ပေသဝတီဝိမႃၼဝတ်ထု၊ ၼၢင်းၽီ ဢၼ်လႆႈဢဝ် မွၵ်ႇၽွၵ်းလူႇသႂ် ၶၢပ်ႈတူဝ် ၸဝ်ႈသႃႇရိပုတ်ႉတရႃႇ
7. ပေသဝတီဝိမႃၼဝတ်ထု၊ ၼၢင်းၽီ ဢၼ်လႆႈဢဝ် မွၵ်ႇၽွၵ်းလူႇသႂ် ၶၢပ်ႈတူဝ် ၸဝ်ႈသႃႇရိပုတ်ႉတရႃႇ
မႄးထတ်း- 646။ ၵဝ်လႆႈႁၼ် ႁေႃဝိမၢၼ်ႇ ၶိုၵ်ႉၶႅမ်ႉယႂ်ႇၵႂၢင်ႈလူင် ဢၼ်ဢဝ်ၽၢၼ်ႇၵႅဝ်ႈ ႁဵတ်းၽႃမၼ်း ဢၼ်ဢဝ်ၽႅၼ်ႇယႅင်ႉသၢႆငိုၼ်းသၢႆၶမ်း ႁူမ်ႇၵင်ႈဝႆႉ၊ ဢၼ်မီးႁၢင်ႈၽၢင်လၢၵ်ႇလၢႆး ၵူႈပိူင်ပိူင် ဢၼ်မီးတီႈ ဢွင်ႈပဵင်း ဢၼ်ပဵၼ်တီႈလီမူၼ်ႈသိူဝ်းၸႂ် ဢၼ်ၵုသူဝ်ႇၵၢမ်ႇၽၢၼ်ႇပဵၼ် သဝ်ႁေႃ (ဢၼ်မီးရတၼႃႇ ၵႅဝ်ႈသႅင်ၸဵတ်းပိူင် တႅမ်ထူၼ်ႈဝႆႉ) ဢၼ်ဢဝ်သၢႆးၶမ်း သိူဝ်ႇဝႆႉၼၼ်ႉယဝ်ႉ။
- 647။ မိူၼ်ၼင်ႇ တႃဝၼ်းၼိူဝ်ၵၢင်ႁၢဝ် ဢၼ်ႁိူဝ်ႈႁႅင်းလႅင်းယႂ်ႇ ပႅတ်ႇၼႃႈမိူင်း ဢၼ်မေႃပၢၵ်ႈပႅတ်ႈ ငဝ်းလပ်းသိင်ႇ ၽွင်းမိူဝ်ႈ လိူၼ်သိပ်းသွင်ၼၼ်ႉလႄႈသင်၊ မိူၼ်ၼင်ႇ ၽႆးႁိူဝ်ႈလႅင်း ၽွင်းမိူဝ်ႈၵၢင်ၶမ်ႈ ၼိူဝ်ၵၢင်ႁၢဝ်ၼၼ်ႉလႄႈသင် ႁေႃဝိမၢၼ်ႇမႂ်းၼႆႉ ႁိူဝ်ႈႁႅင်းလႅင်းလီတႄႉယဝ်ႉ။
- 648။ မိူၼ်ၼင်ႇသၢႆၾႃႉမႅပ်ႈၼၼ်ႉလႄႈသင်၊ (ႁိူဝ်ႈႁႅင်းလႅင်းယႂ်ႇ) ပေႃးဢဝ်မၢၵ်ႇတႃၵႅၼ်းလႄႈသင်၊ ႁေႃဝိမၢၼ်ႇ ဢၼ်မီးဝႆႉယူႇၼိူဝ်ၵၢင်ႁၢဝ်ၼႆႉ ႁဵတ်းႁႂ်ႈႁၢၼ်ႉၸႂ်တႄႉယဝ်ႉ။ ႁေႃဝိမၢၼ်ႇမႂ်း ဢၼ်သဵင်တိင်ႇ သဵင်ၵွင် သဵင်သႅင်ႇ သဵင်ႁိင်ႇ သဵင်တူပ်းမိုဝ်း ၵွင်ႈလင်ဝႆႉၼၼ်ႉ မိူၼ်ၼင်ႇ ဝဵင်းၸဝ်ႈၶုၼ်ဢိၼ်းသေ ၸီးၸိမ်ႇၶုၼ်ၽီၼၢင်းၽီၶဝ် တဵမ်ထူၼ်ႈဝႆႉတႄႉယဝ်ႉ။
- 649။ ႁေႃဝိမၢၼ်ႇၼႆႉ မွၵ်ႇမူဝ်ပတုမ်ႇမႃႇ၊ မွၵ်ႇမူဝ်ၵုမုတြႃႇ၊ မွၵ်ႇမူဝ်ၶၢဝ်၊ မွၵ်ႇမူဝ်လႅင်၊ မွၵ်ႇမူဝ်ၵမ်ႇ လႄႈသင်၊ မွၵ်ႇၸုၼ်ႇ၊ မွၵ်ႇၶွင်ႇယၢၼ်း၊ မွၵ်ႇလဵၵ်ႉသူးသူၺ်ႇလႄႈသင်၊ မွၵ်ႇပဝ်း ဢၼ်မွၵ်ႇၵီႈ လွၼ်ႉတင်းတူၼ်ႈၼၼ်ႉလႄႈသင်၊ မွၵ်ႇသေႃႇၵၸိူဝ်းၼၼ်ႉလႄႈသင် ၵီႈမွၵ်ႇဝႆႉယူႇယဝ်ႉ။ ႁေႃဝိမၢၼ်ႇၼႆႉ တူၼ်ႈမႆႉလၢၵ်ႇလၢႆး ၵူႈပိူင်ပိူင် ႁွမ်ႁူၺ်းဝႆႉယူႇယဝ်ႉ။
- 650။ ၼၢင်းၽီဢၼ်မီး ဢလုမ်းဢလၢင်း ၼွင်ၼမ်ႉ ဢၼ်မီးႁိမ်းႁၢင်ႈႁေႃမႂ်းၼၢင်းၼႆႉ ၵိုၵ်းၵၼ် တင်း တူၼ်ႈမႆႉပႅၵ်ႇ တူၼ်ႈမၢၵ်ႇလၢင်း တူၼ်ႈပုၸၵ ၸိူဝ်းၼႆႉသေ ႁွမ်ႁူၺ်းဝႆႉယူႇယဝ်ႉ။ တူၼ်ႈယိူဝ်း မွၵ်ႇၵႆႇတေႃႇ၊ တူၼ်ႈၶိူဝ်းမွၵ်ႇ ၵီႈမွၵ်ႇယွႆႉတွင်ႇတွတ်ႈၸိူဝ်းၼၼ်ႉၵေႃႈ ၵိုၵ်းၵၼ်ဝႆႉယူႇယဝ်ႉ။ ၼမ်ႉဢၼ် ၶဵဝ်ၸမ်ႉမိူၼ် သႅင်ၶဵဝ်ၵေႃႈ မီးဝႆႉယဝ်ႉ။
- 651။ တမ်ႈတီႈ ႁေႃဝိမၢၼ်ႇမႂ်းၼၢင်းၼႆႉ တူၼ်ႈမွၵ်ႇ ဢၼ်ဢွၵ်ႇၼႂ်းၼမ်ႉသေ ၵီႈယူႇၼၼ်ႉ လႄႈသင်၊ တူၼ်ႈမွၵ်ႇ ဢၼ်ဢွၵ်ႇ ၼိူဝ်လိၼ် ၵီႈယူႇၼၼ်ႉလႄႈသင်၊ တူၼ်ႈမႆႉ ဢၼ်မီးတီႈ မိူင်းၵူၼ်း ဢၼ်ဢမ်ႇမီးတီႈမိူင်းၵူၼ်းၼၼ်ႉလႄႈသင်၊ တူၼ်ႈမႆႉဢၼ်မီးတီႈ မိူင်းၽီတင်းသဵင်ႈၼၼ်ႉလႄႈသင် မီးဝႆႉႁိမ်းႁေႃမႂ်း သဵင်ႈသဵင်ႈယဝ်ႉ။
- 652။ ၼၢင်းၽီ ဢၼ်မီးမွႆတႃဢွၼ်ႇ မွင်ႉၵွင်ႈငွင်ႈ ၽွၼ်းလီဢၼ်ၼႆႉ ပဵၼ်ၽွၼ်းလီ ဢၼ်ပႂ်ႉ ထိင်း ဢိၼ်ႇတရေႇ သူပ်းတူဝ်ႁူဝ်ၸႂ်ဢၼ်လႂ်ၼေႃး။ ယွၼ်ႉပိူဝ်ႈ ဢဵၼ်ႁႅင်း တၢင်းၶတ်းၸႂ် ၵၢမ်ႇဢၼ်လႂ်သေ ၸင်ႇတေမႃးပၼ်ပဵၼ် ႁေႃဝိမၢၼ်ႇမႂ်းၼႆႉၼေႃး။ ၵွပ်ႈၵၢမ်ႇဢၼ်ၼၼ်ႉလႄႈ မႂ်းၼၢင်းမႃးလႆႈ ႁေႃဝိမၢၼ်ႇ ဢၼ်ၼႆႉယဝ်ႉ။ ၸွမ်းၼင်ႇ ၵဝ်ထၢမ်ၼၼ်ႉၸိုင် ၵၢမ်ႇဢၼ်ၼၼ်ႉ မႂ်းၶႅၼ်းတေႃႈ တွပ်ႇၼႄၵဝ်မႃး လူး (ၼႆ ၸဝ်ႈဝင်ႇၵီသ ထၢမ်ၵႂႃႇယဝ်ႉ)။
- 653။ ၵွပ်ႈပိူဝ်ႈ ၵုသူဝ်ႇဢၼ်ၼၼ်ႉသေ ၶႃႈၼၢင်းၸင်ႇလႆႈ ႁေႃဝိမၢၼ်ႇ ဢၼ်ၼူၵ်ႉၵွၼ်ႇ၊ ၼူၵ်ႉယုင်း၊ ၼူၵ်ႉၼၢင်းဢီး မိၼ်ၵႂႃႇမိၼ်မႃး၊ ဢၼ်ပဵၼ်တီႈယူႇတၼ်းႁဵင်း ၸိူဝ်းၼူၵ်ႉလုၺ်းၼမ်ႉ ၼူၵ်ႉႁၢင်းသႃႇ၊ ဢၼ်ပဵၼ်တီႈ ၼူၵ်ႉသပိတ်ႈ၊ ၼူၵ်ႉတွင်ႉလေႃး ႁွင်ႉမေႃးၶၼ်ယူႇၼၼ်ႉယဝ်ႉ။
- 654။ ၵွပ်ႈပိူဝ်ႈ ၵုသူဝ်ႇဢၼ်ၼၼ်ႉသေ ၶႃႈၼၢင်းၸင်ႇလႆႈ ႁေႃဝိမၢၼ်ႇ ဢၼ်မီးတူၼ်ႈမႆႉၵေး၊ သပျေႇ၊ သေႃႇၵ ဢၼ်ၵိင်ႇမၼ်း သူၼ်ႈသိၼ်းသၢၼ်ၵၼ်ၼၼ်ႉယဝ်ႉ။ ၸဝ်ႈႁဝ်းတီႈၶႃႈ ၶႃႈၼၢင်းတေလၢတ်ႈၼေ ၵုသူဝ်ႇဢၼ်မႃးပွင်ပၼ် ႁႂ်ႈလႆႈၽွၼ်းလီဢၼ်ၼႆႉယူႇယဝ်ႉ။ ထွမ်ႇဢဝ်ၶႃႈတႃႉ။
- 655။ ၸဝ်ႈႁဝ်းတီႈၶႃႈ တမ်ႈတီႈ ၽၢႆႇဢွၵ်ႇ တိူင်းမၵထၼၼ်ႉ မီးဝႆႉဝၢၼ်ႈဢွၼ်ႇဝၢၼ်ႈၼိုင်ႈ ႁိၵ်ႈၸိုဝ်ႈဝႃႈ ဝၢၼ်ႈၼႃႇလၵယဝ်ႉ။ ၸၢတ်ႈၵွၼ် ၶႃႈၼၢင်းလႆႈပဵၼ် လုၵ်ႈပႂ်ႉ(ၽူႈမၢၵ်ႈ) တီႈဝၢၼ်ႈၼၼ်ႉယဝ်ႉ။ ၵူၼ်းတီႈဝၢၼ်ႈၼၼ်ႉ ဢွၼ်ၵၼ်ႁူႉၸိုဝ်ႈၶႃႈၼၢင်းဝႃႈ ပေသဝတီႇၼႆယဝ်ႉ။
- 656။ ၶႃႈၼၢင်း မီးၸႂ်ႁူမ်ၸူမ်း လႆႈဢဝ်မွၵ်ႇၽွၵ်းပိုၼ်သေ ပူႇၸေႃႇပၼ် ၸဝ်ႈသႃႇရိပုတ်ႉတရႃႇ ဢၼ်ႁိၵ်ႈၸိုဝ်ႈဝႃႈ ဢုပတိတ်ႉသ ဢၼ်မေႃၼပ်ႉယမ်မုၼ်ၶမ်းၽြႃး ၸဝ်ႈၽူႈႁူႉႁၼ် လူင်ႉလႅၼ်ႇႁဵတ်ႇၽူၼ်၊ ဢၼ်ပဵၼ်တီႈ ၽီသၢင်တင်းသဵင်ႈ ပူႇၸေႃႇမူးၸႃး၊ ဢၼ်မီးၵုင်ႇၵုၼ်းမုၼ်ငဝ်းယႂ်ႇ၊ ဢၼ်မီးၵုင်ႇ ဢမ်ႇတႅၵ်ႈလႆႈ၊ ဢၼ်ၶဝ်ႈၸၢမ်ႇ ပရိၼိပ်ႉပၢၼ်ႇၵႂႃႇၼၼ်ႉယဝ်ႉ။
- 657။ ၸဝ်ႈႁဝ်းတီႈၶႃႈ ၵွပ်ႈပိူဝ်ႈ လႆႈပူႇၸေႃႇ ၸဝ်ႈရႁၢၼ်း ဢၼ်ယေႃးၶိင်းၵႂႃႇတီႈ ဢၼု ပႃႇသိသေသၼိပ်ႉပၢၼ်ႇထွတ်ႈမျၢတ်ႈ၊ ဢၼ်ႁၢမ်ႁၢပ်ႇၶၼ်ႇထႃႇ ၵမ်းလိုၼ်းသုတ်း၊ ဢၼ်လီလွၼ်ႇမုၼ်း လႅင်းၼၼ်ႉလႄႈ ပေႃးဝႃႈ ၶႃႈၼၢင်း ၸုၼ်ႉၶၼ်ႇထႃႇၵူၼ်းယဝ်ႉၵေႃႈ လႆႈမႃးပဵၼ်ၽဝႃႉၽီ တမ်ႈတီႈ မိူင်းတႃႇဝတိမ်ႇသႃႇသေ လႆႈမႃးၵွၼ်းၸိုင်ႈ ႁေႃဝိမၢၼ်ႇ တမ်ႈတီႈ မိူင်းၽီၼႆႉယဝ်ႉ။
ပေသဝတီဝိမႃၼဝတ်ထု ႁူဝ်ၸဵတ်း သုတ်းယဝ်ႉ။
ၽိုၼ်ဢိင်
မႄးထတ်း- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ၵုတ်တိလဝိမႃၼ၊ ပေသဝတီဝိမႃၼဝတ်ထု၊