇၼႄ လွင်ႈႁဵတ်းသၢင်ႈလႄႈ လွင်ႈၽွၼ်း ဢၼ်ၵူၼ်းတေႃႇၵူၼ်း ၵပ်းသိုပ်ႇၵၼ်သေ မၼ်းႁႃၶေႃႈမုၼ်း တႃႇတေပဵၼ် ပိူင် ဢၼ်ႁဝ်းတေလႆႈ ႁဵတ်းၸွမ်း၊ ယူႇၸွမ်းၵႂႃႇ ၼင်ႇပၵ်းပိူင်ၵူၼ်းၼၼ်ႉယဝ်ႉ။ တီႈၸၼ်ႉၸွမ်ၼင်ႇ ၸၼ်ႉၸွမ်လၢၼ်ႇတၢၼ်ႇ​၊ ၸၼ်ႉၸွမ်ဢွၵ်ႇၸ်ၽူတ်ႉ ၸိူဝ်းပဵၼ်ၸၼ်ႉၸွမ် ၼွၵ်ႈမိူင်းၸိူဝ်းၼႆႉ ဢွၼ်ၵၼ်ပူင်သွင် ပၢႆးပႆႇၺႃႇ ၵပ်းၵၢႆႇလွင်ႈၵူၼ်းယူႇ။ တီႈၼႂ်းမိူင်းႁဝ်းၵေႃႈ မိူၼ်ၼင်ႇတီႈ ၸၼ်ႉၸွမ်တႃႈၵုင်ႈ ၼၼ်ႉ ၶဝ်ၵေႃႈ ပူင်သွၼ်ပၼ် ပၢႆးပႆႇၺႃႇ ၵပ်းၵၢႆႇလွင်ႈၵူၼ်းယူႇယဝ်ႉ။