ပဵၼ်ၸဝ်ႈရႁၢၼ်းတႃႇတႄႉတႄႉ

ၼတီႇၵသ်သပ ၵေႃႉပဵၼ်ၼွင်ႉ ဢုရုဝေႇလၵသ်သပၼၼ်ႉ တင်းလုၵ်းၼွင်ႉမၼ်းသၢမ်ပၢၵ်ႇၸိူဝ်းၼၼ်ႉလႄႈသင်၊ ၵေႃႉပဵၼ်ၼွင်ႉထႅင်ႈၵေႃႉၼိုင်ႈ ဢၼ်ပဵၼ်ၵယႃႇၵသ်သပလႄႈ လုၵ်ႈၼွင်ႉမၼ်းသွင်ပၢၵ်ႇၸိူဝ်းၼၼ်ႉလႄႈသင် တိုၵ်ႉဢွၼ်ၵၼ်ၵိူဝ်းလီမူးၸႃးၾႆးယူႇ။ ၶႃသွင်ၵေႃႉပီႈၼွင်ႉၼႆႉ ထၢင်ႇတူဝ်ၶဝ်ပဵၼ်ရႁၢၼ်းတႃႇ၊ ၵူၼ်းၼမ်ၵေႃႈ ထၢင်ႇၶႃပဵၼ်ရႁၢၼ်းတႃႇၼႆသေ ၼပ်ႉယမ်ၶႃၼင်ႇၵဝ်ႇ။

ၶႃသွင်ၵေႃႉၼႆႉ လႆႈႁၼ်ၶူဝ်ႁူဝ်၊ မွႆၵၢင်း၊ ၼူတ်ႇၸိူဝ်းလွင်ႈမႃးၸွမ်းၼမ်ႉၼေႇရၼ်ႇၸရႃႇၼၼ်ႉသေ မိူဝ်ႈၶႃၵႂႃႇၸူးဢုရုဝေႇလၵသ်သပၼၼ်ႉ ၶႃလႆႈႁၼ် ပီႈဢၢႆႈသွင်ၶႃလႄႈ လုၵ်ႈၼွင်ႉမၼ်း ဢွၼ်ၵၼ်ထႃၶူၼ်ႁူဝ်၊ မွႆၵၢင်း၊ ၼူတ်ႇၶဝ်ဝႆႉယူႇယဝ်ႉ။ ပီႈဢၢႆႈၶႃၸင်ႇသၢင်းလၢင်းၼႄ - လွင်ႈဝႃႈ ႁဝ်းဢွၼ်ၵၼ်ထၢင်ႇထိူမ်တူဝ်ႁဝ်းပဵၼ် ရႁၢၼ်းတႃႇၼႆ၊ ပေႃးယင်းပႆႇပဵၼ်းရႁၢၼ်းတႃႇဢၼ်တႄႉမၼ်းၼႆ တိုၼ်းတေပႆႇလွတ်ႈလႆႈသမ်ႇသရႃႇ၊ ၵွပ်ႈၼၼ်လႄႈ ဢွၼ်ၵၼ်ၵႂႃႇသွၼ်ႈႁူမ်ႈယမ်ငဝ်းတမ်ႈတီႈပုတ်ႉထၸဝ်ႈသေ ႁဵတ်းႁႂ်ႈပဵၼ်ရႁၢၼ်းတႃႇဢၼ်တႄႉၸင်ႇတေလႆႈၶုၺ်ႉႁၼ်လွင်ႈငမ်းယဵၼ်ဢၼ်တႄႉမၼ်းဢိူဝ်ႈ - သင်ႇသွၼ်ၶႃၼင်ႇၼႆ။

ၼွင်ႉမၼ်းသွင်ၵေႃႉလႄႈ လုၵ်ႈၼွင်ႉၶႃႁႃႈပၢၵ်ႇၵေႃႈ ပွင်ႇၸႂ်ဝႃႈ တႃႇတေၶိုၼ်ႈၽႅဝ်လႇႈတီႈ ၸၼ်ႉပၺ်ႇၺႃႇၼၼ်ႉ သီႇလလႄႈ သမႃႇထိတေလႆႈတဵမ်ထူၼ်ႈၼႆယူႇယဝ်ႉ။ တူၺ်းတွင်းၸွမ်းၼိူဝ်ရုပ်ႈလႄႈၼၢမ်ႇသေ တေလႆႈပူၵ်းတင်ႈသမႃႇထိ။ ၽြႃးပဵၼ်ၸဝ်ႈၼႆႉ ပုၼ်ႈတေပူၵ်းတင်ႈသမႃႇထိၼၼ်ႉ ႁႂ်ႈတူၺ်းတွင်းၸွမ်းလူမ်းၶဝ်ႈလူမ်းဢွၵ်ႇၼႆယဝ်ႉ။ ပေႃးၶတ်းၸႂ်ႁဵတ်းႁႂ်ႈသမႃႇထိၵႄႇထူၼ်ႈမႃးယဝ်ႉ ၸင်ႇတေယၢင်ႈၶိုၼ်ႈၸူးပၺ်ႇၺႃႇသိၵ်ႉၶႃႇ - ၽြႃးပဵၼ်ၸဝ်ႈႁေႃးၼႄၼင်ႇၼႆ။

ပၺ်ႇၺႃႇၼႆႉမီးသၢမ်ပိူင်၊ ဢၼ်သပ်းသေးဝူၼ်ႉသၢင်ႈၼိူဝ်ဢၼ်လႆႈႁူႉငိၼ်းမႃးတင်းလူင်ၼၼ်ႉ ပဵၼ်ၸိၼ်ႇတႃႇမယပၺ်ႇၺႃၵွႆး။ ဢဝ်ဢၼ်ၼႆႉၵွႆးသေ ဢမ်ႇယၢင်ႈၶိုၼ်ႈထိုင်လႆႈၽႃႇဝၼႃႇပၺ်ႇၺႃႇၵွၼ်ႇ။ ဢမ်ႇထိင်းသိမ်းပႂ်ႉပႃးသီႇလသိၵ်ႉၶႃႈလႄႈ သမႃႇထိသိၵ်ႉၶႃႈၵေႃႈ ၸၢင်ႈလႆႈသုတမယပၺ်ႇၺႃႇလႄႈ ၸိၼ်ႇတႃႇမယပၺ်ႇၺႃႇယူႇ။ ၵူၺ်းၵႃႈ ၽႃႇဝၼႃႇမယပၺ်ႇၺႃႇတႄႉ ပႂ်ႉပႃးသီႇလ၊ ပူၵ်းတင်ႈသမႃႇထိယဝ်ႉၵွင်ႇၸင်ႇၸၢင်ႈလႆႈ။ "လႆႈမီးသြႃႇမိူၼ်ၼင်ႇၵေႃးတမၼႆႉ ႁဝ်းၵၢမ်ႇလီတႄႉတႄႉ၊ ၵဝ်လႄႈ လုၵ်ႈၼွင်ႉၵဝ်ၸိူဝ်းၼႆႉ ဢွၼ်ၵၼ်ၸွမ်းသဵၼ်ႈတၢင်းပုတ်ႉထၸဝ်ႈသေ ပႂ်ႉပႃးသီႇလသိၵ်ႉၶႃႇ၊ သမႃႇထိသိၵ်ႉၶႃႇသေ ပူၼ်ႉသုတမယပၺ်ႇၺႃႇ၊ ၸိၼ်ႇတႃႇမယပၺ်ႇၺႃႇၵႂၢႇယဝ်ႉ ဢွၼ်ၵၼ်ၽိုၵ်းသႃ တူၺ်းတွင်းၽႃႇဝၼႃႇမယပၺ်ႇၺႃႇဢိူဝ်ႈ။ ႁဝ်းၸိူဝ်းၼႆႉ ထူၺ်ႈပႅတ်ႈႁၢၵ်ႈလေႃးၽ၊ တေႃးသ၊ မေႃးႁ ယဝ်ႉ ဢွၼ်ၵၼ်ပူၼ်ႉသေႃးတႃႇပတ်ႉတိမၢၵ်ႈ၊ သၵတႃႇၵႃႇမမၢၵ်ႈသေ ပဵၼ်ရႁၢၼ်းတႃႇ ဢၼ်လွတ်ႈၵၢင်းဢႃႇသဝေႃးတြႃးၸိူဝ်းၼၼ်ႉယဝ်ႉ"။

"သူၶဝ်ၵေႃႈ ဢွၼ်ၵၼ်ၸွမ်းသဵၼ်ႈတၢင်းၽြႃးပုတ်ႉထၸဝ်ႈသေ ဢွၼ်ၵၼ်ၽိုၵ်းသႃတိုဝ်းၵမ်ႁႂ်ႈပေႃးလႆႈပဵၼ် ရႁၢၼ်းတႃႇဢၼ်လွတ်ႈၵၢင်းဢႃႇသဝေႃးတြႃးၸိူဝ်းၼၼ်ႉလႄႈ။ ဢွၵ်ႇယၢၼ်မႃးဢဝိတ်ႉၸႃႇလွင်ႈလပ်းသိင်ႇလူင်ၼၼ်ႉသေ ဢွၼ်ၵၼ်ႁဵတ်းသၢင်ႈပၼ်ၽွၼ်းလီတႃႇၵူၼ်းတင်းၼမ်လႄႈ"

ၵေႃႉပဵၼ်ၼွင်ႉလႄႈ လုၵ်ႈၼွင်ႉၶႃၸိူဝ်းၼၼ်ႉ ၸွမ်းႁပ်ႉဢဝ်ဢေႃးဝႃႇတဢုရုဝေႇလၵသ်သပသေလႄႈသင်၊ ယွၼ်ႉၵုသူဝ်ႇပႃႇရီမီႇႁွမ်တွမ်မႃးလၢႆလၢႆပၢၼ်ၽဝၼၼ်ႉလႄႈသင် ၼႂ်းၶၢဝ်းတၢင်းပွတ်းပွတ်းဢွၼ်ႇၵွႆး လႆႈပဵၼ်ရႁၢၼ်းတႃႇၵႂႃႇယူႇယဝ်ႉ။ ႁဵတ်းၼႆသေ ရႁၢၼ်းတႃႇၶဝ်ႁဵင်းပၢႆသၢမ်ၸဝ်ႈၼႆႉ ဢွၼ်ၵၼ်သွၼ်ႈႁူမ်ႈတမ်ႈတီႈၽြႃးပဵၼ်ၸဝ်ႈသေ လႆႈပဵၼ်ရႁၢၼ်းတႃႇဢၼ်တႄႉတႄႉမၼ်းၵႂႃႇယူႇယဝ်ႉ။

ၽိုၼ်ဢိင် မႄးထတ်း

ၼႃႈလိၵ်ႈ ႕႑၊ ပပ်ႉ - ႁၢင်ႈပိုၼ်းပုတ်ႉထၸဝ်ႈ| တႅမ်ႈ - သြႃႇလူင်ဢူးၵူဝ်ႇဢိင်ႇၵႃႇ (ၽူႈၼႄတြႃးဝိပသ်သၼႃႇလုမ်ႈၾႃႉ)