ပွႆးသၢင်ႇလွင်း

ပွႆးသၢင်ႇလွင်း ပဵၼ်ၽိင်ႈငႄႈတႆး၊ ၵိုၵ်းမႃးၸွမ်း ပုတ်ႉထသႃႇသၼႃႇ ဢၼ်ၸၢဝ်းၶိူဝ်းတႆး ပိုင်ႈဢိင်ၵိူဝ်းယမ်မႃး လၢႆၸူဝ်ႈၵူၼ်း၊ ယွၼ်ႉၼၼ် ၵူၼ်းတႆးႁဝ်း ပေႃးမီးလုၵ်ႈၸၢႆး မိူဝ်ႈဢႃႇယုလႆႈ ႑႒ ပီ၊ ၸင်ႇဢဝ်ၵႂႃႇဢၢပ်ႈပဵၼ် "ၵပ်ႉပီႇယ" တီႈဝတ်ႉၵျွင်းၶၢဝ်းယၢမ်း (႑) ပီ၊ ပုၼ်ႈတႃႇႁဵၼ်းထမ်း၊ ၵႂၢမ်းယွတ်းၽႃႈ၊ ၵႂၢမ်းၶၢမ်ႇသိၼ်၊ ၵႂၢမ်းပၼ်ပွၼ်းၸိူဝ်းၼႆႉ။ ၶၢဝ်းပွႆးသၢင်ႇလွင်းသမ်ႉ လႄႉၵၼ်ၸတ်းႁဵတ်း တင်ႈဢဝ်လိူၼ်သီႇတေႃႇထိုင် လိူၼ်ၸဵတ်းၵူႈပီ၊ မိူဝ်ႈတေဢဝ်လုၵ်ႈၸၢႆးပဵၼ် သၢင်ႇၼုင်ႈၽႃႈလိူၼ်ၼၼ်ႉ ပေႃႈမႄႈတေလႆႈႁၢင်ႈႁႅၼ်းဝႆႉထႃႈ (႑) လိူၼ်၊ ၸဵမ်ဢဝ် ၶူဝ်းသၢင်ႇလွင်း၊ ဢူတ်ႇၸွင်ႉ (မူၺ်းၽူမ်မႄႈ) ၽႃႈလိူၼ်သၢင်ႇၵၢၼ်း၊ ၶိူင်ႈပရိၶၢၼ်၊ ၶိူင်ႈၸႂ်ႉၶူဝ်းသွႆ၊ ပူၵ်ႉၶဝ်ႈတႅၵ်ႇ၊ ၶဝ်ႈတေႃႇၶဝ်ႈတႅၼ်၊ ပေႃႈလဵင်ႉမၢဝ်ႇ၊ မႄႈလဵင်ႉသၢဝ် (ဢၢႆႈသၢၼ်ႈ)။ လိူဝ်သေၼၼ်ႉ သၢင်ႇလွင်း၊ ႁၢင်ႈၶိူင်ႈၽႃႈၽႄး (ၶူဝ်းၶုၼ်ဢလွင်း) ပေႃႈမႄႈတေဢဝ်ၶူဝ်းငိုၼ်းၶမ်း မႃးႁွႆႈပၼ်လုၵ်ႈၸၢႆး၊ ပဵၼ်လွင်ႈမီးၼႃႈမီးတႃမီးငိုၼ်းၶမ်း ပေႃႈမႄႈပိူင်ၼိုင်ႈ၊ မိူဝ်ႈၵႂႃႇႁပ်ႉလုၵ်ႈၸၢႆးမႃးထႃႁူဝ် ၼုင်ႈၶူဝ်းလွင်းယဝ်ႉ၊ သမ်ႉလႆႈႁႄႇၶီႇၶေႃးၵႂႃႇၵၼ်ႇတေႃး ႁူဝ်ၵျွင်း၊ ၽူႈထဝ်ႈၵူၼ်းၵႄႇယဝ်ႉ? ၵူၼ်းဝၢၼ်ႈပီႈၼွင်ႉ ႁွပ်ႇပႃးၶူဝ်းလူႇ၊ တူၼ်ႈပတေႇသႃႇ၊ ၵွင်မွင်းႁႄႇၵႂႃႇတီႈဝတ်ႉၵျွင်းမုၼ်ၸဝ်ႈယူႇယဝ်ႉ။ မိူဝ်ႈၵၼ်ႇတေႃးႁူဝ်ဝတ်ႉယဝ်ႉ ႁပ်ႉသၢင်ႇလွင်းမႃးဢုၼ်ႇငၢၼ်း (ႁပ်ႉၶႅၵ်ႇ) တီႈႁိူၼ်းပေႃႈဢွၵ်ႇ၊ ဢမ်ႇၼၼ် ႁူမ်ႈၵၼ်ႁဵတ်းၽၢမ်ပၢင်ပွႆးတီႈလဵဝ် လဵင်ႉလူပီႈၼွင်ႉ ၸိူဝ်းမႃးႁွမ်းလူႇႁွမ်းတၢၼ်း၊ ဝၢႆးၼၼ်ႉၸင်ႇပဵၼ်ဝၼ်းၼုင်ႈလိူၼ် (ၶၢမ်ႇသၢင်ႇ) ပဵၼ်ဝၼ်းၶႅၵ်ႇ ပီႈၼွင်ႉလႄႈပေႃႈမိုဝ်ႉမႄႈၵႅင်မူၼ်ႈပျေႃႇ၊ ဢဝ်သၢင်လွင်းသိူင်ႇ ႁႂ်ႈပေႃႈဢွၵ်ႇမႄႈယေႃးမႃး ထုတ်ႇဢဝ်ၸင်ႇပၼ်ၶိုၼ်း၊ (ဝၼ်းႁၢင်ႈလွင်း၊ ဝၼ်းႁပ်ႉၶႅၵ်ႇ၊ ဝၼ်းၼုင်ႈလိူင်) မိူဝ်ႈထိုင်ၶၢဝ်း ယၢမ်းၼုင်ႈလိူင်ၼၼ်ႉ၊ ဢဝ်သၢင်ႇလွင်း ၶဝ်ႈမႃးၼႂ်းၵျွင်းသေ သင်ႇၶႃႇၸဝ်ႈႁႂ်းသၢင်ႇလွင်းႁပ်ႉဢဝ် ၽႃႈသၢင်ႇၵၢၼ်းၼႂ်းမိုဝ်း ပေႃႈမႄႈယဝ်ႉ ႁပ်ႉသိၼ်၊ ၼုင်ႈၽႃလိူင်သင်ႇသွၼ်ၸဝ်ႈသၢင်ႇမႂ်ႇ သေယဝ်ႉတူဝ်ႈၵႂႃႇယူႇယဝ်ႉ။